17, 18. ਬਾਬਲ ਦੀ ਹਾਰ ਦੇ ਕਾਰਨ ਇਸਰਾਏਲ ਨੂੰ ਕਿਹੜੀਆਂ ਬਰਕਤਾਂ ਮਿਲੀਆਂ?

¹⁷ ਬਾਬਲ ਦੇ ਡਿੱਗਣ ਨਾਲ ਇਸਰਾਏਲੀਆਂ ਨੇ ਸੁੱਖ ਦਾ ਸਾਹ ਲਿਆ। ਇਸ ਦਾ ਮਤਲਬ ਬੰਦਸ਼ ਤੋਂ ਛੁਟਕਾਰਾ ਹੋਇਆ ਅਤੇ ਉਨ੍ਹਾਂ ਨੂੰ ਵਾਅਦਾ ਕੀਤੇ ਹੋਏ ਦੇਸ਼ ਨੂੰ ਵਾਪਸ ਜਾਣ ਦਾ ਮੌਕਾ ਮਿਲਿਆ। ਇਸ ਲਈ ਯਸਾਯਾਹ ਨੇ ਅੱਗੇ ਕਿਹਾ ਕਿ “ਯਹੋਵਾਹ ਯਾਕੂਬ ਉੱਤੇ ਰਹਮ ਕਰੇਗਾ ਅਤੇ ਇਸਰਾਏਲ ਨੂੰ ਫੇਰ ਚੁਣੇਗਾ ਅਤੇ ਉਨ੍ਹਾਂ ਨੂੰ ਉਨ੍ਹਾਂ ਦੀ ਭੂਮੀ ਉੱਤੇ ਵਸਾਵੇਗਾ ਅਤੇ ਓਪਰੇ ਉਨ੍ਹਾਂ ਨਾਲ ਮਿਲ ਜਾਣਗੇ ਅਤੇ ਓਹ ਯਾਕੂਬ ਦੇ ਘਰਾਣੇ ਨਾਲ ਜੁੜ ਜਾਣਗੇ। ਲੋਕ ਉਨ੍ਹਾਂ ਨੂੰ ਲੈ ਕੇ ਉਨ੍ਹਾਂ ਨੂੰ ਉਨ੍ਹਾਂ ਦੇ ਥਾਂ ਉੱਤੇ ਪੁਚਾ ਦੇਣਗੇ ਅਤੇ ਇਸਰਾਏਲ ਦਾ ਘਰਾਣਾ ਉਨ੍ਹਾਂ ਨੂੰ ਗੋੱਲੇ ਅਰ ਗੋੱਲੀਆਂ ਕਰ ਕੇ ਯਹੋਵਾਹ ਦੀ ਭੂਮੀ ਉੱਤੇ ਆਪਣੇ ਵੱਸ ਵਿੱਚ ਰੱਖੇਗਾ ਅਤੇ ਓਹ ਉਨ੍ਹਾਂ ਨੂੰ ਕੈਦੀ ਬਣਾਉਣਗੇ ਜਿਨ੍ਹਾਂ ਦੇ ਓਹ ਕੈਦੀ ਸਨ, ਅਤੇ ਆਪਣੇ ਦੁਖ ਦੇਣ ਵਾਲਿਆਂ ਉੱਤੇ ਰਾਜ ਕਰਨਗੇ।” (ਯਸਾਯਾਹ 14:1, 2) ਇੱਥੇ “ਯਾਕੂਬ” ਨਾਂ ਪੂਰੇ ਇਸਰਾਏਲ ਦੇ 12 ਗੋਤਾਂ ਨੂੰ ਸੰਕੇਤ ਕਰਦਾ ਹੈ। ਇਸਰਾਏਲੀਆਂ ਨੂੰ ਘਰ ਵਾਪਸ ਜਾਣ ਦੇਣ ਰਾਹੀਂ ਯਹੋਵਾਹ ਨੇ “ਯਾਕੂਬ” ਉੱਤੇ ਰਹਿਮ ਕੀਤਾ ਸੀ। ਉਨ੍ਹਾਂ ਦੇ ਨਾਲ ਹਜ਼ਾਰਾਂ ਹੀ ਵਿਦੇਸ਼ੀ ਆਏ ਅਤੇ ਉਨ੍ਹਾਂ ਵਿੱਚੋਂ ਕਈਆਂ ਨੇ ਹੈਕਲ ਦੇ ਸੇਵਾਦਾਰਾਂ ਵਜੋਂ ਇਸਰਾਏਲੀਆਂ ਦੀ ਸੇਵਾ ਕੀਤੀ। ਕੁਝ ਇਸਰਾਏਲੀਆਂ ਨੇ ਤਾਂ ਆਪਣੇ ਸਾਬਕਾ ਬੰਦੀਕਾਰਾਂ ਉੱਤੇ ਇਖ਼ਤਿਆਰ ਵੀ ਚਲਾਇਆ।c

