NTʼUDI 15
¿Tó genkʼa Hesu?
Kʼa Hesu ʼna kjäʼni ge má i hno̱ni po goʼtho nu̱ ximojoi. Pe, mahke yu̱ kjäʼni i pädihu̱ kʼa ro thuhu, tengutho i pädihu̱ tó genkʼa, nihi ndunthi i peʼtsihu̱ naʼño mfeni de a i nkja gege. ¿Té i úhtite nu̱ Biblia de gege?
1. ¿Tó genkʼa Hesu?
Kʼa Hesu ge ʼna espíritu i peʼtsi tse̱dí nihi i ʼbu̱i ha yu̱ jitsi. Kʼa Jehová bi o̱te kʼa Hesu ʼme̱tʼo de goʼtho yu̱ i ʼbu̱i. Po gehna i thsifí “kʼa ʼme̱tʼo de goʼtho yu̱ i ʼbu̱i” (Colosenses 1:15). Nu̱ Biblia i mä ge kʼa Hesu ro “ʼrase tʼu̱” de kʼa Tsi Mähkí Tá, xo kʼa Jehová bi o̱tese gege (Juan 3:16). Kʼa Hesu bi pe̱fí ko kʼa ro Tá, Jehová, bi mötsí pa di o̱teui goʼtho yu̱ i ʼbu̱i (xödí Proverbios 8:30). Yohmí i nchixiui ra ndo̱ zo. Kʼa Hesu genkʼa “hñä”, kʼa di ne go mähmu̱, kʼa i mä kʼa i ne kʼa Tsi Mähkí Tá, kʼa i ʼrahtsi yo hñä nihi yo mfeni de kʼa ro Tá (Juan 1:14).
2. ¿Ó bo íʼ kʼa Hesu nuua ha nu̱ Joi?
Ya xi thogi má de 2.000 yä kjea, mu̱ kʼa Jehová bi gu̱ kʼa ro espíritu santo pa di o̱te ʼna milagro: bi ʼrahtsi kʼa ro nzahki kʼa Hesu —genkʼa ánje i peʼtsi tse̱dí— de a jitsi ta a kʼa ro mu̱i ʼna xuhtsí mbro birje, kʼa ro thuhu mbro María. Po gehna, kʼa Hesu bi ʼmu̱i ngu ʼna kjäʼni (xödí Lucas 1:34, 35). Gege bo ʼíkua ha nu̱ Joi pa di nkja kʼa Kristo, o kʼa Mesías kʼa hmä di ʼníhi, nihi pa di mötsí yu̱ kjäʼni.a Goʼtho ku̱ profecía kʼa hmä de kʼa Mesías bi thogi ko gege. Nkjanu̱ ku̱ kjäʼni bi zo bi bädihu̱ ge “kʼa Kristo, ro tʼu̱ kʼa Tsi Mähkí Tá i ʼbu̱i” (Mateo 16:16).
3. ¿Nuyá abu̱ i bu̱ʼ kʼa Hesu?
Mu̱ nga theʼ kʼa ro nzahki ngu ʼna kjäʼni, kʼa Hesu bi thsotsi ngu ʼna espíritu pa di maʼ di gohí a jitsi. Nupu̱ “kʼa Tsi Mähkí Tá bi ʼñítsi amañä pa di ʼuni ʼna ndo̱ ʼbe̱fí” (Filipenses 2:9). Nuyá kʼa Hesu i peʼtsi ʼna ʼbe̱fí abu̱ i mända; pe, ho̱nse kʼa Jehová má i ndo̱ peʼtsi tse̱dí di genkʼa Hesu.
MA PÄDIHU̱ MÁ RA NGU DE NU̱ TEMA
Ma núhu̱ má ra zo tó genkʼa Hesu nihi ó ra zo go pädihu̱ a i nkja.
4. Kʼa Hesu hi i peʼtsi Goʼtho kʼa Tse̱dí xo gege hi ro Tsi Mähkí Tá
Nu̱ Biblia i mä ge kʼa Hesu i ʼbu̱i a jitsi ngu ʼna espíritu i peʼtsi tse̱dí, pe mahke nkjanu̱ i o̱hte kʼa Jehová xo ro Tá nihi ro Tsi Mähkí Tá. ¿Ó di mähmu̱ nkjanu̱? Núhu̱ nu̱ VIDEO pa go pädihu̱ kʼa i úhtite nu̱ Biblia de ankja kʼa Hesu hi i hñe̱hmi ko kʼa Tsi Mähkí Tá i ndo̱ peʼtsi Goʼtho kʼa Tse̱dí.
Yu̱ xe̱ni ba ʼíkua i föxkígihu̱ pa go pädihu̱ té i nkjaui kʼa Jehová ko kʼa Hesu. Xödíhu̱ kada ʼna de yu̱ xe̱ni nihi ñähu̱ de gehna:
Xödíhu̱ Lucas 1:30-32.
Ngu bi mä kʼa ánje, ¿té i nkjaui kʼa Hesu ko kʼa Jehová, kʼa má ra “Ndo̱hté”?
