Nanmatalek si Jehosafat ed si Jehova

ANTAM no siopa irayay lalaki tan no antoy gagawaen da? Onla ran milaban, tan sarayay walad arapan et mangakansion. Balet akin et anggapoy armas da? Nengnengen tayo.

Si Jehosafat so ari na duaran tribu na Israel. Kabansag ton nambilay si Arin Ahab tan Jezebel. Balet maong ya ari si Jehosafat ya singa si Asa ya ama to. Kanian diad dakel a taon, mainaway bilay na duaran tribu ed abalaten.

Balet aminsan, ataktakot iray totoo. Walay angibalita ed si Jehosafat: ‘Lusoben kayo na amayamay a sundalo na Moab, Ammon tan Palandey Seir.’ Kanian, dakel ya Israelita so nantitipon ed Jerusalem pian onkerew na tulong ed si Jehova. Linma rad templo, tan diman et nampikasi si Jehosafat: ‘O Jehova a Dios mi, agmi amtay gawaen mi. Agmi sarag a labanan iyan amayamay a sundalo. Tulongan mo kami.’

Dinmengel si Jehova tan impaibaga tod sakey a lingkor to: ‘Aliwan sikayo so milaban noag say Dios. Alagey kayo labat tan nengneng yo no panon kayon iliktar nen Jehova.’

Kanian kaimbuasan, imbaga nen Jehosafat ed totoo: ‘Manmatalek kayod si Jehova!’ Insan impuesto tod unaan na saray sundalo to iray managkansion, tan legan iran manmamartsa, mangakansion ira na panangidayew ed si Jehova. Antam no antoy agawa? Impanlalaban nen Jehova iray kalaban ya sundalo. Tan nen akasabi iray Israelita, inatey lan amin iray kalaban!

Dugay ginawa nen Jehosafat ta nanmatalek ed si Jehova. Tan duga met so gawaen tayo no manmatalek tayod Sikato.