19. ਯਹੋਵਾਹ ਦੀ ਮਾਫ਼ੀ ਹਾਸਲ ਕਰਨ ਲਈ ਇਸਰਾਏਲ ਨੂੰ ਕੀ ਕਰਨ ਦੀ ਲੋੜ ਸੀ, ਅਤੇ ਅਸੀਂ ਇਸ ਤੋਂ ਕੀ ਸਿੱਖਦੇ ਹਾਂ?

¹⁹ ਫਿਰ ਵੀ, ਯਹੋਵਾਹ ਦੀ ਦਇਆ ਇਕ ਸ਼ਰਤ ਤੇ ਮਿਲ ਸਕਦੀ ਸੀ। ਉਸ ਦੇ ਲੋਕਾਂ ਨੂੰ ਆਪਣੀ ਬੁਰਿਆਈ ਤੋਂ ਪਛਤਾਵਾ ਕਰਨਾ ਪਿਆ, ਜਿਸ ਬੁਰਿਆਈ ਦੇ ਕਾਰਨ ਪਰਮੇਸ਼ੁਰ ਨੇ ਉਨ੍ਹਾਂ ਨੂੰ ਸਖ਼ਤ ਸਜ਼ਾ ਦਿੱਤੀ ਸੀ। (ਯਿਰਮਿਯਾਹ 3:25) ਦਿਲੋਂ ਸਾਫ਼-ਸਾਫ਼ ਇਕਬਾਲ ਕਰਨ ਨਾਲ ਹੀ ਯਹੋਵਾਹ ਦੀ ਮਾਫ਼ੀ ਮਿਲ ਸਕਦੀ ਸੀ। (ਨਹਮਯਾਹ 9:6-37; ਦਾਨੀਏਲ 9:5 ਦੇਖੋ।) ਇਹ ਅਸੂਲ ਅੱਜ ਵੀ ਲਾਗੂ ਹੁੰਦਾ ਹੈ। ਸਾਨੂੰ ਸਾਰਿਆਂ ਨੂੰ ਯਹੋਵਾਹ ਦੀ ਦਇਆ ਦੀ ਲੋੜ ਹੈ ਕਿਉਂਕਿ “ਕੋਈ ਮਨੁੱਖ ਨਹੀਂ ਜੋ ਪਾਪ ਨਾ ਕਰਦਾ ਹੋਵੇ।” (2 ਇਤਹਾਸ 6:36) ਯਹੋਵਾਹ ਦਇਆਵਾਨ ਪਰਮੇਸ਼ੁਰ ਹੈ। ਉਹ ਪਿਆਰ ਨਾਲ ਸੱਦਾ ਦਿੰਦਾ ਹੈ ਕਿ ਅਸੀਂ ਆਪਣੇ ਪਾਪਾਂ ਦਾ ਇਕਬਾਲ ਕਰੀਏ, ਤੋਬਾ ਕਰੀਏ, ਅਤੇ ਗ਼ਲਤ ਰਸਤੇ ਉੱਤੇ ਨਾ ਚੱਲੀਏ, ਤਾਂਕਿ ਸਾਨੂੰ ਮਾਫ਼ੀ ਮਿਲੇ। (ਬਿਵਸਥਾ ਸਾਰ 4:31; ਯਸਾਯਾਹ 1:18; ਯਾਕੂਬ 5:16) ਇਸ ਤਰ੍ਹਾਂ ਨਾ ਸਿਰਫ਼ ਸਾਨੂੰ ਉਸ ਦੀ ਕਿਰਪਾ ਮੁੜ ਕੇ ਹਾਸਲ ਹੋਵੇਗੀ, ਸਗੋਂ ਇਸ ਤੋਂ ਸਾਨੂੰ ਦਿਲਾਸਾ ਵੀ ਮਿਲਦਾ ਹੈ।—ਜ਼ਬੂਰ 51:1; ਕਹਾਉਤਾਂ 28:13; 2 ਕੁਰਿੰਥੀਆਂ 2:7.