Алкӕмӕн дӕр кад кӕнут

1. Адӕймагӕн иннӕтӕ куы фӕкад кӕнынц, уӕд ын уый ӕхсызгон цӕмӕн вӕййы? (Ӕмбисӕндтӕ 22:1).

ӔХСЫЗГОН дын нӕ вӕййы, иннӕтӕ дын куы фӕкад кӕнынц, уӕд? Уый алкӕмӕн дӕр вӕййы ӕхсызгон. Адӕймаг афтӕ конд у, ӕмӕ йӕ фӕнды, цӕмӕй йын иннӕтӕ кад кӕной. Афтӕмӕй амондджындӕр вӕййы. Библийы дӕр уымӕн ис афтӕ фыст: «Кад дын уа, уый хуыздӕр у ӕвзист ӕмӕ сызгъӕринӕй». (Бакӕс Ӕмбисӕндтӕ 22:1.)

2, 3. Иннӕтӕн кад кӕнын алы хатт ӕнцон цӕуылнӕ вӕййы ӕмӕ кӕмӕн хъуамӕ кад кӕнӕм?

² Иннӕтӕн кад кӕнын, кӕнӕ сӕ нымайын, алы хатт ӕнцон нӕ вӕййы. Цӕуылнӕ? Иу уый, ӕмӕ сын сӕ хъӕндзинӕдтӕ фӕуынӕм. Стӕй ахӕм рӕстӕджы цӕрӕм, ӕмӕ адӕм кӕрӕдзийы ницӕмӕ дарынц, кӕрӕдзийӕн нӕ кад кӕнынц. Фӕлӕ мах хъуамӕ афтӕ ма уӕм. Цӕуылнӕ? Уымӕн ӕмӕ Йегъовӕйы фӕнды, цӕмӕй «алкӕмӕн дӕр кад кӕнӕм», алкӕй дӕр нымайӕм (1 Пет. 2:17).

³ Ацы статьяйы аныхас кӕндзыстӕм, иннӕтӕн кад кӕнын цӕмӕ амоны ӕмӕ нӕ бон куыд у кад кӕнын: 1) нӕ бинонтӕн, 2) нӕ чырыстон хотӕн ӕмӕ ’фсымӕртӕн ӕмӕ 3) Йегъовӕйӕн чи нӕ лӕггад кӕны, уыдонӕн. Мах базондзыстӕм, нӕ бон куыд у иннӕтӕн кад кӕнын, уый нын зын куы уа, уӕд дӕр.

ИННӔТӔН КАД КӔНЫН ЦӔМӔ АМОНЫ?

4. Иннӕтӕн кад кӕнын, кӕнӕ сӕ нымайын, цӕмӕ амоны?

⁴ Иннӕтӕн кад кӕнын, кӕнӕ сӕ нымайын, цӕмӕ амоны? Цы цӕстӕй сӕм кӕсӕм ӕмӕ сын куыд стӕм, уымӕ. Адӕймагӕн кад фӕкӕнӕм йӕ хорз миниуджыты ӕмӕ йӕ хорз хъуыддӕгты тыххӕй, кӕнӕ йӕм цы бартӕ ис, уыдоны тыххӕй. Ӕмӕ уый хъуамӕ бӕрӕг уа нӕ хъуыддӕгтӕй дӕр. Фӕлӕ ахсджиаг у, цӕмӕй адӕймагӕн кад кӕнӕм зӕрдӕйӕ (Матф. 15:8).

5. Цӕмӕн нӕ фӕнды иннӕтӕн кад кӕнын?

⁵ Йегъовӕйы фӕнды, цӕмӕй алкӕмӕн дӕр кад кӕнӕм. Зӕгъӕм, дзуры нын, цӕмӕй кад кӕнӕм «хицӕуттӕн» (Ром. 13:1, 7). Фӕлӕ, чи зоны, исчи зӕгъа: «Адӕймаг кады аккаг куы уа, уӕд ын кад кӕндзынӕн». Афтӕ хъуыды кӕнын раст у? Нӕу. Мах стӕм Йегъовӕйы лӕггадгӕнджытӕ, ӕмӕ иннӕтӕн, цы аразынц кӕнӕ цы нӕ аразынц, уый тыххӕй нӕ кад кӕнӕм, фӕлӕ, Йегъовӕйы кӕй уарзӕм ӕмӕ нӕ йӕ зӕрдӕ рухс кӕнын кӕй фӕнды, уый тыххӕй (1 Пет. 3:15).

