Watchtower ONLINE YA LIBRARYA
Watchtower
ONLINE YA LIBRARYA
Pangasinan
  • BIBLIA
  • PUBLIKASYON
  • ARAL
  • es25 p. 57-67
  • Hunyo

Anggapoy available ya video ed pinilim.

Pasensya la, walay error na video.

  • Hunyo
  • Usisaen so Kasulatan ya Inagew-agew—2025
  • Subheading
  • Simba, Hunyo 1
  • Lunes, Hunyo 2
  • Martes, Hunyo 3
  • Mierkoles, Hunyo 4
  • Huebes, Hunyo 5
  • Biernes, Hunyo 6
  • Sabado, Hunyo 7
  • Simba, Hunyo 8
  • Lunes, Hunyo 9
  • Martes, Hunyo 10
  • Mierkoles, Hunyo 11
  • Huebes, Hunyo 12
  • Biernes, Hunyo 13
  • Sabado, Hunyo 14
  • Simba, Hunyo 15
  • Lunes, Hunyo 16
  • Martes, Hunyo 17
  • Mierkoles, Hunyo 18
  • Huebes, Hunyo 19
  • Biernes, Hunyo 20
  • Sabado, Hunyo 21
  • Simba, Hunyo 22
  • Lunes, Hunyo 23
  • Martes, Hunyo 24
  • Mierkoles, Hunyo 25
  • Huebes, Hunyo 26
  • Biernes, Hunyo 27
  • Sabado, Hunyo 28
  • Simba, Hunyo 29
  • Lunes, Hunyo 30
Usisaen so Kasulatan ya Inagew-agew—2025
es25 p. 57-67

Hunyo

Simba, Hunyo 1

Nepeg itayon ondalan ed dakel ya irap pian makaloob itayo ed Panarian na Dios.—Gawa 14:22.

Benendisyonan nen Jehova iray Kristiano nen inmunan siglo ta mabulos iran nan-adjust nen anguman so situasyon da. Dakel so kinmontra tan nampairap ed sikara, tan no maminsan et bigla labat itan ya nagawa. Naeksperiensya itan nen Bernabe tan apostol Pablo nen manpupulong ira diad Listra. Diad gapo, maawa-awat iray totoo. Pero ag-abayag, wala ray sinmabin Judio tan inimpluensyaan da ra, kanian arum ed saramay apulongan et sikara lanlamang so nantupak ed si Pablo ya anggad patey-pateyan la. (Gawa 14:19) Antoy ginawa nen Bernabe tan Pablo? Inmalis ira ed arum a lugar tan intuloy day nampulong. Antoy resulta? Dakel so atulongan dan magmaliw a disipulo. Pinaseseg da met iray agagi ya anosan da labat iray subok. Seguradon binmiskeg so liknaan da ed mismon alimbawa nen Pablo tan Bernabe. (Gawa 14:​21, 22) Maabig so resulta lapud ag-ira sinmuko. On, seguradon bendisyonan itayo nen Jehova no agtayo onsuko ed kimey ya ipapagawa tod sikatayo. w23.04 16-17 ¶13-14

Lunes, Hunyo 2

Dengel mo pay pikakasik, O Jehova; tan imanom pay ikekerew koy tulong. Ontatawag ak ed sika sano nagogonigon ak, ta amtak ya ebatan mo ak.—Sal. 86:​6, 7.

Nen aminpigan apeligro so bilay nen Arin David lapud tutugisen na saray kalaban, si Jehova so lanang ton kekerewan na tulong. Segurado si David ya dedengelen tan eebatan nen Jehova iray pikakasi to. Komon ta ontan met kabiskeg so tiwalam ed si Jehova! Ibabaga na Biblia ya sarag itayon ikdan nen Jehova na karunongan tan biskeg pian makapan-anos tayo. Sarag ton pakilosen ya ontulong ed sikatayo iray agagi tan anggan saray agto lingkor. Tua, say ebat nen Jehova ed saray pikakasi tayo et aliwan lanang ya samay labay tayo, pero segurado tayo ya ebatan to iratan. Iter to no antoy kailangan tayo tan no kapigan tayo itan kailangan. Kanian agka komon onsasawa ya manpikasi, tan mantiwala ka ya dedengelen ka nen Jehova. Tandaan mo ya diad sayan kaunoran iran agew, agto kan balot paulyanan. Tan diad balon mundo, makapantiwala ka ya iter toy “pirawat na balang mabilay a bengatla.”—Sal. 145:16. w23.05 8 ¶4; 13 ¶17-18

Martes, Hunyo 3

Antoy ibales kod si Jehova ed amin a maabig a ginawa to parad siak?—Sal. 116:12.

No walay goal mo, marakep no isip mo ray balibalin resulta no nagawaan mo itan. Singa bilang, kasin say goal mo et i-improve so panagbasam na Biblia o panagpikasim? Maabig no isipen mo ya lalon onelet so relasyon mod si Jehova no gawaen mo itan. (Sal. 145:18, 19) No say goal mo et ipanengneng so sakey ya balibalin ugali o kualidad, isip mo ya lapud satan et lalo kan naaro na arum. (Col. 3:14) Anto kasi no ilistam so amin ya rason no akin ya labay mon gawaen so goal mo? No nisulat mo lan amin, maabig no lanang mon nengnengen itan ya listaan. Ontan met, pilim ya kaaro iramay napaseseg da kan gawaen so goal mo. (Pro. 13:20) Diad tua balet, walan-wala ray agew ya agtayo ganadon gawaen so goal tayo. No ontay naliliknam, labay to kasin ibaga, anggapo lay gawaen mo? Andi. Manggawa ka nin siansiay paraan. Tua, kailangan so disiplina ed sarili, pero sulit so pan-effort mo. w23.05 27-28 ¶5-8

Mierkoles, Hunyo 4

Antokaman so itatanem na sakey a too, saya met so anien to.—Gal. 6:7.

