«Huahnihu̱ nubye̱ toꞌo gi ne gi pe̱päbihu̱»

1. Pa gä tinihu̱ näꞌä xa mäjuäni rä johya, ¿te di debe gä pe̱fihu̱ ꞌne por hanja? (Isaías 48:​17, 18).

JEOBA näꞌä mä Zi Dadahu̱, xa di mäkägihu̱ ndunthi ꞌne näꞌä ne dä hyandi gä ꞌmu̱ihu̱ ko rä johya tanto nubye̱ ꞌne xudi ndämäni (Ecl. 3:​12, 13). Nuꞌmu̱ bi hyogägihu̱, bi rꞌakägihu̱ rä mfeni pa gä pe̱fihu̱ ndunthi yä tꞌo̱tꞌe. Pe ninꞌa rä jäꞌi himbi hyoki pa dä mändase̱ nixi pa go dä mää ndaꞌä xä ñho ꞌne ndaꞌä hinxä ñho (Ecl. 8:9; Jer. 10:23). Jeoba pädi xä ñho ge pa gä tinihu̱ näꞌä xa mäjuäni rä johya, pe̱ꞌtsi te di debe gä o̱tehu̱ ꞌne gä ꞌmu̱ihu̱ ja ngu di mändaꞌä (hñeti Isaías 48:​17, 18).

2. a) ¿Te ne rä Zithu gä kamfrihu̱? b) ¿Te xä me̱fi rä Zi Dada Jeoba pa dä ꞌñudi ge hingä mäjuäni näꞌä xä mää rä Zithu?

² ¿Pe gi pädi? Rä Zithu ne dä jakägihu̱ gä kamfrihu̱ ge dä za gä ꞌmu̱ihu̱ ko rä johya ꞌne ge dä za gä mändase̱hu̱ nsi rä mfatsꞌi rä Zi Dada Jeoba (Gén. 3:​4, 5). ¿Te xä me̱fi rä Zi Dada Jeoba pa dä ꞌñudi ge hingä mäjuäni näꞌä xä mää rä Zithu? Xä hye̱gi yä jäꞌi dä mändase̱ po nꞌa rä tiempo. ¿Te dä za gä handihu̱? ¿Xä logra yä jäꞌi dä dini näꞌä xa mäjuäni rä johya? ¡Hinä! Pe ha rä Mäkä Tꞌofo hää no̱ni ndunthi yä ñꞌo̱ho̱ ꞌne yä ꞌme̱hñä nuꞌu̱ bi desidi bi yꞌo̱te rä Zi Dada Jeoba ꞌne bi dini ndunthi rä johya. De gatꞌho nuyu̱ yä zi jäꞌi, Ñhesukristo geꞌä mänꞌa bi dini ndunthi rä johya ngeꞌä bi me̱päbi rä Zi Dada Jeoba. Mꞌe̱tꞌo, ma gä handihu̱ por hanja rä Ñhesukristo bi huahni bi me̱päbi rä Zi Dada Jeoba. ꞌNepu̱, ma gä handihu̱ por hanja rä Zi Dada Jeoba ri ꞌñepäbi gä pe̱päbihu̱. ꞌNe pa ri uadi, ma gä benihu̱ por hanja dä huahnihu̱ gä pe̱päbihu̱ rä Zi Dada Jeoba.

POR HANJA RÄ HESU BI HUAHNI BI ME̱PÄBI JEOBA

3. ¿Te bri ofresebi rä Hesu pe te bi huahni bi me̱fi?

³ Mi mꞌu̱kua rä Hesu ha rä Xiꞌmhai, pe̱ꞌtsi te bi huahni toꞌo mi ne dä me̱päbi. Hixki thogi ndunthi de xki nxixtehe rä Hesu, rä Zithu bi ꞌñembäbi ge mu̱ xä ndäne mäske ho̱nse̱ nꞌa mꞌikitho, näꞌä xä umbäbi gatꞌho nuꞌu̱ yä gobiernu ja ha rä xiꞌmhai. Pe rä Hesu bi ꞌñembäbi: «ꞌUege de geke Satá. Xä ntꞌofo ha rä Mäkä Tꞌofo ge Äjuä ri Hmuu go geꞌä gi nsunda, ꞌne ho̱nse̱ꞌä gi pe̱päbi» (Mat. 4:​8-10). ¿Por hanja rä Hesu bi rechaza näꞌä bi ofresebi rä Zithu? Ma gä handihu̱ por hanja.

