² ਪਤਰਸ ਰਸੂਲ ਨੇ ਲਿਖਿਆ: ‘ਯਹੋਵਾਹ ਦਾ ਦਿਨ ਚੋਰ ਵਾਂਙੁ ਆਵੇਗਾ ਜਿਹ ਦੇ ਵਿੱਚ ਅਕਾਸ਼ ਸਰਨਾਟੇ ਨਾਲ ਜਾਂਦੇ ਰਹਿਣਗੇ ਅਤੇ ਮੂਲ ਵਸਤਾਂ ਵੱਡੇ ਤਾਉ ਨਾਲ ਤਪ ਕੇ ਢਲ ਜਾਣਗੀਆਂ ਅਤੇ ਧਰਤੀ ਉਨ੍ਹਾਂ ਕਾਰਾਗਰੀਆਂ ਸਣੇ ਜੋ ਉਸ ਵਿੱਚ ਹਨ ਜਲ ਬਲ ਜਾਵੇਗੀ।’ (2 ਪਤ. 3:10) ਇੱਥੇ ਜ਼ਿਕਰ ਕੀਤੇ ਗਏ “ਅਕਾਸ਼” ਅਤੇ “ਧਰਤੀ” ਕੀ ਹਨ? “ਮੂਲ ਵਸਤਾਂ” ਕੀ ਹਨ ਜੋ ਢਲ਼ ਜਾਣਗੀਆਂ? ਅਤੇ ਪਤਰਸ ਦਾ ਇਹ ਕਹਿਣ ਦਾ ਕੀ ਮਤਲਬ ਸੀ ਕਿ “ਧਰਤੀ ਉਨ੍ਹਾਂ ਕਾਰਾਗਰੀਆਂ ਸਣੇ ਜੋ ਉਸ ਵਿੱਚ ਹਨ ਜਲ ਬਲ ਜਾਵੇਗੀ”? ਇਨ੍ਹਾਂ ਸਵਾਲਾਂ ਦੇ ਜਵਾਬ ਜਾਣ ਕੇ ਸਾਨੂੰ ਭਵਿੱਖ ਵਿਚ ਹੋਣ ਵਾਲੀਆਂ ਭਿਆਨਕ ਘਟਨਾਵਾਂ ਲਈ ਤਿਆਰ ਹੋਣ ਵਿਚ ਮਦਦ ਮਿਲੇਗੀ।

ਆਕਾਸ਼ ਅਤੇ ਧਰਤੀ ਜੋ ਜਾਂਦੇ ਰਹਿਣਗੇ

3. ਦੂਜਾ ਪਤਰਸ 3:10 ਵਿਚ ਜ਼ਿਕਰ ਕੀਤੇ ਗਏ “ਅਕਾਸ਼” ਕੀ ਹਨ ਅਤੇ ਇਹ ਕਿਵੇਂ ਜਾਂਦੇ ਰਹਿਣਗੇ?

³ ਬਾਈਬਲ ਵਿਚ ਕਈ ਵਾਰ “ਅਕਾਸ਼” ਸ਼ਬਦ ਹਕੂਮਤਾਂ ਨੂੰ ਦਰਸਾਉਣ ਲਈ ਵਰਤਿਆ ਗਿਆ ਹੈ ਜੋ ਲੋਕਾਂ ਤੋਂ ਉੱਚੀਆਂ ਹੁੰਦੀਆਂ ਹਨ। (ਯਸਾ. 14:13, 14; ਪਰ. 21:1, 2) “ਅਕਾਸ਼ [ਜੋ] ਸਰਨਾਟੇ ਨਾਲ ਜਾਂਦੇ ਰਹਿਣਗੇ,” ਉਹ ਦੁਸ਼ਟ ਸਮਾਜ ਉੱਤੇ ਮਨੁੱਖੀ ਰਾਜ ਹੈ। “ਸਰਨਾਟੇ ਨਾਲ” ਜਾਂ ਇਕ ਹੋਰ ਅਨੁਵਾਦ ਅਨੁਸਾਰ “ਵੱਡੀ ਗਰਜਣ ਦੀ ਅਵਾਜ਼” ਨਾਲ ਉਨ੍ਹਾਂ ਦਾ ਜਾਂਦੇ ਰਹਿਣਾ ਸ਼ਾਇਦ ਇਸ ਗੱਲ ਨੂੰ ਦਰਸਾਉਂਦਾ ਹੈ ਕਿ ਇਨ੍ਹਾਂ ਆਕਾਸ਼ਾਂ ਦਾ ਅੰਤ ਚੁਟਕੀ ਵਿਚ ਹੀ ਹੋ ਜਾਵੇਗਾ।

