ਯਹੋਵਾਹ ਸਾਡਾ ਸਿਰਜਣਹਾਰ ਹੈ। ਉਸ ਨੇ ਦਿਸਣ ਅਤੇ ਨਾ ਦਿਸਣ ਵਾਲੀਆਂ ਸਾਰੀਆਂ ਚੀਜ਼ਾਂ ਬਣਾਈਆਂ। ਦਿਸਣ ਵਾਲੀਆਂ ਚੀਜ਼ਾਂ ਬਣਾਉਣ ਤੋਂ ਪਹਿਲਾਂ ਉਸ ਨੇ ਕਿੰਨੇ ਸਾਰੇ ਦੂਤ ਬਣਾਏ! ਤੁਹਾਨੂੰ ਪਤਾ ਦੂਤ ਕੌਣ ਹਨ? ਉਹ ਯਹੋਵਾਹ ਦੇ ਸੇਵਕ ਹਨ। ਉਹ ਪਰਮੇਸ਼ੁਰ ਵਰਗੇ ਹਨ। ਜਿੱਦਾਂ ਅਸੀਂ ਪਰਮੇਸ਼ੁਰ ਨੂੰ ਨਹੀਂ ਦੇਖ ਸਕਦੇ, ਉੱਦਾਂ ਹੀ ਅਸੀਂ ਉਨ੍ਹਾਂ ਨੂੰ ਵੀ ਨਹੀਂ ਦੇਖ ਸਕਦੇ। ਯਹੋਵਾਹ ਨੇ ਜਿਹੜਾ ਪਹਿਲਾ ਦੂਤ ਬਣਾਇਆ, ਉਸ ਨੇ ਪਰਮੇਸ਼ੁਰ ਨਾਲ ਮਿਲ ਕੇ ਹੋਰ ਚੀਜ਼ਾਂ ਬਣਾਈਆਂ, ਜਿਵੇਂ ਤਾਰੇ, ਗ੍ਰਹਿ ਵਗੈਰਾ-ਵਗੈਰਾ। ਇਕ ਗ੍ਰਹਿ ਹੈ, ਸਾਡੀ ਸੋਹਣੀ ਧਰਤੀ।

ਫਿਰ ਯਹੋਵਾਹ ਨੇ ਧਰਤੀ ਨੂੰ ਇੱਦਾਂ ਬਣਾਇਆ ਕਿ ਇਸ ʼਤੇ ਜਾਨਵਰ ਅਤੇ ਇਨਸਾਨ ਰਹਿ ਸਕਣ। ਉਸ ਨੇ ਸੂਰਜ ਦੀ ਰੌਸ਼ਨੀ ਨਾਲ ਧਰਤੀ ʼਤੇ ਚਾਨਣ ਕੀਤਾ। ਉਸ ਨੇ ਪਹਾੜ, ਸਮੁੰਦਰ ਅਤੇ ਨਦੀਆਂ ਬਣਾਈਆਂ।

ਇਸ ਤੋਂ ਬਾਅਦ ਕੀ ਬਣਾਇਆ? ਯਹੋਵਾਹ ਨੇ ਕਿਹਾ: ‘ਮੈਂ ਘਾਹ, ਪੇੜ-ਪੌਦੇ ਅਤੇ ਦਰਖ਼ਤ ਲਾਵਾਂਗਾ।’ ਫਿਰ ਅਲੱਗ-ਅਲੱਗ ਤਰ੍ਹਾਂ ਦੇ ਫਲ, ਸਬਜ਼ੀਆਂ ਅਤੇ ਫੁੱਲ ਉੱਗਣ ਲੱਗ ਪਏ। ਇਸ ਤੋਂ ਬਾਅਦ, ਯਹੋਵਾਹ ਨੇ ਪੰਛੀ, ਪਾਣੀ ਵਿਚ ਰਹਿਣ ਵਾਲੇ ਜਾਨਵਰ ਅਤੇ ਰੀਂਗਣ ਤੇ ਤੁਰਨ ਵਾਲੇ ਜਾਨਵਰ ਬਣਾਏ। ਉਸ ਨੇ ਛੋਟੇ ਜਾਨਵਰ ਬਣਾਏ ਜਿਵੇਂ ਖ਼ਰਗੋਸ਼ ਅਤੇ ਵੱਡੇ ਜਾਨਵਰ ਵੀ ਬਣਾਏ ਜਿਵੇਂ ਹਾਥੀ। ਤੁਹਾਨੂੰ ਕਿਹੜਾ ਜਾਨਵਰ ਪਸੰਦ ਹੈ?

ਫਿਰ ਯਹੋਵਾਹ ਨੇ ਪਹਿਲੇ ਦੂਤ ਨੂੰ ਕਿਹਾ: ‘ਆਓ ਆਪਾਂ ਇਨਸਾਨ ਨੂੰ ਬਣਾਈਏ।’ ਇਨਸਾਨਾਂ ਨੇ ਜਾਨਵਰਾਂ ਤੋਂ ਵੱਖਰੇ ਹੋਣਾ ਸੀ। ਉਹ ਨਵੀਆਂ ਚੀਜ਼ਾਂ ਦੀ ਖੋਜ ਕਰ ਸਕਦੇ ਸਨ। ਉਹ ਹੱਸ ਤੇ ਬੋਲ ਸਕਦੇ ਸਨ। ਨਾਲੇ ਉਹ ਪਰਮੇਸ਼ੁਰ ਨੂੰ ਪ੍ਰਾਰਥਨਾ ਵੀ ਕਰ ਸਕਦੇ ਸਨ। ਉਨ੍ਹਾਂ ਨੇ ਧਰਤੀ ਅਤੇ ਜਾਨਵਰਾਂ ਦੀ ਦੇਖ-ਭਾਲ ਕਰਨੀ ਸੀ। ਕੀ ਤੁਹਾਨੂੰ ਪਤਾ ਪਹਿਲਾ ਆਦਮੀ ਕੌਣ ਸੀ? ਚਲੋ ਆਪਾਂ ਦੇਖੀਏ।