6. Уымӕн гӕнӕн ис, ӕмӕ, махӕн чи нӕ кад кӕны, уыдонӕн кад кӕнӕм? Дӕ дзуапп бамбарын кӕн. (Кӕс нывмӕ дӕр.)

⁶ Чи зоны, исчи ахъуыды кӕна: «Уымӕн гӕнӕн ис, ӕмӕ, мӕнӕн чи нӕ кад кӕны, уымӕн кад кӕнон?» Ис. Ӕркӕсӕм цалдӕр хабармӕ. Ионафаны йӕ фыд, паддзах Саул иннӕты цӕсты бафтыдта (1 Сам. 20:30–34). Фӕлӕ йӕ уӕддӕр Ионафан нымадта, ӕмӕ хӕсты быдыры йӕ фарсмӕ тох кодта, Саул куы фӕмард, суанг уӕдмӕ (Рац. 20:12; 2 Сам. 1:23). Аннӕйӕн хистӕр сауджын Илий бауайдзӕф кодта, зӕгъгӕ, дам, расыг дӕ. Афтӕмӕй та расыг нӕ уыд (1 Сам. 1:12–14). Фӕлӕ Аннӕ йемӕ уӕзданӕй ныхас кодта, кӕд, Илий кӕй рӕдыд, уый ӕнӕхъӕн Израил зыдта, уӕддӕр. Йӕ фырттӕн се ’лгъаг миты тыххӕй карзӕй никуы бауайдзӕф кодта. Афтӕмӕй та уый йӕ хӕс уыди, сӕ фыд ӕмӕ хистӕр сауджын кӕй уыд, уымӕ гӕсгӕ (1 Сам. 1:15–18; 1 Сам. 2:22–24). Апостол Павелы афинӕгтӕ схуыдтой «дзӕгъӕлдзых» (Хъуыд. 17:18). Фӕлӕ уӕддӕр Павел семӕ дзырдта уӕзданӕй (Хъуыд. 17:22). Ацы цӕвиттонтӕй цы у бӕрӕг? Адӕймаг Йегъовӕйы тынг куы фӕуарзы ӕмӕ йӕ зӕрдӕхудты бацӕуынӕй куы фӕтӕрсы, уӕд ӕй фӕфӕнды иннӕтӕн кад кӕнын, уый йын зын куы вӕййы, суанг уӕд дӕр. Цӕй уӕдӕ аныхас кӕнӕм, кӕмӕн хъуамӕ кад кӕнӕм ӕмӕ цӕмӕн.

КАД КӔН ДӔ БИНОНТӔН

7. Хатт нын зын цӕмӕн вӕййы нӕ бинонтӕн кад кӕнын?

⁷ Зын цӕмӕн вӕййы? Нӕ бинонтимӕ бирӕ рӕстӕг кӕй фервитӕм, уымӕ гӕсгӕ сын зонӕм сӕ хорз миниуджытӕ дӕр ӕмӕ сӕ хъӕндзинӕдтӕ дӕр. Кӕд нӕ бинонтӕй исчи уӕззау рынчын у кӕнӕ йын тыхст хъуыдытӕ ӕнцой нӕ дӕттынц, уӕд, гӕнӕн ис, тынг фӕллайӕм. Науӕд та нӕ, чи зоны, нӕ бинонтӕй исчи йӕ ныхӕстӕй кӕнӕ йӕ митӕй фӕхъыг кӕны. Адӕймагӕн йӕ бинонты ’хсӕн хъуамӕ ӕнцон уа. Фӕлӕ бинонтӕ кӕрӕдзийӕн куы нӕ фӕкад кӕнынц, уӕд кӕрӕдзимӕ мӕсты дӕр свӕййынц. Уый уымӕ ӕркӕны, ӕмӕ кӕрӕдзи нал фембарынц. Зӕгъӕм, артриты аххосӕй буары уӕнгтӕ хорз куыд нал фӕкусынц, афтӕ бинонтӕ дӕр кӕрӕдзи куы нал фӕнымайынц, уӕд сӕ ныхас кӕрӕдзийыл нал фӕбады. Ӕмӕ кӕд уый гӕнӕн нӕй, цӕмӕй адӕймаг артритӕй йӕхӕдӕг бынтондӕр фервӕза, уӕд уымӕн та гӕнӕн ис, ӕмӕ бинонтӕ кӕрӕдзийӕн кад кӕнын сахуыр уой.