Nipanengneng mo ya aakoen moy lingom no ipatuam itan, ipetek moy ginawam, tan agmo la uuliten. No ontay gawaen mo, tuloytuloy kan makabatik ed lumba parad bilay. No aliway nansumpalan na desisyon mo, awat mo ya alingo ka. No manggawa ka ni baraan o mananap ka ni tetelen mo, anggapoy naitulong to ’tan. Mas marakep no aminen mo ya aliway ginawam tan pansagpotan mon ipetek itan. No nakokonsiensia ka, maabig no manpikasi kad si Jehova, ipatuam ed sikato so kasalanan mo, tan kerew moy panamerdona to. (Sal. 25:11; 51:​3, 4) Kerew ka met na perdona ed saramay asakitan mo. Tan no kaukolan, manpatulong ka ed saray elder. (Sant. 5:​14, 15) Makaaral ka komon ed saray lingom, tan agmo la iratan uuliten. No gawaen mo iratan ya amin, seguradon kasian ka nen Aman Jehova tan tulongan to ka pian nagawaan moy duga.—Sal. 103:​8-13. w23.08 28-29 ¶8-9

Huebes, Hunyo 5

Si Jehoas et nantultuloy a nanggaway duga ed pakanengneng nen Jehova diad amin ya agew a sikatoy ibabangat nen Jehoiada a saserdote.—2 Ara. 12:2.

Maong ya impluensya si Jehoiada ed si Arin Jehoas. Kanian nen ugaw ni Jehoas, sikatoy “nanggaway duga ed pakanengneng nen Jehova.” Pero nen inatey lay Jehoiada, say dinengel nen Jehoas et saray apostatan prinsipe. (2 Awa. 24:​4, 17, 18) Anggano ansakisakit itan ed si Jehova, sikatoy “lanang a mangibabaki . . . na saray propeta pian ompawil irad sikato, . . . balet agda labay so ondengel.” Pati say anak nen Jehoiada ya si Zacarias et agda italtalek anta propeta nen Jehova tan saserdote. Diad tua, impapatey nen Arin Jehoas si Zacarias, anta kapinsan to! (2 Awa. 22:11; 24:​19-22) Aliwan matakot ed Dios si Jehoas. Tinmua ed sikato iyan abaybayag lan imbaga nen Jehova: “Saramay mamapabanday ed siak et namudmora.” (1 Sam. 2:30) Nen akiguerra so Sirya ed Juda, say “baleg ya armada” nen Jehoas et atalo anta datdaiset so sundalo na kalaban. Apuroan si Jehoas tan “grabe sugat to.” (Awa. 24:24, 25) Nen inmatras la ray Siryano, saray mismon lingkor nen Jehoas so amatey ed sikato bilang bales ed impamatey tod si Zacarias. w23.06 18-19 ¶16-17

Biernes, Hunyo 6

Nensaman et wala kayod kabilungetan, balet natan et wala kayo lad liwawa.—Efe. 5:8.

Abayag ya nanayam si apostol Pablo diad Efeso ta impulong tan imbangat to ditan so maong a balita. (Gawa 19:1, 8-10; 20:20, 21) Sankanonot to iray agagi ditan ta inar-aro to ra, tan labay to ran tulongan ya manmatoor ed si Jehova. Saray agagi ed Efeso et datin singa walad bilunget ta naaripen ira na saray bangat na palson relihyon, tan say bilay da et ontetelek ed espiritismo tan nanduruman pamahiin. Normal labat so imoralidad ed Efeso tan ag-ibabaing na saray totoo ditan so bastos ya kagagawa ra. Saray palabas ed teatro da et halos tungkol ed sex. Diad tua, say bungay sangi na totoo kada no piesta parad dios da et puros kabastosan. (Efe. 5:3) Saray manaayam ditan et “agla ran balot makakaliknay kababaingan.” Labay ton ibaga, manhid la ra. (Efe. 4:17-19) Kanian imadyin yo pay situasyon na saray agagi ed Efeso antis dan akabat si Jehova. Lapud agda amta no antoy duga tan aliwa, ag-ira nakokonsiensia anggano makapabaing iray kagagawa ra. Kampegan imbaga nen Pablo ya “ambilbilunget so kanonotan da tan nisian ira ed bilay a manlalapud Dios.” Maong labat ta wala ray taga Efeso ya pinili dan taynan so bilunget. w24.03 20 ¶2, 4; 21 ¶5-6

Sabado, Hunyo 7

Ombiskeg iramay maniilalo ed si Jehova . . . tan ag-ira nakesawan.—Isa. 40:31.