4. “ਧਰਤੀ” ਕੀ ਹੈ ਅਤੇ ਇਸ ਨੂੰ ਕਿਵੇਂ ਤਬਾਹ ਕੀਤਾ ਜਾਵੇਗਾ?

⁴ “ਧਰਤੀ” ਪਰਮੇਸ਼ੁਰ ਤੋਂ ਦੂਰ ਹੋਈ ਦੁਨੀਆਂ ਨੂੰ ਦਰਸਾਉਂਦੀ ਹੈ। ਅਜਿਹੀ ਇਕ ਦੁਨੀਆਂ ਨੂਹ ਦੇ ਜ਼ਮਾਨੇ ਵਿਚ ਰਹਿੰਦੀ ਸੀ ਜੋ ਪਰਮੇਸ਼ੁਰ ਦੇ ਫ਼ਰਮਾਨ ਨਾਲ ਜਲ-ਪਰਲੋ ਨਾਲ ਤਬਾਹ ਹੋ ਗਈ ਸੀ। “ਅਕਾਸ਼ ਅਤੇ ਧਰਤੀ ਜਿਹੜੇ ਹੁਣ ਹਨ ਸਾੜੇ ਜਾਣ ਲਈ ਓਸੇ ਬਚਨ ਨਾਲ ਰੱਖ ਛੱਡੇ ਹੋਏ ਹਨ ਅਤੇ ਭਗਤੀਹੀਣ ਮਨੁੱਖਾਂ ਦੇ ਨਿਆਉਂ ਅਤੇ ਨਾਸ ਹੋਣ ਦੇ ਦਿਨ ਤੀਕ ਸਾਂਭੇ ਰਹਿਣਗੇ।” (2 ਪਤ. 3:7) ਪਰਲੋ ਨਾਲ ਉਸ ਬੁਰੀ ਦੁਨੀਆਂ ਦਾ ਨਾਸ਼ ਤਾਂ ਇੱਕੋ ਸਮੇਂ ਤੇ ਹੋ ਗਿਆ ਸੀ, ਪਰ “ਵੱਡੀ ਬਿਪਤਾ” ਦੌਰਾਨ ਇੱਦਾਂ ਨਾਸ਼ ਨਹੀਂ ਹੋਵੇਗਾ। (ਪਰ. 7:14) ਉਸ ਬਿਪਤਾ ਦੇ ਪਹਿਲੇ ਪੜਾਅ ਵਿਚ ਪਰਮੇਸ਼ੁਰ ਇਸ ਦੁਨੀਆਂ ਦੇ ਸਿਆਸੀ ਹਾਕਮਾਂ ਨੂੰ ‘ਵੱਡੀ ਨਗਰੀ ਬਾਬੁਲ’ ਦਾ ਨਾਸ਼ ਕਰਨ ਲਈ ਪ੍ਰੇਰੇਗਾ। ਇਸ ਤਰ੍ਹਾਂ ਉਹ ਉਸ ਧਾਰਮਿਕ ਕੰਜਰੀ ਲਈ ਆਪਣੀ ਨਫ਼ਰਤ ਪ੍ਰਗਟ ਕਰੇਗਾ। (ਪਰ. 17:5, 16; 18:8) ਫਿਰ ਆਰਮਾਗੇਡਨ ਦੇ ਯੁੱਧ ਵਿਚ ਵੱਡੀ ਬਿਪਤਾ ਦੇ ਆਖ਼ਰੀ ਪੜਾਅ ਦੌਰਾਨ ਯਹੋਵਾਹ ਸ਼ਤਾਨ ਦੀ ਬਾਕੀ ਦੁਨੀਆਂ ਦਾ ਨਾਮੋ-ਨਿਸ਼ਾਨ ਮਿਟਾ ਦੇਵੇਗਾ।—ਪਰ. 16:14, 16; 19:19-21.