4, 5. ¿Por hanja rä Hesu bi huahni bi me̱päbi rä Zi Dada Jeoba?

⁴ Rä Hesu bi huahni dä me̱päbi rä Zi Dada Jeoba ngeꞌä dä thogiꞌä dä thogi, xa di mädi ko ngatꞌho rä koraso (Juan 14:31). ꞌNehe, rä Hesu pe̱päbi rä Zi Dada Jeoba ngeꞌä pädi ge geꞌä xä ñho (Juan 8:​28, 29; Apoc. 4:11). Pädi xä ñho ge rä Zi Dada Jeoba go geꞌä xä rꞌakägihu̱ rä te, xä rꞌakägihu̱ ndunthi yä tꞌo̱tꞌe mähotho ꞌne ge dä za gä pe̱ꞌtsuäbihu̱ rä komfiansa (Sal. 33:4; 36:9; Sant. 1:17). ꞌNehe pädi ge rä Zi Dada Jeoba nzäntho xä xipäbi näꞌä mäjuäni ꞌne ge go geꞌä xä umbäbi gatꞌho näꞌä pe̱ꞌtsi (Juan 1:14). Rä Hesu pädi xä ñho tenguꞌä rä mꞌu̱i rä Zi Dada Jeoba, pe ꞌnehe pädi xä ñho tenguꞌä rä mꞌu̱i rä Zithu. Pädi ge rä Zithu näꞌä nꞌa rä kꞌuamba, rä embidioso, honi rä ñhose̱, ꞌne ge go rä tsꞌoki hänge njabu̱ gatꞌho yä jäꞌi tu (Juan 8:44). Po geꞌä, rä Hesu nunka bi mbeni dä de̱mbäbi rä mꞌu̱i rä Zithu, nixi nunka bi beni dä nju̱tsꞌi kontra rä Zi Dada Jeoba (Filip. 2:​5-8).

⁵ Rä Hesu bi huahni bi me̱päbi rä Zi Dada Jeoba po nunä mä nꞌa rä däta raso: mi pädi xä ñho ge mu̱ xä ñꞌo mänjuäntho ha rä ꞌñuu ꞌne hinxä fayabi, po mädee de geꞌä ma xä ꞌñehe ndunthi yä hogä tꞌo̱tꞌe (Heb. 12:2). ¿Te mä hogä tꞌo̱tꞌeꞌu̱? Ma xä nsundabi rä thuhu rä Dada. ꞌNehe, ko näꞌä ma xä me̱fi rä Hesu, rä Zi Dada Jeoba ma xä za xä hñäki gatꞌho näꞌä rä sufrimiento bä hä rä Zithu nuua ha rä xiꞌmhai.

POR HANJA RI ꞌÑEPÄBI JEOBA GÄ PE̱PÄBIHU̱

6, 7. a) ¿Por hanja ndunthi yä jäꞌi hingi pe̱päbi rä Zi Dada Jeoba? b) ¿Por hanja xa ri ꞌñepäbi Jeoba gä pe̱päbihu̱?

⁶ Mäpaya, ndunthi yä jäꞌi hingi pe̱päbi rä Zi Dada Jeoba ngeꞌä hingi pädi toꞌoꞌä. Nuꞌu̱ hingi pädi ge rä Zi Dada Jeoba xa rä hojäꞌi ꞌne xa di mäkägihu̱. ꞌNehe hingi pädi gatꞌho nuꞌu̱ yä hogä tꞌo̱tꞌe xä me̱fi po geꞌu̱. Mi njabu̱ ꞌnehe nuꞌu̱ yä jäꞌi bi predikabi rä apostol Pablo ha rä hnini Atenas (Hech. 17:​19, 20, 30, 34).