Makapakesaw so asainmin nen Gideon bilang ukom, kanian importante ya sikatoy mapaot. Diad samay labi ya nilusob nen Gideon tan say 300 ya sundalo to iray Midianita, akatakas so arum ya kalaban da. Manlapud Lawak na Jezreel, inusilan da ra ya anggad Ilog Jordan. (Ukom 7:22) Seguradon naknaksawan la ra kasabi dad Jordan, pero binaliw da itan pian nituloy day panguusil da. Lapud ag-ira sinmuko, narel da tan atalo da iray kalaban. (Ukom 8:​4-12) Matalek si Gideon ya sikatoy ikdan nen Jehova na biskeg pian nagawaan toy asainmin to, tan talagan ontan so ginawa nen Jehova. (Ukom 6:14, 34) Inanosan nen Gideon tan saray sundalo to so ombatik pian nausilan da so duaran arari na Midian, ya nayarin akalugan ed kamelyo! (Ukom 8:12, 21) Lapud pursigido ira tan tinulongan ira nen Jehova, narel da ra. Makapanmatalek met iray elder ed si Jehova, say Dios ya “agbalot nakesawan odino onkapuy.” Seguradon ikdan to ra na biskeg ya kakkaukolan da.—Isa. 40:​28, 29. w23.06 6 ¶14; 7 ¶16

Simba, Hunyo 8

Agto kayo taynanan odino paulyanan [nen Jehova].—Deu. 31:6.

Mansiansia tayo ya mapekder no ipasal tayoy puso tayo ya mantiwala ed si Jehova antokaman so nagawa. Sakey ed saray alimbawa ed Biblia ya nantiwala ed saray instruksion nen Jehova et si Barak. Diad panaon nen Barak, “anggapoy . . . panagsamper odino gayang” na saray Israelita. (Ukom 5:8) Pero ingganggan nen Jehova si Barak ya milaban ed armada na Canaan ya say komander et si Sisera. Kompletoy armas na sarayan sundalo! Inusar nen Jehova si propetesan Debora pian ibaga ed si Barak ya onlasur manlapud palandey tan diad patar ya lugar to lusoben iray kalaban ya akalugan ed 900 ya karwahe. Inmunor si Barak anggano baleg so lamang na kalaban ta akakarwahe ira. Nen onlalasur lay Barak tan saray sundalo diad Palandey Tabor, biglan inmuran ya makmaksil! Milalaban si Jehova parad sikara! Kinmukutep ed pitek iray karwahe nen Sisera tan impanalo nen Jehova si Barak. (Ukom 4:1-7, 10, 13-16) Diad panaon tayo, panaloen itayo met nen Jehova basta mantiwala tayod sikato tan unoren tayo ray instruksion na organisasyon to. w23.07 19 ¶17-18

Lunes, Hunyo 9

Samay akapansungdo anggad anggaan et sikatoy nilaban.—Mat. 24:13.

Importante so inkaanos pian naawat tayoy bilay ya andi-anggaan. Aligen tayo iray matoor ya lingkor na Dios nensaman ya maan-anos dan inalagar so pakagawa na saray sipan nen Jehova. (Heb. 6:11, 12) Inkompara itayo na Biblia ed dumaralos. (Sant. 5:7, 8) Makulikuli ya mantanem tan manparanum so dumaralos. Anggano agto amta no kapigan so eksakton ibaleg na saray intanem to, maan-anos ya manalagar ta amta to ya onsabi panaon et manani lanlamang. Ontan tayo met iran Kristiano. Makulikuli tayo ed kimey ya panagpulong tan panagbangat anggano “[agtayo] amta no anton agew so isabi na Katawan.” (Mat. 24:42) Maan-anos tayon manalagar ta kombinsido tayo ya diad dugan panaon et tooren nen Jehova so amin ya insipan to. No agtayo mananos, ompan onsawa tayo lan manalagar tan agtayo nalilikas ya onaarawi tayo lad si Jehova. Ompan magmaliw tayo lan makasarili tan agtayo la isipen so pansumpalan na saray desisyon tayo, ta say sankanonot tayo labat et no antoy mamaliket ed sikatayo natan. Pero no maanos tayo, manmatoor tayo anggad anggaan tan seguradon iliktar itayo nen Jehova.—Miq. 7:7. w23.08 21 ¶7

Martes, Hunyo 10

Saray gamet na sali et balatyang so arum a parte tan pitek so arum a parte.—Dan. 2:42.

No ikonekta tayo so propesiya ed Daniel 2:41-43 ed arum ni ran propesiya ya nabasa ed libron Daniel tan Apocalipsis, mapatpatnag ya say isisimbolo na sali et say alyansa na Britanya tan Amerika, say sankamakapanyarian ya gobierno ed mundo natan. Imbaga nen Daniel ya sayan gobierno et “mabiskeg ed arum a parte tan lupok ed arum a parte.” Akin et lupok itan ed arum a parte? On ta anggano singa balatyang so pakayari to, papakapuyen itan na “pitek”—saray mismon sakop to. Dakel so atalosan tayon importantin katuaan nen inaral tayon maong so kahulugan na samay balbaleg ya imahen. Unona, mabiskeg so alyansa na Britanya tan Amerika. Singa bilang, analo ira nen World War I tan World War II. Pero kinmapuy itan diad inlabas na panaon tan tuloytuloy ni itan ya onkapuy ta mankokontraan iray sakop to tan mibabali irad pamamalakad na gobierno. Komadua, sayan alyansa so sampot lan world power antis ya deralen na Panarian na Dios so amin ya gobierno ed mundo. w23.08 11 ¶12-13

Mierkoles, Hunyo 11

Tinmawag ak ed si Jehova lapud agonigon ak, agak tinmundan kinmerew na tulong ed Dios ko. Manlapud templo to et dinengel toy boses ko.—Sal. 18:6.

