«Царды фӕндагыл цӕуын кӕй фӕнды», уыдонӕн ӕххуыс кӕн

1. Адӕм хорз хабармӕ цы цӕстӕй ракӕсынц? (Хъуыддӕгтӕ 13:47, 48; 16:14, 15).

ФЫЦЦАГ ӕнусы бирӕтӕ рӕстдзинад сӕ зӕрдӕмӕ айстой, хорз хабар куыддӕр фехъуыстой, афтӕ. (Бакӕс Хъуыддӕгтӕ 13:47, 48; 16:14, 15.) Ӕмӕ абон дӕр иуӕй-иутӕ хорз хабар сӕ зӕрдӕмӕ уайтагъд айсынц. Фыццаг чи нӕ байхъусы, суанг уыдонӕй дӕр кӕйдӕрты фӕстӕдӕр бафӕнды фылдӕр базонын ӕмӕ Хуыцауӕн лӕггад кӕнын. Уӕдӕ, «ӕнусон царды фӕндагыл цӕуын кӕй фӕнды», ахӕм адӕймагыл-иу куы сӕмбӕлӕм, уӕд-иу куыд хъуамӕ бакӕнӕм?

2. Ахуыргӕнинӕгтӕ цӕттӕ кӕныны хъуыддаг цӕхӕрадоны куыстимӕ цӕмӕн ис абарӕн?

² Ахуыргӕнинӕгтӕ цӕттӕ кӕныны хъуыддаг абарӕн ис цӕхӕрадоны куыстимӕ. Иуӕй-иу дыргътӕ кӕнӕ халсартӕ иннӕтӕй раздӕр сцӕттӕ вӕййынц, ӕмӕ сӕ фӕхъӕуы уайтагъд ӕрӕмбырд кӕнын. Иннӕтыл та ма фӕхъӕуы дон кӕнын ӕмӕ сӕм зилын, цалынмӕ не сцӕттӕ уой, уӕдмӕ. Ӕмӕ афтӕ мах дӕр: хорз хабармӕ хъусын кӕй фӕнды, ахӕм адӕймагыл куы сӕмбӕлӕм, уӕд нӕ фӕфӕнды, цӕмӕй йын баххуыс кӕнӕм, ӕмӕ Йесойы ахуыргӕнинаг, гӕнӕн уӕвгӕйӕ, тагъддӕр суа. Цӕттӕ чи нӕма у, уыдонӕн та феххуыс кӕнӕм, цӕмӕй бамбарой, цы сын дзурӕм, уый куыд ахсджиаг у, уый (Иоан. 4:35, 36). Адӕймаг цӕттӕ у ӕви нӕ, уый куы ’мбарӕм, уӕд зондзыстӕм, хуыздӕр ын куыд уаид баххуыс кӕнын. Ацы статьяйы аныхас кӕндзыстӕм, цы ис саразӕн, фыццаг хатт кӕимӕ ныхас кӕнӕм, ахӕм адӕймаджы фылдӕр базонын куы фӕнда, уӕд. Стӕй ма аныхас кӕндзыстӕм, нӕ бон ын куыд у ӕххуыс кӕнын, цӕмӕй Йегъовӕмӕ баввахс уа ӕмӕ йӕ лӕггадгӕнӕг суа.

АДӔЙМАГ ХОРЗ ХАБАР ЙӔ ЗӔРДӔМӔ АЙСЫНМӔ ЦӔТТӔ КУЫ УА

3. Адӕймаг хорз хабармӕ куы байхъусы, уӕд-иу куыд хъуамӕ бакӕнӕм? (1 Коринфӕгтӕм 9:26).

³ Хорз хабармӕ чи байхъусы, ахӕм адӕймагыл куы сӕмбӕлӕм, уӕд нӕ фӕфӕнды, цӕмӕй йын тагъддӕр баххуыс кӕнӕм цардмӕ кӕнӕг фӕндагыл слӕууынӕн. Уымӕ гӕсгӕ ӕфсӕрмы кӕнын нӕ хъӕуы адӕймагӕн Библийы ахуыры тыххӕй зӕгъын ӕмӕ йӕ ӕмбырдмӕ фӕхонын, кӕд йемӕ фыццаг хатт ныхас кӕнӕм, уӕддӕр. (Бакӕс 1 Коринфӕгтӕм 9:26.)

