Duaran Ugaw ya Abilay Lamet

NO INATEY ka, insan ka abilay, anto kasi nalikna nen nanay mo? Seguradon manliket! Balet, nayari kasin nabilay so inatey la? Kasin agawa la ’tan nensaman?

Nengneng moy litrato. Sayay laki et si propetan Elias. Sayay bii et balon taga syudad na Zarepat, tan anak to yay ugaw. Aminsan, nansakit so ugaw. Et linmoor lan linmoor anggad inatey. Kanian imbaga nen Elias ed bii: ‘Andia tay ugaw.’

Insegep nen Elias so inatey ya ugaw tan imparukol tod katri. Insan nampikasi: ‘O Jehova, bilay mo pa lamet yay ugaw.’ Tan inmengas so ugaw! Et inyepas nen Elias so ugaw tan imbaga tod bii: ‘Abilay so anak mo!’ Kanian malikeliket imay bii.

Say sakey nin kabkabat a propeta nen Jehova et si Eliseo. Sikatoy katulongan nen Elias. Balet ag-abayag, inusar met nen Jehova si Eliseo a manggawa na milagro. Diad syudad na Sunem et walay biin maomaong ed si Eliseo. Tan awalaay sakey ya anak a laki.

Sakey ya kabuasan, nen baleg lay ugaw, sikatoy akilad tatay to diad alog. Bigla ton inyakis: ‘Ansakit so ulok!’ Insempet day ugaw, tan inatey. Agaylay ermen nen nanay to! Inanap ton tampol si Eliseo.

Kasabi nen Eliseo, linmad kuarto na inatey ya ugaw. Nampikasi ed si Jehova tan tinikleban to so bangkay. Nen kien et pinmetang so laman na ugaw, tan aminpiton binmasis. Agaylay liket na bii nen naamtaan ton abilay so anak to!

Amayamay lay totoon inaatey. Tan maer-ermen iray pamilya tan kakaaro da. Agtayo nayarian ya bilayen iray inaatey. Balet sarasarag nen Jehova. Nasabi agew, bilayen to iray minilyon ya inaatey.