ਵਧੀਆ ਤਰੀਕੇ ਨਾਲ ਬਾਈਬਲ ਸਟੱਡੀਆਂ ਕਰਾਓ—ਸਟੱਡੀ ਨਾਲ ਕਿੰਨਾ ਕੁ ਪੜ੍ਹੀਏ

¹ ਚੇਲਿਆਂ ਨੂੰ ਸਿਖਾਉਂਦੇ ਸਮੇਂ ਯਿਸੂ ਨੇ ਉਨ੍ਹਾਂ ਨੂੰ ਉੱਨਾ ਹੀ ਸਿਖਾਇਆ ਜਿੰਨਾ ਕੁ ਉਹ ਸਮਝ ਸਕਦੇ ਸਨ। ਉਸ ਨੇ ਉਨ੍ਹਾਂ ਨੂੰ “ਉਨੇ ਹੀ ਉਪਦੇਸ਼ ਦਿੱਤੇ ਜਿੰਨੇ ਵੱਧ ਤੋਂ ਵੱਧ ਉਹ ਸਮਝਣ ਯੋਗ ਸਨ।” (ਮਰ. 4:33, ਈਜ਼ੀ ਟੂ ਰੀਡ ਵਰਯਨ; ਯੂਹੰ. 16:12) ਇਸੇ ਤਰ੍ਹਾਂ, ਬਾਈਬਲ ਸਟੱਡੀ ਕਰਾਉਂਦੇ ਵੇਲੇ ਸਾਨੂੰ ਪਤਾ ਲਗਾਉਣ ਦੀ ਲੋੜ ਹੈ ਕਿ ਵਿਅਕਤੀ ਕਿੰਨਾ ਕੁ ਪੜ੍ਹ ਜਾਂ ਸਮਝ ਸਕਦਾ ਹੈ। ਇਹ ਸਿਖਾਉਣ ਵਾਲੇ ਅਤੇ ਸਟੱਡੀ ਕਰਨ ਵਾਲੇ ਦੋਨਾਂ ਦੀ ਕਾਬਲੀਅਤ ਤੇ ਉਨ੍ਹਾਂ ਦੇ ਹਾਲਾਤਾਂ ਉੱਤੇ ਨਿਰਭਰ ਕਰਦਾ ਹੈ।

² ਪੱਕੀ ਨਿਹਚਾ ਪੈਦਾ ਕਰੋ: ਜਿੱਥੇ ਇਕ ਜਣਾ ਪਹਿਲੀ ਵਾਰੀ ਸਮਝਾਉਣ ਤੇ ਕੋਈ ਗੱਲ ਝੱਟ ਸਮਝ ਜਾਂਦਾ ਹੈ, ਉੱਥੇ ਦੂਸਰੇ ਜਣੇ ਨੂੰ ਵਾਰ-ਵਾਰ ਸਮਝਾਉਣ ਦੀ ਲੋੜ ਪੈ ਸਕਦੀ ਹੈ। ਸਾਡਾ ਮਕਸਦ ਛੇਤੀ-ਛੇਤੀ ਪਾਠ ਪੂਰਾ ਕਰਨਾ ਨਹੀਂ, ਸਗੋਂ ਸਟੱਡੀ ਨੂੰ ਚੰਗੀ ਤਰ੍ਹਾਂ ਸਮਝਾਉਣਾ ਹੈ। ਸਟੱਡੀ ਦੀ ਨਿਹਚਾ ਤਦ ਹੀ ਪੱਕੀ ਹੋਵੇਗੀ ਜਦ ਉਹ ਪਰਮੇਸ਼ੁਰ ਦੇ ਬਚਨ ਦੀਆਂ ਗੱਲਾਂ ਨੂੰ ਚੰਗੀ ਤਰ੍ਹਾਂ ਸਮਝ ਲਵੇਗਾ।—ਕਹਾ. 4:7; ਰੋਮੀ. 12:2.

³ ਹਰ ਹਫ਼ਤੇ ਸਟੱਡੀ ਕਰਾਉਂਦੇ ਸਮੇਂ ਵਿਅਕਤੀ ਦੀ ਮਦਦ ਕਰੋ ਤਾਂਕਿ ਉਹ ਪਰਮੇਸ਼ੁਰ ਦੇ ਬਚਨ ਦੀਆਂ ਗੱਲਾਂ ਨੂੰ ਸਮਝ ਸਕੇ ਤੇ ਉਨ੍ਹਾਂ ਨੂੰ ਕਬੂਲ ਕਰ ਸਕੇ। ਭਾਵੇਂ ਕਿ ਕਿੰਨਾ ਹੀ ਸਮਾਂ ਕਿਉਂ ਨਾ ਲੱਗ ਜਾਵੇ। ਉਸ ਨੂੰ ਹਫੜਾ-ਦਫੜੀ ਵਿਚ ਨਾ ਸਿਖਾਓ, ਨਹੀਂ ਤਾਂ ਉਹ ਬਾਈਬਲ ਦੀਆਂ ਸੱਚਾਈਆਂ ਨੂੰ ਚੰਗੀ ਤਰ੍ਹਾਂ ਨਹੀਂ ਸਮਝ ਸਕੇਗਾ। ਮੁੱਖ ਗੱਲਾਂ ਨੂੰ ਖੋਲ੍ਹ ਕੇ ਸਮਝਾਓ ਅਤੇ ਬਾਈਬਲ ਵਿੱਚੋਂ ਢੁਕਵੀਆਂ ਆਇਤਾਂ ਦਿਖਾਓ।—2 ਤਿਮੋ. 3:16, 17.