⁷ Rä apostol Pablo bi predikabi nuꞌu̱ yä jäꞌi ꞌne bi ꞌñuti ge näꞌä xa mäjuäni Äjuä go geꞌä «di rꞌakhu̱ rä te ꞌne rä ndähi pa gä ju̱ntsꞌihu̱, ꞌne gatꞌho yä tꞌo̱tꞌe nuꞌu̱ di hoñhu̱» (Hech. 17:25). ꞌNehe bi ꞌñuti hanja de nꞌadä rä jäꞌi, Äjuä «bi japi bi bo̱ngä gatꞌho yä mexiꞌmhai» (Hech. 17:26 Ár ꞌRaꞌyo Nkohi Jö). Bi esplikabi nuꞌu̱ yä me Atenas ge po ränge Äjuä «di ꞌmu̱hu̱ ꞌne di ñꞌänihu̱» (Hech. 17:28).

8. ¿Te mä tꞌo̱tꞌe nunka ma dä me̱fi rä Zi Dada Jeoba? ¿Hanja utkägihu̱ ge xa di mäkägihu̱?

⁸ Koꞌmu̱ rä Zi Dada Jeoba geꞌä mä Hyokätehu̱ ꞌne pe̱ꞌtsi gatꞌho rä tsꞌe̱di, näꞌä dä za dä obligabi gatꞌho yä jäꞌi pa dä me̱päbi. Pe hingä geꞌä ne; sino ke näꞌä utkägihu̱ ge xa mäjuäni ꞌmu̱i ꞌne ge xa di mäkägihu̱. Näꞌä ne ge kada nꞌa de gekhu̱ gä pädihu̱ toꞌoꞌä ꞌne gä huahnise̱hu̱ mu̱ di ne gä pe̱ꞌtsihu̱ nꞌa rä hogä ntsitsꞌi kongeꞌä o hinä (1 Tim. 2:​3, 4). Po geꞌä, rä Zi Dada Jeoba utkägihu̱ hanja gä predikabihu̱ märꞌaa ꞌne gä utihu̱ näꞌä ma dä me̱fi po yä jäꞌi ꞌne rä Xiꞌmhai (Mat. 10:​11-13; 28:​19, 20). ꞌNehe, xä rꞌakägihu̱ nꞌa rä mhuntsꞌi habu̱ dä za gä ntinihu̱ pa gä nsundabihu̱ rä thuhu ꞌne habu̱ dä za gä hänihu̱ rä mfatsꞌi de yä anciano (Hech. 20:28).

9. ¿Hanja di nheki rä mhäte rä Zi Dada Jeoba?

⁹ ¡Hängu di mäkägihu̱ rä Zi Dada Jeoba! Näꞌä udi rä mhäte asta po nuꞌu̱ yä jäꞌi hinte ne dä bädi de Geꞌä. Dende mäyaꞌmu̱, yä miyontho nuꞌu̱ yä jäꞌi xä desidi dä mꞌu̱i ja ngu nese̱ hingä ja ngu ne rä Zi Dada Jeoba. Pe mäske njabu̱, rä Zi Dada Jeoba xä umbäbi näꞌä di japäbi mꞌe̱di pa dä mꞌu̱i xä ñho (Mat. 5:​44, 45; Hech. 14:​16, 17). Hää, mäske nuꞌu̱ yä jäꞌi hinte ne dä bädi de rä Zi Dada Jeoba, pe näꞌä hopäbi dä me̱ꞌtsi nꞌa rä familia, dä me̱ꞌtsi yä bätsi, dä me̱ꞌtsi yä amigo, dä mpe̱fi ꞌne dä disfruta de näꞌä xä logra (Sal. 127:3; Ecl. 2:24). Hinte mä duda di pe̱ꞌtsihu̱ ge rä Zi Dada Jeoba xa di mädi gatꞌho yä jäꞌi (Éx. 34:6). Pe xi nuju̱, ¿te mä raso xtä pe̱ꞌtsihu̱ pa xtä huahnihu̱ gä pe̱päbihu̱ rä Zi Dada Jeoba? Ma gä benihu̱.

