ਪੌਲੁਸ ਨੇ ਕਲੀਸਿਯਾਵਾਂ ਨੂੰ ਚਿੱਠੀਆਂ ਲਿਖੀਆਂ

ਨਵੀਂ ਬਣੀ ਮਸੀਹੀ ਕਲੀਸਿਯਾ ਨੇ ਪਰਮੇਸ਼ੁਰ ਦੇ ਮਕਸਦ ਨੂੰ ਪੂਰਾ ਕਰਨ ਵਿਚ ਅਹਿਮ ਭੂਮਿਕਾ ਨਿਭਾਉਣੀ ਸੀ। ਪਰ ਪਹਿਲੀ ਸਦੀ ਦੇ ਮਸੀਹੀਆਂ ਉੱਤੇ ਜਲਦੀ ਹੀ ਹਮਲੇ ਹੋਣ ਲੱਗ ਪਏ। ਉਨ੍ਹਾਂ ਨੂੰ ਬਾਹਰਲਿਆਂ ਲੋਕਾਂ ਦਾ ਅਤਿਆਚਾਰ ਸਹਿਣਾ ਪਿਆ ਅਤੇ ਨਾਲੋ-ਨਾਲ ਕਲੀਸਿਯਾ ਦੇ ਅੰਦਰੋਂ ਵੀ ਖ਼ਤਰੇ ਪੈਦਾ ਹੋਣ ਲੱਗੇ। ਇਨ੍ਹਾਂ ਹਾਲਾਤਾਂ ਵਿਚ ਕੀ ਉਹ ਆਪਣੀ ਵਫ਼ਾਦਾਰੀ ਕਾਇਮ ਰੱਖਣਗੇ? ਬਾਈਬਲ ਦੇ ਯੂਨਾਨੀ ਹਿੱਸੇ ਵਿਚ 21 ਚਿੱਠੀਆਂ ਹਨ ਜਿਨ੍ਹਾਂ ਵਿਚ ਮਸੀਹੀਆਂ ਨੂੰ ਜ਼ਰੂਰੀ ਸਲਾਹ ਅਤੇ ਹੌਸਲਾ ਦਿੱਤਾ ਗਿਆ ਸੀ।

ਰੋਮੀਆਂ ਤੋਂ ਇਬਰਾਨੀਆਂ ਤਕ 14 ਚਿੱਠੀਆਂ ਪੌਲੁਸ ਰਸੂਲ ਨੇ ਲਿਖੀਆਂ ਸਨ। ਇਹ ਚਿੱਠੀਆਂ ਕਲੀਸਿਯਾਵਾਂ ਦੇ ਨਾਵਾਂ ਜਾਂ ਲੋਕਾਂ ਦੇ ਨਾਵਾਂ ʼਤੇ ਲਿਖੀਆਂ ਗਈਆਂ ਸਨ। ਆਓ ਇਨ੍ਹਾਂ ਚਿੱਠੀਆਂ ਦੀਆਂ ਕੁਝ ਖ਼ਾਸ ਗੱਲਾਂ ਉੱਤੇ ਗੌਰ ਕਰੀਏ।