ਯਹੋਵਾਹ ਨੇ ਅਦਨ ਦੇ ਇਲਾਕੇ ਵਿਚ ਇਕ ਬਾਗ਼ ਲਾਇਆ। ਬਾਗ਼ ਵਿਚ ਬਹੁਤ ਸਾਰੇ ਫੁੱਲ, ਦਰਖ਼ਤ ਅਤੇ ਜਾਨਵਰ ਸਨ। ਫਿਰ ਪਰਮੇਸ਼ੁਰ ਨੇ ਪਹਿਲੇ ਇਨਸਾਨ ਆਦਮ ਨੂੰ ਮਿੱਟੀ ਤੋਂ ਬਣਾਇਆ ਅਤੇ ਉਸ ਦੀਆਂ ਨਾਸਾਂ ਵਿਚ ਸਾਹ ਫੂਕਿਆ। ਤੁਹਾਨੂੰ ਪਤਾ ਫਿਰ ਕੀ ਹੋਇਆ? ਆਦਮ ਜੀਉਂਦਾ ਇਨਸਾਨ ਬਣ ਗਿਆ। ਯਹੋਵਾਹ ਨੇ ਉਸ ਨੂੰ ਬਾਗ਼ ਦੀ ਦੇਖ-ਭਾਲ ਕਰਨ ਅਤੇ ਸਾਰੇ ਜਾਨਵਰਾਂ ਦੇ ਨਾਂ ਰੱਖਣ ਦਾ ਕੰਮ ਦਿੱਤਾ।

ਯਹੋਵਾਹ ਨੇ ਆਦਮ ਨੂੰ ਇਕ ਜ਼ਰੂਰੀ ਹੁਕਮ ਦਿੱਤਾ। ਉਸ ਨੇ ਆਦਮ ਨੂੰ ਕਿਹਾ: ‘ਤੂੰ ਸਾਰੇ ਦਰਖ਼ਤਾਂ ਦਾ ਫਲ ਖਾ ਸਕਦਾ ਹੈਂ, ਪਰ ਇਕ ਦਰਖ਼ਤ ਦਾ ਨਹੀਂ। ਜੇ ਤੂੰ ਉਸ ਦਾ ਫਲ ਖਾਵੇਂਗਾ, ਤੂੰ ਮਰ ਜਾਵੇਂਗਾ।’

ਬਾਅਦ ਵਿਚ ਯਹੋਵਾਹ ਨੇ ਕਿਹਾ: ‘ਮੈਂ ਆਦਮ ਦਾ ਸਾਥ ਦੇਣ ਲਈ ਇਕ ਮਦਦਗਾਰ ਬਣਾਵਾਂਗਾ।’ ਉਸ ਨੇ ਆਦਮ ਨੂੰ ਗੂੜ੍ਹੀ ਨੀਂਦ ਸੁਲਾ ਦਿੱਤਾ ਅਤੇ ਫਿਰ ਉਸ ਦੀ ਪਸਲੀ ਤੋਂ ਇਕ ਔਰਤ ਬਣਾਈ। ਉਸ ਦਾ ਨਾਂ ਹੱਵਾਹ ਸੀ। ਆਦਮ ਅਤੇ ਹੱਵਾਹ ਪਹਿਲਾ ਪਰਿਵਾਰ ਸੀ। ਆਦਮ ਨੂੰ ਆਪਣੀ ਪਤਨੀ ਨੂੰ ਦੇਖ ਕੇ ਕਿੱਦਾਂ ਲੱਗਾ? ਆਦਮ ਇੰਨਾ ਖ਼ੁਸ਼ ਸੀ ਕਿ ਉਸ ਨੇ ਕਿਹਾ: ‘ਦੇਖੋ ਯਹੋਵਾਹ ਨੇ ਮੇਰੀ ਪਸਲੀ ਤੋਂ ਕੀ ਬਣਾਇਆ! ਇਹ ਮੇਰੇ ਵਰਗੀ ਹੈ।’

ਯਹੋਵਾਹ ਨੇ ਆਦਮ ਤੇ ਹੱਵਾਹ ਨੂੰ ਕਿਹਾ ਕਿ ਉਹ ਬੱਚੇ ਪੈਦਾ ਕਰਨ ਤੇ ਧਰਤੀ ਨੂੰ ਭਰ ਦੇਣ। ਉਹ ਚਾਹੁੰਦਾ ਸੀ ਕਿ ਉਹ ਮਿਲ ਕੇ ਸਾਰੀ ਧਰਤੀ ਨੂੰ ਅਦਨ ਦੇ ਬਾਗ਼ ਵਰਗੀ ਸੋਹਣੀ ਬਣਾਉਣ ਅਤੇ ਇਸ ਕੰਮ ਦਾ ਮਜ਼ਾ ਲੈਣ। ਪਰ ਇੱਦਾਂ ਹੋਇਆ ਨਹੀਂ। ਕਿਉਂ? ਇਸ ਬਾਰੇ ਅਸੀਂ ਅਗਲੇ ਪਾਠ ਵਿਚ ਸਿੱਖਾਂਗੇ।