¿Ankja ga tʼúhtite yu̱ chala noticia?

Po madé nu̱ ro Reino, kʼa Jehová ya hin da ndé da gu̱ʼtsí goʼtho yu̱ ra ntsʼo i thogi yu̱ kjäʼni. Nsohtho, ¡¿ankja hin go xihme yu̱ kjäʼni gehna chala noticia?! Kʼa Hesu mi ne ge ku̱ yo te̱nite di úhtitehu̱ nuná chala noticia po goʼtho nu̱ ximojoi (Mateo 28:19, 20). ¿Té xi me̱h yu̱ testigo ga Jehová pa da kjáhu̱ kʼa bi mända kʼa Hesu?

1. ¿Ankja i thogi nuyá kʼa xi nthutsí ha nu̱ Mateo 24:14?

Kʼa Hesu bi mä: “Yu̱ chala noticia de kʼa Reino da ma hmä po goʼtho nu̱ ximojoi” (Mateo 24:14). Yu̱ testigo ga Jehová di ndo̱ mpohohe mu̱ di kjáhe nuná ʼbe̱fí ra ndo̱ zo. Di úhtitehe yu̱ chala noticia de kʼa Reino po goʼtho nu̱ ximojoi po má de 1.000 yä hñä. I thoní ndunthi mföxte pa da nkjá nuná ndo̱ ʼbe̱fí ra ndo̱ zo. Nuná ndo̱ ʼbe̱fí hin da zo da nkjá mu̱ hin go peʼtsihu̱ kʼa ro mföxte kʼa Jehová.

2. ¿Té di pe̱hme pa go úhtibihe goʼtho yu̱ kjäʼni de nu̱ Biblia?

Di úhtihe po goʼtho yä luga abu̱ i ʼbu̱i yä kjäʼni. Nihi, ngu mi o̱te ku̱ kristiano de kʼa ʼme̱tʼo siglo, di pöhme “de nguu po nguu” (Hechos 5:42). Nkjanu̱ i tso go ñähe ko ndunthi yä kjäʼni kada kjea. Pe, ndunthi yä kjäʼni hi i ʼbu̱i ha yo nguu, nsohtho di pöhme ha yu̱ luga abu̱ da zo go tötihe. Zäi di höníhe ankja da zo go ñähe ko yu̱ kjäʼni de kʼa Jehová, pa go xihme kʼa da ma o̱te pa ri mäní.

3. ¿Tó genku̱ petsite da zo da úhtite yu̱ chala noticia?

Goʼtho yu̱ chala kristiano petsite da ñähu̱ de yu̱ chala noticia. Nugohe di núhe ge nuná ʼbe̱fí petsite go o̱tehe ra ndo̱ zo. Di o̱tehe tse̱dí pa go úhtitehe de nu̱ Biblia goʼtho yu̱ mpa, xo di pädihe ge ndunthi yä kjäʼni da ʼbe̱di nu̱ ro nzahki mu̱ hin da bädihu̱ de kʼa Jehová (xödí 1 Timoteo 4:16). Kjoʼtho i kjuhtʼigihe po nuná ʼbe̱fí di kjáhe, xo nu̱ Biblia i mä: “Hin go kjutʼi mu̱ nga tʼúhtiki, nihi hin da nkjuhtʼiki” (Mateo 10:7, 8). Pe, mahke hi goʼtho yu̱ kjäʼni i ne da ʼyo̱de, zäi di úhtitehe de nu̱ Biblia, xo nkjanu̱ di xo̱hkimbenihe kʼa Jehová, nihi nkjanu̱ di kjáhe da mpoho.

MA PÄDIHU̱ MÁ RA NGU DE NU̱ TEMA

4. Di o̱tehe tse̱dí pa go tso̱tehe abu̱ i ʼbu̱i goʼtho yu̱ kjäʼni

VIDEO: Di úhtihe de nu̱ Biblia “ta ku̱ hnini má nde yapu̱ de goʼtho nu̱ joi” (7:33)

• ¿Té ʼbenkʼa má gi núge ra zo de kʼa di pe̱hme yu̱ testigo ga Jehová pa go úhtitehe de nu̱ Biblia?

Xödíhu̱ Mateo 22:39 ko kʼa Romanos 10:13-15, nihi ñähu̱ de gehna:

• ¿Ankja dra úhtitehe ge di mädíhe yu̱ kjäʼni mu̱ di úhtitehe de nu̱ Biblia?

• ¿Ankja i nú kʼa Jehová ku̱ i úhtite ku̱ chala noticia? (Núhu̱ kʼa xe̱ni 15).

