Ma gä mbenihu̱ ngu rä Zi Dada Jeoba ꞌne rä Hesu

1, 2. a) ¿Te ri bo̱ni gä mädihu̱ rä Zi Dada Jeoba? b) ¿Hanja bi ꞌñudi rä Hesu ge mi mädi rä Zi Dada Jeoba ko ngatꞌho rä mfeni?

DE NUꞌU̱ yä mhända bi tꞌumbäbi Moisés, rä Hesu bi mää ndaꞌä mänꞌa rä dängi de gatꞌho nuꞌmu̱ bi ꞌñenä: «Pe̱ꞌtsi te gi mädi ri Zi Dada Jeoba ko ngatꞌho ri koraso, ꞌne ko ngatꞌho ri te, ꞌne ko ngatꞌho ri mfeni, ꞌne ko ngatꞌho ri tsꞌe̱di» (Mar. 12:​30, TNM). Ja ngu di handihu̱, xa mähyoni gä mädihu̱ rä Zi Dada Jeoba ko ngatꞌho mä tehu̱, ko ngatꞌho näꞌä di desiahu̱, näꞌä di sentihu̱, ko ngatꞌho mä tsꞌe̱dihu̱ ꞌne ko näꞌä rä modo hanja di usahu̱ mä mfenihu̱. Di pädihu̱ ge nunka ma dä za gä ntiendehu̱ gatꞌho nuꞌu̱ yä mfeni rä Zi Dada Jeoba. Pe hää dä za gä pädihu̱ xi ndunthi de näꞌä di mbeni, mu̱ gä imbestigahu̱ tenguꞌä «rä mfeni rä Kristo». ¿Por hanja? Ngeꞌä nuꞌmu̱ rä Hesu bi mꞌu̱kua ha rä Xiꞌmhai, nzäntho bi ꞌñudi ge mi mbeni ngu di mbeni rä Dada (1 Cor. 2:​16, TNM).

² Rä Hesu bi ꞌñudi ge xa mi mädi rä Zi Dada Jeoba ko ngatꞌho rä mfeni. Näꞌä mi pädi xä ñho te mi adi de geꞌä ꞌne mi ꞌmu̱i desidido dä me̱päbi rä bolunta mäske pa geꞌä ma xä sufri. Koꞌmu̱ rä Hesu nzäntho bi prokura dä me̱fi näꞌä di ho rä Dada, nunka bi distrae ko märꞌa yä tꞌo̱tꞌe.

3. ¿Te bi bädi rä apostol Pedro de rä Hesu ꞌne te bi ꞌñembäbi dä me̱fi nuꞌu̱ yä kristianu de näꞌä tiempoꞌä? (1 Pedro 4:1).

³ Pedro ꞌne nuꞌu̱ märꞌa yä apostol bi me̱ꞌtsi rä däta nsu de bi konose rä Hesu, bi ñꞌoui, bi hyandi ꞌne bi yꞌo̱de hanja mi mbeniꞌä. Mi yꞌofo rä apostol Pedro näꞌä rä mu̱di karta, bi nupäbi yä mfeni nuꞌu̱ yä kristianu de näꞌä tiempoꞌä pa dä gu̱ de gä arma näꞌä rä mfeni rä Kristo (hñeti 1 Pedro 4:​1, TNM). Nuꞌmu̱ rä apostol Pedro bi ꞌñenä «hñähu̱ de gä arma näꞌä mfeniꞌä», bi usa nꞌa rä noya näꞌä mi usa yä soldado de näꞌä tiempoꞌä pa njabu̱ bi ꞌñudi ge mu̱ gä mbenihu̱ ngu di mbeni rä Kristo, geꞌä ma dä zo̱ho̱ dä nja ngu nꞌa rä däta arma pa gekhu̱ näꞌä ma dä maxkägihu̱ pa gä täpäbihu̱ yä tsꞌo nkꞌatꞌi, ꞌne nuꞌu̱ märꞌa yä tsꞌo tꞌo̱tꞌe di nheki ha nunä xiꞌmhai habu̱ di mända rä Zithu (2 Cor. 10:​3-5; Efes. 6:12).