POR HANJA DÄ HUAHNIHU̱ GÄ PE̱PÄBIHU̱ JEOBA

10. a) ¿Por hanja xtä huahnihu̱ gä pe̱päbihu̱ rä Zi Dada Jeoba? (Mateo 22:37). b) ¿Hanja xä maxꞌäꞌi näꞌä rä pasensia udi rä Zi Dada Jeoba? (Salmo 103:​13, 14).

¹⁰ Ja ngu rä Hesu, nuju̱ di pe̱päbihu̱ rä Zi Dada Jeoba ngeꞌä xa di mädihu̱ ko ngatꞌho mä korasohu̱ (hñeti Mateo 22:​37, TNM). Entremäs di konosehu̱ tenguꞌä rä mꞌu̱i rä Zi Dada Jeoba, geꞌä mänꞌa jakägihu̱ gä mädihu̱. Por ejemplo, rä Mäkä Tꞌofo udi ge rä zi Dada Jeoba pe̱skägihu̱ ndunthi rä pasensia ꞌne di punꞌgägihu̱. Mäyaꞌmu̱, nuꞌmu̱ yä israelita bi ꞌuege de geꞌä, näꞌä bi ꞌñembäbi: «Di bänteꞌihu̱, tsohu̱bu̱ näꞌä ri ꞌñuuhu̱ xä ntsꞌo» (Jer. 18:11). Rä Zi Dada Jeoba beni ge nuju̱ xtä mꞌu̱ihu̱ ko rä pekado (hñeti Salmo 103:​13, 14). Ora gi handi hanja rä Zi Dada Jeoba pe̱skägihu̱ ndunthi rä pasensia ꞌne xa rä hojäꞌi kongekhu̱, ¿hingi rꞌaꞌi rä ganä gi umbäbi ri bida pa gi pe̱päbi pa nzäntho?

11. ¿Por hanja xtä huahnihu̱ gä pe̱päbihu̱ rä Zi Dada Jeoba?

¹¹ ꞌNehe xtä huahnihu̱ gä pe̱päbihu̱ rä Zi Dada Jeoba ngeꞌä di pädihu̱ ge geꞌä xä ñho gä pe̱fihu̱ (Mat. 4:10). Ja ngu rä Hesu, ꞌnehe di benihu̱ ge mu̱ gä yꞌohu̱ mänjuäntho ha rä ꞌñuu rä Zi Dada Jeoba ꞌne hingä fayabihu̱; ma gä nsundabihu̱ rä thuhu ꞌne ma gä johyabihu̱ rä koraso. Njabu̱, ma gä udihu̱ ge rä Zithu näꞌä nꞌa rä kꞌuamba. Mu̱ gä huahnihu̱ gä pe̱päbihu̱ rä Zi dada Jeoba dende nubye̱, ma gä pe̱ꞌtsihu̱ rä oportunida de gä pe̱päbihu̱ pa nzäntho (Juan 17:3).

12, 13. ¿Te dä za gä pädihu̱ de näꞌä xä thogi rä zi nju Jane ꞌne rä zi nju Pam?

¹² Dende nuꞌmu̱ di bätsihu̱, dä za gä mädihu̱ rä Zi Dada Jeoba ko ngatꞌho mä korasohu̱. Näꞌä mhäteꞌä hingä ma dä käni mäske dä thogi yä je̱ya. Geꞌä bi thogi ko yoho yä zi nju yä thuhu Jane ꞌne Pam.a Jane mi pe̱ꞌtsi 11 nje̱ya ꞌne Pam mi pe̱ꞌtsi 10 nje̱ya nuꞌmu̱ bi mu̱di bi nxadi rä Mäkä Tꞌofo. Yä dada nuyu̱ yä nxutsi himbi ne bi hñäni nꞌa rä ntꞌudi de rä Mäkä Tꞌofo, pe bi tꞌembäbi ge xä za xä ntsitsꞌi ko yä testigo rä Jeoba mentä hinxä hye̱gi de xä ntini ha rä nijä. Rä zi nju Jane enä: «Näꞌä bi ꞌñutkägi yä testigo rä Jeoba de rä Mäkä Tꞌofo, bi maxkägi ndunthi pa hindä tagi ha nꞌa rä bisio ꞌne pa hindä pe̱fi yä tsꞌo tꞌo̱tꞌe ko mä ndoyꞌo ja ngu nuꞌu̱ märꞌa yä yꞌoskuela».

