3. (ੳ) ਤਿਮੋਥਿਉਸ ਮਸੀਹੀ ਕਿਵੇਂ ਬਣਿਆ ਅਤੇ ਉਸ ਨੇ ਸਿੱਖੀਆਂ ਗੱਲਾਂ ਲਾਗੂ ਕਿਵੇਂ ਕੀਤੀਆਂ? (ਅ) ਪੌਲੁਸ ਨੇ ਤਿਮੋਥਿਉਸ ਦਾ ਧਿਆਨ ਕਿਹੜੀਆਂ ਤਿੰਨ ਗੱਲਾਂ ਵੱਲ ਖਿੱਚਿਆ?

³ ਪੌਲੁਸ ਰਸੂਲ 47 ਈਸਵੀ ਵਿਚ ਪਹਿਲੀ ਵਾਰ ਲੁਸਤ੍ਰਾ ਸ਼ਹਿਰ ਨੂੰ ਗਿਆ। ਸ਼ਾਇਦ ਇਸ ਦੌਰੇ ਦੌਰਾਨ ਤਿਮੋਥਿਉਸ ਨੂੰ ਯਿਸੂ ਦੀਆਂ ਸਿੱਖਿਆਵਾਂ ਬਾਰੇ ਪਤਾ ਲੱਗਾ ਹੋਣਾ। ਉਸ ਸਮੇਂ ਸ਼ਾਇਦ ਤਿਮੋਥਿਉਸ ਅੱਲੜ੍ਹ ਉਮਰ ਦਾ ਸੀ। ਉਸ ਨੇ ਸਿੱਖੀਆਂ ਗੱਲਾਂ ʼਤੇ ਅਮਲ ਕੀਤਾ ਅਤੇ ਫਿਰ ਦੋ ਸਾਲ ਬਾਅਦ ਉਹ ਪੌਲੁਸ ਨਾਲ ਮੰਡਲੀਆਂ ਦਾ ਦੌਰਾ ਕਰਨ ਲੱਗ ਪਿਆ। ਉਸ ਤੋਂ ਤਕਰੀਬਨ 16 ਸਾਲ ਬਾਅਦ ਪੌਲੁਸ ਨੇ ਤਿਮੋਥਿਉਸ ਨੂੰ ਲਿਖਿਆ: “ਤੂੰ ਜਿਹੜੀਆਂ ਗੱਲਾਂ ਸਿੱਖੀਆਂ ਹਨ ਅਤੇ ਜਿਨ੍ਹਾਂ ਬਾਰੇ ਤੈਨੂੰ ਸਮਝਾ ਕੇ ਯਕੀਨ ਦਿਵਾਇਆ ਗਿਆ ਹੈ, ਉਨ੍ਹਾਂ ਗੱਲਾਂ ਉੱਤੇ ਚੱਲਦਾ ਰਹਿ ਅਤੇ ਯਾਦ ਰੱਖ ਕਿ ਉਹ ਗੱਲਾਂ ਤੂੰ ਕਿਨ੍ਹਾਂ ਤੋਂ ਸਿੱਖੀਆਂ ਸਨ ਅਤੇ ਤੂੰ ਛੋਟੇ ਹੁੰਦਿਆਂ ਤੋਂ ਪਵਿੱਤਰ ਲਿਖਤਾਂ [ਇਬਰਾਨੀ ਸ਼ਾਸਤਰ] ਨੂੰ ਜਾਣਦਾ ਹੈਂ। ਇਹ ਲਿਖਤਾਂ ਤੈਨੂੰ ਬੁੱਧੀਮਾਨ ਬਣਾ ਸਕਦੀਆਂ ਹਨ ਜਿਨ੍ਹਾਂ ਦੀ ਮਦਦ ਨਾਲ ਤੈਨੂੰ ਮੁਕਤੀ ਮਿਲ ਸਕਦੀ ਹੈ ਕਿਉਂਕਿ ਤੂੰ ਯਿਸੂ ਮਸੀਹ ਉੱਤੇ ਨਿਹਚਾ ਕੀਤੀ ਹੈ।” (2 ਤਿਮੋ. 3:14, 15) ਪੌਲੁਸ ਦੀਆਂ ਕਹੀਆਂ ਗੱਲਾਂ ʼਤੇ ਗੌਰ ਕਰੋ (1) ਪਵਿੱਤਰ ਲਿਖਤਾਂ ਨੂੰ ਜਾਣਨਾ, (2) ਸਿੱਖੀਆਂ ਗੱਲਾਂ ਨੂੰ ਸਮਝ ਕੇ ਉਸ ʼਤੇ ਯਕੀਨ ਕਰਨਾ ਅਤੇ (3) ਲਿਖਤਾਂ ਬੁੱਧੀਮਾਨ ਬਣਾ ਸਕਦੀਆਂ ਹਨ ਅਤੇ ਯਿਸੂ ਮਸੀਹ ਉੱਤੇ ਨਿਹਚਾ ਕਰਨ ਕਰਕੇ ਮੁਕਤੀ ਮਿਲ ਸਕਦੀ ਹੈ।