‘ਮੂਲ ਵਸਤਾਂ ਢਲ ਜਾਣਗੀਆਂ’

5. ਮੂਲ ਵਸਤਾਂ ਵਿਚ ਕੀ ਸ਼ਾਮਲ ਹੈ?

⁵ “ਮੂਲ ਵਸਤਾਂ” ਕੀ ਹਨ ਜੋ ‘ਢਲ ਜਾਣਗੀਆਂ’? ਇਕ ਬਾਈਬਲ ਡਿਕਸ਼ਨਰੀ ਇਨ੍ਹਾਂ “ਮੂਲ ਵਸਤਾਂ” ਨੂੰ “ਮੁਢਲੇ ਸਿਧਾਂਤ” ਜਾਂ ਨਿਯਮ ਕਹਿੰਦੀ ਹੈ। ਇਹ ਡਿਕਸ਼ਨਰੀ ਕਹਿੰਦੀ ਹੈ ਕਿ “ਮੂਲ ਵਸਤਾਂ” ‘ਭਾਸ਼ਾ ਦੇ ਮੂਲ ਤੱਤਾਂ ਯਾਨੀ ਵਰਣਮਾਲਾ ਦੇ ਅੱਖਰਾਂ ਨੂੰ ਦਰਸਾਉਣ ਲਈ ਵਰਤੇ ਗਏ ਸਨ।’ ਇਸ ਤਰ੍ਹਾਂ ਪਤਰਸ ਨੇ ਜਿਨ੍ਹਾਂ “ਮੂਲ ਵਸਤਾਂ” ਦਾ ਜ਼ਿਕਰ ਕੀਤਾ ਸੀ, ਉਹ ਉਨ੍ਹਾਂ ਮੂਲ ਚੀਜ਼ਾਂ ਨੂੰ ਦਰਸਾਉਂਦੀਆਂ ਹਨ ਜਿਨ੍ਹਾਂ ਕਾਰਨ ਦੁਨੀਆਂ ਵਿਚ ਭੈੜੇ ਲੱਛਣ, ਰਵੱਈਏ, ਤੌਰ-ਤਰੀਕੇ ਅਤੇ ਉਦੇਸ਼ ਪੈਦਾ ਹੁੰਦੇ ਹਨ। “ਮੂਲ ਵਸਤਾਂ” ਵਿਚ “ਜਗਤ ਦਾ ਆਤਮਾ” ਯਾਨੀ ਹਵਾ ਸ਼ਾਮਲ ਹੈ ਜੋ “ਅਣਆਗਿਆਕਾਰੀ ਦੇ ਪੁੱਤ੍ਰਾਂ ਵਿੱਚ ਅਸਰ ਕਰਦੀ ਹੈ।” (1 ਕੁਰਿੰ. 2:12; ਅਫ਼ਸੀਆਂ 2:1-3 ਪੜ੍ਹੋ।) ਇਹ ਹਵਾ ਸ਼ਤਾਨ ਦੀ ਦੁਨੀਆਂ ਵਿਚ ਹਰ ਪਾਸੇ ਫੈਲੀ ਹੋਈ ਹੈ ਕਿਉਂਕਿ ਸ਼ਤਾਨ ‘ਹਵਾਈ ਇਖ਼ਤਿਆਰ ਦਾ ਸਰਦਾਰ’ ਹੈ ਜੋ ਘਮੰਡੀ ਤੇ ਜ਼ਿੱਦੀ ਹੈ। ਜਿਨ੍ਹਾਂ ਲੋਕਾਂ ਨੂੰ ਇਹ ਹਵਾ ਲੱਗੀ ਹੈ, ਉਹ ਸ਼ਤਾਨ ਵਾਂਗ ਸੋਚਦੇ, ਯੋਜਨਾ ਬਣਾਉਂਦੇ, ਬੋਲਦੇ ਅਤੇ ਕੰਮ ਕਰਦੇ ਹਨ।

6. ਦੁਨੀਆਂ ਦੀ ਹਵਾ ਕਿਸ ਤਰ੍ਹਾਂ ਜ਼ਾਹਰ ਹੁੰਦੀ ਹੈ?

