ਜਿਵੇਂ ਯਹੋਵਾਹ ਨੇ ਇਸਰਾਏਲੀਆਂ ਦੀ ਤੁਲਨਾ ਅੰਗੂਰੀ ਵੇਲ ਨਾਲ ਕੀਤੀ ਸੀ, ਉਵੇਂ ਯਿਸੂ ਨੇ ਵੀ ਅੰਗੂਰੀ ਵੇਲ ਨੂੰ ਉਦਾਹਰਣ ਦੇ ਤੌਰ ਤੇ ਵਰਤਿਆ। ਆਪਣੇ ਚੇਲਿਆਂ ਨਾਲ ਆਖ਼ਰੀ ਭੋਜਨ ਕਰਦੇ ਵੇਲੇ ਯਿਸੂ ਨੇ ਉਨ੍ਹਾਂ ਨੂੰ ਕਿਹਾ: “ਮੈਂ ਸੱਚੀ ਅੰਗੂਰ ਦੀ ਬੇਲ ਹਾਂ ਅਤੇ ਮੇਰਾ ਪਿਤਾ ਬਾਗਵਾਨ ਹੈ।” (ਯੂਹੰਨਾ 15:1) ਯਿਸੂ ਨੇ ਆਪਣੇ ਚੇਲਿਆਂ ਦੀ ਤੁਲਨਾ ਵੇਲ ਦੀਆਂ ਟਾਹਣੀਆਂ ਨਾਲ ਕੀਤੀ। ਜਿਵੇਂ ਵੇਲ ਦੀਆਂ ਟਾਹਣੀਆਂ ਤਣੇ ਤੋਂ ਪੋਸ਼ਣ ਪ੍ਰਾਪਤ ਕਰਦੀਆਂ ਹਨ, ਉਵੇਂ ਹੀ ਚੇਲਿਆਂ ਨੂੰ ਮਸੀਹ ਨਾਲ ਜੁੜੇ ਰਹਿਣ ਦੀ ਲੋੜ ਹੈ। ਯਿਸੂ ਨੇ ਕਿਹਾ ਸੀ: “ਮੈਥੋਂ ਵੱਖਰੇ ਹੋ ਕੇ ਤੁਸੀਂ ਕੁਝ ਨਹੀਂ ਕਰ ਸੱਕਦੇ।” (ਯੂਹੰਨਾ 15:5) ਬਾਗ਼ਬਾਨ ਫਲ ਪ੍ਰਾਪਤ ਕਰਨ ਲਈ ਅੰਗੂਰੀ ਬਾਗ਼ ਲਾਉਂਦੇ ਹਨ, ਉਸੇ ਤਰ੍ਹਾਂ ਯਹੋਵਾਹ ਆਪਣੇ ਲੋਕਾਂ ਤੋਂ ਆਸ ਰੱਖਦਾ ਹੈ ਕਿ ਉਹ ਉਸ ਦੀ ਸੇਵਾ ਵਿਚ ਚੰਗੇ ਫਲ ਪੈਦਾ ਕਰਨ। ਇਸ ਤੋਂ ਯਹੋਵਾਹ ਨੂੰ ਖ਼ੁਸ਼ੀ ਹੁੰਦੀ ਹੈ ਤੇ ਉਸ ਦੀ ਮਹਿਮਾ ਹੁੰਦੀ ਹੈ।—ਯੂਹੰਨਾ 15:8.

“ਬਹੁਤਾ ਫਲ ਦਿਓ”

ਮਸਹ ਕੀਤੇ ਹੋਏ ਮਸੀਹੀ “ਸੱਚੀ ਅੰਗੂਰ ਦੀ ਬੇਲ” ਦੀਆਂ ਟਾਹਣੀਆਂ ਹਨ ਜਿਨ੍ਹਾਂ ਨੇ ਫਲ ਦੇਣਾ ਹੈ। ਪਰ ‘ਹੋਰ ਭੇਡਾਂ’ ਲਈ ਵੀ ਫਲ ਪੈਦਾ ਕਰ ਕੇ ਆਪਣੇ ਆਪ ਨੂੰ ਮਸੀਹ ਦੇ ਵਧੀਆ ਚੇਲੇ ਸਾਬਤ ਕਰਨਾ ਜ਼ਰੂਰੀ ਹੈ। (ਯੂਹੰਨਾ 10:16) ਉਹ ਵੀ “ਬਹੁਤਾ ਫਲ” ਪੈਦਾ ਕਰ ਕੇ ਆਪਣੇ ਸਵਰਗੀ ਪਿਤਾ ਦੀ ਵਡਿਆਈ ਕਰ ਸਕਦੇ ਹਨ। (ਯੂਹੰਨਾ 15:5, 8) ਯਿਸੂ ਦੁਆਰਾ ਦਿੱਤੀ ਸੱਚੀ ਅੰਗੂਰੀ ਵੇਲ ਦੀ ਉਦਾਹਰਣ ਤੋਂ ਇਹ ਗੱਲ ਸਾਫ਼ ਹੋ ਜਾਂਦੀ ਹੈ ਕਿ ਸਾਡੀ ਮੁਕਤੀ ਇਸ ਗੱਲ ਤੇ ਨਿਰਭਰ ਕਰਦੀ ਹੈ ਕਿ ਅਸੀਂ ਮਸੀਹ ਨਾਲ ਜੁੜੇ ਰਹੀਏ ਤੇ ਚੰਗੇ ਮਸੀਹੀ ਬਣੀਏ। ਯਿਸੂ ਨੇ ਕਿਹਾ ਸੀ: “ਜੇਕਰ ਤੁਸੀਂ ਮੇਰੇ ਹੁਕਮਾਂ ਦੀ ਪਾਲਨਾ ਕਰੋਗੇ ਤਾਂ ਮੇਰੇ ਪ੍ਰੇਮ ਵਿੱਚ ਰਹੋਗੇ ਜਿਵੇਂ ਮੈਂ ਆਪਣੇ ਪਿਤਾ ਦੇ ਹੁਕਮਾਂ ਦੀ ਪਾਲਨਾ ਕੀਤੀ ਹੈ ਅਤੇ ਉਹ ਦੇ ਪ੍ਰੇਮ ਵਿੱਚ ਰਹਿੰਦਾ ਹਾਂ।”—ਯੂਹੰਨਾ 15:10.