“ਸਮਝਾ ਕੇ ਯਕੀਨ ਦਿਵਾਇਆ”

5. (ੳ) “ਸਮਝਾ ਕੇ ਯਕੀਨ ਦਿਵਾਉਣ” ਦਾ ਕੀ ਮਤਲਬ ਹੈ? (ਅ) ਅਸੀਂ ਕਿਵੇਂ ਜਾਣਦੇ ਹਾਂ ਕਿ ਤਿਮੋਥਿਉਸ ਨੂੰ ਯਿਸੂ ਦੀ ਖ਼ੁਸ਼ ਖ਼ਬਰੀ ਬਾਰੇ ਸਮਝਾ ਕੇ ਯਕੀਨ ਦਿਵਾਇਆ ਗਿਆ ਸੀ?

⁵ ਪਵਿੱਤਰ ਲਿਖਤਾਂ ਬਾਰੇ ਜਾਣਨਾ ਜ਼ਰੂਰੀ ਹੈ। ਪਰ ਬੱਚਿਆਂ ਨੂੰ ਸਿਰਫ਼ ਬਾਈਬਲ ਦੇ ਪਾਤਰਾਂ ਅਤੇ ਘਟਨਾਵਾਂ ਬਾਰੇ ਸਿਖਾਉਣਾ ਹੀ ਕਾਫ਼ੀ ਨਹੀਂ ਹੈ। ਯਾਦ ਕਰੋ ਕਿ ਤਿਮੋਥਿਉਸ “ਛੋਟੇ ਹੁੰਦਿਆਂ ਤੋਂ ਪਵਿੱਤਰ ਲਿਖਤਾਂ ਨੂੰ ਜਾਣਦਾ” ਸੀ। ਪਰ ਉਸ ਨੂੰ ‘ਸਮਝਾ ਕੇ ਯਕੀਨ ਵੀ ਦਿਵਾਇਆ’ ਗਿਆ ਸੀ। ਬਾਅਦ ਵਿਚ ਸਬੂਤਾਂ ਕਰਕੇ ਉਸ ਨੂੰ ਪੂਰਾ ਭਰੋਸਾ ਹੋ ਗਿਆ ਕਿ ਯਿਸੂ ਹੀ ਮਸੀਹ ਹੈ। ਤਿਮੋਥਿਉਸ ਦੀ ਨਿਹਚਾ ਇੰਨੀ ਪੱਕੀ ਹੋਈ ਕਿ ਉਸ ਨੇ ਬਪਤਿਸਮਾ ਲਿਆ ਅਤੇ ਬਾਅਦ ਵਿਚ ਪੌਲੁਸ ਨਾਲ ਮਿਸ਼ਨਰੀ ਦੌਰੇ ਕੀਤੇ।

6. ਬਾਈਬਲ ਉੱਤੇ ਨਿਹਚਾ ਪੱਕੀ ਕਰਨ ਲਈ ਤੁਸੀਂ ਆਪਣੇ ਬੱਚਿਆਂ ਦੀ ਮਦਦ ਕਿਵੇਂ ਕਰ ਸਕਦੇ ਹੋ?