⁶ ਇਸ ਲਈ, ਦੁਨੀਆਂ ਦੀ ਹਵਾ ਤੋਂ ਪ੍ਰਭਾਵਿਤ ਲੋਕ ਜਾਣੇ-ਅਣਜਾਣੇ ਵਿਚ ਆਪਣੇ ਦਿਲਾਂ-ਦਿਮਾਗਾਂ ਉੱਤੇ ਸ਼ਤਾਨ ਨੂੰ ਅਸਰ ਕਰਨ ਦਿੰਦੇ ਹਨ ਜਿਸ ਕਰਕੇ ਉਹ ਉਸ ਵਰਗੀ ਸੋਚ ਅਤੇ ਰਵੱਈਆ ਰੱਖਦੇ ਹਨ। ਨਤੀਜੇ ਵਜੋਂ, ਉਹ ਆਪਣੀ ਮਨ-ਮਰਜ਼ੀ ਕਰਦੇ ਹਨ ਅਤੇ ਪਰਮੇਸ਼ੁਰ ਦੀ ਇੱਛਾ ਦੀ ਕੋਈ ਪਰਵਾਹ ਨਹੀਂ ਕਰਦੇ। ਉਹ ਜੋ ਵੀ ਕਰਦੇ ਹਨ, ਘਮੰਡ ਨਾਲ ਕਰਦੇ ਹਨ ਤੇ ਆਪਣਾ ਸੁਆਰਥ ਦੇਖਦੇ ਹਨ। ਉਹ ਕਿਸੇ ਦੇ ਅਧਿਕਾਰ ਨੂੰ ਨਹੀਂ ਮੰਨਦੇ ਅਤੇ “ਸਰੀਰ ਦੀ ਕਾਮਨਾ ਅਤੇ ਨੇਤਰਾਂ ਦੀ ਕਾਮਨਾ” ਅੱਗੇ ਝੁਕ ਜਾਂਦੇ ਹਨ।—1 ਯੂਹੰਨਾ 2:15-17 ਪੜ੍ਹੋ।

7. ਸਾਨੂੰ “ਆਪਣੇ ਮਨ ਦੀ ਵੱਡੀ ਚੌਕਸੀ” ਕਿਉਂ ਕਰਨੀ ਚਾਹੀਦੀ ਹੈ?

