NTʼUDI 47
¿Kja ya i tso gi nxixthe?
Kjamädí po kʼa ko xödí ha nu̱ Biblia, nuke ya ki pädi ndunthi de kʼa Jehová. Nihi xi mbödi nu̱ ri nzahki pa gi kjá kʼa i mä nu̱ Biblia. Pe, xiʼmu̱ i ʼbu̱i kʼa hi i he̱ikí gi xiʼ kʼa Jehová ge gi ne gi pe̱hpíbi nihi ge gi ne gi nxixthe. Ha nuná ntʼudi go ma núhu̱ té xi me̱h yu̱ kjäʼni i nxödí nu̱ Biblia pa da nxixthehu̱ nihi ma núhu̱ kʼa da zo gi pe̱hke pa gi nxixthe.
1. ¿Té tangu gi pädi de nu̱ Biblia pa da zo gi nxixthe?
Pa da zo gi nxixthe, petsite “gi pädi ra ndo̱ zo kʼa i mä nu̱ Biblia” (1 Timoteo 2:4). Nuná hi i ne da mä ge ante gi nxixthe gi pädi goʼtho ku̱ da tʼönkí de nu̱ Biblia. Xo mahke yu̱ kristino i peʼtsi ndunthi yä kjea xi nxixthe, ra zo ge zäi da nxödíhu̱ (Colosenses 1:9, 10). Pe ʼbu̱i kʼa má da zo gi pädi: ku̱ tʼúhtite hi ra nthí ba íʼ ha nu̱ Biblia. Ku̱ anciano de nu̱ hmuntsi da möxkí pa gi nú te ta ngu gi pädi de nu̱ Biblia.
2. ¿Té da zo gi pe̱fí ante gi nxixthe?
Nu̱ Biblia i mä: “Hie̱gihu̱ yu̱ ra ntsʼo gi kjáhu̱ nihi tsogihu̱ yu̱ ri tsʼohkihu̱” (xödí Hechos 3:19). Nuná da zo gi kjáge pa da zo gi nxixthe. Pe, ¿té i ne da mä nuná? Nuná i ne da mä ge gi ndo̱ nsenti po ku̱ ri tsʼohki ko o̱te nihi gi öhpi kʼa Jehová da däbeni ku̱ ra ntsʼo ko kjá. Nihi i ne da mä ge gi tsʼo goʼtho ku̱ ra ntsʼo ngi o̱te, xo nuyá gi ne gi ʼmu̱i ngu i ne kʼa Tsi Mähkí Tá. Nkjanu̱, mu̱ gi maʼ ha ku̱ hmuntsi gi fu̱dí gi nkja ngu ʼna testigo nihi da zo gi po̱ni gi úhtite de nu̱ Biblia mahke hiʼbe gi nxixthe.
3. ¿Ó hi ra zo gi ntsú mu̱ gi ne gi nxixthe?
ʼRa i benihu̱ ge hin da zo da kjáhu̱ kʼa xi ñähtíbihu̱ kʼa Jehová. Di pädihu̱ ge ʼra yä bes hin da zo gi kjá goʼtho kʼa ra zo, kjangutho ku̱ ʼño̱ho̱ ko ku̱ ʼbe̱hña mi pe̱hpíbi kʼa Jehová i no̱ni nu̱ Biblia. Pe beni ge kʼa Jehová hi i to̱ʼmi ge ku̱ yo me̱fí zäi da kjáhu̱ kʼa ra zo xo di peʼtsihu̱ kʼa tsʼohki (xödí Salmo 103:13, 14). Gege da ndo̱ mpoho mu̱ gi kjá goʼtho kʼa da zo gi kjá pa gi pe̱hpíbi. Xo kʼa Jehová da möxkí. Nihi xi mä ge xaʼtho “da kjá go ʼuegehu̱ de kʼa ro hmädí kʼa Tsi Mähkí Tá” (xödí Romanos 8:38, 39).
MA PÄDIHU̱ MÁ RA NGU DE NU̱ TEMA
Ma núhu̱ yoho yä mföxte ge da möxkí pa da zo gi nxixthe mu̱ gi thogi ku̱ ra nthí: ʼme̱tʼo, pädi má ra zo a i nkja kʼa Jehová, yoho, hie̱gi da möxkí.
4. Pädi má ra zo a i nkja kʼa Jehová
¿Té ta ngu da zo gi pädi de kʼa Jehová pa da zo gi nxixthe? Pa gi mädí kʼa Jehová peʼtsite má gi pädi de gege nihi nkjanu̱ má gi ne gi ʼyo̱htebi. Núhu̱ nu̱ VIDEO pa gi pädi ankja xi kjáhu̱ yu̱ i xödí nu̱ Biblia po go’tho nu̱ ximojoi. ʼMe̱fa ñähu̱ de gehna:
Ngu do núhu̱ ha nu̱ video, ¿té bi mötsí ʼra de ku̱ mi xödí nu̱ Biblia pa di zo di nxixthehu̱?