ਚਾਲ-ਚਲਣ ਬਾਰੇ ਸਲਾਹ। ਵਿਭਚਾਰ, ਹਰਾਮਕਾਰੀ ਅਤੇ ਹੋਰ ਗੰਭੀਰ ਪਾਪ ਕਰਨ ਵਾਲੇ ਲੋਕ “ਪਰਮੇਸ਼ੁਰ ਦੇ ਰਾਜ ਦੇ ਅਧਕਾਰੀ ਨਹੀਂ ਹੋਣਗੇ।” (ਗਲਾਤੀਆਂ 5:19-21; 1 ਕੁਰਿੰਥੀਆਂ 6:9-11) ਪਰਮੇਸ਼ੁਰ ਦੇ ਭਗਤਾਂ ਵਿਚ ਏਕਤਾ ਹੋਣੀ ਚਾਹੀਦੀ ਹੈ ਭਾਵੇਂ ਉਹ ਕਿਸੇ ਵੀ ਕੌਮ ਦੇ ਹੋਣ। (ਰੋਮੀਆਂ 2:11; ਅਫ਼ਸੀਆਂ 4:1-6) ਲੋੜ ਪੈਣ ਤੇ ਉਨ੍ਹਾਂ ਨੂੰ ਖ਼ੁਸ਼ੀ-ਖ਼ੁਸ਼ੀ ਇਕ-ਦੂਜੇ ਦੀ ਮਦਦ ਕਰਨੀ ਚਾਹੀਦੀ ਹੈ। (2 ਕੁਰਿੰਥੀਆਂ 9:7) ਪੌਲੁਸ ਨੇ ਕਿਹਾ: “ਨਿੱਤ ਪ੍ਰਾਰਥਨਾ ਕਰੋ।” ਉਸ ਨੇ ਭੈਣਾਂ-ਭਰਾਵਾਂ ਨੂੰ ਹੱਲਾਸ਼ੇਰੀ ਦਿੱਤੀ ਕਿ ਉਹ ਪ੍ਰਾਰਥਨਾ ਕਰ ਕੇ ਯਹੋਵਾਹ ਨੂੰ ਆਪਣੇ ਦਿਲ ਦੀ ਗੱਲ ਦੱਸਣ। (1 ਥੱਸਲੁਨੀਕੀਆਂ 5:17; 2 ਥੱਸਲੁਨੀਕੀਆਂ 3:1; ਫ਼ਿਲਿੱਪੀਆਂ 4:6, 7) ਜੇ ਅਸੀਂ ਚਾਹੁੰਦੇ ਹਾਂ ਕਿ ਪਰਮੇਸ਼ੁਰ ਸਾਡੀਆਂ ਪ੍ਰਾਰਥਨਾਵਾਂ ਸੁਣੇ, ਤਾਂ ਸਾਨੂੰ ਪੂਰੀ ਨਿਹਚਾ ਨਾਲ ਪ੍ਰਾਰਥਨਾ ਕਰਨੀ ਚਾਹੀਦੀ ਹੈ।​—ਇਬਰਾਨੀਆਂ 11:6.

ਪਰਿਵਾਰਾਂ ਵਿਚ ਖ਼ੁਸ਼ੀ ਕਿਵੇਂ ਆ ਸਕਦੀ ਹੈ? ਪਤੀ ਆਪਣੀ ਪਤਨੀ ਨੂੰ ਆਪਣੇ ਸਰੀਰ ਵਾਂਗ ਪਿਆਰ ਕਰੇ। ਪਤਨੀ ਆਪਣੇ ਪਤੀ ਦੀ ਇੱਜ਼ਤ ਕਰੇ। ਬੱਚੇ ਆਪਣੇ ਮਾਂ-ਬਾਪ ਦਾ ਕਹਿਣਾ ਮੰਨਣ ਕਿਉਂਕਿ ਇਸ ਤੋਂ ਪਰਮੇਸ਼ੁਰ ਨੂੰ ਖ਼ੁਸ਼ੀ ਹੁੰਦੀ ਹੈ। ਮਾਂ-ਬਾਪ ਪਰਮੇਸ਼ੁਰ ਦੇ ਅਸੂਲਾਂ ਅਨੁਸਾਰ ਆਪਣੇ ਬੱਚਿਆਂ ਨੂੰ ਪਿਆਰ ਨਾਲ ਸਿੱਖਿਆ ਦੇਣ।​—ਅਫ਼ਸੀਆਂ 5:22–6:4; ਕੁਲੁੱਸੀਆਂ 3:18-21.