8. Бинонтӕн кад кӕнын ахсджиаг цӕмӕн у? (1 Тимофеймӕ 5:4, 8).

⁸ Цӕмӕн сын хъуамӕ кад кӕнӕм? (Бакӕс 1 Тимофеймӕ 5:4, 8.) Павел йӕ фыццаг фыстӕджы Тимофеймӕ ныффыста, бинонтӕ кӕрӕдзийыл кӕй хъуамӕ тыхсой. Уый бамбарын кодта, нӕ бинонты сӕйраджыдӕр цӕй тыххӕй хъуамӕ нымайӕм: уый нӕ хӕс кӕй у, уый тыххӕй нӕ, фӕлӕ «Хуыцауыл иузӕрдион» кӕй стӕм, уый тыххӕй. Ома нӕ бинонтӕн кад кӕнӕм, Хуыцауы кӕй уарзӕм ӕмӕ уый нӕ лӕггадмӕ кӕй хауы, уый тыххӕй. Бинонты царды бындурӕвӕрӕг Йегъовӕ у (Еф. 3:14, 15). Уымӕ гӕсгӕ, нӕ бинонтӕн куы фӕкад кӕнӕм, уӕд фӕкад кӕнӕм Йегъовӕйӕн – бинонты цардӕн бындур чи ӕрӕвӕрдта, уымӕн. (Кӕс комментари 1 Тимофеймӕ 5:4 стихмӕ, «Ахуыргӕнӕн Библи», англ.) Уӕдӕ тынг ахсджиаг у, цӕмӕй нӕ бинонтӕн кад кӕнӕм, нымайӕм сӕ.

9. Лӕг ӕмӕ ус кӕрӕдзийӕн кӕй кад кӕнынц, уый цӕмӕй уыдзӕн бӕрӕг? (Кӕс нывтӕм дӕр.)

⁹ Нӕ бон сын куыд у кад кӕнын? Йӕ усы чи нымайы, уый адӕмы раз дӕр ӕмӕ хибарӕй дӕр йӕхи йемӕ куыд фӕдары, уымӕй бӕрӕг вӕййы, кӕй йын аргъ кӕны (Ӕмб. 31:28; 1 Пет. 3:7). Йӕ къух ӕм нӕ исы, иннӕты цӕсты йӕ никуы бафтауы ӕмӕ ахӕмӕй ницы фӕзӕгъы ӕмӕ ницы саразы, цӕмӕй йӕ бинойнаг йӕхимӕ ницӕйаг ӕркӕса. Ӕфсымӕр Ариэ́л цӕры Аргентинӕйыa. Уый радзырдта: «Мӕ бинойнаг мын хатт йӕ ныхӕстӕй мӕ зӕрдӕ скъахы. Ахӕм рӕстӕджыты мӕ зӕрдыл ӕрлӕууын кӕнын, уыдӕттӕ йын йӕ низ кӕй дзурын кӕны. Ӕмӕ архайын, цӕмӕй ма рох кӕнон, 1 Коринфӕгтӕм 13:5 стихы цы фыст ис, уый. Уый мын ӕххуыс кӕны, цӕмӕй-иу мӕ маст бауромон ӕмӕ-иу йемӕ тызмӕгӕй нӕ, фӕлӕ фӕлмӕнӕй ныхас кӕнон» (Ӕмб. 19:11). Йӕ сӕрыхицауӕн чи кад кӕны, ахӕм сылгоймаг иннӕты раз йӕ кой куы фӕкӕны, уӕд бӕрӕг вӕййы, кӕй йӕ нымайы, уый (Еф. 5:33). Нӕ йыл фӕхуды, нӕ дзы фӕхынджылӕг кӕны ӕмӕ йын йӕ ныхӕстӕй йӕ кад дӕлӕмӕ нӕ фӕкӕны. Уый ӕмбары, уӕд тӕссаг кӕй уыдзӕн, йӕ бинонты цард куы фехӕла, уымӕй (Ӕмб. 14:1). Италийы чи цӕры, иу ахӕм хойӕн йӕ сӕрыхицау тох кӕны тыхст хъуыдытимӕ. Уый радзырдта: «Хатт мӕм афтӕ фӕкӕсы, ӕмӕ мӕ сӕрыхицау цӕуылдӕрты ӕгӕр фӕмӕт кӕны. Раздӕр-иу ӕм тынг мӕсты кодтон, ӕмӕ-иу уый бӕрӕг уыди мӕ ныхӕстӕй дӕр, стӕй-иу мӕ цӕсгомыл дӕр зынди. Фӕлӕ стӕй бафиппайдтон, иннӕтӕн ӕрмӕстдӕр сӕ хорзы кой чи фӕкӕны, уыдонимӕ рӕстӕг цас фылдӕр фервитын, уыйас мын ӕнцондӕр кӕй вӕййы мӕ сӕрыхицауы нымайын».