Xödíhu̱ Romanos 12:2 nihi ñähu̱ de gehna:
¿Kja gi íhkji goʼtho kʼa i mä nu̱ Biblia? ¿Gi íhkji ge yu̱ testigo ga Jehová i úhtitehu̱ goʼtho kʼa i mä nu̱ Biblia?
Mu̱ hiʼtsa gi íhkji, ¿té da zo gi pe̱hke?
5. Tse̱htí goʼtho ku̱ ra nthí gi ma thogi
Goʼtho di thogihu̱ ku̱ ra nthí mu̱ di xihmu̱ kʼa Jehová ge di ne go pe̱hpíbihu̱ nihi mu̱ di ne go nxixthehu̱. Pa go pädihu̱ kʼa bi thogi ʼna ku, núhu̱ nu̱ VIDEO. ʼMe̱fa ñähu̱ de gehna:
¿Té ma dumu̱i bi ze̱htí kʼa Narangerel pa di zo di pe̱hpíbi kʼa Jehová?
¿Ankja ga mötsí kʼa hmädí mi tso po kʼa Jehová mu̱ nga thogi ku̱ ra nthí?
Xödíhu̱ Proverbios 29:25 ko nu̱ 2 Timoteo 1:7, nihi ñähu̱ de gehna:
¿Abu̱ ri ʼní kʼa tse̱dí di höníhu̱ pa go tse̱htíhu̱ yu̱ ra nthí di thogihu̱?
6. Íhkji ge kʼa Jehová da möxkí
Kʼa Jehová da möxkí pa gi kjá kʼa i to̱ʼmi gege de nuke. Núhu̱ nu̱ VIDEO nihi ñähu̱ de gehna:
¿Ó hi mi ne di nxixthe nu̱ kjäʼni de gehna video?
¿Té ʼbenkʼa bi mötsí pa má di íhkjibi kʼa Jehová?
Xödíhu̱ Isaías 41:10, 13 nihi ñähu̱ de gehna:
¿Ó gi pädi ge hä da zo gi kjá kʼa go xiʼ kʼa Jehová mu̱ ngo ʼuni kʼa ri nzahki?
7. ʼUni kjamädí kʼa Jehová xo i ndo̱ mäʼkí
Mu̱ má gi beni ge kʼa Jehová i nekí, má gi ʼuni kjamädí, nihi má gi ne gi pe̱hpíbi ko ndunthi mpoho. Xödíhu̱ Salmo 40:5 nihi ñähu̱ de gehna:
¿Té ma chala regalo de kʼa Jehová gi núge má ra zo?
Kʼa profehta Jeremías mi ndo̱ mädí kʼa Jehová ko kʼa ro hñä, nihi mi ndo̱ mpoho mu̱ mi úhtite kʼa ro thuhu kʼa Tsi Mähkí Tá. Gege bi mä: “Yu̱ ri hñä bi kjá di mpoho nu̱ ma koraso, xo nugo di úhtite kʼa ri thuhu Tsi Mähkí Tá Jehová” (Jeremías 15:16). Nuya thädi gehya ntʼöni:
¿Ó ra ndo̱ zo go nkjahu̱ yo testigo kʼa Jehová?
¿Nuke gi ne gi nxixthe pa gi nkja testigo ga Jehová?
¿I ʼbu̱i kʼa hi i he̱ikí gi kjá?
¿Té da zo gi pe̱hke pa da zo gi nxixthe?
KʼA I MÄHMU̱ PIʼRA YÄ KJÄʼNI: “Di tsú hin go kjá kʼa i pe̱fí ʼna testigo mu̱ ya xi nxixthe”.
¿Nihi gi tsoge nkjanu̱?
KʼA KO PÄDI
Ko ro mföxte kʼa Jehová, nuke da zo gi tse̱htí goʼtho ku̱ ra nthí ge hi i he̱ikí gi nxixthe.
Kʼa to núhu̱
¿Té tangu gi pädi de nu̱ Biblia pa da zo gi nxixthe?
¿Té da zo gi pe̱fí ante gi nxixthe?
¿Ó hi ra zo gi ntsú mu̱ gi ne gi nxixthe?
MÁ GI PÄDI DE GEHNA
Pädi ra zo ó gi ne gi nxixthe.
Pädi té da zo gi pe̱fí pa gi tse̱htí goʼtho ku̱ ra nthí ge hi i he̱ikí gi nxixthe.
“¿Té ʼbenkä hi i he̱gí go nxixthe?” (La Atalaya, marzo de 2019)
Nú ankja ʼna ʼño̱ho̱ bi ze̱htí ku̱ ra ndo̱ nthí bi thogi pa di zo di nxixthe.
ʼNa ʼño̱ho̱ ro thuhu ro Ataa hi mi pädi kja di nxixthe. Nú té bi mötsí pa di ne di kjá.