4. ¿Te ma gä pädihu̱?

⁴ Ha nunä ntꞌudi di nxadihu̱ ma gä pädihu̱ hanja dä za gä mbenihu̱ ja ngu di mbeni rä Hesu. Ja ngu bi ja rä Hesu, ma gä handihu̱: 1) Hanja xa mähyoni gä mbenihu̱ ja ngu di mbeni rä Zi Dada Jeoba, 2) hingä ñꞌexmänsuhu̱ ꞌne gä pe̱päbihu̱ märꞌaa, ꞌne 3) gä udihu̱ ge ja mä mfenihu̱.

MA GÄ MBENIHU̱ JA NGU DI MBENI JEOBA

5. Mää hämꞌu̱ bi ꞌñudi rä apostol Pedro ge himi mbeni ja ngu di mbeni rä Zi Dada Jeoba.

⁵ Nꞌa rä pa, rä apostol Pedro bi ꞌñudi ge himi mbeni ja ngu di mbeni rä Zi Dada Jeoba. Rä Hesu bi xipäbi nuꞌu̱ yä apostol ge pe̱ꞌtsi te mi debe dä ma ha Jerusalén. Ja gehni habu̱ nuꞌu̱ yä majhä mi gu̱tꞌi rä ꞌñuu ha yä nijä, ma xä gu̱ rä Hesu ꞌnepu̱ ma xä me̱tꞌi ꞌne ma xä hyo (Mat. 16:21). Rä apostol Pedro mi pädi xä ñho ge rä Hesu mi geꞌä rä Mesías xki promete rä Zi Dada Jeoba ge ma xä me̱hni pa xä ñämbäbi rä hnini. Hänge zäi ge rä apostol Pedro mi japäbi xä ñhei dä gamfri ge rä Zi Dada Jeoba ma xä hye̱gi xä thopäbi rä Tꞌu̱ (Mat. 16:16). Hänge Pedro bi zitsꞌi rä Hesu nꞌambu̱se̱ ꞌne bi ꞌñembäbi: «¡Zi Hmuu, ñhojäꞌi kongeꞌise̱! ¡Nuꞌi nunka ma gi thogi njabu̱!» (Mat. 16:​22, TNM). Ja ngu di handihu̱, rä apostol Pedro himi mbeni mähye̱gi ja ngu mi mbeni rä Hesu, ꞌne bi ꞌñudi ge himi o̱tꞌe ngue̱nda ndaꞌä rä bolunta rä Zi Dada Jeoba.

6. ¿Hanja bi ꞌñudi rä Hesu ge mi mbeni ngu di mbeni rä Zi Dada Jeoba?

⁶ Rä Hesu bi ꞌñudi ge mi pädi xä ñho te di mbeni rä Dada. Hänge bi ꞌñembäbi rä apostol Pedro: «¡ꞌUege de geke nuꞌi Satá! Ngeꞌä nuꞌi gi ne gi hñägägi gä o̱ꞌtuä rä paha mä Dada. Nu rä mfeni gi beni go yä me̱ti yä jäꞌi, hingo rä me̱ti Äjuä» (Mat. 16:23). Rä Hesu mi pädi ge pa dä kumpli ko rä bolunta rä Zi Dada Jeoba, pe̱ꞌtsi te ma xä sufri ꞌne asta ma xä tho. Hänge nuꞌmu̱ rä Pedro bi ꞌñembäbi ge himi ja mꞌe̱di dä sufri, rä Hesu bi rechaza näꞌä konsehoꞌä. Njabu̱, rä apostol Pedro bi da ngue̱nda ge mi debe dä bädi dä mbeni ngu di mbeni rä Zi Dada Jeoba. ¿Hänge xa mähyoni gä pe̱fihu̱ njabu̱ ꞌnehe?