10. Сывӕллӕттӕн сӕ бон куыд у ӕвдисын, сӕ ныййарджыты кӕй нымайынц, уый?

¹⁰ Сывӕллӕттӕ, сымахӕн та уӕ бон куыд у ӕвдисын, уӕ ныййарджыты кӕй нымайут, уый? Уыдон уын цӕмӕндӕрты бар фӕдӕттынц, цӕмӕндӕрты та – нӕ. Ӕмӕ хъуамӕ сӕ коммӕ кӕсат (Еф. 6:1–3). Семӕ куыд фӕныхас кӕнут, уымӕй бӕрӕг уӕд, кӕй сын кад кӕнут (Рац. 21:17). Азтӕ куыд цӕуой, афтӕ, гӕнӕн ис, уӕ ныййарджыты фылдӕр ӕххуыс хъӕуа. Уӕ бон цӕмӕйдӕриддӕр у, уымӕй сын ӕххуыс кӕнут. Ӕркӕсӕм хо Марийӕйы хабармӕ. Йӕ фыд Йегъовӕйы Ӕвдисӕн нӕ уыд, ӕмӕ, куы фӕрынчын, уӕд йӕхи афтӕ дардта, ӕмӕ йӕм кӕсын тынг зын уыд. Марийӕ радзырдта: «Куывтон, цӕмӕй мӕ фыды нымадтаин ӕмӕ уый хъуыддагӕй дӕр ӕвдыстаин. Хъуыды кодтон, иугӕр мын Йегъовӕ зӕгъы, дӕ ныййарджыты нымай, зӕгъгӕ, уӕд мын уымӕн тыхтӕ дӕр ратдзӕн. Фӕстӕдӕр бамбӕрстон, ӕмӕ, кӕд мӕ фыд нӕ ивы, уӕддӕр ӕй хъуамӕ нымайон». Мах нӕ бинонты хъӕндзинӕдтӕ уынӕм. Фӕлӕ сын уӕддӕр куы кад кӕнӕм, уӕд уымӕй ӕвдисдзыстӕм, Йегъовӕйӕн, бинонты царды бындурӕвӕрӕгӕн, кӕй кад кӕнӕм.

КАД КӔН ӔМБЫРДЫ ХОТӔ ӔМӔ ’ФСЫМӔРТӔН

11. Хатт нын зын цӕмӕн вӕййы хотӕн ӕмӕ ’фсымӕртӕн кад кӕнын?

¹¹ Зын цӕмӕн вӕййы? Не ’мчырыстӕттӕ цӕрынц Библийы закъӕттӕм гӕсгӕ. Фӕлӕ нӕм хатт хо кӕнӕ ӕфсымӕр хӕларзӕрдӕ нӕ вӕййы, науӕд, цыдӕр цӕмӕн сарӕзтам, уый раст нӕ бамбары, йе та нӕ смӕсты кӕны. Ӕмӕ нын, чи зоны, зын уа, чи нӕ фӕхъыг кодта, уыцы хо кӕнӕ ’фсымӕрӕн кад кӕнын (Кол. 3:13). Ахӕм уавӕры нын цы баххуыс кӕндзӕн?

12. Хотӕ ӕмӕ ’фсымӕртӕн кад кӕнын ахсджиаг цӕмӕн у? (2 Петры 2:9–12).

