¿Te gi mbeni de rä Mäkä Tꞌofo?

RÄ MÄKÄ TꞌOFO MÄÄ

«Gatꞌho rä Mäkä Tꞌofo, Äjuä go bi ungä rä mfeni pa bi tꞌofo.» (2 Timoteo 3:16, Ra ꞌRaꞌyo Testamento.)

TE MA GI TÄHÄ GI PÄDI NJABU̱

Ma gi tini rä mpengi nuꞌu̱ yä ntꞌani xa xä dupäbi yä mu̱i yä jäꞌi (Proverbios 2:1-5).

Ma gi tini yä tsꞌofo nuꞌu̱ nzäntho ma dä maxꞌäꞌi gi pädi hanja gi ꞌmu̱i (Salmo 119:105).

Ma dä rꞌaꞌi nꞌa rä hogä humu̱i pa xudi ndämäni (Romanos 15:4).

¿DÄ ZA GÄ KAMFRIHU̱ NÄꞌÄ MÄÄ RÄ MÄKÄ TꞌOFO?

Hää, po nuya yä raso:

• Nꞌatꞌä näꞌä mää. Pa bi tꞌofo rä Mäkä Tꞌofo bi zitsꞌi 1.600 yä je̱ya. Bi yꞌofo ngu 40 yä jäꞌi. Ndunthi de gehyu̱ himbi mpädi nꞌa ngu mänꞌaa. Mäske njabu̱, di nthe̱ gatꞌho nuꞌu̱ yä mfeni hutsꞌi, ꞌne ja nꞌa rä däta tꞌo̱tꞌe näꞌä no̱ni po mäxo̱ge rä Mäkä Tꞌofo.

• Hutsꞌi näꞌä xa mäjuäni bi thogi. Ndunthi de nuꞌu̱ yä yꞌofo xä mꞌu̱i, di ntsa dä yꞌofo de nuꞌu̱ yä tuhni di ꞌme̱di yä hnini. Pe nuꞌu̱ toꞌo bi yꞌofo rä Mäkä Tꞌofo, bi yꞌofo ꞌnehe nuꞌu̱ yä tsꞌoki bi yꞌo̱tꞌäse̱, ꞌne nuꞌu̱ bi yꞌo̱tꞌe yä hnini (2 Crónicas 36:15, 16; Salmo 51:1-4).

• Hutsꞌi yä profesia nuꞌu̱ xa mäjuäni xä kumpli. Rä Mäkä Tꞌofo bi mää ko 200 yä je̱ya änte, ge rä hnini Babilonia ma xä uadi (Isaías 13:17-22). Hingä ho̱nse̱ bi mää hanja ma xä uadi, ꞌnehe bi mämbäbi rä thuhu näꞌä jäꞌi ma xä gu̱tꞌi rä ꞌñuu pa xä huati nunä hnini (Isaías 45:1-3).

  Ndunthi märꞌa yä profesia xä kumpli gatꞌho näꞌä xä mää. ¿Hänge mäjuäni ge geꞌä di to̱ꞌmihu̱ de nꞌa rä mfistꞌofo näꞌä bi ehe de Äjuä? (2 Pedro 1:21.)