NTʼUDI 17
¿A i nkja kʼa Hesu?
Mu̱ má di pädihu̱ kʼa bi me̱ʼ kʼa Hesu nihi kʼa bi mä mu̱ nga ʼmu̱hkua ha nu̱ Joi, di tötihu̱ yä tsi chala ʼmu̱i i kjá má go kuatihu̱ ko gege nihi ko kʼa ro Tá, Jehová. Go ma núhu̱ ʼra de gehya tsi chala ʼmu̱i ra ndo̱ zo, nihi ¿té da zo go pe̱hmu̱ pa go nkjahu̱ ngu kʼa Hesu?
1. ¿Té i kjá da hñe̱hmi kʼa Hesu ko kʼa ro Tá?
Po mil yä millón ga kjea kʼa Hesu xi ʼmu̱i a jitsi, i käʼti kʼa i pe̱ʼ kʼa ro Tá, nkjanu̱ i pädi a i nkja gege. Nsohtho i beni, i tso nihi i pe̱fí ngu gege (xödí Juan 5:19). Po gehna, kʼa Hesu i úhtite ra ndo̱ zo ku̱ yo tsi chala ʼmu̱i de kʼa ro Tá, xo gege bi zo bi mä: “Kʼa xi kähtigigo nihi xi käʼti kʼa ma Tá” (Juan 14:9). Po gehna, mu̱ nuke gi pädi ra zo a i nkja kʼa Hesu, gi pädi ra zo a i nkja kʼa Jehová. Hä, mu̱ kʼa Hesu mi juihki ku̱ kjäʼni, i úhtite kʼa i tso kʼa Jehová po nuke.
2. ¿Ankja ga úhtite kʼa Hesu ge i mädí kʼa ro Tá?
Kʼa Hesu bi mä: “Pa da bädi yu̱ kjäʼni ge di mädí nu̱ Tá, di kjá ra ndo̱ zo kʼa xi mändagi kʼa Tá” (Juan 14:31). Mu̱ kʼa Hesu mi ʼbu̱i a nu̱ Joi, bi úhtite kʼa ndo̱ hmädí mi tso po kʼa ro Tá, mahke bi thogi po ku̱ ra ndo̱ nthí bi ʼyo̱htebi. Kʼa Hesu mi ndo̱ mpoho mu̱ mi ñä de kʼa ro Tá nihi mi fötsí ku̱ kjäʼni pa di nkjahu̱ yo amigo kʼa Tsi Mähkí Tá (Juan 14:23).
3. ¿Ankja xi úhtite kʼa Hesu ge i mädí yu̱ kjäʼni?
Nu̱ Biblia i mä ge kʼa Hesu i ndo̱ peʼtsi “ʼna hmädí ra ndo̱ zo po yu̱ kjäʼni” (Proverbios 8:31). Bi úhtite nuná hmädí mu̱ nga juihki nihi mu̱ nga mötsí ku̱ kjäʼni, gege hi mi to̱ʼmi di nkjáhpibi kʼa ra zo. Hi ho̱nse bi o̱te yä milagro pa di úhtite kʼa ro tse̱dí, má ra zo pa di nigi ge mi juihki ku̱ kjäʼni (Marcos 1:40-42). Gege mi ñä ra zo nihi hi mi juahnitho ku̱ kjäʼni. Ko kʼa mi mä mi jóʼti ku̱ kjäʼni nihi mi kjá ge di do̱ʼmihu̱ kʼa ra zo ku̱ mi o̱de ga koraso. Nihi ta bi ne bi thogi ku̱ ra nthí, nihi bi ʼun kʼa ro nzahki po kʼa hmädí mi tso po yu̱ kjäʼni, pe má i mädí ku̱ kjäʼni i kjáhu̱ kʼa i úhtite (xödí Juan 15:13, 14).
MA PÄDIHU̱ MÁ RA NGU DE NU̱ TEMA
Ma pädihu̱ má ra zo a i nkja kʼa Hesu, ma núhu̱ ankja go mipiahu̱ kʼa ro hmädí nihi mu̱ nga ʼun kʼa mi peʼtsi.
4. Kʼa Hesu i mädí kʼa ro Tá
Ko kʼa bi me̱ʼ kʼa Hesu, bi úhtigihu̱ ankja go úhtibihu̱ kʼa Tsi Mähkí Tá ge di mädíhu̱. Xödíhu̱ Lucas 6:12 ko kʼa Juan 15:10 nihi nu̱ 17:26. Mu̱ gi guadi gi xödíhu̱ kada ʼna de yu̱ xeni, ñähu̱ de gehna:
Mu̱ di núhu̱ kʼa bi me̱ʼ kʼa Hesu, ¿ankja da zo go úhtibihu̱ kʼa Jehová ge di mädíhu̱?
