Levitico

9 Diad komawalon agew+ et tinawag nen Moises si Aaron tan saray ananak to tan saray mamatatken na Israel. 2 Inkuan tod si Aaron: “Mangala kay sakey a kilaw a kalakian a baka ya onkanan apay parad kasalanan+ tan sakey a kalakian a karnero parad apay a popoolan, samay andiay depekto, tan iyapay mo iratan ed arapan nen Jehova. 3 Balet ibagam ed saray Israelita, ‘Mangala kayoy sakey a kalakian a kanding ya onkanan apay parad kasalanan tan sakey a kilaw a baka tan sakey a kilaw a kalakian a karnero parad apay a popoolan, a saratan et mantaon na sakey, tan andiay depekto iratan, 4 tan sakey a kalakian a baka tan sakey a kalakian a karnero parad saray bagat a pandurungoan,+ pian ibagat iratan ed arapan nen Jehova, tan apay a kakanen+ a nilaokay larak, ta manpanengneng natan si Jehova ed sikayo.’”+

5 Kanian inawit dad arap na tolda a pantitiponan irayan amin a bengatlan ingganggan nen Moises. Insan inmasingger so amin a totoo tan inmalagey ira ed arapan nen Jehova. 6 Tan inkuan nen Moises: “Oniay ingganggan nen Jehova a gawaen yo, pian nanengneng yo so gloria nen Jehova.”+ 7 Insan inkuan nen Moises ed si Aaron: “La kad altar tan iyapay mo so apay mo parad kasalanan+ tan say apay mo a popoolan, tan manggawa kay pananakbong parad sika+ tan parad sankaabungan mo; tan iyapay mo so apay na totoo,+ tan manggawa kay pananakbong parad sikara,+ unong ya ingganggan nen Jehova.”

8 Linman tampol si Aaron ed altar tan pinakgeran to so kilaw a kalakian a baka ya apay parad kasalanan ya onkana ed sikato.+ 9 Insan saray ananak nen Aaron et inyakar dad sikato so dala,+ tan indelnet tod dala so gamet to tan inyan to itan ed saray saklor na altar, tan inkalbo to so akeran dala diad leksab na altar.+ 10 Pinaasewek tod altar so taba tan saray bato tan say taba na altey a nanlapud apay parad kasalanan, unong ya ingganggan nen Jehova ed si Moises.+ 11 Tan pinoolan to so karne tan say katat diad paway na kampo.+

12 Insan pinakgeran nen Aaron so apay a popoolan, tan inter ed sikato na ananak to so dala tan inwalsik to ed amin a diking na altar.+ 13 Inter dad sikato iray tegteg na apay a popoolan a kaibay ulo, tan pinaasewek to iratan diad altar. 14 Ontan met, inurasan to iray pait tan saray sali tan pinaasewek to iratan ed tapew na apay a popoolan a walad altar.

15 Insan inyapay to so apay na totoo tan inala to so kanding ya apay parad kasalanan ya onkana ed saray totoo tan pinakgeran to tan inyapay to itan bilang apay parad kasalanan a singa samay inmuna. 16 Tan inyapay to so apay a popoolan unong ed kaslakan lan gagawaen.+

17 Insan inyapay to so apay a kakanen,+ angakop na daiset ed satan tan pinaasewek tod altar, a kaaruman na apay a popoolan diad kabuasan.+

18 Kayari na satan et pinakgeran to so kalakian a baka tan say kalakian a karnero a parad bagat a pandurungoan ya onkana ed saray totoo. Insan saray ananak nen Aaron et inter dad sikato so dala, tan inwalsik to ed amin a diking na altar.+ 19 No nipaakar ed saray taba na kalakian a baka,+ say mataban ikol na kalakian a karnero, taba ya akabalkot ed loob-loob, saray bato, tan say taba na altey,+ 20 intapew dad saray pagew iratan ya amin a taba, insan pinaasewek to iratan a taba ed tapew na altar.+ 21 Balet saray pagew tan say kawanan ya ulpo et impayapay nen Aaron bilang apay ya ipapayapay diad arapan nen Jehova, unong ya ingganggan nen Moises.+

22 Insan inyatagey nen Aaron iray lima to ed arapan na totoo tan benendisyonan to ra+ tan linmasur manlapud pangiyaapay to na apay parad kasalanan tan apay a popoolan tan saray bagat a pandurungoan. 23 Diad kaunoran et linmoob si Moises tan Aaron diad tolda a pantitiponan insan ira pinmaway tan benendisyonan da iray totoo.+

Anengneng natan na amin a totoo so gloria nen Jehova,+ 24 tan pinmaway so apoy manlapud si Jehova+ tan pinoolan na satan so apay a popoolan tan saray taba a walad tapew na altar. Sanen anengneng itan na amin a totoo, inmeyag ira tan dinmakmomo ra ed dalin.+