⁷ ਤਾਂ ਫਿਰ ਕਿੰਨਾ ਮਹੱਤਵਪੂਰਣ ਹੈ ਕਿ ਅਸੀਂ ਦੋਸਤ ਚੁਣਨ, ਕੋਈ ਜਾਣਕਾਰੀ ਪੜ੍ਹਨ, ਮਨੋਰੰਜਨ ਕਰਨ ਅਤੇ ਇੰਟਰਨੈੱਟ ʼਤੇ ਵੈੱਬ-ਸਾਈਟਾਂ ਦੇਖਣ ਲੱਗਿਆਂ ਸਮਝ ਤੋਂ ਕੰਮ ਲਈਏ। ਇਸ ਤਰ੍ਹਾਂ ਅਸੀਂ ‘ਆਪਣੇ ਮਨ ਦੀ ਵੱਡੀ ਚੌਕਸੀ ਕਰਾਂਗੇ।’ (ਕਹਾ. 4:23) ਪੌਲੁਸ ਰਸੂਲ ਨੇ ਲਿਖਿਆ: “ਵੇਖਣਾ ਕਿਤੇ ਕੋਈ ਆਪਣੀ ਫ਼ੈਲਸੂਫ਼ੀ ਅਤੇ ਲਾਗ ਲਪੇਟ ਨਾਲ ਤੁਹਾਨੂੰ ਲੁੱਟ ਨਾ ਲਵੇ ਜੋ ਮਨੁੱਖਾਂ ਦੀਆਂ ਰੀਤਾਂ ਅਤੇ ਸੰਸਾਰ ਦੀਆਂ ਮੂਲ ਗੱਲਾਂ ਦੇ ਅਨੁਸਾਰ ਹਨ ਪਰ ਮਸੀਹ ਦੇ ਅਨੁਸਾਰ ਨਹੀਂ।” (ਕੁਲੁ. 2:8) ਇਸ ਹੁਕਮ ਨੂੰ ਮੰਨਣਾ ਹੋਰ ਵੀ ਜ਼ਰੂਰੀ ਹੈ ਜਿਉਂ-ਜਿਉਂ ਯਹੋਵਾਹ ਦਾ ਦਿਨ ਨੇੜੇ ਆਉਂਦਾ ਹੈ ਕਿਉਂਕਿ ਇਸ ਦੇ “ਤਪ” ਨਾਲ ਸ਼ਤਾਨ ਦੀ ਦੁਨੀਆਂ ਦੀਆਂ ਸਾਰੀਆਂ “ਮੂਲ ਵਸਤਾਂ” ਪਿਘਲ ਜਾਣਗੀਆਂ। ਇਸ ਤੋਂ ਪ੍ਰਗਟ ਹੋਵੇਗਾ ਕਿ ਇਹ ਯਹੋਵਾਹ ਦੇ ਕ੍ਰੋਧ ਦੀ ਤਪਸ਼ ਨਹੀਂ ਸਹਾਰ ਸਕਦੀਆਂ। ਇਹ ਗੱਲ ਸਾਨੂੰ ਮਲਾਕੀ 4:1 ਵਿਚ ਪਾਏ ਜਾਂਦੇ ਸ਼ਬਦਾਂ ਦੀ ਯਾਦ ਦਿਲਾਉਂਦੀ ਹੈ: “ਉਹ ਦਿਨ ਆਉਂਦਾ ਹੈ, ਤੰਦੂਰ ਵਾਂਙੁ ਸਾੜਨ ਵਾਲਾ। ਸਾਰੇ ਆਕੜ ਬਾਜ਼ ਅਤੇ ਸਾਰੇ ਦੁਸ਼ਟ ਭੁਠਾ ਹੋਣਗੇ। ਉਹ ਦਿਨ ਓਹਨਾਂ ਨੂੰ ਸਾੜਨ ਲਈ ਆਉਂਦਾ ਹੈ, ਸੈਨਾਂ ਦਾ ਯਹੋਵਾਹ ਆਖਦਾ ਹੈ, ਉਹ ਓਹਨਾਂ ਲਈ ਟੁੰਡ ਮੁੰਡ ਨਾ ਛੱਡੇਗਾ।”

“ਧਰਤੀ ਉਨ੍ਹਾਂ ਕਾਰਾਗਰੀਆਂ ਸਣੇ ਜੋ ਉਸ ਵਿੱਚ ਹਨ ਜਲ ਬਲ ਜਾਵੇਗੀ”

8. ਧਰਤੀ ਅਤੇ ਇਸ ਦੇ ਸਾਰੇ ਕੰਮ ਕਿਵੇਂ “ਪ੍ਰਗਟ” ਹੋਣਗੇ?

