¿Hanja dä za gä uñhu̱ ntꞌo̱de ko nuꞌu̱ yä bo̱jä o yä mexa?

Nuꞌmu̱ di thutsꞌi nuꞌu̱ yä bo̱jä o yä mexa pa di tꞌungä ntꞌo̱de, faxte ndunthi pa di thini nuꞌu̱ yä jäꞌi ne dä bädi de Äjuä (Juan 6:44). Po rängeꞌä, xä fembäbi yä ansiano ge dä organisa xä ñho hanja dä tꞌungä ntꞌo̱de ha nuꞌu̱ yä territorio de rä mhuntsꞌi habu̱ thogi ndunthi yä jäꞌi. Nuꞌu̱ yä bo̱jä o yä mexa, di häkihu̱ mꞌe̱fa de gä uñhu̱ ntꞌo̱de, hänge rꞌabu̱ hindi ja mꞌe̱di gä ju̱kihu̱ nꞌa rä se̱ki ko yä tsꞌu̱tꞌhui pa gä hutsꞌihu̱. Pe, ¿toꞌo dä za dä ungä ntꞌo̱de ko nuꞌu̱ yä bo̱jä o yä mexa? Nuꞌu̱ yä publikador udi rä hogä mfädi, rä tꞌekꞌei, nuꞌu̱ xa pädi dä ñäui yä jäꞌi, ꞌne yä hee udi ge pepäbi Äjuä. Nuya yä tsꞌofo ma gä handihu̱, ma dä matsꞌi yä publikador dä bädi näꞌä xä ñho dä me̱fi ꞌne näꞌä hinä, pa njabu̱ dä za dä matsꞌi nuꞌu̱ yä jäꞌi ne dä bädi de Äjuä.