⁶ ਮਾਪੇ ਕੀ ਕਰ ਸਕਦੇ ਹਨ ਤਾਂਕਿ ਉਨ੍ਹਾਂ ਦੇ ਬੱਚਿਆਂ ਦੀ ਨਿਹਚਾ ਤਿਮੋਥਿਉਸ ਵਾਂਗ ਪੱਕੀ ਹੋਵੇ? ਪਹਿਲਾ ਕਦਮ, ਧੀਰਜ ਰੱਖੋ। ਪੱਕੀ ਨਿਹਚਾ ਪੈਦਾ ਕਰਨ ਵਿਚ ਸਮਾਂ ਲੱਗਦਾ ਹੈ। ਨਾਲੇ ਇਹ ਵੀ ਯਾਦ ਰੱਖੋ ਕਿ ਜੇ ਤੁਸੀਂ ਕਿਸੇ ਗੱਲ ʼਤੇ ਯਕੀਨ ਕਰਦੇ ਹੋ, ਤਾਂ ਜ਼ਰੂਰੀ ਨਹੀਂ ਕਿ ਤੁਹਾਡੇ ਬੱਚੇ ਵੀ ਉਸੇ ਗੱਲ ʼਤੇ ਯਕੀਨ ਕਰਨ। ਬਾਈਬਲ ʼਤੇ ਨਿਹਚਾ ਕਰਨ ਲਈ ਹਰੇਕ ਬੱਚੇ ਨੂੰ “ਆਪਣੀ ਸੋਚਣ-ਸਮਝਣ ਦੀ ਕਾਬਲੀਅਤ” ਵਰਤਣੀ ਚਾਹੀਦੀ ਹੈ। (ਰੋਮੀਆਂ 12:1 ਪੜ੍ਹੋ।) ਮਾਪਿਓ, ਤੁਸੀਂ ਆਪਣੇ ਬੱਚਿਆਂ ਦੀ ਨਿਹਚਾ ਮਜ਼ਬੂਤ ਕਰਨ ਲਈ ਬਹੁਤ ਕੁਝ ਕਰ ਸਕਦੇ ਹੋ, ਖ਼ਾਸ ਕਰਕੇ ਉਦੋਂ ਜਦੋਂ ਉਹ ਸਵਾਲ ਪੁੱਛਦੇ ਹਨ। ਆਓ ਆਪਾਂ ਦੇਖੀਏ ਕਿ ਅਸੀਂ ਇਕ ਪਿਤਾ ਦੀ ਮਿਸਾਲ ਤੋਂ ਕੀ ਸਿੱਖ ਸਕਦੇ ਹਾਂ?

7, 8. (ੳ) ਇਕ ਪਿਤਾ ਆਪਣੀ ਧੀ ਨੂੰ ਸਿਖਾਉਣ ਲਈ ਕਿਵੇਂ ਧੀਰਜ ਰੱਖਦਾ ਹੈ? (ਅ) ਤੁਹਾਨੂੰ ਆਪਣੇ ਬੱਚਿਆਂ ਨਾਲ ਕਦੋਂ ਧੀਰਜ ਰੱਖਣ ਦੀ ਲੋੜ ਪੈਂਦੀ ਹੈ?