¹³ Himbi thogi ndunthi yä je̱ya, nuyu̱ yä nxutsi bi mpublicadora. Ko rä tiempo ꞌnehe bi mprecursora ꞌne mi mfatsꞌi mi su yä dada ngeꞌä ya bi zi ndäta jäꞌi. Mäpaya rä zi nju Jane enä: «Xtä handi hanja rä Zi Dada Jeoba di su yä amigo ꞌne hindi fayabi. Mäjuäni näꞌä mää 2 Timoteo 2:19 ora enä ge “rä Zi Dada pädi toꞌo gatꞌho yä me̱tiꞌä”». Hinte mä duda ja ge rä Zi Dada Jeoba di su ꞌne nunka di bandonä nuꞌu̱ huahni dä mädi ꞌne dä me̱päbi.

14. ¿Hanja dä za gä defendebihu̱ rä thuhu rä Zi Dada Jeoba? (Hyandi ꞌnehe yä kꞌoi).

¹⁴ Nuju̱ di ne gä mfaxtehu̱ gä defendebihu̱ rä thuhu rä Zi Dada Jeoba. Por ejemplo, mu̱ nuꞌi gi pe̱ꞌtsi nꞌa ri amigo näꞌä xa rä hojäꞌi kongeꞌi, faxꞌäꞌi ꞌne di komprendeꞌi; pe nꞌa rä pa gi yꞌo̱de ge nꞌa rä jäꞌi mää ge ri amigo xa rä tsꞌomꞌu̱i ꞌne hingi mängä näꞌä mäjuäni. ¿Te ma gi pe̱fi? ¿Hänge ma gi defende ri amigo ngeꞌä gi pädi ge hingä mäjuäni näꞌä mhää de geꞌä? Njabu̱ ꞌnehe ora di o̱dehu̱ toꞌo mää yä nkꞌuamba kontra rä Zi Dada Jeoba. Nuju̱ mäntꞌä di defendebihu̱ rä thuhu ꞌne di mäñhu̱ näꞌä mäjuäni de Geꞌä (Sal. 34:1; Is. 43:10). Hää, ko näꞌä di mäñhu̱ ꞌne ko näꞌä di pe̱fihu̱, nuju̱ di udihu̱ ge di huahnihu̱ gä mädihu̱ ꞌne gä pe̱päbihu̱ rä Zi Dada Jeoba ko ngatꞌho mä korasohu̱.

15. ¿Te mä mpadi bi ja rä apostol Pablo ha rä bida ꞌne te mä jäpi bi hñäni? (Filipenses 3:​7, 8).

¹⁵ Kontal gä ꞌmu̱ihu̱ ja ngu di mända rä Zi Dada Jeoba, nuju̱ di ꞌmu̱ihu̱ dispuesto gä tsohu̱bu̱ nuꞌu̱ yä tꞌo̱tꞌe ja ndunthi rä muui pa gekhu̱. ꞌNehe, di jahu̱ rꞌa yä mpadi ha mä bidahu̱ pa dä za gä umbäbihu̱ rä Zi Dada Jeoba mä nꞌa tu̱i o mäxo̱ge de mä tiempohu̱ pa gä pe̱päbihu̱. Geꞌä bi me̱fi rä apostol Pablo nuꞌmu̱ bi zopu̱ näꞌä rä däta nsu mi pe̱ꞌtsi pa bi za bi de̱ni rä Kristo ꞌne bi me̱päbi rä Zi Dada Jeoba (Gál. 1:14). ¿Te bi dähä rä apostol Pablo ko näꞌä bi me̱fi? Bi dini näꞌä xa mäjuäni rä johya ꞌne bi hñäni näꞌä rä däta nsu de dä mända ko rä Kristo ha mähetsꞌi. Rä apostol Pablo nunka bi arrepenti po näꞌä bi me̱fi. Nuju̱ ꞌnehe, nunka ma gä arrepentihu̱ ngeꞌä xtä huahnihu̱ gä pe̱päbihu̱ rä Zi Dada Jeoba (hñeti Filipenses 3:​7, 8, TNM).