No maminsan, agla amta nen David so gawaen to lapud karakel na subok ya aarapen to. (Sal. 18:​4, 5) Pero makakainawa kada no nalilikas toy panangaro tan panangasikaso nen Jehova. No naknaksawan la, sikatoy iyakar nen Jehova ed “saray marikan panagpastolan” tan ed “saray pasen a painawaan diad abay na danum.” Kanian anggano dakel so subok, akapantultuloy ya nanlingkor si David ed si Jehova. (Sal. 18:28-32; 23:2) Singa si David, nasasarag tayo met so antokaman ya subok tan problema “lapud matoor a panangaro nen Jehova.” (Tag. 3:22: Col. 1:11) Naynay ya walad peligro so bilay nen David. Maimpluensya tan mabiskeg iray kalaban to tan amayamay ira. Pero maligen so liknaan to ta amta ton sikatoy inar-aro nen Jehova. Kombinsido si David ya antokaman so situasyon, kaiba toy Jehova. Inkansion to ingen ya sikatoy insalba na Dios ed “amin a pakatatakotan [to].” (Sal. 34:4) On, nalalabanan nen David so takot to kada no iisipen to ya sikatoy inar-aro nen Jehova. w24.01 30 ¶15-17

Huebes, Hunyo 12

No sagyaten ka na saray makasalanan, agka onaabuloy.—Pro. 1:10.

Agmo aaligen iray makapuy ya desisyon nen Jehoas. Nen inatey lay Atagey ya Saserdoten si Jehoiada, wala ray kakaaro nen Jehoas ya nan-impluensya ed sikato ya manggaway aliwa. (2 Awa. 24:​17, 18) Say dinengel to la et saray prinsipe ed Juda ya agda inaroy Jehova. Iniwasan to ra komon ta mauges iran kaulop. Say amta to seguro, tua iran kakaaro. Diad tua, sikatoy sinimbawa na kapinsan ton si Zacarias. Pero imbes ya ondengel, impapatey to laingen! (2 Awa. 24:​20, 21; Mat. 23:35) Abalang so kalakal to! Anta balibali so impanugaw to, no kapigan tinmatken, diman laingen nagmaliw ya apostata tan managpatey. Asabi panaon, saray mismon lingkor to so amatey ed sikato. (2 Awa. 24:22-25) Aliwan ontan komon so nansumpalan to no tuloytuloy ya dinmengel ed si Jehova tan ed saray matoor ya lingkor na Dios. w23.09 9 ¶6

Biernes, Hunyo 13

Agka la natatakot.—Luc. 5:10.

Walay tiwala nen Jesus ya sarag nen apostol Pedro so manmatoor. Kanian oniay imbaga nen Jesus: “Agka la natatakot.” Simpli labat so imbaga to pero balbaleg so epekto tod si Pedro. Ag-abayag, tinaynan nen Pedro tan say agi ton si Andres so negosyo dan panagsigay tan akila rad si Jesus diad pampupulong to. Dakel ya bendisyon so naawat da lapud satan ya desisyon da. (Mar. 1:16-18) Dakdakel so makapakelaw tan maliket ya eksperiensya nen Pedro nen nagmaliw ya disipulo nen Jesus. Anengneng ton mismo ya pinaabig nen Jesus iray mansasakit tan saray aselepan na demonyo, tan binilay to ni ingen iray inatey. (Mat. 8:14-17; Mar. 5:37, 41, 42) Diad sakey met ya pasingawey, patiuna lan anengneng nen Pedro so gloria nen Jesus no magmaliw lan Ari ed Panarian na Dios. Sakey itan ed saray agnalinglingwanan nen Pedro ya agawad bilay to. (Mar. 9:1-8; 2 Ped. 1:16-18) Agto iratan anengneng no agto pinili so magmaliw ya disipulo. Maong labat ta nilabanan to iray iisipen ton negatibo! No andi, asayang to iratan ya amin. w23.09 21 ¶4-5

Sabado, Hunyo 14

Inkuan nen Jesus ed sikato: “Ibagak ed sika, aliwan anggad maminpito, noagta, anggad mamin-77.”—Mat. 18:22.

Diad unonan sulat nen apostol Pedro, inusar to so ekspresyon ya “aralem a panangaro.” Say ontan ya panangaro et sasakoban to so “dakel a kasalanan.” (1 Ped. 4:8) Seguro, sankanonot nen Pedro imay impantongtong da nen Jesus tungkol ed panamerdona. Say amta nen Pedro, sikato lay sankamaongan ya too nen imbaga tod si Jesus ya perdonaen toy agi to ya “anggad maminpito.” Pero oniay kuan nen Jesus: “Aliwan anggad maminpito, noagta, anggad mamin-77.” (Mat. 18:21) Labay ton ibaga, anggapo dapat so limitasyon na pamerdona tayo. Sika ey, kasin no maminsan et nanairapan kan mamerdona? No on, agka komon nadidismaya. Nasasali tayon amin itan. Pero anggano nanairapan ka, gawam so anggaay nayarian mo ya mikareenan ed agim tan perdonam manlapud puso. w23.09 29 ¶12

Simba, Hunyo 15

Tinmawag ak ed si Jehova, tan inebatan to ak.—Jon. 2:2.