7. ¿Hanja bi ꞌñudi rä apostol Pedro ge xa mi o̱tꞌe ntsꞌe̱di po dä mbeni ja ngu di mbeni rä Zi Dada Jeoba? (Hyandi rä kꞌoi).

⁷ Ko rä tiempo, rä apostol Pedro bi ꞌñudi ge xa mi o̱tꞌe ntsꞌe̱di po dä mbeni ja ngu di mbeni rä Zi Dada Jeoba. Nubye̱ rä Zi Dada Jeoba bi desidi ge xki zo̱ho̱ rä ora pa dä asepta ha rä hnini yä jäꞌi de märꞌa yä dähni. Hänge bi me̱hni rä apostol Pedro pa dä ma dä predikabi nꞌa rä jäꞌi mrä thuhu Cornelio. Rä Cornelio geꞌä nꞌa de nuꞌu̱ yä mu̱di jäꞌi bi yu̱tꞌi ha rä hnini rä Zi Dada Jeoba mäske mrä mengu de mä nꞌa rä dähni. Änte de geꞌä, yä judío himi numäñho nixi mi ntsitsꞌi ko yä jäꞌi de märꞌa yä dähni. ¿Dä za gi imäjinä hängu bi japäbi xä ñhei rä apostol Pedro dä paatä rä mfeni? Pe ora bi ntiende ndaꞌä rä bolunta rä Zi Dada Jeoba, bi mꞌu̱i dispuesto dä predikabi gatꞌho yä jäꞌi mäske hingä myä judío. Di handihu̱ njabu̱, ngeꞌä nuꞌmu̱ Cornelio bi yꞌapäbi rä apostol Pedro ge dä ma dä zo̱ni ha rä nguu, näꞌä mäntꞌä bi ma pa bi predikabi (Hech. 10:​28, 29). Rä apostol Pedro bi predikabi Cornelio ꞌne rä familia ꞌne nuꞌu̱ bi nxixtehe (Hech. 10:​21-23, 34, 35, 44-48).

8. ¿Hanja ma gä udihu̱ ge di mbenihu̱ ja ngu di mbeni rä Zi Dada Jeoba? (1 Pedro 3:8).

⁸ Mi thogi rꞌa yä je̱ya, rä apostol Pedro bi ꞌñembäbi nuꞌu̱ yä mu̱di kristianu: «Nuꞌähu̱ gri gatꞌhohu̱, pe̱ꞌtshu̱ nꞌadä rä mfeni» (hñeti 1 Pedro 3:8).a Pa gä jamäsuhu̱ nunä konseho ꞌne gä pe̱ꞌtsihu̱ nꞌadä rä mfeni ko mä kuhu̱ de gatꞌho rä Xiꞌmhai, mähyoni gatꞌho gä mbenihu̱ ja ngu di mbeni rä Zi Dada Jeoba. ¿Pe toꞌo ma dä xikägihu̱ hanja di mbeniꞌä? ¡Rä Mäkä Tꞌofo! Por ejemplo, mi mꞌu̱kua rä Hesu ha rä Xiꞌmhai, bi nupäbi yä mfeni nuꞌu̱ yä de̱ni pa mꞌe̱tꞌo dä prokura dä me̱päbi rä Zi Dada Jeoba (Mat. 6:33). Mu̱ di mbenihu̱ ja ngu di mbeni rä Zi Dada Jeoba, ¿te ma gä pe̱fihu̱ mu̱ nꞌa rä ku dä xikägihu̱ ge ne dä umbäbi mäxo̱ge de rä tiempo rä Zi Dada Jeoba pa dä me̱päbi? ¿Ma gä desanimäbihu̱ ja ngu rä apostol Pedro mi ne dä desanimäbi rä Hesu? ¡Hinä! Zäi ge nuju̱ ma gä felisitahu̱ näꞌä zi ku po näꞌä rä hogä desision ne dä me̱fi, ꞌne asta ma gä ofresehu̱ gä fatsꞌihu̱.

