NTʼUDI 01
¿Ankja da zo da möxkí nu̱ Biblia?
Goʼtho di kjáhu̱ yä ntʼöni de nu̱ nzahki, nu̱ dumu̱i, nu̱ dú nihi a da nkja ku̱ mpa pa ri mäní. Nihi di ʼñonfenihu̱ ko yu̱ di thogihu̱ mpa ko mpa, kjangútho go tähmu̱ yä domi o ankja da mpoho yu̱ ma miníhu̱. Ndunthi yä kjäʼni xo núhu̱ ge nu̱ Biblia i thädí gehya ntʼöni, pe nihi i úhti ankja da ʼmu̱fu̱ ra zo, ¿nuke gi mbeni ge nu̱ Biblia da zo da mötsí ʼna kjäʼni gi mpädiui?
1. ¿Té piʼra yä ntʼöni i thädí nu̱ Biblia?
Nu̱ Biblia i thädí gehya ntʼöni: ¿ankja ga mu̱dí nu̱ nzahki?, ¿ó di ʼbu̱fu̱ua?, ¿ó i thogihu̱ yä dumu̱i yu̱ kjäʼni i kjáhu̱ kʼa ra zo?, ¿té i thogi mu̱ di túhu̱?, ¿ó i ndo̱ kja yä ntú mu̱ goʼtho yu̱ kjäʼni i ne da ʼmu̱fu̱ ra zo?, ¿té da ma thogi ko gehna ximojoi abu̱ di ʼbu̱fu̱? Ndunthi yä kjäʼni xi dötihu̱ yo thädí de gehya ntʼöni ha nu̱ Biblia, nuyá i ndo̱ mpohmu̱.
2. ¿Ankja i föxkígihu̱ nu̱ Biblia pa go mpohmu̱ goʼtho yä mpa?
Nu̱ Biblia i xihkígihu̱ té ʼbenkʼa go pe̱hmu̱ pa go ʼmu̱fu̱ ra zo, i úhtibi yu̱ miní ankja da zo da mpohmu̱, ya hiʼtsa go ʼñonfenihu̱ ko gehyu̱ i thogi nihi go mpohmu̱ ko nu ma ʼbe̱fí di peʼtsihu̱. Mu̱ hin go he̱gíhu̱ go xödíhu̱ nuná he̱ʼmi nuke má gi pädi té ʼbenkʼa i mä nu̱ Biblia de piʼra yä tema. Nkjanu̱ da zo gi mä ge “goʼtho nu̱ xi Nthutsí [goʼtho kʼa i mä nu̱ Biblia] [...] ra zo” (2 Timoteo 3:16).
Nuná he̱ʼmi hi geh nu̱ Biblia, pe da möxkígihu̱ go pädihu̱ té i mänkʼa. Po gehna ra zo go xödíhu̱ goʼtho yu̱ xe̱ni de nu̱ Biblia ba íhkua pa gi he̱ti kʼa ga pädi.
MA PÄDIHU̱ MÁ RA NGU DE NU̱ TEMA
Ma núhu̱ ankja nu̱ Biblia xi mötsí ndunthi yä kjäʼni, té ʼbenkʼa da zo go pe̱hmu̱ pa go tsohu̱ ra tsi zo mu̱ di xödíhu̱ nihi ó ra zo da ʼmu̱i tó da möxkígihu̱ pa má go pädihu̱ de nu̱ Biblia.
3. Nu̱ Biblia i úhtigihu̱
Nu̱ Biblia i hñe̱hmi ʼna tsibí i ndo̱ yoti ha nu ma ʼñuhu̱. Da zo go xödíhu̱ pa go pädihu̱ té go pe̱hmu̱ nihi pa go pädihu̱ té da ma thogi pa ri mäní.
Xödíhu̱ Salmo 119:105 nihi ñähu̱ de gehna:
¿Té mi beni de nu̱ Biblia kʼa bi hñutsí nu̱ salmo?
¿Nuke té gi beni de nu̱ Biblia?