¹² Цӕмӕн сын хъуамӕ кад кӕнӕм? (Бакӕс 2 Петры 2:9–12.) Петр йӕ дыккаг фыстӕджы ныффыста, фыццаг ӕнусы чырыстон ӕмбырды иуӕй-иутӕ кӕй фаудтой «кадджынты», ома хистӕр нӕлгоймӕгты. Ӕмӕ уый уыдтой иузӕрдион зӕдтӕ дӕр. Фӕлӕ Йегъовӕйы ’фсӕрмӕй уыдонӕй иунӕг фауӕн ныхас дӕр нӕ загътой. Ахъуыды-ма кӕн: ӕххӕст зӕдтӕ уыцы сӕрбӕрзонд чырыстӕтты тыххӕй ӕвзӕрӕй ницы загътой! Уыдон ӕмбӕрстой, тӕрхонгӕнӕг Йегъовӕ кӕй у (Ром. 14:10–12; абар Иудӕйы 9). Зӕдтӕй цӕуыл ахуыр кӕнӕм? Уыдон ӕфхӕрӕн ныхӕстӕ нӕ кодтой, Йегъовӕйы ныхмӕ чи цыд, суанг уыдонӕй дӕр. Ӕмӕ уӕд мах хъуамӕ цас тынгдӕр архайӕм, цӕмӕй, Йегъовӕйы чи уарзы, уыцы хотӕ ӕмӕ ’фсымӕртӕй фауӕн ныхӕстӕ ма кӕнӕм! Фӕлӕ, Библийы куыд фыст ис, хъуамӕ афтӕ кӕнӕм: «Кӕрӕдзийӕн кад кӕнынмӕ-иу иу иннӕйы разӕй фӕуӕд» (Ром. 12:10). Афтӕмӕй ӕвдисдзыстӕм, Йегъовӕйӕн кӕй кад кӕнӕм.

13, 14. Хотӕ ӕмӕ ’фсымӕртӕн кӕй кад кӕнӕм, уый нӕ бон куыд у ӕвдисын? Ӕрхӕсс цӕвиттонтӕ. (Кӕс нывтӕм дӕр.)

¹³ Нӕ бон сын куыд у кад кӕнын? Хистӕр нӕлгоймӕгтӕ, иннӕты ахуыр кӕнгӕйӕ-иу бӕрӕг уӕд, кӕй сӕ уарзут, уый (Филим. 8, 9). Искӕмӕн уӕ уынаффӕ раттын куы хъӕуа, уӕд-иу уый мӕстыйӕ ма саразут. Фыццаг уал-иу ӕрсабыр ут ӕмӕ-иу стӕй йемӕ фӕлмӕнӕй аныхас кӕнут. Хотӕ, сымахӕн дӕр уӕ бон бирӕ у аразын, цӕмӕй ӕмбырды иууылдӕр кӕрӕдзийӕн кад кӕной. Зӕгъӕм, иннӕтӕ искӕй фыдкой куы кӕной кӕнӕ искӕмӕй мӕнг ныхӕстӕ куы кӕной, уӕд-иу сӕм сымах дӕр ма баиу ут (Тит. 2:3–5). Махӕн не ’ппӕтӕн дӕр нӕ бон у ӕвдисын, хистӕр нӕлгоймӕгтӕн кӕй кад кӕнӕм. Уый бӕрӕг уыдзӕн, семӕ ӕмгуыст куы кӕнӕм ӕмӕ сын сӕ фыдӕбоны тыххӕй бузныг куы дзурӕм, уымӕй. Уыдон ӕмбырдтӕ уадзынц, хъусын кӕныны хъуыддаджы разамынд сӕхимӕ исынц ӕмӕ, «рӕдыд къахдзӕф» чи саразы, уыдонӕн феххуыс кӕнынц (Гал. 6:1; 1 Тим. 5:17).

