¿Tó rä Tsi Mähkí Tá?

1. ¿Ó petsite go xo̱hkimbenihu̱ rä Tsi Mähkí Tá?

Rä Tsi Mähkí Tá xi o̱te goʼtho yä ntʼo̱te. Zäi xi ʼmu̱i ʼne zäi da ma ʼmu̱i (Salmo 90:2). Goʼtho yä nto̱de ra zo i nthutsi ha nu̱ Biblia ba ihi de rä Tsi Mähkí Tá (1 Timoteo 1:11). Nu̱ Biblia i mä: “Jehová ma Tsi Táhe [...], nuke petsite go xo̱hkimbenikihe, ge nuke go o̱te goʼtho yä ntʼo̱te”. Nge xi rahki nu ma nzahkihu̱, ho̱nse gegese petsite go xo̱hkimbenihu̱ (Revelación [Apocalipsis] 4:11).

2. ¿A i nkja rä Tsi Mähkí Tá?

Nindi ʼna kjäʼni xi handí kʼa Tsi Mähkí Tá nge ro espíritu, gege ma ndo̱hte ge nugohu̱, nge di nkjahu̱ ga ngo̱ ʼne ga ndoʼyo (Juan 1:18; 4:24). Nihi da zo go pädihu̱ a i nkja mu̱ di hiandíhu̱ kʼa xi o̱te. Núhma ʼna nkʼoi, i ʼbu̱i ndunthi yä íxi ʼne yä do̱ní xi kja pa da uhtigihu̱ ge i negihu̱, ʼne i petsi ndunthi mphädi. Nihi goʼtho kʼa i ʼbu̱i ha nu̱ jitsi i uhtigihu̱ ge petsi ndunthi tse̱dí. Xödi Romanos 1:20.

Nihi da zo go pädihu̱ de rä Tsi Mähkí Tá mu̱ di xödihu̱ ra Biblia. Gengua i mä ankja gege i nú yä kjäʼni, ʼne té ma ntʼo̱te i nú ra zo ʼne té ma ntʼo̱te hi i ne, ʼne nihi ankja i thädi mu̱ i nkja yä ntʼo̱te. Xödi Salmo 103:7-10.

3. ¿I petsi ro thuhu rä Tsi Mähkí Tá?

Hesu bi mä: “Ma Tá gi ʼbu̱i ha nu̱ jitsi, da nthuhki ri thuhu” (Mateo 6:9). Maʼke yä kjäʼni i nzohmu̱ rä Tsi Mähkí Tá kjangú i nehu̱, gege i petsisehe ʼnatho ro thuhu. I ʼbu̱i kjuadi yä hñä abu̱ hi i hno̱mbi ra ngentho ro thuhu rä Tsi Mähkí Tá. Ga hñämfo̱ i hno̱ni Jehová, maʼke nihi i tʼimbi Yavé. Nu̱ Biblia i mä: “Nuke gi petsi kʼa thuhu Jehová, ho̱nseki gi ʼbu̱i amaña de goʼtho nu̱ i ʼbu̱i ha nu̱ ximojoi” (Salmo 83:18).

I ʼbu̱i ndunthi yä Biblia abu̱ xi nkju̱ʼtsibi ro thuhu rä Tsi Mähkí Tá, ʼne ha ku̱ luga xi nkju̱ʼtsi ro thuhu ho̱nse xi nthutsi Nzoya o Dada. Ta ma kjaʼmu̱, mu̱ nga thutsi kʼa me̱tʼo Biblia, bi nthutsi ro thuhu rä Tsi Mähkí Tá ngu ha siete mil yä luga. Mu̱ kʼa Hesu mi uhti de rä Tsi Mähkí Tá a yä kjäʼni, zäi mi no̱mbi ro thuhu. Xödi Juan 17:26.

4. ¿Kja i negihu̱ rä Tsi Mähkí Tá?

Mu̱ rä Tsi Mähkí Tá i mähkigihu̱, ¿ó i he̱gi da thogi yä dumu̱i? ʼRaa i bini ge rä Tsi Mähkí Tá i he̱gi go thohmu̱ yä dumu̱i pa da bädi tengú di hotihu̱. Pe nuna ro ʼbe̱thri. Xödi Santiago 1:13.

Jehová i he̱gi ge go juähnihu̱ kʼa di ne go pe̱hmu̱ ko nu ma nzahkihu̱. Pe kʼa ma ra zo go kjahu̱, go pe̱hpibihu̱ (Josué 24:15). Pe ndunthi yä kjäʼni i pe̱hmu̱ ndunthi yä ntʼo̱te rä ntsʼo, nsohtho i ʼbu̱i ndunthi yä dumu̱i. Pe Jehová i nsenti mu̱ i nú gehya ntsʼo ntʼo̱te. Xödi Génesis 6:5, 6.

Jehová i mähkigihu̱ ʼne i ne go mpohmu̱, nsohtho da gu̱ʼtsi yä dumu̱i ʼne yä ʼu̱gi. Pe rä Tsi Mähkí Tá i pädi o i he̱hma da thogi yä dumu̱i. Kʼa ntʼudi 8 da uhtigihu̱ o i he̱gi da thogi. Xödi 2 Pedro 2:9 ʼne 3:7, 13.

5. ¿Ankja da zo go kuätihu̱ ko rä Tsi Mähkí Tá?

Jehová i ne ge go kuätihu̱ ko gege mu̱ di nzohmu̱ pa go ñähu̱. Rä Tsi Mähkí Tá i ʼñonfeni po goʼthogigohu̱ (Salmo 65:2; 145:18). Nihi i ne da däbeni yu̱ ma tsʼohkihu̱ ʼne i hiandí mu̱ di mpexkehu̱ pa go kjahu̱ kʼa i ne, maʼke i ʼbu̱i yä mpa abu̱ hin di kjahu̱ goʼtho kʼa i to̱ʼmi go pe̱hmu̱. Maʼke di petsihu̱ nu̱ tsʼohki, da zo go nkjahu̱ ro ntsitsi. Xödi Salmo 103:12-14 ʼne Santiago 4:8.

Nge di tuhpibihu̱ nu ma nzahkihu̱ ho̱nse rä Tsi Mähkí Tá go ndo̱ mädihu̱, nindi tó ma ʼna (Marcos 12:30). Di mädihu̱ mu̱ ma di pädihu̱ de gege, ʼne mu̱ di kjahu̱ ku̱ i manda. Nsohtho mu̱ di kjahu̱ nkjagua, nu ma ntsitsi ko gege ma da ze̱di. Xödi 1 Timoteo 2:4 ʼne 1 Juan 5:3.