ਯਹੋਵਾਹ ਨੂੰ ਆਪਣਾ ਉੱਤਮ ਚੜ੍ਹਾਵਾ ਚੜ੍ਹਾਓ

¹ ਇਸਰਾਏਲੀਆਂ ਨੂੰ ਦਿੱਤੀ ਯਹੋਵਾਹ ਦੀ ਬਿਵਸਥਾ ਵਿਚ ਇਹ ਸਾਫ਼-ਸਾਫ਼ ਦੱਸਿਆ ਗਿਆ ਸੀ ਕਿ ਯਹੋਵਾਹ ਨੂੰ ਬਲੀ ਚੜ੍ਹਾਏ ਜਾਣ ਵਾਲੇ ਜਾਨਵਰ “ਬੱਜ ਤੋਂ ਰਹਿਤ” ਯਾਨੀ ਪੂਰੀ ਤਰ੍ਹਾਂ ਤੰਦਰੁਸਤ ਹੋਣ। ਰੋਗੀ ਜਾਨਵਰ ਦੀ ਬਲੀ ਨੂੰ ਯਹੋਵਾਹ ਸਵੀਕਾਰ ਨਹੀਂ ਕਰਦਾ ਸੀ। (ਲੇਵੀ. 22:18-20; ਮਲਾ. 1:6-9) ਇਸ ਤੋਂ ਇਲਾਵਾ, ਬਲੀ ਚੜ੍ਹਾਏ ਗਏ ਜਾਨਵਰ ਦੇ ਸਰੀਰ ਦਾ ਸਭ ਤੋਂ ਵਧੀਆ ਹਿੱਸਾ ਯਾਨੀ ਚਰਬੀ ਯਹੋਵਾਹ ਦੀ ਹੁੰਦੀ ਸੀ। (ਲੇਵੀ. 3:14-16) ਇਸਰਾਏਲੀਆਂ ਦਾ ਪਿਤਾ ਅਤੇ ਸੁਆਮੀ ਹੋਣ ਦੇ ਨਾਤੇ ਯਹੋਵਾਹ ਉੱਤਮ ਚੜ੍ਹਾਵੇ ਦਾ ਹੱਕਦਾਰ ਸੀ।

² ਪੁਰਾਣੇ ਸਮਿਆਂ ਵਾਂਗ ਪਰਮੇਸ਼ੁਰ ਅੱਜ ਵੀ ਸਾਡੇ ਤੋਂ ਉੱਤਮ ਚੜ੍ਹਾਵਿਆਂ ਦੀ ਆਸ ਰੱਖਦਾ ਹੈ। ਸਾਡੀ ਸੇਵਾ ਤੋਂ ਪਤਾ ਲੱਗਣਾ ਚਾਹੀਦਾ ਹੈ ਕਿ ਸਾਡੇ ਦਿਲ ਵਿਚ ਯਹੋਵਾਹ ਲਈ ਸ਼ਰਧਾ ਹੈ। ਇਹ ਸੱਚ ਹੈ ਕਿ ਸਾਰਿਆਂ ਦੇ ਹਾਲਾਤ ਵੱਖੋ-ਵੱਖਰੇ ਹਨ। ਪਰ ਸਾਨੂੰ ਸਾਰਿਆਂ ਨੂੰ ਆਪਣੀ ਜਾਂਚ ਕਰਨੀ ਚਾਹੀਦੀ ਹੈ ਕਿ ਅਸੀਂ ਉਸ ਨੂੰ ਉੱਤਮ ਚੜ੍ਹਾਵਾ ਚੜ੍ਹਾ ਰਹੇ ਹਾਂ ਜਾਂ ਨਹੀਂ।—ਅਫ਼. 5:10.

