Tinulongan na Ugaw a Bii so Makapanyarin Laki

ANTAM no antoy ibabaga to yay ugaw? Iistoryaen tod sayay bii so propeta nen Jehova a si Eliseo tan saray makapakelaw ya nagagawaan to diad tulong nen Jehova. Agkabat na bii si Jehova ta aliwan Israelita. Balet, akin et manaayam iyan ugaw ed abung na bii?

Sayay bii et asawa nen Naaman ya opisyal na saray sundalo na Sirya. Inala na saray Siryano iyay Israelitan ugaw, tan inter dad asawa nen Naaman pian magmaliw ya aripen to.

Walay ketong nen Naaman. Lapud sayan sakit, namimigmig so laman to. Kanian ibabaga na sayan ugaw ed asawa nen Naaman: ‘Komon onla si amok ed propeta nen Jehova diad Israel pian onabig.’ Tan imbaga iya na bii ed asawa to.

Labalabay nen Naaman so onabig kanian linmad Israel. Kasabi tod man, linmad abung nen Eliseo. Et imbaki nen Eliseo so aripen to a mangibagad si Naaman ya maminpiton manames ed Ilog Jordan. Nampasnok ya maong si Naaman, tan imbaga to: ‘Malinis ni ray ilog ed Sirya nen say diad Israel!’ Insan la tinmaynan.

Balet imbaga na sakey ed saray lingkor to: ‘Amo, no mairap so pagagawad sika nen Eliseo, seguradon gawaen mo nin siansia. Akin no salien mo may ipapagawa to a?’ Dinmengel si Naaman tan aminpiton nanames ed Ilog Jordan. Kabebekta, nagmaliw ya balibali so baog to!

Malikeliket si Naaman. Sikatoy pinmawil ed si Eliseo tan imbaga to: ‘Amtak la natan ya anggapo lay arum a tuan Dios ed interon dalin noag say Dios na Israel. Kanian, awat mo pa labat yay regalok ed sika.’ Balet inmebat si Eliseo: ‘Agko itan awaten.’ Amta ton aliwan duga so pangawat ed satan ya regalo ta si Jehova so nampaabig ed si Naaman. Balet say lingkor nen Eliseo a si Gehazi et labay to imay regalo.

Kanian sanen inmalis la ra di Naaman, inusilan ira nen Gehazi. Tan oniay imbaga to: ‘Papaibaga nen Eliseo ya wala ray sinmabin kakaaro to tan ikdan yo ra kuno na regalo.’ Balet ag-amta nen Naaman ya mantitila, kanian inikdan toy regalo.

Amta nen Eliseo so ginawa nen Gehazi ta imbagad sikato nen Jehova. Kanian kasempet nen Gehazi, inkuan to: ‘Lapud mauges so ginawam, onlad sika so ketong nen Naaman.’ Tan tampol ya aketong!

Antoy naaralan tayod saya? Unona, nepeg ya aligen tayo may ugaw ya inistorya toy Jehova. Komadua, agtayo aaligen si Naaman ya malastog nen unaan, imbes et unoren tayo iray lingkor na Dios. Tan komatlo, nepeg ya agtayo aaligen si Gehazi ya matila. Dakel so naaralan tayod Biblia awa?