HINGÄ ÑꞌEXMÄNSUHU̱ ꞌNE GÄ PE̱PÄBIHU̱ MÄRꞌAA

9, 10. ¿Hanja bi ꞌñudi rä Hesu ge mi ꞌmu̱i dispuesto dä me̱päbi märꞌaa ja ngu nꞌa rä ꞌme̱go?

⁹ Näꞌä xui änte de xä tho rä Hesu, bi ꞌñuti rä apostol Pedro ꞌne nuꞌu̱ märꞌa yä apostol hanja xa mähyoni dä me̱päbi märꞌaa. Pa geꞌä, bi mändabi Pedro ꞌne Juan ge dä hyoni gatꞌho näꞌä mi ja mꞌe̱di pa dä ntꞌoxi mähye̱gi. Zäi ge nuꞌu̱ bi hyoni ꞌnehe nꞌa rä tꞌu̱kä tina, rä dehe ꞌne rꞌa yä toalla pa dä su̱kuäbi yä ua gatꞌho nuꞌu̱ ma xä ntini ha nunä tꞌoxi. Pe, ¿toꞌo ma xä mꞌu̱i dispuesto xä xu̱kuäbi yä ua rä Hesu ꞌne nuꞌu̱ yä apostol?

¹⁰ Ha näꞌä rä tiempoꞌä, yä ꞌme̱go go geꞌu̱ mi xu̱kuäbi yä ua yä zo̱nte. Pe näꞌä rä xuiꞌä, rä Hesu himbi mbeni yo mꞌiki ꞌne mäntꞌä bi hñäki näꞌä rä patꞌi mi hñä, bi gu̱ nꞌa rä toalla, bi xitꞌä rä dehe ha näꞌä rä tꞌu̱kä tinä ꞌne bi mu̱di bi xu̱kuäbi yä ua nuꞌu̱ yä apostol (Juan 13:​4, 5). Zäi ge nuꞌu̱ yä apostol, nunka bi imäjinä ge rä Hesu ma xä me̱fi njabu̱. ¿Dä za gi imäjinä hängu bi tarda rä Hesu pa bi uadi bi xu̱kuäbi yä ua nuꞌu̱ 12 yä apostol? Bi xu̱kuäbi yä ua asta rä Judas näꞌä toꞌo ma xä traisionä mꞌe̱fa. Hää, mäske rä Hesu mi geꞌä rä Tꞌu̱ Äjuä, näꞌä bi mꞌu̱i dispuesto bi ja nꞌa rä ꞌme̱fi ja ngu nꞌa rä ꞌme̱go. Mi uadi rä Hesu, bi ꞌñembäbi nuꞌu̱ yä apostol: «¿Tso ri mfenihu̱ nuꞌä stä o̱ꞌtꞌaꞌihu̱? Nuꞌähu̱ gi enju̱ ge go geki ri Xahnätegihu̱ ꞌne ri Hmuugihu̱. Nuꞌä gi enju̱ geꞌä mäjuäni, ngeꞌä hää go gekägi. Hänge ngeꞌä nuga ri Hmugihu̱ ꞌne ri Xahnätegihu̱ ꞌne stä xu̱kꞌä ri uahu̱, hänge nuꞌähu̱ ꞌnehe ri ꞌñepꞌähu̱ gi nxu̱kuä uahu̱ nꞌa ngu mänꞌaa» (Juan 13:​12-14).

11. ¿Hanja bi ꞌñudi rä apostol Pedro ge xki bädi ndunthi de näꞌä bi me̱fi rä Hesu? (1 Pedro 5:5; hyandi ꞌnehe rä kꞌoi).