³ ਪੂਰੇ ਦਿਲ ਨਾਲ ਸੇਵਾ ਕਰਨੀ: ਜੇ ਅਸੀਂ ਚਾਹੁੰਦੇ ਹਾਂ ਕਿ ਸਾਡੀ ਸੇਵਾ ਤੋਂ ਯਹੋਵਾਹ ਦੀ ਮਹਿਮਾ ਹੋਵੇ ਅਤੇ ਇਸ ਦਾ ਲੋਕਾਂ ਦੇ ਦਿਲਾਂ ਉੱਤੇ ਅਸਰ ਪਵੇ, ਤਾਂ ਅਸੀਂ ਅੱਧੇ ਮਨ ਨਾਲ ਸੇਵਾ ਨਹੀਂ ਕਰਾਂਗੇ। ਪਰਮੇਸ਼ੁਰ ਅਤੇ ਉਸ ਦੇ ਮਹਾਨ ਮਕਸਦਾਂ ਬਾਰੇ ਸਾਨੂੰ ਦਿਲੋਂ ਗੱਲ ਕਰਨੀ ਚਾਹੀਦੀ ਹੈ ਅਤੇ ਇਸ ਤੋਂ ਸਾਡੀ ਕਦਰਦਾਨੀ ਝਲਕਣੀ ਚਾਹੀਦੀ ਹੈ। (ਜ਼ਬੂ. 145:7) ਇਸ ਲਈ ਜ਼ਰੂਰੀ ਹੈ ਕਿ ਅਸੀਂ ਬਾਕਾਇਦਾ ਬਾਈਬਲ ਪੜ੍ਹੀਏ ਅਤੇ ਇਸ ਦਾ ਅਧਿਐਨ ਕਰੀਏ।—ਕਹਾ. 15:28.

⁴ ਯਹੋਵਾਹ ਨੂੰ ਆਪਣਾ ਉੱਤਮ ਚੜ੍ਹਾਵਾ ਚੜ੍ਹਾਉਣ ਵਿਚ ਇਹ ਵੀ ਸ਼ਾਮਲ ਹੈ ਕਿ ਅਸੀਂ ਉਸ ਵਾਂਗ ਲੋਕਾਂ ਨਾਲ ਪਿਆਰ ਕਰੀਏ। (ਅਫ਼. 5:1, 2) ਲੋਕਾਂ ਲਈ ਪਿਆਰ ਸਾਨੂੰ ਪ੍ਰੇਰਿਤ ਕਰੇਗਾ ਕਿ ਅਸੀਂ ਜ਼ਿਆਦਾ ਤੋਂ ਜ਼ਿਆਦਾ ਲੋਕਾਂ ਨੂੰ ਬਾਈਬਲ ਵਿੱਚੋਂ ਸੱਚਾਈ ਦੱਸਣ ਦੀ ਕੋਸ਼ਿਸ਼ ਕਰੀਏ ਤਾਂਕਿ ਉਨ੍ਹਾਂ ਨੂੰ ਸਦੀਪਕ ਜੀਵਨ ਮਿਲੇ। (ਮਰ. 6:34) ਅਜਿਹਾ ਪਿਆਰ ਹੋਣ ਕਰਕੇ ਅਸੀਂ ਉਨ੍ਹਾਂ ਵਿਚ ਨਿੱਜੀ ਦਿਲਚਸਪੀ ਲਵਾਂਗੇ। ਅਸੀਂ ਉਨ੍ਹਾਂ ਨੂੰ ਮਿਲਣ ਤੋਂ ਬਾਅਦ ਵੀ ਉਨ੍ਹਾਂ ਬਾਰੇ ਸੋਚਦੇ ਰਹਾਂਗੇ ਅਤੇ ਜਲਦੀ ਤੋਂ ਜਲਦੀ ਉਨ੍ਹਾਂ ਨੂੰ ਦੁਬਾਰਾ ਮਿਲਣ ਜਾਵਾਂਗੇ। ਅਸੀਂ ਅਧਿਆਤਮਿਕ ਤਰੱਕੀ ਕਰਨ ਵਿਚ ਉਨ੍ਹਾਂ ਦੀ ਪੂਰੀ-ਪੂਰੀ ਮਦਦ ਵੀ ਕਰਾਂਗੇ।—ਰਸੂ. 20:24; 26:28, 29.