⁷ ਟੌਮਸ ਦੀ ਧੀ 11 ਸਾਲਾਂ ਦੀ ਹੈ ਅਤੇ ਉਹ ਕਦੀ-ਕਦੀ ਉਸ ਤੋਂ ਅਜਿਹੇ ਸਵਾਲ ਪੁੱਛਦੀ ਹੈ: “ਕੀ ਯਹੋਵਾਹ ਨੇ ਵਿਕਾਸਵਾਦ ਰਾਹੀਂ ਧਰਤੀ ਉੱਤੇ ਸਭ ਕੁਝ ਬਣਾਇਆ?” ਜਾਂ “ਅਸੀਂ ਸਮਾਜ ਦੇ ਉਨ੍ਹਾਂ ਕੰਮਾਂ ਵਿਚ ਹਿੱਸਾ ਕਿਉਂ ਨਹੀਂ ਲੈਂਦੇ ਜਿਨ੍ਹਾਂ ਨਾਲ ਸਮਾਜ ਦੇ ਹਾਲਾਤ ਸੁਧਰ ਸਕਣ, ਜਿਵੇਂ ਕਿ ਵੋਟ ਪਾਉਣੀ?” ਕਦੀ-ਕਦੀ ਉਹ ਸੋਚਦਾ ਹੈ ਕਿ ਸੌਖਾ ਹੋਵੇਗਾ ਕਿ ਉਹ ਆਪਣੀ ਧੀ ਨੂੰ ਸਿੱਧਾ ਹੀ ਜਵਾਬ ਦੇ ਦੇਵੇ ਕਿ ਕਿਹੜੀ ਗੱਲ ਸਹੀ ਹੈ, ਪਰ ਉਹ ਆਪਣੇ ਆਪ ਨੂੰ ਰੋਕਦਾ ਹੈ। ਟੌਮਸ ਜਾਣਦਾ ਹੈ ਕਿ ਸਿਰਫ਼ ਸੱਚਾਈ ਦੱਸ ਕੇ ਹੀ ਯਕੀਨ ਨਹੀਂ ਦਿਵਾਇਆ ਜਾ ਸਕਦਾ, ਸਗੋਂ ਛੋਟੇ-ਛੋਟੇ ਸਬੂਤ ਪੇਸ਼ ਕਰਨੇ ਵੀ ਜ਼ਰੂਰੀ ਹਨ।

⁸ ਟੌਮਸ ਇਹ ਵੀ ਜਾਣਦਾ ਹੈ ਕਿ ਆਪਣੀ ਧੀ ਨੂੰ ਸਿਖਾਉਣ ਲਈ ਉਸ ਨੂੰ ਧੀਰਜ ਰੱਖਣ ਦੀ ਲੋੜ ਹੈ। ਦਰਅਸਲ, ਸਾਰੇ ਮਸੀਹੀ ਮਾਪਿਆਂ ਨੂੰ ਧੀਰਜ ਰੱਖਣ ਦੀ ਲੋੜ ਹੈ। (ਕੁਲੁ. 3:12) ਟੋਮਸ ਜਾਣਦਾ ਹੈ ਕਿ ਉਹ ਰਾਤੋ-ਰਾਤ ਆਪਣੀ ਧੀ ਵਿਚ ਨਿਹਚਾ ਪੈਦਾ ਨਹੀਂ ਕਰ ਸਕਦਾ, ਸਗੋਂ ਉਸ ਨੂੰ ਆਪਣੀ ਧੀ ਨਾਲ ਉਨ੍ਹਾਂ ਵਿਸ਼ਿਆਂ ʼਤੇ ਕਈ ਵਾਰ ਗੱਲ ਕਰਨ ਦੀ ਲੋੜ ਹੈ। ਬਾਈਬਲ ਤੋਂ ਉਸ ਦੀ ਧੀ ਜੋ ਵੀ ਸਿੱਖਦੀ ਹੈ ਟੌਮਸ ਨੂੰ ਉਨ੍ਹਾਂ ਗੱਲਾਂ ʼਤੇ ਉਸ ਨਾਲ ਤਰਕ ਕਰਨੀ ਦੀ ਲੋੜ ਹੈ। ਟੌਮਸ ਕਹਿੰਦਾ ਹੈ: “ਸਾਡੀ ਧੀ ਬਾਈਬਲ ਵਿੱਚੋਂ ਅਹਿਮ ਵਿਸ਼ਿਆਂ ਬਾਰੇ ਜੋ ਵੀ ਸਿੱਖਦੀ ਹੈ ਮੈਂ ਤੇ ਮੇਰੀ ਪਤਨੀ ਜਾਣਨਾ ਚਾਹੁੰਦੇ ਹਾਂ ਕਿ ਉਹ ਉਨ੍ਹਾਂ ਗੱਲਾਂ ʼਤੇ ਸੱਚ-ਮੁੱਚ ਨਿਹਚਾ ਕਰਦੀ ਹੈ ਅਤੇ ਕੀ ਉਹ ਗੱਲਾਂ ਉਸ ਨੂੰ ਸਮਝ ਆਉਂਦੀਆਂ ਹਨ। ਸਾਨੂੰ ਚੰਗਾ ਲੱਗਦਾ ਹੈ ਜਦੋਂ ਉਹ ਸਵਾਲ ਪੁੱਛਦੀ ਹੈ। ਪਰ ਜੇ ਉਹ ਬਿਨਾਂ ਸਵਾਲ ਪੁੱਛੇ ਗੱਲ ਮੰਨ ਲੈਂਦੀ ਹੈ, ਤਾਂ ਅਸੀਂ ਫ਼ਿਕਰਾਂ ਵਿਚ ਪੈ ਜਾਂਦੇ ਹਾਂ।”