¹⁴ Хо Роси́ойӕн зын уыди, уынаффӕ йын чи радта, уыцы хистӕр нӕлгоймагӕн кад кӕнын. Уый радзырдта: «Мемӕ куыд ныхас кодта, уый мӕ зӕрдӕмӕ нӕ фӕцыд. Афтӕ мӕм фӕкаст, ӕмӕ мемӕ тызмӕгӕй дзырдта. Хӕдзары йӕ фыдкой кодтон. Ӕмӕ кӕд, йемӕ разы кӕй нӕ дӕн, уый ӕргом не ’вдыстон, уӕддӕр дызӕрдыг кодтон, мӕ хорздзинад ӕй кӕй фӕнды, ууыл. Ӕмӕ йын йӕ уынаффӕмӕ нӕ байхъуыстон». Росиойӕн цы баххуыс кодта? «Библи кӕсгӕйӕ мӕ цӕст ӕрхӕцыд 1 Фессалоникӕгтӕм 5:12, 13 стихтыл, ӕмӕ бамбӕрстон, уыцы ӕфсымӕры кӕй нӕ нымайын. Гъемӕ мӕ мӕ цӕсгом хӕрын райдыдта. Йегъовӕмӕ куывтон ӕмӕ нӕ публикациты бацагуырдтон, уыцы ӕфсымӕрмӕ мын раст цӕстӕй кӕсынӕн чи баххуыс кодтаид, ахӕм информаци. Ӕмӕ бамбӕрстон, уыцы ӕфсымӕр кӕй ницы аххосджын уыд. Хъуыддаг уыд мӕ сӕрбӕрзонддзинады мидӕг. Ныр ӕй ӕмбарын, цӕмӕй иннӕтӕн кад кӕнон, уый тыххӕй сӕрныллӕг кӕй хъуамӕ уон. Нырма мӕ мӕхиуыл кусын хъӕуы. Фӕлӕ архайын, цӕмӕй иннӕты ноджы тынгдӕр нымайон, ӕмӕ мын Йегъовӕ арфӕ кӕны».

КАД КӔНУТ, ЙЕГЪОВӔЙӔН ЧИ НӔ ЛӔГГАД КӔНЫ, УЫДОНӔН

15. Зын нын цӕмӕн вӕййы, Йегъовӕйы Ӕвдисӕн чи нӕу, уыдонӕн кад кӕнын?

¹⁵ Зын цӕмӕн вӕййы? Хорз хабар хъусын кӕнгӕйӕ арӕх фембӕлӕм, Хуыцау ӕмӕ Библи нымады дӕр кӕмӕ не сты, ахӕм адӕмыл (Еф. 4:18). Иуӕй-иутӕ нӕм нӕ хъусынц, уымӕн ӕмӕ, мах цы дзурӕм, уый хицӕн кӕны, сӕ гыццылӕй фӕстӕмӕ цӕуыл ӕууӕндынц, уымӕй. Не ’мкусджытӕй кӕнӕ нӕм нӕ къласӕгтӕй чидӕртӕ, чи зоны, ӕвзӕр зӕрдӕ дарынц ӕмӕ немӕ тызмӕгӕй фӕныхас кӕнынц. Йе та, чи зоны, нӕ куысты хицау кӕнӕ нӕ ахуыргӕнӕг разы никуы вӕййы, цы саразӕм, уымӕй. Уымӕ гӕсгӕ йын, гӕнӕн ис, мауал кад кӕнӕм ӕмӕ сӕм хӕларзӕрдӕ мауал уӕм.

16. Йегъовӕйӕн чи нӕ лӕггад кӕны, уыдонӕн кад кӕнын ахсджиаг цӕмӕн у? (1 Петры 2:12; 3:15).

¹⁶ Цӕмӕн сын хъуамӕ кад кӕнӕм? Йегъовӕ лӕмбынӕг кӕсы, чи йын нӕ лӕггад кӕны, уыдонимӕ нӕхи куыд дарӕм, уымӕ. Апостол Петр чырыстӕттӕм ныффыста, сӕ уаг ӕмӕ се ’гъдауӕй фӕзминаг куы уой, уӕд ацы дунейы адӕмӕй кӕйдӕрты кӕй бафӕнддзӕн Хуыцауы кадджын кӕнын. Ӕмӕ сын уый тыххӕй бафӕдзӕхста, цӕмӕй сӕ уырнындзинады сӕрыл дзурой «сабырӕй ӕмӕ уӕзданӕй». (Бакӕс 1 Петры 2:12; 3:15.) Ӕмӕ уӕлдай нӕу, цӕуыл ӕууӕндӕм, уый тыххӕй тӕрхондоны дзурӕм ӕви ӕнӕуи искӕимӕ ныхас кӕнӕм,– хъуамӕ-иу афтӕ дзурӕм, цыма Хуыцау нӕ разы ис. Мах зонӕм: Йегъовӕ хъусы, цы дзурӕм ӕмӕ куыд дзурӕм, уый. Уӕдӕ, Йегъовӕйы Ӕвдисӕн чи нӕу, уыдонӕн куыннӕ хъуамӕ кад кӕнӕм!

