⁶ ਨਵੇਂ ਰਾਜੇ ਬਾਰੇ ਇਹ ਬਿਆਨ ਐਨ ਠੀਕ ਸੀ। “[ਹਿਜ਼ਕੀਯਾਹ] ਨੇ ਹੀ ਫਲਿਸਤੀਆਂ ਨੂੰ ਅੱਜ਼ਾਹ ਅਰ ਉਹ ਦੀਆਂ ਹੱਦਾਂ ਤਾਈਂ . . . ਮਾਰਿਆ।” (2 ਰਾਜਿਆਂ 18:8) ਅੱਸ਼ੂਰੀ ਰਾਜਾ ਸਨਹੇਰੀਬ ਦੇ ਬਿਰਤਾਂਤ ਅਨੁਸਾਰ ਫਲਿਸਤੀ ਹਿਜ਼ਕੀਯਾਹ ਦੇ ਰਾਜ ਅਧੀਨ ਆਏ। ‘ਗਰੀਬ,’ ਯਾਨੀ ਯਹੂਦਾਹ ਦੇ ਕਮਜ਼ੋਰ ਰਾਜ ਦੇ ਲੋਕ, ਸਲਾਮਤ ਰਹੇ ਅਤੇ ਉਨ੍ਹਾਂ ਨੂੰ ਕਿਸੇ ਚੀਜ਼ ਦੀ ਕਮੀ ਨਹੀਂ ਹੋਈ ਜਦ ਕਿ ਫਲਿਸਤ ਉੱਤੇ ਕਾਲ ਆ ਪਿਆ ਸੀ।—ਯਸਾਯਾਹ 14:30, 31 ਪੜ੍ਹੋ।

8. (ੳ) ਅੱਜ ਕੁਝ ਕੌਮਾਂ ਫਲਿਸਤ ਵਰਗੀਆਂ ਕਿਵੇਂ ਬਣੀਆਂ ਹਨ? (ਅ) ਪੁਰਾਣੇ ਜ਼ਮਾਨੇ ਵਾਂਗ ਯਹੋਵਾਹ ਨੇ ਅੱਜ ਆਪਣੇ ਲੋਕਾਂ ਨੂੰ ਸਹਾਰਾ ਦੇਣ ਲਈ ਕੀ ਕੀਤਾ ਹੈ?

⁸ ਫਲਿਸਤ ਦੀ ਤਰ੍ਹਾਂ, ਅੱਜ ਕੁਝ ਕੌਮਾਂ ਪਰਮੇਸ਼ੁਰ ਦੇ ਉਪਾਸਕਾਂ ਦਾ ਡਾਢਾ ਵਿਰੋਧ ਕਰਦੀਆਂ ਹਨ। ਯਹੋਵਾਹ ਦੇ ਮਸੀਹੀ ਗਵਾਹ ਕੈਦਖ਼ਾਨਿਆਂ ਅਤੇ ਨਜ਼ਰਬੰਦੀ-ਕੈਂਪਾਂ ਵਿਚ ਬੰਦ ਰੱਖੇ ਗਏ ਹਨ। ਉਨ੍ਹਾਂ ਉੱਤੇ ਬੰਦਸ਼ਾਂ ਲਾਈਆਂ ਗਈਆਂ ਹਨ। ਕੁਝ ਜਾਨੋਂ ਮਾਰੇ ਗਏ ਹਨ। ਵਿਰੋਧੀ ‘ਧਰਮੀ ਦੀ ਜਾਨ ਦੇ ਵਿਰੁੱਧ ਚੜ੍ਹੀ ਆਉਂਦੇ ਹਨ।’ (ਜ਼ਬੂਰ 94:21) ਉਨ੍ਹਾਂ ਵੈਰੀਆਂ ਦੀ ਨਜ਼ਰ ਵਿਚ, ਇਹ ਮਸੀਹੀ ਸਮੂਹ ਸ਼ਾਇਦ ‘ਗਰੀਬ’ ਅਤੇ “ਕੰਗਾਲ” ਲੱਗੇ। ਪਰ, ਯਹੋਵਾਹ ਦੇ ਸਹਾਰੇ ਨਾਲ, ਉਹ ਬਹੁਤ ਸਾਰੀਆਂ ਰੂਹਾਨੀ ਚੀਜ਼ਾਂ ਦਾ ਮਜ਼ਾ ਲੈਂਦੇ ਹਨ, ਜਦ ਕਿ ਉਨ੍ਹਾਂ ਦੇ ਦੁਸ਼ਮਣ ਕਾਲ਼ ਭੋਗ ਰਹੇ ਹਨ। (ਯਸਾਯਾਹ 65:13, 14; ਆਮੋਸ 8:11) ਜਦੋਂ ਯਹੋਵਾਹ ਅੱਜ ਦੇ ਜ਼ਮਾਨੇ ਦੇ ਫਲਿਸਤੀਆਂ ਉੱਤੇ ਹੱਥ ਚੁੱਕੇਗਾ, ਤਾਂ ਇਹ ‘ਗਰੀਬ’ ਸਹੀ-ਸਲਾਮਤ ਹੋਣਗੇ। ਕਿਵੇਂ? “ਪਰਮੇਸ਼ੁਰ ਦੇ ਘਰਾਣੇ” ਨਾਲ ਸੰਬੰਧ ਰੱਖ ਕੇ ਜਿਸ ਘਰਾਣੇ ਦੀ ਪੱਕੀ ਨੀਂਹ ਦੇ ਖੂੰਜੇ ਦਾ ਪੱਥਰ ਯਿਸੂ ਹੈ। (ਅਫ਼ਸੀਆਂ 2:19, 20) ਉਹ “ਸੁਰਗੀ ਯਰੂਸ਼ਲਮ,” ਯਾਨੀ ਯਹੋਵਾਹ ਦੇ ਆਸਮਾਨੀ ਰਾਜ ਦੀ ਸੁਰੱਖਿਆ ਦੇ ਅਧੀਨ ਵੀ ਹੋਣਗੇ, ਜਿਸ ਦਾ ਰਾਜਾ ਯਿਸੂ ਮਸੀਹ ਹੈ।—ਇਬਰਾਨੀਆਂ 12:22; ਪਰਕਾਸ਼ ਦੀ ਪੋਥੀ 14:1.