⁸ ਪਵਿੱਤਰ ਬਾਈਬਲ ਨਵਾਂ ਅਨੁਵਾਦ ਵਿਚ 2 ਪਤਰਸ 3:10 ਦਾ ਤਰਜਮਾ ਇਸ ਤਰ੍ਹਾਂ ਕੀਤਾ ਗਿਆ ਹੈ: “ਧਰਤੀ ਅਤੇ ਇਸ ਦੇ ਸਾਰੇ ਕੰਮ ਵੀ ਪ੍ਰਗਟ ਹੋ ਜਾਣਗੇ।” ਪਤਰਸ ਦੇ ਕਹਿਣ ਦਾ ਕੀ ਮਤਲਬ ਸੀ? “ਪ੍ਰਗਟ” ਹੋਣ ਦਾ ਇਹ ਵੀ ਮਤਲਬ ਹੋ ਸਕਦਾ ਹੈ “ਪਤਾ ਲੱਗਣਾ” ਜਾਂ “ਪਰਦਾ ਫ਼ਾਸ਼ ਕਰਨਾ।” ਪਤਰਸ ਦੇ ਕਹਿਣ ਦਾ ਮਤਲਬ ਸੀ ਕਿ ਵੱਡੀ ਬਿਪਤਾ ਦੌਰਾਨ, ਯਹੋਵਾਹ ਪਰਦਾ ਫ਼ਾਸ਼ ਕਰੇਗਾ ਕਿ ਸ਼ਤਾਨ ਦੀ ਦੁਨੀਆਂ ਯਹੋਵਾਹ ਅਤੇ ਉਸ ਦੇ ਰਾਜ ਖ਼ਿਲਾਫ਼ ਹੈ, ਇਸ ਲਈ ਇਹ ਨਾਸ਼ ਕਰਨ ਦੇ ਲਾਇਕ ਹੈ। ਉਸ ਸਮੇਂ ਬਾਰੇ ਭਵਿੱਖਬਾਣੀ ਕਰਦੇ ਹੋਏ ਯਸਾਯਾਹ 26:21 ਕਹਿੰਦਾ ਹੈ: “ਯਹੋਵਾਹ ਆਪਣੇ ਅਸਥਾਨ ਤੋਂ ਨਿੱਕਲ ਰਿਹਾ ਹੈ, ਭਈ ਉਹ ਧਰਤੀ ਦੇ ਵਾਸੀਆਂ ਦੇ ਉੱਤੇ ਉਨ੍ਹਾਂ ਦੀ ਬਦੀ ਦੀ ਸਜ਼ਾ ਦੇਵੇ। ਧਰਤੀ ਆਪਣਾ ਖੂਨ ਪਰਗਟ ਕਰੇਗੀ, ਅਤੇ ਫੇਰ ਆਪਣੇ ਵੱਢੇ ਹੋਇਆਂ ਨੂੰ ਨਾ ਢੱਕੇਗੀ।”

9. (ੳ) ਸਾਨੂੰ ਕਿਹੜੀਆਂ ਚੀਜ਼ਾਂ ਤੋਂ ਦੂਰ ਰਹਿਣਾ ਚਾਹੀਦਾ ਅਤੇ ਕਿਉਂ? (ਅ) ਸਾਨੂੰ ਆਪਣੇ ਵਿਚ ਕੀ ਪੈਦਾ ਕਰਨਾ ਚਾਹੀਦਾ ਅਤੇ ਕਿਉਂ?

⁹ ਜਿਹੜੇ ਲੋਕ ਦੁਨੀਆਂ ਅਤੇ ਇਸ ਦੀ ਭੈੜੀ ਹਵਾ ਦੇ ਅਸਰ ਹੇਠ ਆ ਗਏ ਹਨ, ਯਹੋਵਾਹ ਦੇ ਦਿਨ ਦੌਰਾਨ ਉਨ੍ਹਾਂ ਦਾ ਅਸਲੀ ਰੂਪ ਸਾਮ੍ਹਣੇ ਆ ਜਾਵੇਗਾ ਤੇ ਉਹ ਇਕ-ਦੂਜੇ ਦਾ ਲਹੂ ਵਹਾਉਣਗੇ। ਦਰਅਸਲ, ਅੱਜ ਪ੍ਰਚਲਿਤ ਕਈ ਤਰ੍ਹਾਂ ਦਾ ਹਿੰਸਕ ਮਨੋਰੰਜਨ ਕਈਆਂ ਦੇ ਮਨਾਂ ਨੂੰ ਉਸ ਸਮੇਂ ਲਈ ਤਿਆਰ ਕਰ ਰਿਹਾ ਹੈ ਜਦੋਂ ਲੋਕਾਂ ਦੇ ਹੱਥ “ਓਹਨਾਂ ਦੇ ਗੁਆਂਢੀਆਂ ਦੇ ਉੱਤੇ ਚੁੱਕੇ ਜਾਣਗੇ।” (ਜ਼ਕ. 14:13) ਤਾਂ ਫਿਰ ਕਿੰਨਾ ਜ਼ਰੂਰੀ ਹੈ ਕਿ ਅਸੀਂ ਅਜਿਹੀਆਂ ਫ਼ਿਲਮਾਂ, ਕਿਤਾਬਾਂ, ਵਿਡਿਓ ਗੇਮਾਂ ਆਦਿ ਚੀਜ਼ਾਂ ਤੋਂ ਦੂਰ ਰਹੀਏ ਜੋ ਸਾਡੇ ਵਿਚ ਅਜਿਹੇ ਔਗੁਣ ਪੈਦਾ ਕਰ ਸਕਦੀਆਂ ਹਨ ਜਿਨ੍ਹਾਂ ਤੋਂ ਪਰਮੇਸ਼ੁਰ ਨੂੰ ਘਿਣ ਹੈ ਜਿਵੇਂ ਘਮੰਡ ਅਤੇ ਹਿੰਸਾ ਨਾਲ ਪਿਆਰ। (2 ਸਮੂ. 22:28; ਜ਼ਬੂ. 11:5) ਇਸ ਦੀ ਬਜਾਇ, ਆਓ ਆਪਾਂ ਆਪਣੇ ਵਿਚ ਪਰਮੇਸ਼ੁਰੀ ਗੁਣ ਪੈਦਾ ਕਰੀਏ ਜੋ ਪਰਮੇਸ਼ੁਰ ਦੇ ਕ੍ਰੋਧ ਦੀ ਤਪਸ਼ ਅੱਗੇ ਠਹਿਰੇ ਰਹਿਣਗੇ।—ਗਲਾ. 5:22, 23.