4. Уайтагъд Библи ахуыр кӕныныл чи сразы, ахӕм искӕй хабар радзур.

⁴ Библийы ахуыры тыххӕй йын зӕгъ. Кӕимӕ фӕныхас кӕнӕм, уыдонӕй иуӕй-иуты уайтагъд бафӕнды Библи ахуыр кӕнын. Иу ахӕм хабар ӕрцыд Канадӕйы. Иу ӕрыгон чызг бацыд, стендимӕ чи хъусын кодта, уыдонмӕ ӕмӕ райста брошюрӕ «Амондджынӕй цӕр ӕнустӕм!». Стенды фарсмӕ цы хо лӕууыд, уый йын загъта, Йегъовӕйы Ӕвдисӕнтӕн сӕ бон кӕй у йемӕ Библи лӕвар ахуыр кӕнын. Уый чызджы зӕрдӕмӕ фӕцыд, ӕмӕ сӕ кӕрӕдзийӕн сӕ телефоны номыртӕ радтой. Уый уыди цыппӕрӕмы. Уыцы бон фӕстӕдӕр чызг нӕ хомӕ ныффыста, Библи ахуыр кӕнынмӕ мӕм кӕд ӕрбацӕудзыстут, зӕгъгӕ. Хо йӕм ныффыста, сабаты кӕнӕ йӕм хуыцаубоны кӕй ӕрбацӕудзӕн. Ӕмӕ уӕд чызг афтӕ: «Ӕмӕ райсом цы кӕны? Райсом мӕ ’вдӕлы». Афтӕ майрӕмбоны Библи ахуыр кӕнын райдыдта, хуыцаубоны та ацыд ӕмбырдмӕ. Цыбыр рӕстӕгмӕ чызг Йегъовӕмӕ тынг баввахс.

5. Адӕймаг Библи ахуыр кӕнынмӕ цӕттӕ кӕй нӕма у, уый куы бамбарӕм, уӕд куыд хъуамӕ бакӕнӕм? (Кӕс нывтӕм дӕр.)

⁵ Кӕй зӕгъын ӕй хъӕуы, иууылдӕр уыцы чызджы хуызӕн не сты ӕмӕ уайтагъд Библи ахуыр кӕнын нӕ райдайдзысты. Кӕйдӕрты фылдӕр рӕстӕг фӕхъӕуы. Кӕд адӕймаг Библи ахуыр кӕнынмӕ цӕттӕ нӕма у, уӕд нӕ бон у йемӕ аныхас кӕнын, чи йӕ цымыдис кӕны, уыцы фарстайыл. Кӕй йыл тыхсӕм, уый куы уына, уӕд ӕй, чи зоны, фӕстӕдӕр Библи ахуыр кӕнын бафӕнда. Адӕймагӕн Библи ахуыр кӕныны тыххӕй куыд ис зӕгъӕн? Уымӕй бафарстам, Библийы ахуыр райдайынмӕ хорз чи арӕхсы, ахӕм хоты ӕмӕ ’фсымӕрты.

6. Адӕймагӕн нӕ бон цы у зӕгъын, цӕмӕй ма йӕ иннӕ хатт дӕр немӕ аныхас кӕнын бафӕнда?