16. ¿Te dä za gä pädihu̱ de rä esperiensia rä zi nju Julia? (Hyandi ꞌnehe yä kꞌoi).

¹⁶ Mu̱ nuju̱ gä usahu̱ mä bidahu̱ pa gä pe̱päbihu̱ rä Zi Dada Jeoba, näꞌä ma dä rꞌakägihu̱ ndunthi yä jäpi tanto nubye̱ ngu xudi ndämäni. Geꞌä xä hyandi rä zi nju Julia; nuꞌmu̱ mrä zi tꞌu̱kä nxutsi, bi thahni pa dä ntuhu ko märꞌa yä bätsi ha rä nijä. Nꞌa rä pa, nꞌa rä duhu näꞌä xa mrä famoso bi konose Julia ꞌne bi ofresebi dä umbäbi rꞌa yä klase pa dä bädi dä ntuhu mänꞌa xä ñho. Himbi thogi ndunthi, Julia xa bi mfamosa ꞌne mi tsꞌohni pa dä ntuhu ha nuꞌu̱ yä däta luga habu̱ mi ntini ndunthi yä jäꞌi. Ha näꞌä rä däta ngunsadi habu̱ mi häni yä klase Julia, mä nꞌa rä yꞌoskuela bi predikabi ꞌne bi ꞌñuti ge Jeoba geꞌä rä thuhu Äjuä. Mi thogi rꞌa yä pa, Julia bi asepta dä nxadi rä Mäkä Tꞌofo yo mꞌiki tatꞌä semänä. Ko rä tiempo Julia bi desidi dä usa rä bida pa dä me̱päbi rä Zi Dada Jeoba en lugar de dä dedika dä ntuhu. Rä zi nju Julia enä: «Xa bi jakägi xä ñhei ngeꞌä ndunthi yä jäꞌi mi engägi ge ndrä donda ngeꞌä xti renunsia gä mfamosa. Pe nuga xti desidi gä umbäbi gatꞌho mä bida rä Zi Dada Jeoba pa gä pe̱päbi». Nubye̱ ya xä thogi 30 nje̱ya, rä zi nju Julia enä: «Di senti ndunthi rä johya ha mä mfeni ꞌne ha mä koraso ꞌne di pädi xä ñho ge rä Zi Dada Jeoba ma dä rꞌakägi xudi ndämäni gatꞌho näꞌä di desia» (Sal. 145:16).

SIGI PE̱PÄBI RÄ ZI DADA JEOBA

17. a) ¿Te ri bo̱ni nuꞌu̱ yä noya hutsꞌi ha Hebreos 10:37 pa nuꞌu̱ yä jäꞌi tobe hingi pe̱päbi rä Zi Dada Jeoba? b) ¿Te ri bo̱ni nuꞌu̱ yä noya pa nuju̱ ya di pe̱päbihu̱ rä Zi Dada Jeoba?

¹⁷ Mähyoni gä benihu̱ ge ya xa di ꞌmu̱ihu̱ getbu̱ de rä fin. Rä apostol Pablo bi ꞌñenä: «Ya mero dä zo̱ho̱ nuꞌä toꞌo ma dä ꞌñehe. Ya tsꞌu̱tho yä pa di ꞌme̱di pa dä zo̱ho̱ꞌä» (Heb. 10:37). Nuya yä noya ri bo̱ni ge ya hingi kohibi ndunthi rä tiempo yä jäꞌi pa dä desidi dä me̱päbi rä Zi Dada Jeoba (1 Cor. 7:29). ꞌNehe —nuju̱ ya di pe̱päbihu̱ rä Zi Dada Jeoba— di pädihu̱ ge ma dä ꞌñekägihu̱ ndunthi yä xuñha, pe hingä ma dä dura ndunthi rä tiempo.

