Salmo

51 Kasian mo ak pa, O Dios, unong ed matoor a panangarom.+

Bural mo pa ray impakasumlang ko unong ed baleg a panangasim.+

 2 Urasan mo ak pa ed kalilingoan ko,+

Tan linisan mo ak ed kasalanan ko.+

 3 Ta amtak iray impakasumlang ko,

Tan say kasalanan ko et naynay a walad arapan ko.*+

 4 Sika so manuna a* nankasalananan ko;+

Ginawak so mauges ed pakanengneng mo.+

Kanian matunong ka sano mansasalita ka,

Duga ka diad panangukom mo.+

 5 Inyanak ak a walay kalilingoan,

Tan innginew ak nen inak ed kasalanan.*+

 6 Panliliketan moy katuaan a walad puso;+

Say pusok* et ibangat mo komon na tuan karunongan.

 7 Dalisay mo ak komon manlapud kasalanan ko diad panamegley na tanaman a hisopo, pian magmaliw ak a malinis;+

Urasan mo ak komon, pian magmaliw ak a mas amputi nen say niebe.+

 8 Narengel ko komon so tanol na liket tan gayaga,

Pian manliket iray pukel a pinuputer mo.+

 9 Agka komon onnenengneng ed* saray kasalanan ko,+

Tan punas* mon amin iray lingok.+

10 Gawam pan malinis so pusok, O Dios,+

Tan ikdan mo ak na sakey a balo tan mapekder ya espiritu.+

11 Agmo ak komon ipupulisay ed arapan mo;

Tan agmo eekalen ed siak so masanton espiritum.

12 Ipawil mo pad siak so liket ya aliknak sanen inliktar mo ak;+

Pakiwas mo ak pan mabulos ya ontulok ed sika.*

13 Ibangat kod saray mananumlang na ganggan iray dalan mo,+

Pian ompawil ed sika iray makasalanan.

14 Ipaliis mo ak pad pankasalanan ed dala,+ O Dios, say Dios a manangiliktar ko,+

Pian say dilak et malikeliket a mangiyabawag ed inkatunong mo.+

15 O Jehova, abuloyan mo ak pan mansalita,

Pian niyabawag koy dayew mo.+

16 Ta agmo labay so bagat—no labay mo komon et mangiyapay ak;+

Agka naliliketan ed interon apay a popoolan.+

17 Say bagat a makapaliket ed Dios et say nagogonigon ya espiritu;

Agmo ipulisay,* O Dios, so sakey a puson asugatan tan maer-ermen.+

18 Diad kaabigay-linawam et gawaen mo komon so maong ed Sion;

Ipaalagey mo pa iray padir na Jerusalem.

19 Diad ontan et naliketan ka ed saray bagat na inkatunong,

Saray bagat a popoolan tan saray interon apay;

Diad ontan et niyapay ed altar mo iray kalakian a baka.+