⁶ Иуӕй-иу хотӕ ӕмӕ ӕфсымӕртӕ зӕгъынц, кӕцыдӕр бӕстӕты адӕм ахӕм ныхӕстӕ кӕй нӕ уарзынц, зӕгъӕм, «ахуыр кӕнын», «уроктӕ». Фӕлӕ сын семӕ аныхас кӕнын хуыздӕр рауайы, куы фӕпайда кӕнынц ахӕм ныхӕстӕй, зӕгъӕм, «Библийыл ныхас кӕнын» кӕнӕ «Библи хуыздӕр базонын». Цӕмӕй адӕймаджы иннӕ хатт дӕр демӕ аныхас кӕнын бафӕнда, уый тыххӕй йын дӕ бон у зӕгъын: «Царды ахсджиагдӕр фарстатӕн Библийы дзуапп кӕй ис, уый зыдтай?» Кӕнӕ: «Библийы ӕрмӕст Хуыцауы тыххӕй нӕй фыст. Уым ма ис бирӕ хорз уынаффӕтӕ дӕр». Стӕй дӕ ныхас адарддӕр кӕн: «10–15 минутмӕ дӕ бон у базонын, царды дын стыр ӕххуыс цы фӕуыдзӕн, ахӕм исты». Ӕнӕмӕнг нӕу зӕгъын, алы къуыри дӕр-иу фембӕлдзыстӕм, зӕгъгӕ, кӕннод ӕм афтӕ фӕкӕсдзӕн, цыма йыл хӕс ӕвӕрыс.

7. Иуӕй-иутӕ кӕд бамбӕрстой, рӕстдзинад кӕй ссардтой, уый? (1 Коринфӕгтӕм 14:23–25).

⁷ Ӕмбырдмӕ йӕ фӕхон. Ӕвӕццӕгӕн, ӕмӕ апостол Павелы рӕстӕджы иуӕй-иутӕ, рӕстдзинад кӕй ссардтой, уый бамбӕрстой, фыццаг хатт ӕмбырдмӕ куы ’рбацыдысты, уӕд. (Бакӕс 1 Коринфӕгтӕм 14:23–25.) Ӕмӕ абон дӕр афтӕ арӕх вӕййы. Библи чи ахуыр кӕны, уыдон ӕмбырдтӕм цӕуын куы райдайынц, уӕд сӕ уырнындзинад тагъддӕр райдайы фидар кӕнын. Фӕлӕ-иу сӕ ӕмбырдмӕ кӕд хъуамӕ фӕхонӕм? Чиныджы «Амондджынӕй цӕр ӕнустӕм!» ӕмбырдтӕм цӕуыныл дзырд цӕуы 10 урочы. Фӕлӕ ӕнхъӕлмӕ кӕсын нӕ хъӕуы, цалынмӕ уыцы урокмӕ нӕ бахӕццӕ уат, уӕдмӕ. Адӕймагимӕ фыццаг хатт куы ныхас кӕнӕм, уӕд дӕр ӕй нӕ бон у фӕхонын, сабаты кӕнӕ нын хуыцаубоны цы фембӕлд вӕййы, уымӕ. Нӕ бон ын у зӕгъын ӕргом раныхасы ном кӕнӕ, «Хъахъхъӕнӕн мӕсыджы» ахуыры цавӕр статья ӕвзардзыстӕм, уый.

8. Ӕмбырдмӕ фыццаг хатт кӕй хонӕм, уымӕн не ’мбырдты тыххӕй нӕ бон цы уаид радзурын? (Исай 54:13).

⁸ Адӕймаг, чи зоны, аргъуанмӕ цӕуы. Ӕмӕ йӕ ӕмбырдмӕ куы фӕхонай, уӕд ын бамбарын кӕн, аргъуаны куыд вӕййы, махмӕ афтӕ кӕй нӕу. Иу сылгоймаг «Хъахъхъӕнӕн мӕсыджы» ахуырмӕ фыццаг хатт куы ’рбацыд, уӕд, йемӕ Библи чи ахуыр кодта, уыцы хойы бафарста: «Фембӕлд чи уадзы, уый алкӕй ном дӕр зоны, ӕви?» Хо йын бамбарын кодта, ӕмбырд нын хи бинонты хуызӕн кӕй у ӕмӕ уымӕ гӕсгӕ кӕй архайӕм, цӕмӕй дзы алкӕй дӕр хорз базонӕм. Сылгоймаг загъта, сӕ аргъуаны адӕмӕн сӕ фылдӕр кӕрӕдзийы нӕмттӕ кӕй нӕ зонынц. Нӕ бон ма у адӕймагӕн бамбарын кӕнын, не ’мбырдтӕн сӕ нысан цы у, уый. (Бакӕс Исайы 54:13.) Мах ӕрӕмбырд вӕййӕм, цӕмӕй Йегъовӕйӕн лӕггад кӕнӕм, йӕ зондамындтӕм ын хъусӕм ӕмӕ кӕрӕдзийы ныфсыл ныфс ӕфтауӕм (Дзут. 2:12; 10:24, 25). Уымӕ гӕсгӕ не ’мбырдтӕм цавӕрдӕр ӕгъдӕуттӕ ӕххӕст кӕнынмӕ нӕ цӕуӕм, фӕлӕ цӕмӕй ахуыр кӕнӕм, пайда нын цы у, ууыл. Уымӕй уӕлдай, не ’мбырдты ис уаг ӕмӕ ӕгъдау (1 Кор. 14:40). Нӕ залтӕ сты хуымӕтӕг ӕмӕ райдзаст, ӕмӕ нын дзы ахуыр кӕнын ӕнцон у. Мах уым иу политикон партийы сӕрыл дӕр нӕ фӕдзурӕм, уымӕн ӕмӕ нын политикӕимӕ иумӕйагӕй ницы ис. Стӕй дзы быцӕутӕ дӕр нӕ фӕкӕнӕм. Ӕмбырдмӕ кӕй фӕхонӕм, уымӕн рагацау ис равдисӕн видеоролик «Паддзахады залы цы вӕййы?», цӕмӕй зона, ӕмбырды цы уыдзӕн, уый.