¹¹ Rä apostol Pedro bi bädi ndunthi de näꞌä bi me̱fi rä Hesu. Nuꞌmu̱ rä Hesu ya xki mengi pa mähetsꞌi; nꞌa rä pa, rä apostol Pedro bi ja nꞌa rä milagro pa bi yꞌo̱the nꞌa rä ñꞌo̱ho̱ näꞌä himi tsa dä ñꞌo dende nuꞌmu̱ bi mꞌu̱i (Hech. 1:​8, 9; 3:​2, 6-8). Näꞌä rä oraꞌä, bi muntsꞌi xi ndunthi yä jäꞌi pa bi hyandi näꞌä xki me̱fi rä apostol Pedro (Hech. 3:11). Ma gä benihu̱ ge rä apostol Pedro näꞌä xki te ha nꞌa rä luga habu̱ yä jäꞌi mi nzäi dä ꞌñexä yä nsu po näꞌä mi pe̱fi. ¿Hänge te ma xä xipäbibye̱ nuꞌu̱ yä jäꞌi xki muntsꞌi? ¿Go ma xä ꞌñexä rä nsu po näꞌä bi me̱fi? Hinä, näꞌä bi ꞌñenä: «Nunä ñꞌo̱ho̱ gi hanthu̱ ꞌne gi pähu̱ ge mrä douahmä, go rä Hesu bi yꞌo̱the ngeꞌä di kamfriheꞌä» (Hech. 3:​12-16). Hää, nubye̱ rä apostol Pedro nzäntho mi eꞌtsuäbi rä nsu rä Zi Dada Jeoba ꞌne rä Hesu po näꞌä mi pe̱fi. Mꞌe̱fa bi yꞌofo nꞌa rä karta habu̱ bi ꞌñenä: «Ñhehu̱ ko nꞌa rä hogä mfeni ꞌne ogi exä ri nsuhu̱» (hñeti 1 Pedro 5:​5, TNM). Nuya yä noya, zäi ge jakägihu̱ gä benihu̱ ora rä Hesu bi ngu̱tꞌi nꞌa rä toalla ꞌne bi mu̱di bi xu̱kuäbi yä ua nuꞌu̱ yä apostol.

12. Ja ngu rä apostol Pedro, ¿hanja ma gä udihu̱ ge hindi honihu̱ dä tꞌeskägihu̱ mä nsuhu̱?

¹² Ja ngu rä apostol Pedro, nuju̱ ꞌnehe dä za gä pädihu̱ gä eꞌtsuäbihu̱ rä nsu rä Zi Dada Jeoba ꞌne rä Hesu ꞌne hingä go gä exä mä nsuhu̱ po näꞌä di pe̱fihu̱. Nuꞌmu̱ rä apostol Pedro bi ꞌñenä «ñhehu̱ ko nꞌa rä hogä mfeni ꞌne ogi exä ri nsuhu̱», signifika ge mähyoni gä benihu̱ ge näꞌä di mäñhu̱ ꞌne näꞌä di pe̱fihu̱ debe dä bo̱ni dende ha mä mfenihu̱ ꞌne ha mä korasohu̱. Nuju̱ di ne gä fatsꞌihu̱ märꞌaa, ngeꞌä xa di mädihu̱ rä Zi Dada Jeoba ꞌne mä mikꞌeihu̱ hingä ngeꞌä di honihu̱ go dä tꞌeskägihu̱ mä nsuhu̱. Mu̱ ko ndunthi rä johya gä sigihu̱ gä pe̱päbihu̱ rä Zi Dada Jeoba ꞌne gä fatsꞌihu̱ mä kuhu̱ —nsinke gä to̱ꞌmihu̱ ge märꞌaa dä da ngue̱nda näꞌä di pe̱fihu̱—, ma gä udihu̱ ge xa mäjuäni xtä “ñhehu̱ ko nꞌa rä hogä mfeni ꞌne hindi exä mä nsuhu̱” (Mat. 6:​1-4).

MA GÄ UDIHU̱ GE JA MÄ MFENIHU̱

13. ¿Hanja ma gä udihu̱ ge ja mä mfenihu̱?