ਪਰਮੇਸ਼ੁਰ ਦੇ ਮਕਸਦ ਨੂੰ ਸਮਝਾਇਆ। ਮਸੀਹ ਦੇ ਆਉਣ ਤਕ ਮੂਸਾ ਦੁਆਰਾ ਦਿੱਤੇ ਕਾਨੂੰਨ ਨੇ ਇਸਰਾਏਲੀਆਂ ਨੂੰ ਸੇਧ ਦਿੱਤੀ ਅਤੇ ਉਨ੍ਹਾਂ ਦੀ ਰਾਖੀ ਕੀਤੀ। (ਗਲਾਤੀਆਂ 3:24) ਪਰ ਹੁਣ ਮਸੀਹੀਆਂ ਨੂੰ ਮੂਸਾ ਦੁਆਰਾ ਦਿੱਤੇ ਕਾਨੂੰਨ ਉੱਤੇ ਚੱਲਣ ਦੀ ਲੋੜ ਨਹੀਂ ਹੈ। ਇਬਰਾਨੀਆਂ ਨੂੰ ਲਿਖੀ ਚਿੱਠੀ ਵਿਚ ਪੌਲੁਸ ਨੇ ਮੂਸਾ ਦੁਆਰਾ ਦਿੱਤੇ ਕਾਨੂੰਨ ਦਾ ਮਤਲਬ ਸਮਝਾਇਆ ਅਤੇ ਦੱਸਿਆ ਕਿ ਮਸੀਹ ਨੇ ਪਰਮੇਸ਼ੁਰ ਦਾ ਮਕਸਦ ਕਿਵੇਂ ਪੂਰਾ ਕੀਤਾ। ਪੌਲੁਸ ਨੇ ਇਹ ਵੀ ਸਮਝਾਇਆ ਕਿ ਇਸ ਕਾਨੂੰਨ ਦੀਆਂ ਕਈ ਗੱਲਾਂ ਮਸੀਹ ਨਾਲ ਤਅੱਲਕ ਰੱਖਦੀਆਂ ਸਨ। ਮਿਸਾਲ ਲਈ, ਜਾਨਵਰਾਂ ਦੀਆਂ ਬਲੀਆਂ ਯਿਸੂ ਦੀ ਕੁਰਬਾਨੀ ਵੱਲ ਇਸ਼ਾਰਾ ਕਰਦੀਆਂ ਸਨ ਜਿਸ ਰਾਹੀਂ ਪਾਪਾਂ ਦੀ ਮਾਫ਼ੀ ਮਿਲਦੀ ਹੈ। (ਇਬਰਾਨੀਆਂ 10:1-4) ਯਿਸੂ ਦੀ ਕੁਰਬਾਨੀ ਰਾਹੀਂ ਪਰਮੇਸ਼ੁਰ ਨੇ ਮੂਸਾ ਦੇ ਕਾਨੂੰਨ ਨੂੰ ਖ਼ਤਮ ਕਰ ਦਿੱਤਾ ਕਿਉਂਕਿ ਹੁਣ ਇਸ ਦੀ ਲੋੜ ਨਹੀਂ ਰਹੀ।​—ਕੁਲੁੱਸੀਆਂ 2:13-17; ਇਬਰਾਨੀਆਂ 8:13.

ਕਲੀਸਿਯਾ ਲਈ ਜ਼ਰੂਰੀ ਹਿਦਾਇਤਾਂ। ਕਲੀਸਿਯਾ ਵਿਚ ਜ਼ਿੰਮੇਵਾਰੀਆਂ ਸੰਭਾਲਣ ਵਾਲੇ ਭਰਾਵਾਂ ਦਾ ਚਾਲ-ਚਲਣ ਸ਼ੁੱਧ ਹੋਣਾ ਚਾਹੀਦਾ ਹੈ ਅਤੇ ਉਨ੍ਹਾਂ ਲਈ ਬਾਈਬਲ ਵਿਚ ਦਿੱਤੀਆਂ ਮੰਗਾਂ ਉੱਤੇ ਪੂਰਾ ਉਤਰਨਾ ਜ਼ਰੂਰੀ ਹੈ। (1 ਤਿਮੋਥਿਉਸ 3:1-10, 12, 13; ਤੀਤੁਸ 1:5-9) ਯਹੋਵਾਹ ਪਰਮੇਸ਼ੁਰ ਦੇ ਭਗਤਾਂ ਨੂੰ ਇਕੱਠੇ ਹੋ ਕੇ ਇਕ-ਦੂਜੇ ਨੂੰ ਹੌਸਲਾ ਦੇਣਾ ਚਾਹੀਦਾ ਹੈ। (ਇਬਰਾਨੀਆਂ 10:24, 25) ਭਗਤੀ ਲਈ ਰੱਖੀਆਂ ਸਭਾਵਾਂ ਤੋਂ ਸਾਰਿਆਂ ਨੂੰ ਹੌਸਲਾ ਅਤੇ ਗਿਆਨ ਮਿਲਣਾ ਚਾਹੀਦਾ ਹੈ।​—1 ਕੁਰਿੰਥੀਆਂ 14:26, 31.