9, 10. Цы ис зӕгъӕн, ӕмбырдмӕ ӕрбацӕуынмӕ йӕ ныфс чи нӕ хӕссы, ахӕм адӕймагӕн? (Кӕс нывмӕ дӕр.)

⁹ Иуӕй-иутӕ ӕмбырдмӕ ӕрбацӕуынмӕ сӕ ныфс нӕ фӕхӕссынц, уымӕн ӕмӕ фӕтӕрсынц, куы сын зӕгъой, зӕгъгӕ, Йегъовӕйы Ӕвдисӕн су. Ахӕм адӕймагӕн ис зӕгъӕн, алкӕй ӕрбацыд дӕр нын ӕхсызгон кӕй вӕййы ӕмӕ йӕ бон кӕй уыдзӕн программӕмӕ ӕнӕуи хъусын – дзурын кӕнӕ йӕ аразын ницы хъӕудзӕн. Ӕмбырдтӕм цӕуӕн ис ӕнӕхъӕн бинонтӕй дӕр, суанг гыццыл сывӕллӕттимӕ дӕр. Сывӕллӕттӕн нӕм хицӕн программӕ нӕй – ныййарджытӕ ӕмӕ сывӕллӕттӕ фӕбадынц иумӕ ӕмӕ фӕахуыр кӕнынц иу программӕмӕ гӕсгӕ. Уымӕ гӕсгӕ ныййарджытӕн сӕ сывӕллӕттӕм сӕ зӕрдӕ нӕ фехсайы ӕмӕ фӕзонынц, цӕуыл сӕ ахуыр кӕнынц, уый (Дык. з. 31:12). Стӕй нӕ фембӕлдты ӕхца дӕр нӕ фембырд кӕнӕм, уымӕн ӕмӕ Йесо загъта: «Лӕвар райстат – лӕвар дӕттут» (Матф. 10:8). Адӕймагӕн ма зӕгъӕн ис, ӕнӕмӕнг кӕй нӕу, цӕмӕй ӕмбырдмӕ хъӕздыг кондӕй ӕрбацӕуа. Хуыцау зӕрдӕтӕм кӕсы, не ’ддаг бакастмӕ нӕ, фӕлӕ (1 Сам. 16:7).

¹⁰ Адӕймаг ӕмбырдмӕ куы ’рбацӕуа, уӕд-иу бацархай, цӕмӕй фена, йе ’рбацыд хотӕ ӕмӕ ’фсымӕртӕн ӕхсызгон кӕй у. Базонгӕ йӕ кӕн хистӕр нӕлгоймӕгтӕй ӕмӕ хотӕ ӕмӕ ’фсымӕртӕй искӕйтимӕ. Куы фена, ӕмӕ йыл хионау бацин кодтой, уӕд та йӕ, чи зоны, ногӕй ӕрбацӕуын бафӕнда. Ӕмбырды рӕстӕджы йын дӕ бон у ӕвдисын стихтӕ Библийы ӕмӕ, цы ӕрмӕг ахуыр кӕнӕм, уый. Афтӕмӕй йын ӕнцондӕр уыдзӕн программӕмӕ хъусын.