9. ਬਾਈਬਲ ਉੱਤੇ ਨਿਹਚਾ ਪੱਕੀ ਕਰਨ ਲਈ ਤੁਸੀਂ ਆਪਣੇ ਬੱਚਿਆਂ ਦੀ ਮਦਦ ਕਿਵੇਂ ਕਰ ਸਕਦੇ ਹੋ?

⁹ ਜਦੋਂ ਮਾਪੇ ਧੀਰਜ ਰੱਖ ਕੇ ਆਪਣੇ ਬੱਚਿਆਂ ਨੂੰ ਸਿਖਾਉਂਦੇ ਹਨ, ਤਾਂ ਹੌਲੀ-ਹੌਲੀ ਬੱਚੇ “ਸੱਚਾਈ ਦੀ ਲੰਬਾਈ, ਚੌੜਾਈ, ਉਚਾਈ ਅਤੇ ਡੂੰਘਾਈ ਨੂੰ ਚੰਗੀ ਤਰ੍ਹਾਂ ਸਮਝ” ਜਾਂਦੇ ਹਨ। (ਅਫ਼. 3:18) ਬੱਚਿਆਂ ਨੂੰ ਉਨ੍ਹਾਂ ਦੀ ਉਮਰ ਅਤੇ ਸਮਝ ਮੁਤਾਬਕ ਸਿਖਾਓ। ਜਿੱਦਾਂ-ਜਿੱਦਾਂ ਉਨ੍ਹਾਂ ਦੀ ਨਿਹਚਾ ਮਜ਼ਬੂਤ ਹੁੰਦੀ ਜਾਵੇਗੀ, ਉੱਦਾਂ-ਉੱਦਾਂ ਉਨ੍ਹਾਂ ਲਈ ਆਪਣੇ ਸਕੂਲ ਦੇ ਵਿਦਿਆਰਥੀਆਂ ਅਤੇ ਹੋਰਨਾਂ ਨਾਲ ਆਪਣੀ ਨਿਹਚਾ ਬਾਰੇ ਗੱਲ ਕਰਨੀ ਸੌਖੀ ਹੋਵੇਗੀ। (1 ਪਤ. 3:15) ਮਿਸਾਲ ਲਈ, ਕੀ ਤੁਹਾਡੇ ਬੱਚੇ ਬਾਈਬਲ ਤੋਂ ਦਿਖਾ ਸਕਦੇ ਹਨ ਕਿ ਮਰਨ ਤੋਂ ਬਾਅਦ ਕੀ ਹੁੰਦਾ ਹੈ? ਇਸ ਵਿਸ਼ੇ ਬਾਰੇ ਬਾਈਬਲ ਜੋ ਵੀ ਕਹਿੰਦੀ ਹੈ, ਕੀ ਉਹ ਖ਼ੁਦ ਇਸ ਗੱਲ ʼਤੇ ਯਕੀਨ ਕਰਦੇ ਹਨ?a ਯਾਦ ਰੱਖੋ ਕਿ ਬਾਈਬਲ ʼਤੇ ਆਪਣੇ ਬੱਚਿਆਂ ਦੀ ਨਿਹਚਾ ਪੱਕੀ ਕਰਨ ਲਈ ਧੀਰਜ ਰੱਖਣਾ ਬਹੁਤ ਜ਼ਰੂਰੀ ਹੈ। ਇਕ ਦਿਨ ਤੁਹਾਡੀ ਮਿਹਨਤ ਜ਼ਰੂਰ ਰੰਗ ਲਿਆਵੇਗੀ।​—ਬਿਵ. 6:6, 7.