Kʼa Hesu mi mädí kʼa ro Tá i ʼbu̱i a jitsi nihi zäi mi nzofo.
5. Kʼa Hesu mi ʼñonfeni po ku̱ mi höní di ʼbötsí
Kʼa Hesu má mi ʼñonfeni po ku̱ maʼra ge po gegese. Mahke kʼa bö ro kue bi gu̱ kʼa ro tiempo ko kʼa ro tse̱dí pa di mötsí ku̱ kjäʼni. Xödíhu̱ Marcos 6:30-44 nihi ñähu̱ de gehna:
Ngu i mä kʼa to xödíhu̱, ¿ankja ga úhtite kʼa Hesu ge mi ʼñonfeni po ku̱ kjäʼni? (Núhu̱ yu̱ xe̱ni 31, 34, 41 ko nu̱ 42).
¿Ó bi mötsí kʼa Hesu genku̱ kjäʼni? (Núhu̱ nu̱ xe̱ni 34).
To núhu̱ ge kʼa Hesu i úhtite a i nkja kʼa ro Tá, po gehna, ¿té i úhtiki goʼtho nuná de kʼa Jehová?
¿Té ʼbenkʼa da zo go pe̱hmu̱ pa go úhtitehu̱ ge di ʼñonfenihu̱ po yu̱ kjäʼni ngu kʼa Hesu?
6. Kʼa Hesu i ʼun kʼa i peʼtsi
Kʼa Hesu bi ʼun kʼa mi peʼtsi mahke hiʼtsa te mi peʼtsi gege, nihi i xihkígigohu̱ ge da zo go kjáhu̱ nkjapu̱. Xödíhu̱ Hechos 20:35 nihi ñähu̱ de gehna:
Ko kʼa bi mä kʼa Hesu, ¿té ʼbenkʼa má i kjá go mpohmu̱?
Núhu̱ nu̱ VIDEO nihi ñähu̱ de gehna:
¿Ankja da zo go mföxtehu̱ mahke hiʼtsa di peʼtsihu̱ domi?
¿Ngi pädina?
Nu̱ Biblia i úhtigihu̱ ge mu̱ go nzohmu̱ kʼa Jehová go kjáhu̱ po madé ro thuhu kʼa Hesu (xödíhu̱ Juan 16:23, 24). Nkjanu̱ di úhtitehu̱ ge di mädíhu̱ kʼa bi me̱ʼ kʼa Hesu, xo i föxkígihu̱ go nkjahu̱ yo amigo kʼa Jehová.
KʼA I MÄHMU̱ PIʼRA YÄ KJÄʼNI: “Kʼa Tsi Mähkí Tá hi i ʼñonfeni po yu̱ kjäʼni i thogi ku̱ ra nthí”.
Ko genkʼa i úhtite kʼa Hesu de a i nkja kʼa ro Tá, ¿ankja ga úhtigihu̱ ko kʼa bi me̱fí ge i mähkígihu̱ kʼa Jehová?
KʼA KO PÄDI
Kʼa Hesu i mädí kʼa Jehová nihi i mädí yu̱ kjäʼni. Ngu do núhu̱, kʼa Hesu i nkja ngu kʼa ro Tá, nsohtho mu̱ má go pädihu̱ de kʼa Hesu, má go pädihu̱ de kʼa Jehová.
Kʼa to núhu̱
Mu̱ go hähu̱ ro nguenda kʼa bi me̱ʼ kʼa Hesu, ¿ankja da zo go úhtitehu̱ ge di mädíhu̱ kʼa Jehová?
Mu̱ go hähu̱ ro nguenda kʼa bi me̱ʼ kʼa Hesu, ¿ankja da zo go úhtitehu̱ ge di mädíhu̱ yu̱ kjäʼni?
¿Té ʼbenkʼa má gi núge ra zo de a i nkja kʼa Hesu?
MÁ GI PÄDÍ DE GEHNA
Nú ʼra de ku̱ yo tsi chala ʼmu̱i i peʼtsi kʼa Hesu pa da zo go kjáhu̱.
“Ma mipiahu̱ kʼa bi me̱ʼ kʼa Hesu” (Jesús: el camino, la verdad y la vida, página 317)
Té má ʼbe̱fí ra ndo̱ zo i peʼtsi kʼa Hesu mu̱ di nzohmu̱ kʼa Tsi Mähkí Tá.
¿I no̱ni nu̱ Biblia ge kʼa Hesu mi ge ʼna ʼño̱ho̱ mbra nchala?
“¿Mi ge ʼna ño̱ho̱ mbra nchala kʼa Hesu?” (Artículo de jw.org)
¿Té di pädihu̱ de kʼa Hesu de ankja ga nú ku̱ ʼbe̱hña?
“Kʼa Tsi Mähkí Tá i nú ra zo yu̱ ʼbe̱hña” (La Atalaya, 1 de septiembre de 2012)