АДӔЙМАГ БИБЛИ АХУЫР КӔНЫН КУЫ РАЙДАЙА

11. Нӕ бон куыд у равдисын, Библи кӕимӕ ахуыр кӕнӕм, уымӕн йӕ рӕстӕгӕн кӕй аргъ кӕнӕм?

¹¹ Искӕимӕ Библи куы ахуыр кӕнай, уӕд дӕ зӕрдыл цы хъуамӕ дарай? Йӕ рӕстӕгӕн ын аргъ кӕн ӕмӕ йын цыдӕр хъуыддӕгтӕ кӕй вӕййы, уый ма рох кӕн. Зӕгъӕм, цы рӕстӕгмӕ баныхас кодтат, уыцы рӕстӕг-иу ӕм бацу, кӕд, кӕм цӕрут, уым ӕрӕджы кӕнын диссаг никӕмӕ кӕсы, уӕддӕр. Хорз ма уаид, фыццаг урок-иу ӕгӕр куы нӕ ныддаргъ кӕниккам. Фӕлтӕрдджын хъусынгӕнджытӕй чидӕртӕ зӕгъынц, хуыздӕр кӕй вӕййы ахуыр афоныл фӕуын, адӕймагмӕ ма исты фарстатӕ куы уа, уӕддӕр. Стӕй-иу хъуамӕ нӕхӕдӕг ӕгӕр бирӕ ма дзурӕм, фӕлӕ, кӕимӕ ахуыр кӕнӕм, уый-иу дзурын уадзӕм (Ӕмб. 10:19).

12. Искӕимӕ Библи ахуыр кӕнын куы райдайӕм, уӕд нӕ нысан цы хъуамӕ уа?

¹² Искӕимӕ Библи ахуыр кӕнын куы райдайӕм, уӕд нӕ нысан хъуамӕ уа, цӕмӕй адӕймаг Йегъовӕйы ӕмӕ Йесойы базона ӕмӕ сӕ бауарза. Уый тыххӕй йын хъуамӕ йе ’ргом нӕхимӕ ӕмӕ, нӕхӕдӕг цас зонӕм, уымӕ ма здахӕм, фӕлӕ Хуыцауы Ныхасмӕ (Хъуыд. 10:25, 26). Уымӕй нын фӕзминаг у апостол Павел. Иннӕты ахуыр кӕнгӕйӕ-иу Павел арӕх кодта Йесо Чырыстийы кой. Уый ӕрцыд зӕхмӕ, цӕмӕй нын баххуыс кодтаид Йегъовӕйы базонынӕн ӕмӕ йӕ бауарзынӕн (1 Кор. 2:1, 2). Павел ма дзырдта, тынг ахсджиаг кӕй у ног ахуыргӕнинӕгтӕн ӕххуыс кӕнын, цӕмӕй сӕ удыхъӕды фидар кӕной, сызгъӕрин, ӕвзист ӕмӕ зынаргъ дуртимӕ абарӕн кӕй ис, уыцы миниуджытӕ (1 Кор. 3:11–15). Уыдонмӕ хауынц уырнындзинад, зонд, арфуынындзинад ӕмӕ Йегъовӕйӕ тӕрсын (Пс. 19:9, 10; Ӕмб. 3:13–15; 1 Пет. 1:7). Ахуыргӕнинӕгтӕ цӕттӕ кӕнгӕйӕ нӕ бон у Павелы фӕзмын: ӕххуыс сын кӕнын сӕ уырнындзинад фидар кӕнынӕн ӕмӕ нӕ уарзӕгой уӕларвон Фыдмӕ ӕввахсдӕр кӕнынӕн (2 Кор. 1:24).

13. Искӕимӕ Библи ахуыр кӕнгӕйӕ нӕ бон куыд у фӕразондзинад ӕмӕ ӕмбаргӕдзинад ӕвдисын? (2 Коринфӕгтӕм 10:4, 5). (Кӕс нывмӕ дӕр.)