Nen walad eges na sira si Jonas, baleg so tiwala to ya no sikatoy manpaabeba tan magbabawi, dengelen nen Jehova so pikakasi to, tan sikatoy tulongan nen Jehova. Kanian nen inyula na baleg ya sira si Jonas ed amagan dalin, ready la ya gawaen so ipapagawa nen Jehova ed sikato. (Jon. 2:10–3:4) No walay dadalanen mon ambelbelat ya problema, kasin ngalngali agmo amtay ibagam ed si Jehova ta maguloy isip mo? Kasin makapkapuy ka kanian anggapoy ganas mon man-personal study? Natatalosan nen Jehova so situasyon mo. Tandaan mo ya anggano simpli labat so ibagam, dengelen nen Jehova so pikakasim tan iter toy kaukolan mon tulong. (Efe. 3:20) No nanairapan kan manbasa tan manaral ta makapkapuy ka o aburido kan maong, marakep no ondengel kay audio recording na Biblia tan saray publikasyon tayo. Balibali met no dengelen mo iray kansion tayo o manbantay ka na saray video tayo ed jw.org. No manpikasi kad si Jehova tan anapen moy ebat to diad Biblia tan ed saray publikasyon tayo, iikdan moy Jehova na rason pian pabiskegen to ka. w23.10 13 ¶6; 14 ¶9

Lunes, Hunyo 16

Impalinew na masanton espiritu a say dalan a paonlad masanton pasen et agni niparungtal legan ya akaalagey ni so unonan tabernakulo.—Heb. 9:8.

Amay tabernakulo tan samay templo ed Jerusalem et pareho so inkadesinyo da. Diad loob et walay duaran kuarto—say “Masanton Pasen” tan say “Sankasantosan.” Walay aburdaan ya kurtina ya pinagka-divider o mangibibiig ed satan ya duaran kuarto. (Heb. 9:2-5; Exo. 26:31-33) Diad loob na Masanto et wadtan so kandelero ya gawad gold, say altar ya pampopoolan na insenso, tan say lamisaan na iyaapay ya tinapay. “Saray alanaan a saserdote” labat so nayarin onloob ed Masanto pian gawaen iray sagradon kimey da. (Num. 3:3, 7, 10) Diad loob na Sankasantosan so kulaan na kaban na sipanan ya gawa met ed gold. Isisimbolo toy presensia nen Jehova. (Exo. 25:21, 22) Say atagey a saserdote labat so nayarin onloob ed Sankasantosan diad tinaon ya Agew na Pananakbong. (Lev. 16:2, 17) Sikatoy onloob ditan ya walay awit ton dala na ayayep ya mansakbong ed mismon kasalanan to tan say kasalanan na interon Israel. Kayari na dakel ya taon, inusar nen Jehova so masanton espiritu to pian ipaamta so isisimbolo na sarayan parte na tabernakulo.—Heb. 9:6, 7. w23.10 27 ¶12

Martes, Hunyo 17

Manaaroan kayo.—Juan 15:17.

Diad Biblia, aminpigapiga ya ingganggan iray Kristiano ya “manaaroan” ira. (Juan 15:12; Roma 13:8; 1 Tes. 4:9; 1 Ped. 1:22; 1 Juan 4:11) Pero di ba, say panangaro et emosyon ya walad puso tayo, tan anggapo tay too ya nabasa to no antoy walad puso tayo. Anto sirin so gawaen tayo pian nalikna na arum ya inar-aro tayo ra? Ipanengneng tayo itan diad salita tan gawa. Walay nanduruman paraan ya ibabaga na Biblia pian naipalikna tayoy panangaro. Niay pigaran alimbawa: “Mansalita kayoy tua ed balang sakey.” (Zac. 8:16) “Pansiansia yoy kareenan ed balang sakey.” (Mar. 9:50) “Idaulo yo so pangipanengneng na galang ed sakey tan sakey.” (Roma 12:10) “Awat yo so sakey tan sakey.” (Roma 15:7) “Itultuloy yon itepel . . . tan mabulos a perdonaen so sakey tan sakey.” (Col. 3:13) “Itultuloy yon sakbaten so ambelat ya awit na balang sakey.” (Gal. 6:2) “Itultuloy yon ligliwaen so sakey tan sakey.” (1 Tes. 4:18) “Itultuloy yon . . . pabiskegen so sakey tan sakey.” (1 Tes. 5:11) “Ipikasi yo so balang sakey.”—Sant. 5:16. w23.11 9 ¶7-8

Mierkoles, Hunyo 18

Manliket kayod ilalo.—Roma 12:12.

Kada agew, wala ray gagawaen tayon desisyon ya kailangan so mabiskeg ya pananisia. Singa bilang, kaukolan tayoy mandesisyon no siopa ray pilien tayon kakaaro, no anto ray pilien tayon libangan, ontan met ed edukasyon, trabaho, pangasawa o piasawa, tan no kasin manpamilya tayo o andi. Tepetan moy sarilim: ‘Kasin nanengneng ed saray desisyon ko ya manisia ak ya naderal lanlamang iyan sistema tan asingger lay balon mundo? Odino anggapoy pidumaan kod arum ya totoo ya sarili da labat so iisipen da tan iyuupot day biskeg da ed sayan sistema?’ (Mat. 6:19, 20; Luc. 12:​16-21) Makapandesisyon tayoy duga no kombinsido tayo ya asingsingger lay balon mundo. Kailangan tayo met so mabiskeg ya pananisia no ondadalan tayo ed subok. Ompan onkapuy so liknaan tayo no walay graben sakit tayo, no walay onkontra ed panagdayew tayo, o no walay makapa-stress ya situasyon ya aarapen tayo. No kagagapo ni labat na subok, ompan desidido tayon ag-onsuko. Pero no diman mas ombabayag so subok, diman tayo mas kaukolan so mabiskeg ya pananisia pian makapan-anos tayo tan agnabalang so liket tayo ed panaglingkor.—1 Ped. 1:6, 7. w23.04 27 ¶4-5

Huebes, Hunyo 19

Naynay kayon manpikasi.—1 Tes. 5:17.