ਯਹੋਵਾਹ ਦੇ ਮਹਾਨ ਦਿਨ ਲਈ ਤਿਆਰੀ

12. ਯਹੋਵਾਹ ਦਾ ਦਿਨ ਆਉਣ ਤੇ ਲੋਕ ਕਿਉਂ ਹੱਕੇ-ਬੱਕੇ ਰਹਿ ਜਾਣਗੇ?

¹² ਪੌਲੁਸ ਅਤੇ ਪਤਰਸ ਦੋਵਾਂ ਨੇ ਕਿਹਾ ਕਿ ਯਹੋਵਾਹ ਦਾ ਦਿਨ “ਚੋਰ” ਵਾਂਗ ਚੁੱਪ-ਚਾਪ ਅਚਾਨਕ ਆਵੇਗਾ। (1 ਥੱਸਲੁਨੀਕੀਆਂ 5:1, 2 ਪੜ੍ਹੋ।) ਇਸ ਦਿਨ ਦੀ ਉਡੀਕ ਕਰ ਰਹੇ ਸੱਚੇ ਮਸੀਹੀ ਵੀ ਅਚਾਨਕ ਇਸ ਦੇ ਆ ਜਾਣ ਤੇ ਹੈਰਾਨ ਰਹਿ ਜਾਣਗੇ। (ਮੱਤੀ 24:44) ਪਰ ਬਾਕੀ ਦੀ ਦੁਨੀਆਂ ਸਿਰਫ਼ ਹੈਰਾਨ ਹੀ ਨਹੀਂ ਹੋਵੇਗੀ, ਸਗੋਂ ਇਸ ਨਾਲੋਂ ਕੁਝ ਵੱਧ ਹੋਵੇਗਾ। ਪੌਲੁਸ ਨੇ ਲਿਖਿਆ: “ਜਦ ਲੋਕ [ਜੋ ਯਹੋਵਾਹ ਤੋਂ ਦੂਰ ਹੋ ਚੁੱਕੇ ਹਨ] ਆਖਦੇ ਹੋਣਗੇ ਭਈ ਅਮਨ ਚੈਨ ਅਤੇ ਸੁਖ ਸਾਂਦ ਹੈ ਤਦ ਜਿਵੇਂ ਗਰਭਵੰਤੀ ਇਸਤ੍ਰੀ ਨੂੰ ਪੀੜਾਂ ਲੱਗਦੀਆਂ ਹਨ ਤਿਵੇਂ ਉਨ੍ਹਾਂ ਦਾ ਅਚਾਣਕ ਨਾਸ ਹੋ ਜਾਵੇਗਾ ਅਤੇ ਓਹ ਕਦੀ ਨਾ ਬਚਣਗੇ।”—1 ਥੱਸ. 5:3.