Jeremias

32 Say mensahe nen Jehova ed si Jeremias diad koma-10 taon nen Arin Zedekias na Juda, salanti, diad koma-18 taon nen Nabucodonosor.*+ 2 Diad saman et kukubkoben na saray armada na ari na Babilonia so Jerusalem, tan si propeta Jeremias et akapriso ed Sular na Guardia+ diad abung* na ari na Juda. 3 Ta sikatoy impriso nen Arin Zedekias na Juda,+ ya imbaga ton, “Akin et oniay ipropropesiyam? Ibabagam ya, ‘Oniay inkuan nen Jehova: “Iyawat ko iyan syudad ed ari na Babilonia, tan sakopen to iya,+ 4 tan si Arin Zedekias na Juda et agmakaliktar ed saray Caldeo, ta sikatoy seguradon niyawat ed ari na Babilonia, tan sikatoy arap-arapan a mitongtong ed ari.”’+ 5 ‘Awiten tod Babilonia si Zedekias, tan sikatoy mansiansia diman anggad sikatoy imanoen ko,’ so imbaga nen Jehova. ‘Anggano mantultuloy kayon milaban ed saray Caldeo, agkayo manalo.’”+

6 Inkuan nen Jeremias: “Oniay imbaga nen Jehova ed siak, 7 ‘Onlad sika si Hanamel ya anak nen Salum a pangamaen* mo tan oniay ibaga to: “Saliw mo imay umak diad Anatot,+ lapud sika so manunan walaay kanepegan a manondon ed satan.”’”+

8 Linma ed siak si Hanamel ya anak na pangamaen ko, unong ya imbaga nen Jehova, diad Sular na Guardia, tan oniay inkuan to: “Ipangasim, saliw mo imay umak ed Anatot, a walad dalin na Benjamin, ta sika so makanepegan a mangayarian tan manondon ed satan. Saliw mo iman.” Diad saman et naamtaan ko ya agawa iya lapud salita nen Jehova.

9 Kanian sinaliw kod si Hanamel ya anak na pangamaen ko so uma diad Anatot. Sinimbang kod sikato so kuarta,+ pitoran siklo* tan samploran piraso na pilak. 10 Insan nanggawa ak na kasulatan,+ tinatakan ko itan, anawag ak na saray tasi,+ tan sinimbang ko so kuarta. 11 Inalak imay kasulatan na impangaliw, samay atatakan unong ed ganggan tan saray legal a kakaukolanen, tan samay ag-atatakan, 12 tan inter ko so kasulatan na impangaliw ed si Baruc+ ya anak nen Nerias,+ ya anak nen Masias, diad arapan nen Hanamel ya anak na pangamaen ko, ed arapan na saray tasi a nampirma ed kasulatan na impangaliw, tan ed arapan na amin a Judio ya akayurong diad Sular na Guardia.+

13 Diad arapan da et oniay ingganggan kod si Baruc: 14 “Oniay inkuan nen Jehova na saray armada, say Dios na Israel, ‘Alam irayan kasulatan, say kasulatan na impangaliw, samay atatakan tan samay agtinatakan, tan ikargam ed pananginan a gawad pitek, pian nisinop iraya ed andukey a panaon.’ 15 Ta oniay inkuan nen Jehova na saray armada, say Dios na Israel, ‘Saray kaabungan tan kaumaan tan kaubasan et nasaliw lamet ed sayan dalin.’”+

16 Insan kayarik ya inter ed si Baruc ya anak nen Nerias so kasulatan na impangaliw, nampikasi ak ed si Jehova, ya inkuan ko: 17 “O Soberanon Katawan a Jehova! Sika so nanggawa na katawenan tan say dalin diad panamegley na baleg a pakayarim+ tan akaunat a taklay mo. Anggapoy imposible ed sika, 18 sika a mangipapatnag na matoor a panangaro ed saray nilibolibo, balet say kasalanan na saray kaamaan et ibabales mo ed* saray ananak da ya onsublay ed sikara,+ sika so tuan Dios, say magloria tan makapanyarin Dios, a say ngaran mo et Jehova na saray armada. 19 Makapadinayew so simbawam* tan makapanyari iray gawam,+ nanenengneng na saray matam so amin a kabibilay na totoo,+ pian iter mod balang sakey so unong ed kabibilay to tan unong ed saray gagawaen to.+ 20 Nanggawa ka na saray tanda tan milagro ed dalin na Ehipto, a kabkabat ni anggad sayan agew, kanian nanggawa kay ngaran parad inkasika diad Israel tan diad limog na saray totoo,+ a singa natan. 21 Tan impaway mo so Israel a totoom ed dalin na Ehipto, diad panamegley na saray tanda, milagro, mabiskeg a lima, akaunat a taklay, tan makapataktakot a gawa.+

22 “Asabi panaon et inter mod sikara iyan dalin ya insipan mon iter ed saray inmuunan atateng da,+ say dalin a manag-agus so gatas tan dilo.+ 23 Tan akakar ira tan kinayarian da itan, balet ag-ira tinmulok ed boses mo tan ag-ira tinmumbok ed ganggan mo. Agda ginawa so amin ya ingganggan mod sikara, kanian indapom ed sikara iyan amin a kadederal.+ 24 Sinmabi iray lalaki tan nantambak ira na dalanen da pian kubkoben tan sakopen da so syudad,+ tan diad panamegley na espada,+ eras, tan salot*+ et niyawat so syudad ed saray Caldeo a milalaban ed sikara; agawan amin so imbagam, a singa nanenengneng mo natan. 25 Balet imbagam ed siak, O Soberanon Katawan a Jehova, ‘Saliw mo so uma tan manawag ka na saray tasi,’ anta say syudad et niiter lanlamang ed lima na saray Caldeo.”