Labay nen Jehova ya onkilos tayo base ed impikasi tayo. Bilang alimbawa, panon to no impikasi na sakey ya brother ya tulongan komon nen Jehova ya makapampatanir ed boss to pian makaatendi ed regional a kombension? Anto kasi gawaen nen Jehova pian naebatan itan ya pikakasi? Nayarin ikdan to na pakpel imay brother pian agnaunaan na baing. Pero anto met so kailangan ton gawaen may brother? Siempre, kailangan toy mitongtong ed boss to. No agda pinagbigyan, aga onsukon tampol. Salien to lamet so manpatanir, anggano maminpigapiga ni ingen. Sarag to met ya i-suggest ed boss to ya misalatan lay eskedyul ed arum ya empleyado o ibaga ton ayos labat anggano ikaltas lad sueldo to so pambakasyon to. No walay kekerewen tayo ed si Jehova, labay to ya agtayo onsasawan ipikasi itan. Base ed samay imbaga nen Jesus diad Lucas 11:9, wala ran talagay pikakasi ya agan tampol ebatan nen Aman Jehova. Kanian agka komon nadidismaya no agan tampol inebatan nen Jehova so pikakasim. Itultuloy mo itan ya ipikasi tan agka nababaingan ya kuliten si Aman Jehova. (Luc. 18:​1-7) No ontan so gawaen mo, ipapanengneng mod si Jehova ya seryoso ka ed kekerewen mo. Patunay met itan ya mabiskeg so pananisiam ya sarasarag to kan tulongan. w23.11 22-23 ¶10-11

Biernes, Hunyo 20

Say ilalo et agmansumpal ed pakadismaya.—Roma 5:5.

Insipan nen Jehova ed kaaro ton si Abraham ya sikatoy nawalaan na anak ya laki, tan lapud satan ya anak et nabendisyonan so amin ya nasyon ed interon dalin. (Gen. 15:5; 22:18) Baleg so tiwala nen Abraham ya nagawa itan ta mabiskeg so pananisia tod Dios. Pero nen asabi la nen Abraham so edad ya 100 tan 90 la na asawa ton si Sara, anggapo nin siansiay anak da. (Gen. 21:1-7) Imbaga balet na Biblia ya “siansia nin nanilalo [si Abraham] tan walaan na pananisia a sikatoy magmaliw ya ama na dakel a nasyon.” (Roma 4:18) Ag-asayang so impanalagar nen Abraham. Inlukon tan inyanak nen Sara si Isaac—say anak ya abaybayag to lan pipirawaten. Akin et ontan lay kabiskeg na tiwala nen Abraham ed si Jehova? On ta kabkabat nen Abraham si Aman Jehova. Atan so rason kanian mabiskeg so tiwala to ya “nayarian na Dios a gawaen imay insipan to.” (Roma 4:21) Inturing ingen nen Jehova si Abraham ya kaaro tan inyabawag ton matunong lapud pananisia to.—Sant. 2:23. w23.12 8 ¶1-2

Sabado, Hunyo 21

Say toon napanmatalkan ed daiset et napanmatalkan met ed dakel, tan say toon agmatunong ed daiset et agmet matunong ed dakel.—Luc. 16:10.

Nibagan responsable so sakey ya kabataan ya brother no napampiyaan o naasaan, tan makuli ton susumpalen so amin ya responsabilidad to. Maabig ya alimbawa si Jesus. Makulikuli si Jesus tan sineryoso to iray asainmin ya inter nen Aman Jehova ed sikato. Sinumpal ton amin iratan anggano aliwan mainomay. Inar-aro to ray totoo, lalo la ray disipulo to, tan mabulos ton insakripisyo so bilay to parad sikara. (Juan 13:1) Singa si Jesus, makulim ya gawaen so antokaman ya asainmin ya inter ed sika. No agka segurado no panon mon gawaen so sakey ya asainmin, manpatulong kad saray maespiritual ya brother. Tan iter moy ‘the best’ mo. (Roma 12:11) Mamasya ka ta ‘parad si Jehova itan, aliwan parad totoo.’ (Col. 3:23) Siempre, agka perpekto. Kanian no bilang ta nalingo ka, dapat manpaabeba ka tan marakep no aminen mo ya alingo ka.—Pro. 11:2. w23.12 26 ¶8

Simba, Hunyo 22

Nabendisyonan imay too a manmatalek ed si Jehova.—Jer. 17:7.

Agaylay liket tayo nen abautismoan tayo ta nagmaliw tayon parte na pamilya nen Jehova. Balbaleg itan ya pribilehyo! Talagan aga alingolingo si David nen oniay imbaga tod si Jehova: “Maliket so toon pipilien tan iyaasingger mo pian manayam ed saray sular na templom.” (Sal. 65:4) On, pipilien nen Jehova no siopa labat iray palooben to ed sular na templo to. Sikatoy onaapit labat ed saramay mani-effort ya onapit ed sikato. (Sant. 4:8) Nen indedikam so sarilim ed si Jehova tan nampabautismo ka, im-promise to ya ‘ikalbo tod sika so dakerakel a bendisyon ya anggad anggapo lay napanginan ed satan.’ (Mal. 3:10; Jer. 17:8) Say bautismo et gapoan labat. Seguradon labay mon gawaen so anggaay nayarian mo pian natoor moy dedikasyon mo anggano wala ray tukso tan onsabin subok ed bilay mo. (Ecl. 5:4, 5) Lapud disipulo ka la nen Jesus, maapit mo lan tumboken so alimbawa to tan unoren mo met la ray ganggan to.—Mat. 28:19, 20; 1 Ped. 2:21. w24.03 8 ¶1-3

Lunes, Hunyo 23

Taynan na laki so ama tan ina to tan iyamong toy asawa to.—Gen. 2:24.

