Ed si Hebreo
12 Kanian sirin, lapud walay baleg a grupo na saray tasi* ya akapaliber ed sikatayo, ekalen tayo met so amin a pakakabelatan tan say kasalanan a mainomay a makaamper ed sikatayo,+ tan mananos itayon ombatik ed lumba a niiyan diad arapan tayo,+ 2 legan ya akateen so imano tayo ed Manunan Manangitonton tan Manamayadyari na pananisia tayo, si Jesus.+ Lapud liket a niiyan diad arapan to, sikatoy nansungdo ed panamairapan a poste,* imbaliwala to so kababaingan, tan yinmurong ed nikawanan na trono na Dios.+ 3 Nonot yon maong imay nansungdo ed makapainsulton panagsalita na saray makasalanan,+ a saya et pankaugsan da, pian agkayo onkesaw tan onsuko.*+
4 Diad pilalaban yo ed kasalanan, agyo nin balot asali akilaban ya anggad inmagus so dala yo. 5 Tan alingwanan yo la imay bilin a diad satan et tinawag kayon ananak: “Ana’ko, agmo leleglemewen so disiplina nen Jehova,* tan agka onsusuko sano ipepetek to ka; 6 ta saramay aaroen nen Jehova* et didisiplinaen to, diad tua et leleweten* to so balang sakey ya aawaten to bilang anak.”+
7 Kaukolan yoy mansungdo ta kabiangan itan na panagdisiplina* ed sikayo. Say Dios et ipapasen to kayon ananak.+ Ta wala ta’y anak ya agdidisiplinaen na ama to?+ 8 Balet no agkayo nadidisiplina a singa ed pandidisiplina tod arum, aliwa kayon peteg ya ananak noagta ananak ed paway. 9 Sakey ni, saray ama tayo ed laman et dinisiplina da itayo, tan rerespetoen tayo ra. Agta nagkalalo lan mabulos itayon manpasakop ed espiritual ya Ama tayo* pian manbilay itayo?+ 10 Ta dinisiplina itayo na kaamaan tayo diad antikey a panaon unong ed iisipen dan maabig, balet gagawaen itan na Dios parad pakagunggonaan tayo pian magmaliw itayon masanto a singa sikato.+ 11 Tua, diad panaon a niiter so disiplina et ag-itan makapaliket noagta ansakit;* ingen kayari to, saramay nipasal ed satan et manani na mareen a bunga, salanti, inkatunong.
12 Kanian pabiskeg yo ray linmaylay a lima tan makapuy a pueg,+ 13 tan itultuloy yon gawaen a maptek iray dadalanen na sali yo,+ pian samay piley et agnalupoy, noagta napaabig. 14 Panseetan yoy mikareenan ed amin a totoo+ tan say pagmaliw a masanto,+ ta no agnapasanto so sakey, agto nanengneng so Katawan. 15 Manalwar kayo pian amin yo et makaawat na agnaparaan a kaabigan na Dios, diad ontan et anggapoy ontubon makasamal a lamot a pansengegay gulo tan dakel so nadutakan lapud satan;+ 16 tan manalwar kayo ya anggapod sikayo so manggagaway seksual ya imoralidad* odino siopaman ya agmamapabli ed sagrado iran bengatla, a singa si Esau, ya insalat to ray kanepegan to bilang panguloan ed sakey a naakan.+ 17 Ta amta yo a kayari na satan, sanen labay ton nagamoran so bendisyon et sikatoy impulisay; ta anggano sinali ton umanen so nonot nen ama to diad impanakis to,+ anggapoy agawaan to.
18 Ta agyo naasinggeran imay palandey a nayarin diwiten+ tan napopoolan ed apoy,+ tan walay andekereket a lurem tan makapal a bilunget tan makmaksil a dagem,+ 19 tan wala met so tanol na trumpeta+ tan boses a mansasalita,+ a sanen nadngel iya na totoo et akikasi ira ya anggapo la komon so ibagad sikara.+ 20 Ta ataktakot iran maong ed sayan ganggan: “Anggan say ayep ya onggatin ed sayan palandey et nepeg a tupaken anggad ompatey.”+ 21 Ontan met, makapakebbiew so nanenengneng da kanian inkuan nen Moises: “Natatakot ak tan manggiwgiw ak.”+ 22 Balet naasinggeran yo so Palandey Sion+ tan say syudad na mabilay a Dios, salanti say Jerusalem ed tawen,+ tan say samplon libolibon anghel 23 a nantitipon,+ tan say kongregasyon na saray panguloan a nilistay kangaranan da ed tawen, tan say Dios ya Ukom na amin,+ tan say bilay na saray matunong a niyanak ed panamegley na masanton espiritu+ tan ginawan perpekto,+ 24 tan si Jesus a manamegley+ ed balon sipanan,+ tan say inwalsik ton dala, a mas maabig nen say dala nen Abel.+
25 Seguroen yo a dengelen imay* sakey a mansasalita. Ta no ag-akaliktar iramay agdinmengel ed samay angipasabi na pasakbay na Dios diad dalin, mas lalon ag-itayo makaliktar no ibeneg tayo imay mansasalita manlapud tawen!+ 26 Ta diad saman a panaon et yinmegyeg so dalin lapud boses to,+ balet natan et oniay insipan to: “Maminsan ni et aliwan say dalin labat so yegyegen ko noag pati say tawen.”+ 27 Natan say salitan “maminsan ni” et ontutukoy ed pakaandi na saray bengatlan nayegyeg, saramay agginawa na Dios, pian saramay bengatlan agnayegyeg et mansiansia. 28 Kanian, lapud awaten tayo so Panarian ya agnayegyeg, itultuloy tayo komon ya awaten so agnaparaan a kaabigan, a diad panamegley na satan et abobonan na Dios so sagradon panaglingkor tayo tekep na takot tan respeto. 29 Ta say Dios tayo et singa apoy a manguupot.+