¹³ Адӕймагимӕ Библи ахуыр кӕнгӕйӕ Йесойау у фӕразон ӕмӕ ӕмбаргӕ. Ахӕм фарстатӕ йӕм ма дӕтт, цӕмӕй фӕтыхса кӕнӕ фефсӕрмы уа. Кӕд ын цыдӕр зын бамбарӕн у, уӕд ыл ӕгӕр бирӕ дзурын нӕ хъӕуы. Фӕлтау уал дарддӕр ацӕут ӕмӕ уыцы фарстамӕ фӕстӕдӕр раздӕхут. Исты ахуырад йӕ зӕрдӕмӕ айсынмӕ цӕттӕ куы нӕма уа, уӕд-иу ма архай, цӕмӕй цыфӕндыйӕ дӕр уыцы ахуырадимӕ сразы уа. Рӕстӕг-иу ын ратт, цӕмӕй йыл ахъуыды кӕна ӕмӕ йӕ зондахаст аива (Иоан. 16:12; Кол. 2:6, 7). Библи мӕнг ахуырӕдтӕ бары, басӕттын кӕй хъӕуы, ахӕм фидӕрттимӕ. (Бакӕс 2 Коринфӕгтӕм 10:4, 5; кӕс комментари 2 Коринфӕгтӕм 10:4 стихмӕ, «Ахуыргӕнӕн Библи», уырыс.) Ахуыргӕнинагӕн, чи зоны, ӕнцон нӕу, бирӕ рӕстӕг цӕуыл ӕууӕндыд, уыдӕттыл йӕ къух сисын. Уымӕ гӕсгӕ уал-иу ын хъуамӕ баххуыс кӕнӕм ног «фидар», кӕнӕ мӕсыг, саразынӕн – сахуыр ӕй кӕнӕм йӕ ныфс Йегъовӕйыл дарын. Ӕмӕ уӕд Йегъовӕ суыдзӕн «[йе] ’мбӕхсӕн» (Пс. 91:9).

АДӔЙМАГ ӔМБЫРДТӔМ КУЫ ФӔЦӔУЫ

14. Не ’мбырдтӕм чи ’рбацӕуы, уыдонмӕ-иу цы цӕстӕй хъуамӕ ракӕсӕм?

¹⁴ Йегъовӕйы фӕнды, цӕмӕй макӕй хъулон кӕнӕм, уӕлдай нӕу, адӕймаг кӕцӕй у, цавӕр ӕгъдӕуттыл хӕст у кӕнӕ хъӕздыг у ӕви мӕгуыр (Иак. 2:1–4, 9). Уӕдӕ нӕм ӕмбырдмӕ чи ’рбацӕуы, уыдонмӕ нӕ бон куыд у уарзондзинад равдисын?

15, 16. Ӕмбырдмӕ нӕм чи ’рбацӕуы, уыдонӕн нӕ бон куыд у ӕххуыс кӕнын, цӕмӕй ӕмбырды сӕ зӕрдӕмӕ фӕцӕуа?