Panon to no agyo nai-enjoy nen asawam so panaon ya sankaiba kayo? Antoy gawaen yo? Isip yoy sakey ya apoy. Di ba, no kakkagapom nin sungloran so apoy, agmet ni masyadon marlang? Pero no sandaraiset mon aruman so itungom, mas ondalang itan. Ontan met ed sanasawa. Anto kasi no iplano yoy makapaniba kada agew anggan magano labat? Manpili kayoy activity ya na-enjoy yon dua. (Sant. 3:18) On, anggano magano labat so pam-bonding yo, baleg so nitulong to pian ompawil lamet so aroan yon dua. Importante so respeto ed relasyon na sanasawa. Singa itan oxygen ed dagem ya kailangan pian tuloytuloy so idalang na apoy. No anggapoy oxygen, naerep itan ya tampol. Ontan met ed ulopan na sanasawa. No naekal lay respeto, ombetel met lay aroan da. Pero no ipanengneng day respeto diad panagtrato dad sakey tan sakey, mansiansian ampetang so aroan da. Ompan iisipen mo ya ipapanengneng mo met lay respeto. Pero say tepet, kasin nalilikna nen asawam ya talagan rerespetoen mo? w23.05 22 ¶9; 24 ¶14-15

Martes, Hunyo 24

Sanen nadadaeg ak na saray kapagaan, niligliwa tan pinakalma mo ak.—Sal. 94:19.

Anggan saray matoor ya lingkor na Dios nensaman et asali da kunoy ‘ginmiwgiw tan pinasyay pankebbiew da’ ta wala ray mamubusol ed sikara tan agda la amta no antoy ontumbok ya nagawa. (Sal. 18:4; 55:1, 5) Singa sikara, ompan wala ray onkokontra met ed sikatayo diad eskuelaan, diad trabaho, diad abung, odino say mismon gobierno ni ingen. Sakey ni, no walay sakit mo tan antam ya agka la onabig, ompan natatakot kan ompatey. Diad ontan iran situasyon, ompan say pakalikna tayo et singa tayo pakaskasin ugaw. Pero panon itayon tutulongan nen Jehova no natatakot tayo? Ligliwaen tan pakalmaen to tayo. Kanian naynay kan manpikasi ed si Jehova tan inagew-agew kan manbasa na Biblia. (Sal. 77:​1, 12-14) No ontan so apasalan mo, si Jehova ya tampol so naisip mon asinggeran no nai-stress o natatakot ka. Agka nababaingan ya ibagad sikato iray pakakatakotan tan pakakaaburidoan mo. Legan mon babasaen so Biblia, dengel moy mensahe tod sika tan likas mo no panon to kan liligliwaen.—Sal. 119:28. w24.01 24-25 ¶14-16

Mierkoles, Hunyo 25

Say Dios so mamapabiskeg ed sikayo, ya iiter tod sikayo so panlabay tan pakayarin onkiwas.—Fil. 2:13.

No talagan labay mon nagawaan iray goal mod espiritual, dapat pursigido tan ganado ka. No ontan so nalilikna na sakey ya too, anggapoy makapigil ed sikato tan pankulian ton gawaen so plano to. Ontan met, no diman tayo mas ganado tan mas pursigido, mas baleg so posibilidad ya nagawaan tayoy goal tayo. Anto sirin so makatulong pian mas pursigido tan ganado kan gawaen so goal mo? Ipikasim ed si Jehova ya tulongan to kan magmaliw ya ganado. Usaren nen Jehova so espiritu to pian ikdan to kay “panlabay” ya gawaen so goal mo. No maminsan, say rason no akin ya walay goal tayo et lapud amta tayon atan so dugan gawaen. Pero diad tua, ompan agtayo ganadon gawaen itan. Makatulong no isipen mo no anto la ray ginawa nen Jehova parad sika. (Sal. 143:5) Nen dinalepdep nen apostol Pablo so agnaparaan a kaabigan nen Jehova ed sikato, apakilos ya iter so ‘the best’ to ed si Jehova. (1 Cor. 15:​9, 10; 1 Tim. 1:​12-14) No sankanonot mo met ya lanang iray ginawa la nen Jehova parad sika, napakilos kan gawaen so goal mo.—Sal. 116:12. w23.05 27 ¶3-5

Huebes, Hunyo 26

Idayew yoy ngaran nen Jehova.—Sal. 113:1.

Naliliketan si Aman Jehova kada no idadayew tayoy ngaran to. (Sal. 119:108) Labay to kasin ibaga, kulang so tiwala nen Jehova ed sarili to kanian kailangan toy panangidayew? Andi. No idadayew tayoy Aman Jehova, napapatunayan tayon aliwa imay akusasyon nen Satanas ed sikatayo ran totoo. Diad panaon nen Job, imbaga nen Satanas ya anggapo tay too ya manmatoor ed Dios no wala lad mairap ya situasyon. Imbaga to ingen ya mandadayew tayo labat ed si Aman Jehova lapud bendisyon ya nanaawat tayo tan ibeneg tayo lanlamang no anggapo la kunoy pinanabangan tayod sikato. (Job 1:9-11; 2:4) Pero nanmatoor si Job kanian apatunayan ya matila si Satanas. Sika ey? Kasin labay mo met ya patunayan ya aliwan tua imay akusasyon nen Satanas? Idepensam sirin so ngaran nen Jehova tan manmatoor kad sikato anggan diad sankairapan ya situasyon. (Pro. 27:11) Balbaleg itan ya pribilehyo! w24.02 8-9 ¶3-5

Biernes, Hunyo 27

Manmatalek kayod saray propeta to, et manalo kayo.​—2 Awa. 20:20.

