ਯੂਸੁਫ਼ ਇਸ ਗੱਲ ਤੋਂ ਬਿਲਕੁਲ ਅਣਜਾਣ ਸੀ ਕਿ ਉਸ ਦੇ ਭਰਾ ਉਸ ਨੂੰ ਮਾਰਨ ਦੀ ਸਾਜ਼ਸ਼ ਘੜ ਰਹੇ ਸਨ। ਯੂਸੁਫ਼ ਇਸ ਉਮੀਦ ਨਾਲ ਉਨ੍ਹਾਂ ਕੋਲ ਗਿਆ ਕਿ ਉਸ ਦੇ ਭਰਾ ਉਸ ਨਾਲ ਪਿਆਰ ਨਾਲ ਬੋਲਣਗੇ। ਪਰ ਉਨ੍ਹਾਂ ਨੇ ਤਾਂ ਉਸ ʼਤੇ ਧਾਵਾ ਹੀ ਬੋਲ ਦਿੱਤਾ! ਉਨ੍ਹਾਂ ਨੇ ਬੜੀ ਹੀ ਬੇਦਰਦੀ ਨਾਲ ਉਸ ਦਾ ਸੋਹਣਾ ਚੋਗਾ ਲਾਹ ਸੁੱਟਿਆ ਅਤੇ ਉਸ ਨੂੰ ਟੋਏ ਵੱਲ ਘੜੀਸ ਕੇ, ਉਸ ਵਿਚ ਸੁੱਟ ਦਿੱਤਾ ਜੋ ਕਿ ਬਹੁਤ ਡੂੰਘਾ ਸੀ। ਸਭ ਕੁਝ ਇੰਨਾ ਜਲਦੀ ਹੋ ਗਿਆ ਕਿ ਯੂਸੁਫ਼ ਦੇ ਹੋਸ਼ ਉੱਡ ਗਏ। ਉਹ ਇਕੱਲਾ ਟੋਏ ਤੋਂ ਬਾਹਰ ਨਹੀਂ ਸੀ ਨਿਕਲ ਸਕਦਾ। ਯੂਸੁਫ਼ ਨੇ ਜਦ ਉੱਪਰ ਦੇਖਿਆ, ਤਾਂ ਉਸ ਨੂੰ ਸਿਰਫ਼ ਆਕਾਸ਼ ਹੀ ਨਜ਼ਰ ਆਇਆ ਅਤੇ ਆਪਣੇ ਭਰਾਵਾਂ ਦੀਆਂ ਗੱਲਾਂ ਧੀਮੀ ਆਵਾਜ਼ ਵਿਚ ਸੁਣਾਈ ਦਿੱਤੀਆਂ। ਉਸ ਨੇ ਚੀਕ-ਚੀਕ ਕੇ ਆਪਣੇ ਭਰਾਵਾਂ ਨੂੰ ਤਰਲੇ ਕੀਤੇ, ਪਰ ਹਰ ਕਿਸੇ ਨੇ ਉਸ ਦੀ ਆਵਾਜ਼ ਅਣਸੁਣੀ ਕਰ ਦਿੱਤੀ। ਉਸ ਦੇ ਪੱਥਰ-ਦਿਲ ਭਰਾਵਾਂ ਨੇ ਨੇੜੇ ਹੀ ਕਿਤੇ ਬੈਠ ਕੇ ਖਾਣਾ ਖਾਧਾ। ਰਊਬੇਨ ਉਸ ਵੇਲੇ ਉੱਥੇ ਨਹੀਂ ਸੀ ਤੇ ਉਨ੍ਹਾਂ ਨੇ ਫਿਰ ਯੂਸੁਫ਼ ਨੂੰ ਮਾਰਨ ਦੀ ਸਾਜ਼ਸ਼ ਘੜੀ, ਪਰ ਯਹੂਦਾਹ ਨੇ ਆਪਣੇ ਭਰਾਵਾਂ ਨੂੰ ਮਨਾਇਆ ਕਿ ਉਹ ਉਸ ਨੂੰ ਰਾਹ ਜਾਂਦੇ ਵਪਾਰੀਆਂ ਦੇ ਹੱਥ ਵੇਚ ਦੇਣ। ਦੋਥਾਨ ਮਿਸਰ ਵੱਲ ਜਾਂਦੀ ਮਸ਼ਹੂਰ ਸੜਕ ਦੇ ਨੇੜੇ ਸੀ ਅਤੇ ਉੱਧਰੋਂ ਦੀ ਇਸਮਾਏਲੀਆਂ ਅਤੇ ਮਿਦਯਾਨੀਆਂ ਦਾ ਕਾਫਲਾ ਜਾ ਰਿਹਾ ਸੀ। ਉਨ੍ਹਾਂ ਨੇ ਰਊਬੇਨ ਦੇ ਆਉਣ ਤੋਂ ਪਹਿਲਾਂ-ਪਹਿਲਾਂ ਯੂਸੁਫ਼ ਨੂੰ ਉਨ੍ਹਾਂ ਵਪਾਰੀਆਂ ਦੇ ਹੱਥ 20 ਸ਼ਕਲਾਂ ਦੇ ਬਦਲੇ ਇਕ ਗ਼ੁਲਾਮ ਵਜੋਂ ਵੇਚ ਦਿੱਤਾ।b​—ਉਤਪਤ 37:23-28; 42:21.