¿Ó ra zo ge hin gi he̱gi gi nxödi nu̱ Biblia?

1. ¿Ankja da möxkí nu̱ Biblia mu̱ hin gi he̱gi gi nxödi?

Nge ko pädi ʼraa yä ntʼudi i nthutsi ha nu̱ Biblia, di mbenihe ge kʼa hmädi gi tso po Jehová xi te. Pe nuyá petsite gi kja da te nu̱ hmädi gi tso (1 Pedro 2:2). Kʼa nzahki pa zäi gi to̱ʼmi, ho̱nse da zo gi petsi mu̱ gi pädi té i mä ro Hñä rä Tsi Mähkí Tá nge nkjanu̱ zäi gi kuäti ko Jehová. Nu̱ Biblia i mä: “Mu̱ gra pädi de kʼa ʼnase Tsi Mähkí Tá nihi de ro tʼu̱ Hesu kʼa ko xifí ge di ihkua ha nu̱ ximojoi da zo gi petsi nzahki pa zäi” (Juan 17:3). Xödi Judas 21.

Mu̱ ma gi pädi de rä Tsi Mähkí Tá, ma da ze̱di ri ihkji, ʼne ma gi kjahpi da poho (Hebreos 11:1, 6). Nu̱ ihkji di petsihu̱ i kja go tsohu̱ ra ndo̱ ʼu̱ ambö ma korasohu̱ po kʼa to o̱tehu̱ nihi i kja da mbödi nu̱ ma nzahkihu̱ pa da nkja ma ra zo. Xödi Hechos 3:19.

2. ¿Ankja da zo gi föxke a maʼra?

Ra zo mu̱ gi ne gi uhti a maʼra kʼa gi pädiya, nge di goʼthohu̱ di ne go xihmu̱ a maʼra yä nto̱de ra zo. Mu̱ ma gi pädi de nu̱ Biblia, ma da zo gi pädi nu̱ xi nthutsi pa gi ñä de rä Jehová ʼne de yä nto̱de ra zo i petsi pa yä kjäʼni. Xödi Romanos 10:13-15.

Da zo gi fu̱dí gi uhti ri miní nihi ri ntsitsi. Pe mu̱ ti uhtiku̱, gi nú ra zo ʼne gi hña guenda de ankja gi ñä ko gegehu̱. Hin gi xiʼku̱ ge yo ihkji hi ra zo, ma ra zo gi xiʼku̱ té xi ñähtigihu̱ rä Tsi Mähkí Tá. Maʼke ri hñä da föxku̱, hin gi däbeni ge nu̱ ri ʼmu̱i gi petsi, genkʼa ma i ñä pa da möxku̱. Xödi 2 Timoteo 2:24, 25.

3. ¿Té ma chala ntsitsi da zo gi petsi ko rä Tsi Mähkí Tá?

Mu̱ gi xödi nu̱ Biblia da möxkí pa da te ri ihkji ʼne nihi da möxkí pa da zo gi petsi ʼna chala ntsitsi ko Jehová. Nuke da zo gi nkja ngu ʼna tó i ʼbu̱i ambö ro miní de rä Tsi Mähkí Tá. Jehová i mä: “ʼNe go nkja tá pa nukehu̱, ʼne nukehu̱ gi nkjahu̱ ma tʼu̱ ʼne ma tixú” (2 Corintios 6:18).

4. ¿Té da möxkí pa hin gi he̱gi gi kuäti ko rä Tsi Mähkí Tá?

Hin gi he̱gi gi xödi ro Hñä rä Tsi Mähkí Tá (Hebreos 5:13, 14). Öhpi ʼna testigo rä Jehová pa da uhtiki de nu̱ Biblia ko kʼa he̱ʼmi ¿Qué nos enseña la Biblia? Mu̱ ma gi pädi, ri nzahki ma da poho. Xödi Salmo 1:1-3 ʼne 73:27, 28.

Hin gi däbeni ge yä chala nto̱de i nthutsi ha nu̱ Biblia ba ihi de Jehová, kʼa Tsi Mähkí Tá i poho, nihi ge da zo gi kuäti ko gege mu̱ gi muntsi ko yo me̱fí zäi i ʼyo̱htebi (Hebreos 10:24, 25). ʼNe mu̱ hä gi ndo̱ mpexke pa gi o̱te kʼa i ne Jehová, da zo gi petsi kʼa nzahki ge hä ro nzahki: kʼa nzahki pa zäi. Nsohtho mu̱ gi kuäti ko rä Tsi Mähkí Tá genkʼa ma ra ndo̱ zo gi kja. Xödi 1 Timoteo 1:11 ʼne 6:19.