⁵ “ਉਸਤਤ ਦਾ ਬਲੀਦਾਨ”: ਸੇਵਕਾਈ ਵਿਚ ਮਿਹਨਤ ਕਰ ਕੇ ਵੀ ਅਸੀਂ ਯਹੋਵਾਹ ਨੂੰ ਆਪਣਾ ਉੱਤਮ ਚੜ੍ਹਾਵਾ ਚੜ੍ਹਾਉਂਦੇ ਹਾਂ। ਜਦੋਂ ਅਸੀਂ ਪੂਰੀ ਤਿਆਰੀ ਕਰ ਕੇ ਚੰਗੀ ਤਰ੍ਹਾਂ ਪ੍ਰਚਾਰ ਕਰਦੇ ਹਾਂ, ਤਾਂ ਅਸੀਂ ਆਪਣੇ ਸਮੇਂ ਦੀ ਚੰਗੀ ਵਰਤੋਂ ਕਰਦੇ ਹਾਂ। (1 ਤਿਮੋ. 4:10) ਚੰਗੀ ਤਿਆਰੀ ਕਰ ਕੇ ਅਸੀਂ ਪ੍ਰਚਾਰ ਦੌਰਾਨ ਸਾਫ਼ ਤਰੀਕੇ ਤੇ ਪੂਰੇ ਵਿਸ਼ਵਾਸ ਨਾਲ ਗੱਲ ਕਰ ਸਕਦੇ ਹਾਂ ਜਿਸ ਕਰਕੇ ਲੋਕ ਸਾਡੀ ਗੱਲ ਸੁਣਨਗੇ। (ਕਹਾ. 16:21) ਦੂਸਰਿਆਂ ਨੂੰ ਖ਼ੁਸ਼ ਖ਼ਬਰੀ ਦੱਸਦੇ ਹੋਏ ਅਸੀਂ ਆਪਣੇ ਦਿਲੋਂ ਜੋ ਕਹਾਂਗੇ, ਉਸ ਨੂੰ ਅਸੀਂ “ਉਸਤਤ ਦਾ ਬਲੀਦਾਨ” ਕਹਿ ਸਕਦੇ ਹਾਂ।—ਇਬ. 13:15.

ਨੌਜਵਾਨੋ—ਪਰਮੇਸ਼ੁਰ ਦਾ ਬਚਨ ਪੜ੍ਹੋ!

¹ ਜਵਾਨੀ ਦੇ ਦਿਨ ਬਹੁਤ ਸਾਰੀਆਂ ਚੁਣੌਤੀਆਂ ਨਾਲ ਭਰੇ ਹੁੰਦੇ ਹਨ ਤੇ ਨੌਜਵਾਨਾਂ ਨੂੰ ਕਈ ਅਹਿਮ ਫ਼ੈਸਲੇ ਕਰਨੇ ਹੁੰਦੇ ਹਨ। ਤੁਹਾਡੇ ਵਰਗੇ ਬਹੁਤ ਸਾਰੇ ਮਸੀਹੀ ਨੌਜਵਾਨਾਂ ਉੱਤੇ ਰੋਜ਼-ਰੋਜ਼ ਦਬਾਅ ਪਾਇਆ ਜਾਂਦਾ ਹੈ ਕਿ ਉਹ ਅਨੈਤਿਕ ਕੰਮ ਕਰ ਕੇ ਪਰਮੇਸ਼ੁਰ ਦੇ ਨੈਤਿਕ ਮਿਆਰਾਂ ਦੀ ਉਲੰਘਣਾ ਕਰਨ। ਪੜ੍ਹਾਈ, ਨੌਕਰੀ ਅਤੇ ਵਿਆਹ ਸੰਬੰਧੀ ਫ਼ੈਸਲੇ ਕਰਨ ਤੋਂ ਪਹਿਲਾਂ ਹੀ ਤੁਹਾਨੂੰ ਅਧਿਆਤਮਿਕ ਟੀਚੇ ਰੱਖ ਲੈਣੇ ਚਾਹੀਦੇ ਹਨ। ਇਸ ਤਰ੍ਹਾਂ ਕਰ ਕੇ ਹੀ ਤੁਸੀਂ ਦੂਸਰੇ ਫ਼ੈਸਲੇ ਸੋਚ-ਸਮਝ ਕੇ ਕਰ ਸਕੋਗੇ ਜਿਨ੍ਹਾਂ ਤੋਂ ਤੁਹਾਨੂੰ ਜ਼ਿੰਦਗੀ ਭਰ ਲਈ ਫ਼ਾਇਦਾ ਹੋਵੇਗਾ। ਨਿਸ਼ਚਿਤ ਅਧਿਆਤਮਿਕ ਟੀਚੇ ਰੱਖ ਕੇ ਤੁਸੀਂ ਸਮਝਦਾਰੀ ਨਾਲ ਚੱਲੋਗੇ ਅਤੇ ਤੁਹਾਨੂੰ ਕਾਮਯਾਬੀ ਮਿਲੇਗੀ। ਪਰਮੇਸ਼ੁਰ ਦੇ ਬਚਨ ਨੂੰ ਬਾਕਾਇਦਾ ਪੜ੍ਹਨ ਅਤੇ ਇਸ ਉੱਤੇ ਮਨਨ ਕਰਨ ਨਾਲ ਤੁਹਾਨੂੰ ਇਸ ਵਿਚ ਦਿੱਤੀ ਸਲਾਹ ਅਨੁਸਾਰ ਆਪਣੀ ਜ਼ਿੰਦਗੀ ਜੀਣ ਦੀ ਪ੍ਰੇਰਣਾ ਮਿਲੇਗੀ ਅਤੇ ਤੁਸੀਂ ਸਹੀ ਕੰਮਾਂ ਵਿਚ ਕਾਮਯਾਬ ਹੋਵੋਗੇ।—ਯਹੋ. 1:8; ਜ਼ਬੂ. 1:2, 3.