17. Цӕмӕй уыдзӕн бӕрӕг, Йегъовӕйы Ӕвдисӕн чи нӕу, уыдонӕн кӕй кад кӕнӕм, уый?

¹⁷ Нӕ бон сын куыд у кад кӕнын? Хорз хабар хъусын кӕнгӕйӕ арӕх фембӕлӕм, Библи хорз чи нӕ зоны кӕнӕ йӕ ӕппындӕр чи нӕ зоны, ахӕм адӕмыл. Фӕлӕ нӕхи хъуамӕ афтӕ ма дарӕм, цӕмӕй сӕм афтӕ фӕкӕса, цыма нӕхи уыдонӕй зондджындӕр хонӕм. Хъуамӕ сӕ нӕхицӕй уӕлдӕрыл нымайӕм ӕмӕ ма рох кӕнӕм, Йегъовӕйы цӕсты зынаргъ хӕзнатӕ кӕй сты (Аг. 2:7; Фил. 2:3). Хатт нӕ, цӕуыл ӕууӕндӕм, уый тыххӕй ныхасӕй бафхӕрынц. Ӕмӕ нӕ уӕд фӕфӕнды ахӕм исты сын зӕгъын, цӕмӕй сӕ ӕдылыйы бынаты сӕвӕрӕм. Фӕлӕ хъуамӕ афтӕ ма кӕнӕм (1 Пет. 2:23). Фӕлӕ кӕд дӕхиуыл нӕ фӕхӕцыдтӕ ӕмӕ, цӕуыл фӕфӕсмон кодтай, ахӕмӕй исты загътай, уӕд-иу хатыр ракур. Кӕимӕ кусыс, уыдонӕн та дӕ бон куыд у кад кӕнын? Хорз кусӕг у ӕмӕ архай, цӕмӕй уынай, де ’мкусджытӕм ӕмӕ дӕ куысты хицаумӕ хорзӕй цы ис, уый (Тит. 2:9, 10). Ӕмӕ кӕд ӕнӕзӕрдӕхудт кусӕг дӕ ӕмӕ ӕппӕт удӕй фыдӕбон кӕныс, фӕлӕ дын дӕ куыстӕн алкӕд нӕ саргъ кӕнынц, уӕд-иу ма рох кӕн, Йегъовӕ йын кӕй саргъ кӕндзӕн (Кол. 3:22, 23).

18. Иннӕтӕн кад кӕнын ӕмӕ уый хъуыддагӕй ӕвдисын хорз цӕмӕн у?

¹⁸ Куыд федтам, афтӕмӕй бирӕ цӕйдӕрты тыххӕй хъуамӕ кад кӕнӕм иннӕтӕн. Зӕгъӕм, нӕ бинонтӕн куы кад кӕнӕм, уӕд афтӕмӕй кад кӕндзыстӕм бинонты царды бындурӕвӕрӕг Йегъовӕйӕн. Стӕй нӕ чырыстон хотӕ ӕмӕ ӕфсымӕртӕн куы кад кӕнӕм, уӕд афтӕмӕй дӕр кад кӕндзыстӕм нӕ уӕларвон Фыдӕн. Йегъовӕйӕн чи нӕ лӕггад кӕны, уыдонӕн куы кад кӕнӕм, уӕд уыдоны дӕр, чи зоны, бафӕнда не Стыр Хуыцауы кадджын кӕнын. Ӕмӕ нӕ кӕд иннӕтӕ нӕ нымайынц, уӕддӕр ахсджиаг у, цӕмӕй сӕ мах нымайӕм ӕмӕ уый хъуыддагӕй ӕвдисӕм. Цӕмӕн? Уымӕн ӕмӕ нын уӕд Йегъовӕ раарфӕ кӕндзӕн. Йегъовӕ нын зӕрдӕ ӕвӕры: «Ӕз кад кӕндзынӕн, мӕнӕн чи кад кӕны, уыдонӕн» (1 Сам. 2:30).