¹³ ¿Hanja ma gä udihu̱ ge ja mä mfenihu̱? (1 Ped. 4:​7, TNM). Ma gä udihu̱ ge ja mä mfenihu̱ mu̱ näꞌä di mäñhu̱ ꞌne näꞌä di pe̱fihu̱, di nthe̱ ko näꞌä di mbeni rä Zi Dada Jeoba. ꞌNehe ma gä udihu̱ ge ja mä mfenihu̱, mu̱ nunka di pumfrihu̱ ge näꞌä rä ntsitsꞌi di pe̱ꞌtsihu̱ ko rä Zi Dada Jeoba, geꞌä mänꞌa xa mähyoni ke gatꞌho märꞌa yä tꞌo̱tꞌe. Mu̱ ja mä mfenihu̱, hingä ma gä mbenihu̱ ge xa di pädihu̱ gatꞌho, sino ke nzäntho gä xatuäbihu̱ rä Zi Dada Jeoba pa gä apäbihu̱ rä mfatsꞌi.b

14. ¿Te bi me̱fi rä apostol Pedro ora himbi hyombäbi rä mfatsꞌi rä Zi Dada Jeoba?

¹⁴ Näꞌä rä xui änte de xä tho rä Hesu, bi ꞌñembäbi nuꞌu̱ yä apostol: «Nu rä nxuuibye̱, gatꞌhoꞌihu̱ [ . . . ] ma gi tsogäse̱hu̱ua» (Mat. 26:31). Rä apostol Pedro xa mi ꞌmu̱i seguro ge nunka ma xä fayabi rä Hesu, hänge mäntꞌä bi dädi ꞌne bi ꞌñembäbi: «Mäske gatꞌho märꞌa dä ꞌuege de geꞌäꞌi, pe nugi hiñhaꞌmu̱ gä ꞌuege de geꞌäꞌi» (Mat. 26:33). Näꞌä rä xuiꞌä, rä Hesu bi ꞌñembäbi rꞌa de geꞌu̱: «Nuhuhu̱ ꞌne yꞌaphu̱ Äjuä pa gi tse̱tꞌhu̱ yä tsꞌo thogi» (Mat. 26:41). Pe rä apostol Pedro himbi jamäsu nunä konseho ꞌne himbi hyombäbi rä mfatsꞌi rä Zi Dada Jeoba. Hänge bi hyopäbi ge rä tsu go bi dominä ꞌne bi uadi bi mää ge himi konose rä Hesu. Mꞌe̱fa, Pedro xa bi arrepenti ndunthi po näꞌä bi me̱fi (Mat. 26:​69-75).

15. ¿Te bi me̱fi rä Hesu näꞌä xui änte de xä tho?

¹⁵ Mäske rä Hesu mrä perfecto, näꞌä nzäntho bi xatuäbi rä Zi Dada Jeoba pa bi yꞌapäbi rä mfatsꞌi. Geꞌä bi me̱fi näꞌä rä xui änte de xä tho ꞌne geꞌä bi umbäbi rä balo pa bi za bi me̱päbi rä bolunta rä Dada (Mat. 26:​39, 42, 44; Juan 18:​4, 5). Zäi ge rä apostol Pedro nunka bi pumfri hanja rä Hesu xa bi xatuäbi rä Zi Dada Jeoba näꞌä xuiꞌä.

16. ¿Hanja bi ꞌñudi rä apostol Pedro ge nubye̱ hää xki bädi dä hyombäbi rä mfatsꞌi rä Zi Dada Jeoba? (1 Pedro 4:7).