5. Di mfötsihe ko kʼa Tsi Mähkí Tá

Ko kʼa xi thogi ndunthi yä kjäʼni i úhtigihu̱ ge kʼa Jehová a ʼbe̱tʼo mu̱ di úhtitehe de nu̱ Biblia. Ma núhu̱ kʼa bi thogi a kʼa hnini Nueva Zelanda. ʼNa mpa mu̱ ya kʼa ndé, ʼna testigo ro thuhu Paul bi döti ʼna ʼbe̱hña mu̱ nga maʼ úhtite de nu̱ Biblia nguu po nguu. Kʼa nxudi de kʼa mpakä, kʼa ʼbe̱hña kʼa nzofo kʼa Tsi Mähkí Tá po kʼa ro thuhu, Jehová, nihi bi ʼyöhpí tó di mötsí pa di bädi de gege. “Ka thogi hñu ora—i mä kʼa Paul—, mu̱ ya ndra gonti kʼa ro goxthi”.

Xödíhu̱ 1 Corintios 3:9 nihi ñähu̱ de gehna:

• Ko kʼa do núhu̱, ¿ankja ga úhtigihu̱ ge kʼa Jehová a ʼbe̱tʼo mu̱ di úhtitehe de nu̱ Biblia?

Xödíhu̱ Hechos 1:8 nihi ñähu̱ de gehna:

• ¿Ó di höníhe ge kʼa Jehová da möxkígihe mu̱ di úhtitehe de nu̱ Biblia?

¿Ngi pädina?

Ha kʼa hmuntsi ga madé ngo zäi i tʼúhtigihe ankja go úhtitehe de nu̱ Biblia. Mu̱ nuke ya ko maʼ ha ʼna de gehya hmuntsi, ¿ankja ko nú kʼa ʼböxte i tʼahkígihe?

6. Mu̱ di úhtitehe de nu̱ Biblia di ʼo̱htehe ʼna hmända de kʼa Tsi Mähkí Tá

Ha kʼa ʼme̱tʼo siglo, ku̱ yo nkontra de ku̱ yo te̱nite kʼa Hesu hi mi he̱gíhu̱ di ñähu̱ de kʼa Tsi Mähkí Tá. Nsohtho ku̱ ʼme̱tʼo kristiano bi fendehu̱ kʼa mi íhkjihu̱, nkjanu̱ “bi ñähu̱ ko ku̱ áhte pa di zo di úhtitehu̱ de yu̱ chala noticia” (Filipenses 1:7). Nihi nuyá, yu̱ testigo ga Jehová di kjáhe kʼa bi kjáhu̱ gegehu̱.a

VIDEO: Di fendehe ra zo yu̱ chala noticia (2:28)

Xödíhu̱ Hechos 5:27-42 nihi ñähu̱ de gehna:

• ¿Ó hin go he̱gíhu̱ go ñähu̱ de nu̱ Biblia? (Núhu̱ yu̱ xe̱ni 29, 38 ko nu̱ 39).

KʼA KO PÄDI

Kʼa Hesu bi xiʼ ku̱ yo te̱nite di úhtitehu̱ yu̱ chala noticia po goʼtho yu̱ hnini. Kʼa Jehová i fötsí kʼa ro hnini pa da kjáhu̱ nuná ʼbe̱fí ra ndo̱ zo.

Kʼa to núhu̱

• ¿Té ʼbenkʼa ra tʼo̱te pa da tʼúhtite yu̱ chala noticia po goʼtho nu̱ ximojoi?

• ¿Ankja dra úhtitehe ge di mädíhe yu̱ kjäʼni mu̱ di úhtitehe de nu̱ Biblia?

• ¿Nuke gi beni ge mu̱ di úhtitehe de nu̱ Biblia i kjá go mpohohe? ¿Ó i nkjapu̱?

MÁ GI PÄDI DE GEHNA

Nú ankja yu̱ testigo ga Jehová i úhtitehu̱ de nu̱ Biblia ha yu̱ ndo̱ hnini.

Ra tʼúhtite de nu̱ Biblia ha kʼa hnini París abu̱ i nde thogi yä kjäʼni (5:11)

¿Ankja xi zo̱te yu̱ testigo ga Jehová abu̱ i ʼbu̱i yu̱ kjäʼni xi bo̱ni de kʼa ro hnini?

Di fötsíhe ko nu̱ Biblia yu̱ kjäʼni xi bo̱ni de ku̱ yo hnini (5:59)

ʼYo̱de kʼa i mä ʼna ma kuhu̱: ankja bi ndo̱ mpoho mu̱ nga ʼun kʼa ro nzahki pa di úhtite de nu̱ Biblia goʼtho yu̱ mpa.

Mu̱ ndo maʼ ʼna hnini ge hi mi hñe̱hmi ko yu̱ piʼra (6:29)

Nú ankja ga dähmu̱ yu̱ testigo ga Jehová ante yu̱ áhte pa hin di hie̱gíhu̱ di ñähu̱ de yu̱ chala noticia.

“Yu̱ ku mi úhtite de kʼa Reino bi möhmu̱ ha ku̱ tribunal” (El Reino de Dios ya está gobernando, capítulo 13)