4. Nu̱ Biblia i xihkígihu̱ kʼa di ne go pädihu̱
ʼNa ʼbe̱hña bi nú ge nu̱ Biblia mi thädí yä ntʼöni mi kjá di ʼñonfeni po ndunthi yä kjea. Núhu̱ nu̱ VIDEO nihi ñähu̱ de gehna:
¿Té ʼbenkʼa mi ne di bädi kʼa ʼbe̱hña de kʼa video?
¿Ankja ga mötsí nu̱ Biblia ko kʼa bi xödí gege?
Nu̱ Biblia i xihkígihu̱ go kjáhu̱ yä ntʼöni. Xödíhu̱ Mateo 7:7 nihi ñähu̱ de gehna:
¿Da zo da dädí nu̱ Biblia piʼra yä ntʼöni gi peʼtsi? Kjangú, ¿ndänaku̱?
5. Da zo go tsohu̱ ra tsi zo mu̱ di xödíhu̱ nu̱ Biblia
Ndunthi yä kjäʼni xi núhu̱ kʼa ro nföxte de nu̱ Biblia po gehna i ne da xödíhu̱. Núhu̱ nu̱ VIDEO nihi ñähu̱ de gehna:
¿Té i benihu̱ de nu̱ nxödí yu̱ bähtsí de nu̱ video?
Nuyá, ¿ankja ga núhu̱ nu̱ nxödí de nu̱ Biblia?
Nu̱ Biblia i jóhtigihu̱ nihi i xihkígihu̱ kʼa ra zo da ma thogi. Xödíhu̱ Romanos 15:4 nihi ñähu̱ de gehna:
¿Kja má gi ne gi pädi de kʼa ra zo da ma thogi nihi ankja ga jóhtigihu̱ nu̱ Biblia?
6. Da zo go pädihu̱ de nu̱ Biblia mu̱ tó da möxkígihu̱
Mahke yu̱ kjäʼni i xödísehu̱ nu ro Biblia, ndunthi xo núhu̱ ra zo ge piʼna da ʼñuhti. Xödíhu̱ Hechos 8:26-31 nihi ñähu̱ de gehna:
¿Ankja má da zo go pädihu̱ de nu̱ Biblia? (Núhu̱ yu̱ xe̱ni 30 ko nu̱ 31).
Kʼa ʼño̱ho̱ ga Etiopía bi höní tó di mötsí pa di bädi ra zo kʼa mi xödí. Yu̱ ma mpahu̱ya, ndunthi yä kjäʼni xi núhu̱ ra zo mu̱ tó da mötsí pa da bädihu̱ kʼa i mä nu̱ Biblia.
KʼA I MÄHMU̱ PIʼRA YÄ KJÄʼNI: “Xaʼtho gi täha mu̱ gi xödí nu̱ Biblia”.
¿Té gi mänge? ¿Ó gi mbeni nkjapu̱?
KʼA KO PÄDI
Nu̱ Biblia i ʼrahkígihu̱ yä ntʼsofo, i thädí yä ntʼöni i kjá go ʼñonfenihu̱, i xihkígihu̱ kʼa ra zo da ma thogi nihi i jóhtigihu̱.
Kʼa to núhu̱
¿Té ma ntʼsofo to tötihu̱ ha nu̱ Biblia?
¿Té maʼra yä ntʼöni i thädí nu̱ Biblia?
Nuke, ¿té ʼbenkʼa má gi ne gi pädi de nu̱ Biblia?
MÁ GI PÄDI DE GEHNA
Da zo gi pädi ankja yo ntʼsofo de nu̱ Biblia da zo da möxkígihu̱ya.
“Nu̱ mphädi de nu̱ Biblia hin da thege” (La Atalaya, núm. 1 2018)
Nú ankja nu̱ Biblia bi mötsí ʼna ʼño̱ho̱ ta mu̱ mi lengu ko genku̱ mi tso.
Da zo gi pädi yä ntʼsofo hi ra nthi i nahkígihu̱ nu̱ Biblia pa da mpoh yu̱ miní.
“12 yä ntʼsofo pa da mpoh yu̱ miní” (¡Despertad!, núm. 2 2018)
Nú ankja nu̱ Biblia i úhti ge hi ra zo kʼa i mbeni yä kjäʼni de tó genkʼa ro ndä de nu̱ ximojoi.