19, 20. ਯਿਸੂ ਨੇ ਕਿਹੜੀ ਉਦਾਹਰਣ ਦੇ ਕੇ ਪ੍ਰਚਾਰ ਦੀ ਅਹਿਮੀਅਤ ਸਮਝਾਈ?

¹⁹ ਤੀਜੀ ਗੱਲ, ਯਿਸੂ ਲਈ ਪ੍ਰਚਾਰ ਦਾ ਕੰਮ ਸਭ ਤੋਂ ਜ਼ਰੂਰੀ ਸੀ। ਸਾਮਰੀ ਤੀਵੀਂ ਨਾਲ ਹੋਈ ਯਿਸੂ ਦੀ ਗੱਲਬਾਤ ਬਾਰੇ ਜ਼ਰਾ ਫਿਰ ਤੋਂ ਸੋਚੋ। ਲੱਗਦਾ ਹੈ ਕਿ ਉਸ ਸਮੇਂ ਤੇ ਰਸੂਲਾਂ ਨੇ ਦੂਜਿਆਂ ਨੂੰ ਰਾਜ ਦੀ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ ਕਰਨਾ ਇੰਨਾ ਜ਼ਰੂਰੀ ਨਹੀਂ ਸਮਝਿਆ। ਯਿਸੂ ਨੇ ਉਨ੍ਹਾਂ ਨੂੰ ਕਿਹਾ: “ਕੀ ਤੁਸੀਂ ਨਹੀਂ ਕਹਿੰਦੇ ਕਿ ਵਾਢੀ ਨੂੰ ਅਜੇ ਚਾਰ ਮਹੀਨੇ ਪਏ ਹਨ? ਪਰ ਦੇਖੋ! ਮੈਂ ਤੁਹਾਨੂੰ ਕਹਿੰਦਾ ਹਾਂ: ਆਪਣੀਆਂ ਨਜ਼ਰਾਂ ਚੁੱਕ ਕੇ ਖੇਤਾਂ ਨੂੰ ਦੇਖੋ ਕਿ ਫ਼ਸਲ ਵਾਢੀ ਲਈ ਪੱਕ ਚੁੱਕੀ ਹੈ।”—ਯੂਹੰਨਾ 4:35.

²⁰ ਯਿਸੂ ਨੇ ਮੌਸਮ ਨੂੰ ਧਿਆਨ ਵਿਚ ਰੱਖਦੇ ਹੋਏ ਵਾਢੀ ਦੀ ਉਦਾਹਰਣ ਦਿੱਤੀ ਸੀ। ਉਸ ਵੇਲੇ ਕਿਸਲੇਵ (ਨਵੰਬਰ/ਦਸੰਬਰ) ਦਾ ਮਹੀਨਾ ਸੀ। ਜੌਆਂ ਦੀ ਵਾਢੀ ਲਗਭਗ ਪਸਾਹ ਦੇ ਤਿਉਹਾਰ ਸਮੇਂ ਹੁੰਦੀ ਸੀ ਜੋ 14 ਨੀਸਾਨ ਨੂੰ ਮਨਾਇਆ ਜਾਂਦਾ ਸੀ। ਇਸ ਲਈ ਵਾਢੀ ਨੂੰ ਅਜੇ ਚਾਰ ਮਹੀਨੇ ਪਏ ਸਨ ਅਤੇ ਕਿਸਾਨ ਸ਼ਾਇਦ ਅਜੇ ਇਸ ਬਾਰੇ ਸੋਚ ਵੀ ਨਹੀਂ ਰਹੇ ਸਨ। ਯਿਸੂ ਨੇ ਪ੍ਰਚਾਰ ਦੀ ਤੁਲਨਾ ਵਾਢੀ ਨਾਲ ਕੀਤੀ ਸੀ ਕਿਉਂਕਿ ਇਸ ਰਾਹੀਂ ਲੋਕਾਂ ਨੂੰ ਇਕੱਠਾ ਕੀਤਾ ਜਾ ਰਿਹਾ ਸੀ। ਬਹੁਤ ਸਾਰੇ ਲੋਕ ਉਸ ਦੀਆਂ ਗੱਲਾਂ ਸੁਣਨ, ਸਿੱਖਣ ਅਤੇ ਉਸ ਦੇ ਚੇਲੇ ਬਣ ਕੇ ਯਹੋਵਾਹ ਵੱਲੋਂ ਬਰਕਤਾਂ ਪਾਉਣੀਆਂ ਚਾਹੁੰਦੇ ਸਨ। ਇਸੇ ਲਈ ਯਿਸੂ ਨੇ ਕਿਹਾ ਕਿ ਖੇਤਾਂ ਵਿਚ ਲਹਿਰਾਉਂਦੀਆਂ ਫ਼ਸਲਾਂ ਪੱਕ ਚੁੱਕੀਆਂ ਸਨ ਯਾਨੀ ਲੋਕਾਂ ਨੂੰ ਇਕੱਠਾ ਕਰਨ ਦਾ ਸਮਾਂ ਆ ਗਿਆ ਸੀ! ਸੋ ਜਦੋਂ ਇਕ ਸ਼ਹਿਰ ਦੇ ਲੋਕਾਂ ਨੇ ਯਿਸੂ ਨੂੰ ਆਪਣੇ ਕੋਲ ਰਹਿਣ ਲਈ ਮਜਬੂਰ ਕੀਤਾ, ਤਾਂ ਉਸ ਨੇ ਕਿਹਾ: “ਇਹ ਜ਼ਰੂਰੀ ਹੈ ਕਿ ਮੈਂ ਹੋਰਨਾਂ ਸ਼ਹਿਰਾਂ ਵਿਚ ਵੀ ਜਾ ਕੇ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ ਕਰਾਂ, ਕਿਉਂਕਿ ਮੈਨੂੰ ਇਸੇ ਕੰਮ ਲਈ ਭੇਜਿਆ ਗਿਆ ਹੈ।”—ਲੂਕਾ 4:43.