Genesis

47 Kanian linmay Jose tan imbalita tod Faraon:+ “Sinmabi manlapud Canaan so amak tan saray agagik pati saray karnero tan baka ra tan amin a kayarian da, tan wadman ira ed dalin na Gosen.”+ 2 Impila toy limara ed saray agagi to tan inyarap to ra ed Faraon.+

3 Inkuan na Faraon ed saray agagi to: “Antoy anapan yo?” Oniay ebat dad Faraon: “Managkomponi na karnero iray lingkor mo, a singa saray inmuunan atateng mi.”+ 4 Insan inkuan dad Faraon: “Linma kami dia pian manayam bilang dayo ed sayan dalin,+ ta anggapo lay pangipastolan ed pulok na saray lingkor mo, ta pinasya so eras ed dalin na Canaan.+ Kanian ipangasim, abuloyan mo komon a manayam iray lingkor mo diad dalin na Gosen.”+ 5 Diad saman et inkuan na Faraon ed si Jose: “Nila ka dia na amam tan saray agagim. 6 Walad arapan mo so interon dalin na Ehipto. Panayam mo so amam tan saray agagim diad sankaabigan a pasen na dalin.+ Panayam mo ra ed dalin na Gosen, tan no wala ray kabat mon makayarin lalaki ed sikara, ipasen mo ra bilang manag-asikaso na kokomponien ya ayayep ko.”

7 Insan inyakar nen Jose ed Faraon si Jacob ya ama to tan inkabat tod sikato, tan benendisyonan nen Jacob so Faraon. 8 Intepet na Faraon ed si Jacob: “Pigay taon mo la?” 9 Inkuan nen Jacob ed Faraon: “Saray taon na impanalis-alis ko ed nanduruman pasen* et 130. Antikey tan makapagonigon iray taon na bilay ko,+ tan aliwa ran singa karukey na saray taon na impanbilay na saray inmuunan atateng ko legan na impanalis-alis dad nanduruman pasen.”*+ 10 Kayari na satan et benendisyonan nen Jacob so Faraon tan linma la.

11 Kanian impanayam nen Jose so ama to tan saray agagi to ed dalin na Ehipto, tan inikdan to ray kayarian ed sankaabigan a pasen na dalin, diad dalin na Rameses,+ unong ya ingganggan na Faraon. 12 Tan intultuloy ya inikdan nen Jose na naakan* so ama to tan saray agagi to tan say interon sankaabungan nen ama to, unong ed bilang na saray ananak da.

13 Natan et anggapo lay naakan* ed interon dalin, ta pinasya lay eras, tan kinmapuy la ray totoo ed dalin na Ehipto tan ed dalin na Canaan nisengeg ed eras.+ 14 Titiponen nen Jose so amin a kuartan walad dalin na Ehipto tan ed dalin na Canaan, ya ibabayar na totoo ed ilik a sasaliwen da,+ tan iyaakar nen Jose so kuarta ed abung na Faraon. 15 Sinmabi panaon a naupot lay kuarta ed dalin na Ehipto tan ed dalin na Canaan, kanian linmad si Jose so amin ya Ehipsio, ya inkuan dan: “Ikdan mo kami na naakan! Ta akin et ompatey kami ed arapan mo lapud naupot lay kuarta mi?” 16 Insan inkuan nen Jose: “No naupot lay kuarta yo, iter yo ray ayayep yo, tan ikdan ta kayoy naakan bilang kasalat na saray ayayep yo.” 17 Kanian inyakar dad si Jose iray ayayep da, tan inikdan ira nen Jose na naakan bilang kasalat na saray kabayo ra, saray karnero tan baka, tan saray asno ra, tan diad saman a taon et intultuloy to ran inikdan na naakan bilang kasalat na amin ya ayayep da.

18 Sanen anampot iman a taon, linma rad sikato diad tinmumbok a taon tan inkuan da: “Agmi la iyamot ed katawan ko a niiter mi lan amin ed katawan ko so kuarta tan saray ayayep. Anggapo lay akera a niiter mi ed katawan mi noag say laman mi tan dalin mi. 19 Akin et ompatey kami ed arapan mo, sikami tan say dalin mi? Saliw mo kami tan say dalin mi bilang kasalat na naakan, tan magmaliw kamin aripen na Faraon tan nakayarian to so dalin mi. Ikdan mo kami na bini pian manbilay kami tan ag-ompatey, tan agnapaulyan so dalin mi.” 20 Kanian sinaliw nen Jose so amin a dalin na saray Ehipsio parad Faraon, lapud inlako na kada Ehipsio so uma to, ta pinasya lay eras; tan nagmaliw a kayarian na Faraon so dalin.

21 Insan inyalis tod saray syudad iray totoo, manlapud sakey a sampot na ketegan na Ehipto ya anggad sananey a sampot na satan.+ 22 Say agto labat sinaliw et say dalin na saray saserdote,+ ta manlalapud Faraon so rasyon na saray saserdote tan pambibilay da so rasyon ya iiter ed sikara na Faraon. Kanian agda inlako so dalin da. 23 Insan inkuan nen Jose ed saray totoo: “Sikayo tan say dalin yo et asaliw ko la parad Faraon. Nia so bini parad sikayo, tan itanem yo itan ed dalin. 24 No manbunga itan, iter yo ed Faraon so kakalima,+ balet kien yo so apatiran kabiangan pian onkanan bini ed uma tan onkanan naakan yo tan saray walad sankaabungan yo tan saray ananak yo.” 25 Kanian inkuan da: “Inliktar moy bilay mi.+ Nagamoran mi komon so panangabobon na katawan mi, tan magmaliw kamin ariripen na Faraon.”+ 26 Insan ginawa itan nen Jose a ganggan, a say kakalima et kien na Faraon, ya ipapakurang anggad natan diad dalin na Ehipto. Say aglabat nagmaliw a kayarian na Faraon et say dalin na saray saserdote.+

27 Nantultuloy a nanayam si Israel ed dalin na Ehipto, diad dalin na Gosen,+ tan nampirmi ra ditan tan nagmaliw iran mabunga tan dinmakerakel iran maong.+ 28 Tan 17 taon a nanayam si Jacob ed dalin na Ehipto, kanian say impanbilay nen Jacob et 147 taon.+

29 Asingger lay ipatey nen Israel,+ kanian tinawag toy Jose ya anak to tan inkuan to: “Natan, no ipatnag mod siak so kaabigan, ipangasim ya iyan moy limam ed silong na ulpok, tan ipatnag mod siak so matoor a panangaro tan inkamatoor. Ipangasim, agmo ak ipoponpon ed Ehipto.+ 30 Sano ompatey ak,* ipaway mo ak ed Ehipto tan iponpon mo ak ed lubok na saray inmuunan atateng ko.”+ Diad satan et inkuan to: “Gawaen ko so unong ed imbagam.” 31 Insan inkuan to: “Mansamba kad siak.” Kanian sikatoy nansamba ed sikato.+ Diad saman et dinmakmomo si Israel ed uloan na dukolan to.+