⁴ ਸਟੱਡੀ ਵਿਚ ਅੜਿੱਕਾ ਨਾ ਪੈਣ ਦਿਓ: ਹਾਲਾਂਕਿ ਅਸੀਂ ਹਫੜਾ-ਦਫੜੀ ਵਿਚ ਸਟੱਡੀ ਨਹੀਂ ਕਰਾਉਣੀ ਚਾਹੁੰਦੇ, ਫਿਰ ਵੀ ਸਾਨੂੰ ਇੱਧਰ-ਉੱਧਰ ਦੀਆਂ ਗੱਲਾਂ ਕਰਨ ਤੋਂ ਬਚਣਾ ਚਾਹੀਦਾ ਹੈ। ਜੇ ਸਟੱਡੀ ਨੂੰ ਆਪਣੀਆਂ ਸਮੱਸਿਆਵਾਂ ਬਾਰੇ ਗੱਲਾਂ ਕਰਨ ਦੀ ਆਦਤ ਹੈ, ਤਾਂ ਅਸੀਂ ਕਹਿ ਸਕਦੇ ਹਾਂ ਕਿ ਸਟੱਡੀ ਖ਼ਤਮ ਕਰਨ ਤੋਂ ਬਾਅਦ ਅਸੀਂ ਇਸ ਬਾਰੇ ਗੱਲ ਕਰਾਂਗੇ।—ਉਪ. 3:1.

⁵ ਦੂਜੇ ਪਾਸੇ, ਅਸੀਂ ਦੂਸਰਿਆਂ ਨੂੰ ਸੱਚਾਈ ਸਿਖਾਉਣ ਲਈ ਇੰਨੇ ਉਤਾਵਲੇ ਹੋ ਸਕਦੇ ਹਾਂ ਕਿ ਅਸੀਂ ਇੱਕੋ ਵਾਰੀ ਉਨ੍ਹਾਂ ਨੂੰ ਸਭ ਕੁਝ ਸਮਝਾਉਣ ਦੀ ਕੋਸ਼ਿਸ਼ ਕਰਦੇ ਹਾਂ। (ਜ਼ਬੂ. 145:6, 7) ਕਦੀ-ਕਦੀ ਚਰਚਾ ਕੀਤੇ ਜਾ ਰਹੇ ਵਿਸ਼ੇ ਨਾਲ ਜੁੜਿਆ ਕੋਈ ਮੁੱਦਾ ਜਾਂ ਤਜਰਬਾ ਦੱਸਣ ਨਾਲ ਸਟੱਡੀ ਦਿਲਚਸਪ ਬਣ ਸਕਦੀ ਹੈ। ਪਰ ਸਾਨੂੰ ਵਾਧੂ ਗੱਲਾਂ ਦੱਸਣ ਵਿਚ ਇੰਨਾ ਜ਼ਿਆਦਾ ਸਮਾਂ ਨਹੀਂ ਲਾਉਣਾ ਚਾਹੀਦਾ ਕਿ ਵਿਅਕਤੀ ਬਾਈਬਲ ਦੀਆਂ ਮੁੱਖ ਸਿੱਖਿਆਵਾਂ ਨੂੰ ਚੰਗੀ ਤਰ੍ਹਾਂ ਸਮਝ ਹੀ ਨਾ ਸਕੇ।

⁶ ਹਰ ਹਫ਼ਤੇ ਸਟੱਡੀ ਨੂੰ ਉੱਨਾ ਹੀ ਸਿਖਾਓ ਜਿੰਨਾ ਉਹ ਚੰਗੀ ਤਰ੍ਹਾਂ ਸਮਝ ਸਕੇ। ਇਸ ਤਰ੍ਹਾਂ ਕਰ ਕੇ ਅਸੀਂ ‘ਯਹੋਵਾਹ ਦੇ ਚਾਨਣ ਵਿੱਚ ਚੱਲਣ’ ਵਿਚ ਉਸ ਦੀ ਮਦਦ ਕਰ ਸਕਾਂਗੇ।—ਯਸਾ. 2:5.