² ਇਸ ਤੋਂ ਤੁਹਾਨੂੰ ਕੀ ਫ਼ਾਇਦਾ ਹੋਵੇਗਾ? ਸ਼ਤਾਨ ਦੀ ਦੁਨੀਆਂ ਵਿਚ ਅਜਿਹੀਆਂ ਬਹੁਤ ਸਾਰੀਆਂ ਚੀਜ਼ਾਂ ਹਨ ਜੋ ਗ਼ਲਤ ਕੰਮ ਕਰਨ ਲਈ ਸਾਨੂੰ ਭਰਮਾਉਂਦੀਆਂ ਹਨ। (1 ਯੂਹੰ. 2:15, 16) ਤੁਸੀਂ ਸ਼ਾਇਦ ਆਪਣੇ ਨਾਲ ਪੜ੍ਹਨ ਵਾਲਿਆਂ ਬਾਰੇ ਜਾਂ ਦੂਸਰੇ ਹਮਉਮਰ ਨੌਜਵਾਨਾਂ ਬਾਰੇ ਜਾਣਦੇ ਹੋਵੋਗੇ ਜੋ ਆਪਣੇ ਦੋਸਤਾਂ ਦੇ ਦਬਾਅ ਥੱਲੇ ਆ ਕੇ ਗ਼ਲਤ ਕੰਮ ਕਰ ਬੈਠੇ ਅਤੇ ਇਸ ਦੇ ਨਤੀਜੇ ਭੁਗਤੇ। ਬਾਈਬਲ ਦੀ ਸਿੱਖਿਆ ਉੱਤੇ ਚੱਲਣ ਨਾਲ ਤੁਹਾਨੂੰ ਗ਼ਲਤ ਕੰਮ ਕਰਨ ਤੋਂ ਇਨਕਾਰ ਕਰਨ ਲਈ ਨੈਤਿਕ ਅਤੇ ਅਧਿਆਤਮਿਕ ਤਾਕਤ ਮਿਲੇਗੀ। ਇਸ ਤੋਂ ਇਲਾਵਾ, ਪਰਮੇਸ਼ੁਰ ਦੇ ਬਚਨ ਦੀ ਸਿੱਖਿਆ ਸ਼ਤਾਨ ਦੇ ਨਜ਼ਰ ਨਾ ਆਉਣ ਵਾਲੇ ਫੰਦਿਆਂ ਤੋਂ ਬਚਣ ਵਿਚ ਤੁਹਾਡੀ ਮਦਦ ਕਰ ਸਕਦੀ ਹੈ। (2 ਕੁਰਿੰ. 2:11; ਇਬ. 5:14) ਪਰਮੇਸ਼ੁਰ ਦੇ ਰਾਹਾਂ ਉੱਤੇ ਚੱਲਣ ਨਾਲ ਤੁਹਾਨੂੰ ਜ਼ਿੰਦਗੀ ਵਿਚ ਸੱਚੀ ਖ਼ੁਸ਼ੀ ਅਤੇ ਸੰਤੁਸ਼ਟੀ ਮਿਲੇਗੀ।—ਜ਼ਬੂ. 119:1, 9, 11.

