“ਨਿਰਾਸ਼ ਲੋਕਾਂ ਨੂੰ ਦਿਲਾਸਾ ਦਿਓ।”​—1 ਥੱਸਲੁਨੀਕੀਆਂ 5:14.

ਸ਼ਾਇਦ ਤੁਹਾਡਾ ਕੋਈ ਆਪਣਾ ਬਹੁਤ ਜ਼ਿਆਦਾ ਚਿੰਤਾ ਵਿਚ ਡੁੱਬਿਆ ਹੋਵੇ ਜਾਂ ਆਪਣੇ ਆਪ ਵਿਚ ਨਿਕੰਮਾ ਮਹਿਸੂਸ ਕਰ ਰਿਹਾ ਹੋਵੇ। ਇਨ੍ਹਾਂ ਮੌਕਿਆਂ ʼਤੇ ਜਦੋਂ ਤੁਸੀਂ ਉਸ ਨੂੰ ਯਕੀਨ ਦਿਵਾਉਂਦੇ ਹੋ ਕਿ ਤੁਹਾਨੂੰ ਉਸ ਦੀ ਪਰਵਾਹ ਹੈ, ਤਾਂ ਤੁਸੀਂ ਉਸ ਨੂੰ ਹੌਸਲਾ ਤੇ ਦਿਲਾਸਾ ਦੇ ਸਕਦੇ ਹੋ, ਭਾਵੇਂ ਤੁਹਾਨੂੰ ਉਸ ਵੇਲੇ ਪਤਾ ਨਹੀਂ ਲੱਗ ਰਿਹਾ ਹੁੰਦਾ ਕਿ ਤੁਸੀਂ ਕੀ ਕਹਿਣਾ ਹੈ।

“ਧੀਰਜ ਨਾਲ ਪੇਸ਼ ਆਓ।”​—1 ਥੱਸਲੁਨੀਕੀਆਂ 5:14.

ਸ਼ਾਇਦ ਕਈ ਵਾਰ ਉਹ ਗੱਲ ਕਰਨੀ ਨਾ ਚਾਹੇ। ਇੱਦਾਂ ਦੇ ਮੌਕਿਆਂ ਤੇ ਤੁਸੀਂ ਉਸ ਨੂੰ ਕਹਿ ਸਕਦੇ ਹੋ ਕਿ ਜਦੋਂ ਵੀ ਉਹ ਗੱਲ ਕਰਨੀ ਚਾਹੇ, ਤੁਸੀਂ ਉਸ ਦੀ ਗੱਲ ਸੁਣਨ ਲਈ ਤਿਆਰ ਹੋ। ਆਪਣੀ ਬੀਮਾਰੀ ਕਰਕੇ ਸ਼ਾਇਦ ਉਹ ਕੁਝ ਅਜਿਹਾ ਕਹਿ ਜਾਂ ਕਰ ਦੇਵੇ ਜਿਸ ਕਰਕੇ ਤੁਹਾਨੂੰ ਦੁੱਖ ਲੱਗੇ। ਸ਼ਾਇਦ ਤੁਸੀਂ ਕੋਈ ਕੰਮ ਇਕੱਠੇ ਕਰਨਾ ਹੋਵੇ, ਪਰ ਬਾਅਦ ਵਿਚ ਉਹ ਮਨ੍ਹਾ ਕਰ ਦੇਵੇ ਜਾਂ ਫਿਰ ਉਸ ਦਾ ਮੂਡ ਹੀ ਖ਼ਰਾਬ ਹੋਵੇ। ਉਸ ਦੀ ਮਦਦ ਕਰਦੇ ਸਮੇਂ ਧੀਰਜ ਰੱਖੋ ਅਤੇ ਉਸ ਨੂੰ ਸਮਝਣ ਦੀ ਕੋਸ਼ਿਸ਼ ਕਰੋ।​—ਕਹਾਉਤਾਂ 18:24.