10. ਬੱਚਿਆਂ ਨੂੰ ਸਿੱਖੀਆਂ ਦੇਣ ਦੇ ਨਾਲ-ਨਾਲ ਹੋਰ ਕਿਹੜੀ ਗੱਲ ਜ਼ਰੂਰੀ ਹੈ?

¹⁰ ਬੱਚਿਆਂ ਦੀ ਨਿਹਚਾ ਮਜ਼ਬੂਤ ਕਰਨ ਲਈ ਇਹ ਵੀ ਜ਼ਰੂਰੀ ਹੈ ਕਿ ਤੁਸੀਂ ਉਨ੍ਹਾਂ ਲਈ ਵਧੀਆ ਮਿਸਾਲ ਬਣੋ। ਤਿੰਨ ਕੁੜੀਆਂ ਦੀ ਮਾਂ ਸਟੈਫ਼ਨੀ ਕਹਿੰਦੀ ਹੈ: “ਮਾਂ ਬਣਨ ਤੋਂ ਬਾਅਦ ਮੈਂ ਹਮੇਸ਼ਾ ਆਪਣੇ ਆਪ ਤੋਂ ਇਹ ਸਵਾਲ ਪੁੱਛਦੀ ਆਈ ਹਾਂ, ‘ਕੀ ਮੈਂ ਆਪਣੇ ਬੱਚਿਆਂ ਨਾਲ ਇਸ ਬਾਰੇ ਗੱਲ ਕਰਦੀ ਹਾਂ ਕਿ ਮੈਨੂੰ ਇਨ੍ਹਾਂ ਗੱਲਾਂ ʼਤੇ ਪੱਕਾ ਯਕੀਨ ਕਿਉਂ ਹੈ ਕਿ ਯਹੋਵਾਹ ਜੀਉਂਦਾ ਪਰਮੇਸ਼ੁਰ ਹੈ, ਉਹ ਸਾਨੂੰ ਪਿਆਰ ਕਰਦਾ ਹੈ ਅਤੇ ਉਸ ਦੇ ਮਿਆਰ ਸਾਡੇ ਭਲੇ ਲਈ ਹਨ? ਕੀ ਮੇਰੇ ਬੱਚੇ ਸਾਫ਼-ਸਾਫ਼ ਦੇਖ ਸਕਦੇ ਹਨ ਕਿ ਮੈਂ ਸੱਚ-ਮੁੱਚ ਯਹੋਵਾਹ ਨੂੰ ਪਿਆਰ ਕਰਦੀ ਹਾਂ?’ ਜੇ ਮੈਨੂੰ ਹੀ ਨਿਹਚਾ ਨਹੀਂ ਹੈ, ਤਾਂ ਮੇਰੇ ਬੱਚੇ ਨਿਹਚਾ ਕਿਵੇਂ ਕਰਨਗੇ।”