³ ਪਰਮੇਸ਼ੁਰ ਦੇ ਬਚਨ ਦੇ ਕਦੀ ਨਾ ਬਦਲਣ ਵਾਲੇ ਅਸੂਲ ਇਨਸਾਨੀ ਸਮਝ ਤੋਂ ਕਿਤੇ ਬਿਹਤਰ ਹਨ। (ਜ਼ਬੂ. 119:98-100) ਬਾਈਬਲ ਦੇ ਅਸੂਲਾਂ ਨੂੰ ਜਾਣਨ ਅਤੇ ਯਹੋਵਾਹ ਦੇ ਜ਼ਾਹਰ ਮਕਸਦਾਂ ਉੱਤੇ ਮਨਨ ਕਰਨ ਦੇ ਨਾਲ-ਨਾਲ ਦਿਲੋਂ ਪ੍ਰਾਰਥਨਾ ਕਰ ਕੇ ਤੁਹਾਨੂੰ ਬਾਈਬਲ ਦੇ ਸਰਬ ਬੁੱਧੀਮਾਨ ਲੇਖਕ ਯਹੋਵਾਹ ਪਰਮੇਸ਼ੁਰ ਨਾਲ ਗੂੜ੍ਹਾ ਰਿਸ਼ਤਾ ਜੋੜਨ ਵਿਚ ਮਦਦ ਮਿਲੇਗੀ। ਉਹ ਵਾਅਦਾ ਕਰਦਾ ਹੈ: “ਮੈਂ ਤੈਨੂੰ ਸਮਝ ਦੇਵਾਂਗਾ, ਅਤੇ ਜਿਸ ਰਾਹ ਉੱਤੇ ਤੈਂ ਚੱਲਣਾ ਹੈ ਤੈਨੂੰ ਸਿਖਾਵਾਂਗਾ, ਤੇਰੇ ਉੱਤੇ ਨਿਗਾਹ ਰੱਖ ਕੇ ਤੈਨੂੰ ਸਲਾਹ ਦਿਆਂਗਾ।”—ਜ਼ਬੂ. 32:8.

⁴ ਇਸ ਨੂੰ ਪੜ੍ਹਨ ਲਈ ਸਮਾਂ ਕੱਢੋ: ਇਕ ਮਸੀਹੀ ਨੌਜਵਾਨ ਨੇ ਪੂਰੀ ਬਾਈਬਲ ਪੜ੍ਹਨ ਦਾ ਟੀਚਾ ਰੱਖਿਆ ਅਤੇ ਉਸ ਨੇ ਇਕ ਸਾਲ ਵਿਚ ਪੂਰੀ ਬਾਈਬਲ ਪੜ੍ਹ ਲਈ। ਉਸ ਨੂੰ ਇਸ ਦਾ ਕੀ ਫ਼ਾਇਦਾ ਹੋਇਆ? ਉਹ ਦੱਸਦੀ ਹੈ: “ਮੈਂ ਯਹੋਵਾਹ ਦੇ ਬਾਰੇ ਬਹੁਤ ਕੁਝ ਸਿੱਖਿਆ। ਇਹ ਸਾਰੀਆਂ ਗੱਲਾਂ ਸਿੱਖਣ ਨਾਲ ਯਹੋਵਾਹ ਪ੍ਰਤੀ ਮੇਰਾ ਪਿਆਰ ਹੋਰ ਡੂੰਘਾ ਹੋ ਗਿਆ ਅਤੇ ਇਸ ਤੋਂ ਮੈਨੂੰ ਪ੍ਰੇਰਣਾ ਮਿਲੀ ਕਿ ਮੈਂ ਪੂਰੀ ਜ਼ਿੰਦਗੀ ਪਰਮੇਸ਼ੁਰ ਦਾ ਡਰ ਆਪਣੇ ਦਿਲ ਵਿਚ ਰੱਖਾਂ।” (ਯਾਕੂ. 4:8) ਕੀ ਤੁਸੀਂ ਪੂਰੀ ਬਾਈਬਲ ਪੜ੍ਹ ਲਈ ਹੈ? ਜੇ ਨਹੀਂ, ਤਾਂ ਕਿਉਂ ਨਾ ਤੁਸੀਂ ਇਸ ਨੂੰ ਆਪਣਾ ਟੀਚਾ ਬਣਾਓ? ਯਹੋਵਾਹ ਜ਼ਰੂਰ ਤੁਹਾਡੇ ਜਤਨਾਂ ਤੇ ਬਰਕਤ ਪਾਵੇਗਾ ਅਤੇ ਤੁਹਾਨੂੰ ਅਧਿਆਤਮਿਕ ਤੌਰ ਤੇ ਮਾਲਾਮਾਲ ਕਰੇਗਾ।