Xödíhu̱ Mateo 3:16, 17.
¿Té bi mä kʼa hñä ma íʼ de a jitsi mu̱ nga nxixthe kʼa Hesu?
¿Nuke gi pädi tó genkʼa bi ñä?
Xödíhu̱ Juan 14:28.
¿Tó kʼa má ndo̱hté nihi má i mända: ʼna tá gua kʼa ro tʼu̱?
¿Té mi ne di mä kʼa Hesu mu̱ mga xiʼ kʼa Jehová “Tá”?
Xödíhu̱ Juan 12:49.
¿Mi beni kʼa Hesu ge gege ko kʼa ro Tá mi nkjaui ʼnatho kjäʼni? ¿Nuke té gi beni?
5. Kʼa Hesu mi ge kʼa Mesías
Ha nu̱ Biblia di tötihu̱ ndunthi yä profecía ge i fötsí ndunthi yä kjäʼni pa da bädihu̱ tó genkʼa Mesías, hä, kʼa bi juahni kʼa Tsi Mähkí Tá pa da mötsí ndunthi yä kjäʼni. Núhu̱ nu̱ VIDEO, a bu̱ i hno̱ni ʼra yä profecía bi thogi ko kʼa Hesu mu̱ mi ʼbu̱hkua ha nu̱ Joi.
Xödíhu̱ gehya profecía de nu̱ Biblia nihi ñähu̱ de gehna:
Xödíhu̱ Miqueas 5:2 pa gi pädihu̱ abu̱ bi ʼmu̱i kʼa Mesías.b
¿Bi thogi nuná profecía mu̱ nga ʼmu̱i kʼa Hesu? (Mateo 2:1).
Xödíhu̱ Salmo 34:20 ko kʼa Zacarías 12:10 pa go núhu̱ kʼa ka hmä di thogi ko kʼa ro dú kʼa Mesías.
¿Bi thogi gehya profecía? (Juan 19:33-37).
¿Gi beni ge kʼa Hesu bi kjáse di thogi ʼra de gehya profecía?
Nuke, ¿té i úhtiki ko goʼtho kʼa bi thogi kʼa Hesu?
6. Mu̱ go pädihu̱ de kʼa Hesu i föxkígihu̱
Nu̱ Biblia i mä ge ra ndo̱ zo go pädihu̱ de kʼa Hesu nihi de kʼa ndo̱ ʼbe̱fí xi ʼuni kʼa Tsi Mähkí Tá. Xödíhu̱ Juan 14:6 ko kʼa 17:3, nihi ñähu̱ de gehna:
¿Ó ra ndo̱ zo go pädihu̱ de kʼa Hesu?
Kʼa Hesu bi xohki kʼa ʼñu pa da zo go nkjahu̱ yo amigo kʼa Tsi Mähkí Tá, hin ga úhtite yä ʼbe̱thrí de kʼa Jehová. Nihi, di to̱ʼmihu̱ zäi go ʼmu̱fu̱ po madé de gege.
KʼA I MÄHMU̱ PIʼRA YÄ KJÄʼNI: “Yu̱ testigo ga Jehová hi i íhkjibihu̱ kʼa Hesukristo”.
¿Nuke té gi mä?
KʼA KO PÄDI
Kʼa Hesu ge ʼna espíritu i peʼtsi tse̱dí, ro tʼu̱ kʼa Tsi Mähkí Tá nihi ge kʼa Mesías.
Kʼa to núhu̱
¿Ó i thsifí kʼa Hesu “kʼa bi ʼmu̱i ʼme̱tʼo de goʼtho yu̱ i ʼbu̱i”?
¿Té mi pe̱fí kʼa Hesu ante di ʼníkua ha nu̱ Joi?
¿Ankja dra pädihu̱ ge kʼa Hesu mi ge kʼa Mesías?
MÁ GI PÄDI DE GEHNA
Nú maʼra yä rraso ge i úhtite ge kʼa Hesu ge kʼa Mesías.
“¿I úhtite yu̱ profecía de nu̱ Biblia ge kʼa Hesu mi ge kʼa Mesías?” (Artículo de jw.org)
Nú kja nu̱ Biblia i mä ge kʼa Tsi Mähkí Tá bi nkja ro tá de kʼa Hesu ngu mu̱ ʼna kjäʼni i ʼñi ʼna ro bähtsí.
“¿Ó i thsíʼ kʼa Hesu ge ro Tʼu̱ kʼa Tsi Mähkí Tá?” (Artículo de jw.org)
Da zo gi pädi ó nu̱ Biblia hi i úhtite de nu̱ trinidad.
“Kʼa Hesu: ¿ro Tsi Mähkí Tá?” (La Atalaya, 1 de abril de 2009)
Xödí ankja ʼna ʼbe̱hña bi mbödi kʼa ro nzahki mu̱ nga bädi kʼa i mä nu̱ Biblia de kʼa Hesu.
“ʼNa judía i mä ó bi mbödi kʼa mi íhkji” (¡Despertad!, mayo de 2013)