ਪੌਲੁਸ ਵਾਪਸ ਰੋਮ ਆਇਆ; ਉੱਥੇ ਉਹ ਕੈਦ ਵਿਚ ਰਿਹਾ ਅਤੇ ਮੁਕੱਦਮੇ ਦੀ ਕਾਰਵਾਈ ਦੀ ਉਡੀਕ ਕਰਦਾ ਰਿਹਾ। ਉਸ ਸਮੇਂ ਦੌਰਾਨ ਉਸ ਨੇ ਤਿਮੋਥਿਉਸ ਨੂੰ ਦੂਜੀ ਚਿੱਠੀ ਲਿਖੀ। ਕੁਝ ਮਸੀਹੀ ਆਪਣੀ ਜਾਨ ਖ਼ਤਰੇ ਵਿਚ ਪਾ ਕੇ ਉਸ ਨੂੰ ਮਿਲਣ ਆਉਂਦੇ ਰਹੇ। ਪੌਲੁਸ ਨੂੰ ਪਤਾ ਸੀ ਕਿ ਉਸ ਦਾ ਸਮਾਂ ਥੋੜ੍ਹਾ ਰਹਿ ਗਿਆ ਸੀ। ਉਸ ਨੇ ਲਿਖਿਆ: “ਮੈਂ ਅੱਛੀ ਲੜਾਈ ਲੜ ਚੁੱਕਾ ਹਾਂ, ਮੈਂ ਦੌੜ ਮੁਕਾ ਛੱਡੀ, ਮੈਂ ਨਿਹਚਾ ਦੀ ਸਾਂਭ ਕੀਤੀ ਹੈ।” (2 ਤਿਮੋਥਿਉਸ 4:7) ਇਵੇਂ ਲੱਗਦਾ ਹੈ ਕਿ ਇਸ ਗੱਲ ਤੋਂ ਜਲਦੀ ਹੀ ਬਾਅਦ ਪੌਲੁਸ ਆਪਣੀ ਨਿਹਚਾ ਕਰਕੇ ਸ਼ਹੀਦ ਹੋ ਗਿਆ। ਪਰ ਪੌਲੁਸ ਦੀਆਂ ਚਿੱਠੀਆਂ ਤੋਂ ਅੱਜ ਵੀ ਪਰਮੇਸ਼ੁਰ ਦੇ ਸੱਚੇ ਭਗਤਾਂ ਨੂੰ ਸੇਧ ਮਿਲਦੀ ਹੈ।

—ਇਹ ਜਾਣਕਾਰੀ ਰੋਮੀਆਂ; ਪਹਿਲਾ ਕੁਰਿੰਥੀਆਂ; ਦੂਜਾ ਕੁਰਿੰਥੀਆਂ; ਗਲਾਤੀਆਂ; ਅਫ਼ਸੀਆਂ; ਫ਼ਿਲਿੱਪੀਆਂ; ਕੁਲੁੱਸੀਆਂ; ਪਹਿਲਾ ਅਤੇ ਦੂਜਾ ਥੱਸਲੁਨੀਕੀਆਂ; ਪਹਿਲਾ ਅਤੇ ਦੂਜਾ ਤਿਮੋਥਿਉਸ; ਤੀਤੁਸ; ਫਿਲੇਮੋਨ ਅਤੇ ਇਬਰਾਨੀਆਂ ਵਿੱਚੋਂ ਲਈ ਗਈ ਹੈ।