«Фӕнды» дӕ иннӕтӕн ӕххуыс кӕнын?
1 Йесо адӕмыл ӕцӕгӕй тыхстис. Хъотырджын лӕг ын куы балӕгъстӕ кодта, цӕмӕй йӕ сдзӕбӕх кодтаид, уӕд ӕм Йесо йӕ къух бадардта, андзӕвыд ыл ӕмӕ йын загъта: «Фӕнды Мӕ, ссыгъдӕг у» (Маркы 1:40—42). Куыд у нӕ бон Йесойау иннӕтӕн ӕххуыс кӕнын?
2 Цымыдисгӕнаг адӕмӕн ӕххуысгӕнгӕйӕ. Ӕмбырды уӕнгтӕй алчидӕр архайы, цӕмӕй цымыдисгӕнаг адӕм Иегъовӕйӕн лӕггад кӕнын райдайой. Ӕмбырды фембӕлдмӕ ног адӕм куы ӕрбацӕуа, уӕд сын салам радт ӕмӕ семӕ базонгӕ у. Ӕххуыс сын кӕн. Зӕгъӕм, дзуапп куы радтой, уӕд сын уый фӕстӕ раарфӕ кӕн. Раппӕл сӕ, Библийы уагӕвӕрдтӕй сӕ царды кӕй пайда кӕнынц, уый тыххӕй. Баххуыс сын кӕн, цӕмӕй ӕмбырды сӕхицӕн ӕцӕг хӕлӕрттӕ ссарой.
3 Ӕмчырыстӕттӕн ӕххуысгӕнгӕйӕ. Сӕйраджыдӕр хъуамӕ ӕххуыс кӕнӕм «уырнындзинады иу кӕимӕ стӕм», уыдонӕн (Гал. 6:10). Бирӕтӕ тыхсынц сӕ низтӕй. Рынчынфӕрсӕг сӕм куы бацӕуай, уӕд сын удыбӕстӕ скӕндзынӕ ӕмӕ ма сын, гӕнӕн ис, исты куыстытӕ дӕр бакӕнай. Иуӕй-иутӕ та, чи зоны, ӕмбӕлынц ӕндӕр зындзинӕдтыл. Куы сӕм байхъусай ӕмӕ сын ныфсытӕ куы бавӕрай, уӕд бӕрӕг уыдзӕн кӕй сыл тыхсыс, уый (1 Фес. 5:14). Хистӕр нӕлгоймӕгтимӕ дӕр хъӕуы ӕмгуыст кӕнын, цӕмӕй сын ӕнцондӕр уа сӕ хӕстӕ ӕххӕст кӕнын (Дзут. 13:17). Не ’мчырыстӕтты зӕрдӕтӕ рухс кӕндзыстӕм, ӕнӕзивӕгӕй сын куы ӕххуыс кӕнӕм, уӕд (Кол. 4:11, НФ).
4 Бинонтӕн ӕххуысгӕнгӕйӕ. Йесо адӕмыл куыд тыхстис, мах дӕр хъуамӕ афтӕ тыхсӕм нӕ бинонтыл. Ныййарджытӕ сӕ сывӕллӕтты тынг бирӕ кӕй уарзынц, уымӕ гӕсгӕ сӕ «хъомыл кӕнынц... Хуыцауы ахуырыл ӕмӕ амындыл» (Еф. 6:4, НФ). Хорз уаид, сывӕллӕттӕ дӕр-иу афойнадыл сӕхи куы бацӕттӕ кӕниккой, цӕмӕй бинонтимӕ иумӕ Библи ахуыр кӕной, семӕ ӕмбырдтӕм кӕнӕ та хъусын кӕнынмӕ цӕуой. Чи бахъомыл, уыцы сывӕллӕттӕ Йесойы фӕзмдзысты, сӕ ныййарджытӕ сӕ кармӕ гӕсгӕ цы зындзинӕдтыл ӕмбӕлынц, уыдон фӕразынӕн сын зӕрдӕбынӕй куы ӕххуыс кӕной, уӕд. Ацы хъуыддаджы дӕр ӕмӕ ӕндӕр хъуыддӕгты дӕр, нӕ бон у архайын, цӕмӕй «нӕ бинонты ’хсӕн Хуыцауы ӕфсарм уа» (1 Тим. 5:4, НД).
5 Йесойау мах дӕр иннӕтӕн куы ӕххуыс кӕнӕм, уӕд сын сӕ уаргъ фӕрогдӕр кӕндзыстӕм ӕмӕ нӕ бинонты ӕмӕ ӕмбырды уӕнгты кӕрӕдзимӕ фенгомдӕр кӕндзыстӕм. Ӕппӕты ахсджиагдӕр та уый у, ӕмӕ уымӕй кад кӕндзыстӕм Иегъовӕйӕн, «хӕларзӕрдӕ Фыдӕн» (2 Кор. 1:3).