¹⁵ Чидӕр ӕмбырдмӕ ӕрбацӕуы, цӕмӕй фена, цы дзы вӕййы, уый. Кӕмӕндӕр та ӕмбырдмӕ бацӕуыны тыххӕй, гӕнӕн ис, загъта, ӕндӕр ран чи цӕры, ахӕм исчи. Уӕдӕ-иу ӕмбырды ног искӕй куы фенай, уӕд-иу ын салам ратт ӕмӕ-иу йемӕ аныхас кӕн. Бацин-иу ыл кӕн, фӕлӕ-иу ӕй ма стыхсын кӕн. Зӕгъ-иу ын, кӕд ӕй фӕнды, уӕд цӕмӕй дӕ фарсмӕ сбада. Ӕмбырды рӕстӕг-иу ын ӕвдис стихтӕ дӕ Библийы ӕмӕ, цы ӕрмӕг ахуыр кӕнӕм, уый. Кӕнӕ та йын Библи ӕмӕ ахуыргӕнӕн публикаци ратт, цӕмӕй йӕхимӕ дӕр уой. Стӕй-ма ахъуыды кӕн, цы ма уаид дӕ бон саразын, цӕмӕй ӕмбырды йӕ зӕрдӕмӕ фӕцӕуа. Иухатт ӕфсымӕр бацыд, Паддзахады залмӕ фыццаг хатт чи ’рбацыд, иу ахӕм нӕлгоймагмӕ ӕмӕ йын салам радта. Уый ын загъта, тынг кӕй тыхсы, иннӕтау аив конд кӕй нӕу, уый тыххӕй. Ӕфсымӕр ӕй ӕрсабыр кодта ӕмӕ йын загъта, Йегъовӕйы Ӕвдисӕнтӕ хуымӕтӕг адӕм кӕй сты. Фӕстӕдӕр нӕлгоймаг донаргъуыд райста. Ӕмӕ абоны онг дӕр нӕ рох кӕны, уыцы ’фсымӕр куыд хӕларзӕрдӕ уыд, уый. Кӕй зӕгъын ӕй хъӕуы, мах фӕнды, цӕмӕй хӕларзӕрдӕ уӕм. Фӕлӕ хъуамӕ нӕ зӕрдыл дарӕм: уазджытимӕ куы фӕныхас кӕнӕм, уӕд-иу сӕм ахӕм фарстатӕ ма дӕттӕм, цӕмӕй фефсӕрмы уой, ӕмӕ-иу сӕ сӕ цардӕй хынцфарст ма кӕнӕм (1 Пет. 4:15).

¹⁶ Цӕмӕй адӕймагӕн ӕмбырды йӕ зӕрдӕмӕ фӕцӕуа, уый тыххӕй ма нӕ бон ноджыдӕр цы у аразын? Зӕгъӕм, ныхас кӕнгӕйӕ, дзуапп дӕтгӕйӕ кӕнӕ нӕ хӕслӕвӕрдтӕ дзургӕйӕ, Йегъовӕйы Ӕвдисӕнтӕ чи не сты, уыдоны тыххӕй ӕмӕ, цӕуыл ӕууӕндынц, уый тыххӕй афтӕ дзурӕм, цӕмӕй бӕрӕг уа, кӕй сӕ нымайӕм. Ахӕмӕй ницы дзурдзыстӕм, цӕмӕй сӕм хъыг фӕкӕса кӕнӕ сӕ иннӕ хатт ӕрбацӕуын мауал бафӕнда (Тит. 2:8; 3:2). Зӕгъӕм, сӕ дин сын нӕ фаудзыстӕм (2 Кор. 6:3). Уӕлдай лӕмбынӕг хъуамӕ уой, раныхӕстӕ кӕмӕн вӕййы, уыцы ӕфсымӕртӕ. Йегъовӕйы Ӕвдисӕн чи нӕу, уыдоныл кӕй хъуыды кӕнынц, уый ма цӕмӕй уыдзӕн бӕрӕг? Ахӕм адӕмӕн зонгӕ чи нӕу, ахӕм ныхӕстӕ ӕмӕ-иу хабӕрттӕ куы бамбарын кӕной, уымӕй.

17. «Ӕнусон царды фӕндагыл цӕуын кӕй фӕнды», ахӕм адӕймагыл куы сӕмбӕлӕм, уӕд нӕ нысан цы вӕййы?

¹⁷ Ахуыргӕнинӕгтӕ цӕттӕ кӕныны хъуыддаг кӕны бонӕй-бон ахсджиагдӕр. Уымӕ гӕсгӕ дарддӕр дӕр агурдзыстӕм, «ӕнусон царды фӕндагыл цӕуын кӕй фӕнды», ахӕм адӕмы (Хъуыд. 13:48). Ӕмӕ ахӕм адӕймаг куы ссарӕм, уӕд-иу ын цӕй ӕмӕ Библийы ахуыры тыххӕй зӕгъӕм ӕмӕ йӕ ӕмбырдмӕ фӕхонӕм. Афтӕмӕй йын нӕ бон уыдзӕн баххуыс кӕнын, «цардмӕ цы фӕндаг кӕны», ууыл слӕууынӕн (Матф. 7:14).