18. ¿Te ne rä Zi Dada Jeoba ꞌne rä Hesu gä pe̱fihu̱?

¹⁸ Rä Hesu bi nupäbi yä mfeni nuꞌu̱ yä apostol pa hingä ho̱nse̱ xä mu̱di xä de̱ni, sino ke xä yꞌo̱tꞌe ntsꞌe̱di pa xä sigi xä de̱ni (Mat. 16:24). Hänge mu̱ ya o̱tꞌe ndunthi yä je̱ya de di pe̱päbihu̱ rä Zi Dada Jeoba, mähyoni gä benihu̱ ge näꞌä ne gä o̱thu̱ ntsꞌe̱di pa gä sigihu̱ gä pe̱päbihu̱. Mäjuäni ge rꞌabu̱ dä za dä jakägihu̱ xä ñhei, pe xtä handihu̱ ge ora di pe̱päbihu̱ rä Zi Dada Jeoba, näꞌä rꞌakägihu̱ ndunthi yä jäpi ꞌne di tinihu̱ rä johya dende nubye̱ (Sal. 35:27).

19. ¿Te dä za gä pädihu̱ de näꞌä bi thogi rä zi ku Gene?

¹⁹ Rꞌaa di mbeni ge toꞌo ne dä me̱päbi rä Zi Dada Jeoba, pe̱ꞌtsi te dä ja xi ndunthi yä sacrificio. Bäsjäꞌi, ¿gi senti ge mu̱ gi pe̱päbi rä Zi Dada Jeoba, ma xi dä jaꞌi xä ñhei ꞌne ge hingä ma gi ꞌmu̱i ko rä johya? Nꞌa rä tsꞌu̱ntꞌu̱ rä thuhu Gene enä: «Ndi humämu̱i ge mu̱ xtä nxixtehe ngu nꞌa rä ntestigo rä Jeoba, ya hingä ma xä za xtä diberti. Di senti ge mentä nuga ndi pa ha yä mhuntsꞌi ꞌne ndi po̱ni gä predika, märꞌa yä bäsjäꞌi go mi diberti ha yä ngo, mi po̱ni ko yä nxutsi, ꞌne ge hinto mi häkuäbi de dä ñꞌeni nuꞌu̱ yä videojuego habu̱ di nheki ndunthi yä tuhni». Rä zi ku Gene sigi enä: «Koꞌmu̱ ndi mbeni njabu̱, dä fu̱di dä pe̱fi näꞌä hingi ho rä Zi Dada Jeoba. Po nꞌa rä tiempo dä senti ge dä diberti pe hindä tini näꞌä xa mäjuäni rä johya. Nubye̱ dä fu̱di dä beni näꞌä xti pädi de rä Mäkä Tꞌofo, ꞌne dä handi hängu yä benefisio bi hä toꞌo dä jamäsu näꞌä udi. Hänge dä desidi dä pe̱päbi rä Zi Dada Jeoba ko ngatꞌho mä koraso. Dende geꞌmu̱, xtä handi hanja rä Zi Dada Jeoba xä dädi gatꞌho mä sadi».

20. ¿Te di ꞌmu̱ihu̱ desidido gä pe̱fihu̱?

²⁰ Nꞌa rä pa, rä rey David bi ꞌñembäbi rä Zi Dada Jeoba: «Pe̱ꞌtsi ndunthi rä johya nꞌa rä jäꞌi näꞌä gi huahni pa dä joni kongeꞌi ꞌne pa dä mꞌu̱i ha rä patio ri nguu» (Sal. 65:4). Xi nuju̱, ¿te ma gä pe̱fihu̱? Nuju̱ ma gä huahnihu̱ gä pe̱fihu̱ näꞌä bi me̱fi Josué nuꞌmu̱ bi ꞌñenä: «Pe nuga ꞌne nuꞌu̱ ꞌmu̱i ha mä nguu, nuje ma gä pe̱päbihe rä Zi Dada Jeoba» (Jos. 24:15).