¿Hanja dä za dä me̱ꞌtsi rä johya yä familia?

RÄ MÄKÄ TꞌOFO MÄÄ

“¡Häni yä jäpi nuꞌu̱ toꞌo o̱tuäbi rä Noya Äjuä ꞌne o̱tꞌe nuꞌä mää!”(Lucas 11:28, Ra ꞌRaꞌyo Testamento.)

TE MA GI TÄHÄ GI PÄDI NJABU̱

Rä mhäte (Efesios 5:28, 29).

Rä tꞌekꞌei (Efesios 5:33).

Nꞌa rä hogä ntsitsꞌi (Marcos 10:6-9).

¿DÄ ZA GÄ KAMFRIHU̱ NÄꞌÄ MÄÄ RÄ MÄKÄ TꞌOFO?

Hää, po nuya yä raso:

• Äjuä geꞌä rä Hyokäte de rä familia. Rä Mäkä Tꞌofo mää ge rä Zi Dada Jeoba go geꞌä bi thäti näꞌä rä mu̱di ñꞌo̱ho̱ ꞌne näꞌä mu̱di ꞌme̱hñä (Génesis 2:18-24). Ja ngu di handihu̱, yä familia bi zo̱ho̱ bi nja ngeꞌä Jeoba go bi hyoki. ¿Por hanja mähyoni gä pädihu̱ ge Äjuä go bi hyoki rä familia?

  Ma gä hutsꞌihu̱ nꞌa kꞌoi: Mu̱ gi tsi nꞌa ñhuni näꞌä xa xä ku̱hi, ꞌne gi ne gi pädi gatꞌho näꞌä pe̱ui, ¿toꞌo dä hogi gi yꞌambäbi? ¿Hänge ma gi yꞌambäbi näꞌä jäꞌi bi hyoki näꞌä ñhuniꞌä?

  Njabu̱ ꞌnehe, pa gä pähu̱ te di ja mꞌe̱di pa dä me̱ꞌtsi rä johya yä familia, mähyoni gä ambäbihu̱ rä Zi Dada Jeoba näꞌä rä Hyokäte de rä familia.

• Äjuä turämu̱i po nuju̱. Yä familia udi ge ja yä mfädi nuꞌmu̱ honi nuꞌu̱ yä tsꞌofo uni rä Zi Dada Jeoba po mäde de rä Mäkä Tꞌofo. ¿Por hanja? Ngeꞌä Äjuä di “sugägihu̱” (1 Pedro 5:6, 7). Jeoba nzäntho honi mä ñhohu̱ ꞌne yä tsꞌofo nzäntho ma dä maxkägihu̱ (Proverbios 3:5, 6; Isaías 48:17, 18).