¹⁶ Ko rä tiempo, rä apostol Pedro ꞌnehe himbi hye̱gi de bi xatuäbi rä Zi Dada Jeoba pa bi yꞌapäbi rä mfatsꞌi. Mi nuhu rä Hesu de rä du, bi ꞌñembäbi rä Pedro ꞌne nuꞌu̱ märꞌa yä apostol ge xä ma pa xä do̱ꞌmi ha rä hnini Jerusalén, habu̱ ma xä hñäni rä mäkä tsꞌe̱di Äjuä pa xä sigi xä predika (Luc. 24:49; Hech. 1:​4, 5). ¿Te bi me̱fi Pedro? ¿Bi hñudi bi do̱ꞌmitho? Hinä. Rä Mäkä Tꞌofo udi ge Pedro bi muntsꞌi ko märꞌaa pa xa bi xatuäbi rä Zi Dada Jeoba (Hech. 1:​13, 14). Mꞌe̱fa, ha näꞌä rä mu̱di karta bi yꞌofo Pedro, bi ꞌñembäbi nuꞌu̱ märꞌa yä kristianu: «ꞌÑudihu̱ ge ja ri mfenihu̱ ꞌne ogi he̱gihu̱ de gi xatuäbihu̱ Äjuä» (hñeti 1 Pedro 4:​7, TNM). Hää, di nheki hanja rä apostol Pedro, nubye̱ hää xki bädi hanja dä hyombäbi rä mfatsꞌi rä Zi Dada Jeoba. Njabu̱, bi za bi umbäbi ndunthi rä mfatsꞌi yä kristianu de näꞌä tiempoꞌä (Gál. 2:9).

17. ¿Hanja ma gä udihu̱ ge ja mä mfenihu̱ ꞌne ge di hombäbihu̱ rä mfatsꞌi rä Zi Dada Jeoba? (Hyandi ꞌnehe rä kꞌoi).

¹⁷ Pa gä udihu̱ ge ja mä mfenihu̱ ꞌne ge di hombäbihu̱ rä mfatsꞌi rä Zi Dada Jeoba, mähyoni hingä he̱gihu̱ de gä xatuäbihu̱. Debe gä apäbihu̱ rä gia ꞌne rä mfatsꞌi mäske di mbenihu̱ ge ya di pädihu̱ te ma gä pe̱fihu̱. Pe tobe mänꞌa di debe gä xatuäbihu̱ ꞌne gä apäbihu̱ rä mfatsꞌi änte de gä huahnihu̱ nꞌa rä däta desision. ¿Por hanja? Ngeꞌä rä Zi Dada Jeoba xa di mäkägihu̱ ꞌne go mänꞌa pädi ndaꞌä mänꞌa xä ñho pa gekhu̱.

18. Ja ngu rä apostol Pedro, ¿te dä za gä lograhu̱ ꞌnehe?

¹⁸ Rä Zi Dada Jeoba bi hyogägihu̱ pa dä za gä udihu̱ näꞌä rä mfeni ꞌne näꞌä rä mꞌu̱i pe̱ꞌtsiꞌä (Gén. 1:26). ¿Hänge xa di umbäbihu̱ njamädi ngeꞌä bi hyogägihu̱ njabu̱? Mäjuäni ge nuju̱ xtä mꞌu̱ihu̱ ko rä tsꞌoki, ꞌne ge hindä za gä pe̱ꞌtsihu̱ gatꞌho nuꞌu̱ yä mfeni ꞌne nuꞌu̱ yä hogä mꞌu̱i pe̱ꞌtsi rä Zi Dada Jeoba (Is. 55:9). Pe ja ngu rä apostol Pedro, mu̱ xa gä o̱thu̱ ntsꞌe̱di, ma gä lograhu̱ ꞌnehe gä mbenihu̱ ja ngu di mbeni rä Zi Dada Jeoba. Hää, ma gä honihu̱ hanja gä fatsꞌihu̱ märꞌaa ꞌne nzäntho go ma gä eꞌtsuäbihu̱ rä nsu rä Zi Dada Jeoba hingä go ma gä exä mä nsuhu̱. ꞌNehe nzäntho ma gä xatuäbihu̱ pa gä apäbihu̱ rä mfatsꞌi änte de te gä pe̱fihu̱.