26 Diad saman et oniay mensahe nen Jehova a sinmabi ed si Jeremias: 27 “Siak si Jehova, say Dios na amin a katooan.* Wala tay imposible ed siak? 28 Kanian inkuan nen Jehova, ‘Iyawat ko iyan syudad ed saray Caldeo tan ed Arin Nabucodonosor* na Babilonia, tan sakopen to iya.+ 29 Tan onsabi iray Caldeo a milaban ed sayan syudad tan palioben tan poolan da iyan syudad+ tan saray kaabungan a diad atep so pangiyaapayan na saray totoo ed saray bagat dad si Baal tan pangiyiibungan day apay ya iinumen parad arum a dirios pian pasanoken da ak.’+

30 “‘Ta puro mauges ed pakanengneng ko so gagawaen na saray totoo na Israel tan Juda, manlapud inkaugaw da ya anggad natan;+ naynay ak a pasasanoken na saray totoo na Israel lapud kimey na saray lima ra,’ so imbaga nen Jehova. 31 ‘Ta sayan syudad et nagmaliw a sengegan na pasnok tan sanok ko,+ manlapu lad agew ya inletneg da iya ya anggad natan, kanian nepeg a naekal iya ed arapan ko,+ 32 lapud amin a kaugsan a ginawa na saray totoo na Israel tan Juda pian pasanoken da ak—sikara, saray arari ra,+ saray prinsipe ra,+ saray saserdote ra, saray propeta ra,+ tan saray lalaki ed Juda tan saray manaayam ed Jerusalem. 33 Naynay da ak ya ibebeneg;+ anggano aminpigapigak iran imbangat,* anggapod sikara so dinmengel pian mangawat na disiplina.+ 34 Tan inyan da iray makapadimlan idolo ra diad abung a tinawag ed ngaran ko, pian dutakan da itan.+ 35 Sakey ni, impaalagey da iray atagey a pasen nen Baal diad Lawak na Anak nen Hinom,*+ pian iparalan dad apoy iray ananak dan lalaki tan bibii parad si Molec,+ a satan et agko ingganggan ed sikara+ tan agbalot linmad pusok* pian gawaen itan a makapadimlan bengatla, a sengegay impankasalanan na Juda.’

36 “Kanian oniay inkuan nen Jehova, say Dios na Israel, nipaakar ed sayan syudad ya ibabaga yon niyawat ed ari na Babilonia diad panamegley na espada, eras, tan salot, 37 ‘Tiponen ko ra manlapud amin a dalin ya angitayakan kod sikara lapud pasnok tan sanok ko tan lapud baleg a pambusol,+ tan ipawil ko rad sayan pasen tan panayamen ko ra ed kaligenan.+ 38 Tan magmaliw iran totook, tan magmaliw ak a Dios da.+ 39 Tan ikdan ko ray saksakey a puso+ tan saksakey a dalan na kabibilay pian naynay da ak a takotan, parad dilin pankaabigan da tan pankaabigan na saray ananak da ya onsublay ed sikara.+ 40 Tan manggawa ak na andi-anggaan a pisisipanan ed sikara,+ tan agak ontundan manggaway kamaongan ed sikara;+ tan iyan kod puso ra so takot ed siak, pian ag-ira onarawi ed siak.+ 41 Panliketan koy panggawa na kamaongan ed sikara,+ tan malet ko ran iletneg ed sayan dalin,+ diad interon pusok tan interon kamarerwak.’”*

42 “Ta oniay inkuan nen Jehova, ‘No panon ya inyakar kod sarayan totoo iyan amin a baleg a kadederal, iyakar ko met ed sikara so amin a kamaongan* ya insipan kod sikara.+ 43 Tan nasaliw lamet ed sayan dalin iray kaumaan,+ anggano ibabaga yon: “Ag-itan napanayaman na too tan ayayep, tan niyawat la itan ed saray Caldeo.”’

44 “‘Saliwen da iray kaumaan, manggawa ray kasulatan na impangaliw tan tatakan da itan, tan manawag ira na saray tasi diad dalin na Benjamin,+ diad kaliberliber na Jerusalem, diad saray syudad na Juda,+ diad saray syudad ed mapalandey a rehyon, diad saray syudad ed abeban pasen,+ tan diad saray syudad ed abalaten, lapud ipawil ko iray naaripen ed sikara,’+ so imbaga nen Jehova.”