Nen inatey lay Moises tan Josue, wala ray ukom ya inusar nen Jehova pian igiya iray lingkor to. Tan nen wala lay arari ya manuuley ed Israel, inusar nen Jehova iray propeta ya mangigiya ed saray Israelita. Saray arari ya matoor ed si Jehova et dinmengel ed simbawa na saray propeta. Singa bilang, mapaabeban inawat nen Arin David so panangipetek nen propetan Natan. (2 Sam. 12:​7, 13; 1 Awa. 17:​3, 4) Inunor nen Arin Jehosafat iray instruksion nen propetan Jahaziel tan pinaseseg to met iray sakop to ya manmatalek irad saray propeta na Dios. (2 Awa. 20:​14, 15) Nen agla amta nen Arin Hezekias so gawaen to, kinmerew na tulong ed si propetan Isaias. (Isa. 37:​1-6) Basta maunor so ari ed panangigiya nen Jehova, mareen so bilay na saray sakop to ta walad sikaray pabor na Dios. (2 Awa. 20:​29, 30; 32:22) Mapatpatnag ya uusaren nen Jehova iray propeta ya mangigiya ed sikara. w24.02 21 ¶8

Sabado, Hunyo 28

Agkayo mibibiang ed sikara.—Efe. 5:7.

Labalabay nen Satanas ya miulop tayo ed saray totoon agda uunoren si Jehova. Amta to ya walan-walay impluensya da ed sikatayo. Diad tua, mas kailangan tayoy manalwar natan komparad saray taga Efeso nensaman, ta diad panaon tayo et maksil so impluensya na saray totoo anggano agtayo ra personal ya nakakaiba. Mainomay la natan so mikaaro ed anggan siopa diad social media. Agtayo manpapaloko ed ideya na sayan mundo ya ayos labat so manggaway imoral. Amta tayo ya aliwa ra. (Efe 4:19, 20) Tepetan tayoy sarili tayo: ‘Kasin gagawaen koy anggaay nayarian ko ya agmiulop ed saray katrabahok, kaklasek, odino arum ni ya anggapoy respeto dad saray ganggan nen Jehova? Anggano balawen ak na arum ya too, kasin manindigan ak tan unoren ko nin siansiay ganggan nen Jehova?’ Diad tua, idadanet na 2 Timoteo 2:​20-22 ya kaukolan tayo met so manalwar ed saray pipilien tayon kaulop diad kongregasyon. Tandaan tayo ya anggan diad loob na kongregasyon et ompan wala ray mauges so impluensya ra, tan pakapuyen day determinasyon tayon manmatoor ed si Jehova. w24.03 22-23 ¶11-12

Simba, Hunyo 29

Si Jehova et maar-aro.—Sant. 5:11.

Kasin iisipen mo no maminsan no antoy itsura nen Aman Jehova? Ibabaga na Biblia ya agtayo nanengneng si Jehova, pero wala ray nabasa ditan ya deskripsion tungkol ed sikato. Sikatoy tinawag ya “agew tan samper” tan “singa apoy a manguupot.” (Sal. 84:11; Heb. 12:29) Sikatoy adeskribe met ya singa mankirlap a metal, akayurong ed trono ya gawad baton safiro, tan apaliberan na maliwliwawan bunlalakaw o rainbow. (Eze. 1:26-28) Lapud agtayo nanengneng si Jehova, ompan mairap tayon panisiaan ya inaro to tayo. Iisipen na arum ya ag-iran balot naaro nen Aman Jehova lapud background da o lapud saray aliwliwan agawad bilay da. No ontay situasyon mo, agka mapaga ta natatalosan nen Jehova no akin ya nanairapan kan onapit ed sikato. Pero impaisulat tod Biblia iray ugali to ta labay ton nakabkabat mon maong. Diad ami-amin ya deskripsion ed si Jehova, say eksakton mandeskribe ed sikato et say salitan “aro.” Ibabaga na Biblia ya “say Dios et aro.” (1 Juan 4:8) Amin ya gagawaen to et lapud aro. Agaylay kaaralem tan kabiskeg na panangaro to. Diad tua, anggan saramay agmangaaro ed sikato et papanengnengan toy panangaro.—Mat. 5:44, 45. w24.01 26 ¶1-3

Lunes, Hunyo 30

Sikatoy akitongtong ed sikara manlapud lurem a singa lusek.—Sal. 99:7.

Si Moises so pinili nen Jehova ya mangidaulo ed saray Israelita papaway ed Ehipto. Pian ipanengneng ed saray Israelita ya si Moises so pinili to, no agew et walay nanengneng dan singa lusek ya lurem, tan no labi et walay nanengneng dan singa lusek ya apoy. (Exo. 13:21) Tinumbok nen Moises itan ya lusek ya anggad akasabi iray Israelita diad Ambalangan Dayat. Pero nen anengneng da ya nitan lay armada na Ehipto ya onuusil ed sikara, ataktakot ira. Singa anggapo lay natakasan da lapud dayat so walad arapan da. Pero diad tua, ginagala nen Jehova ya diman so laen da. (Exo. 14:2) Inligtas to ra diman diad makapabilib ya paraan! (Exo. 14:26-28) Diad loob na 40 ya taon ya indaulo nen Moises iray Israelita paarap ed Insipan ya Dalin, tuloytuloy ton tinumbok imay singa lusek ya lurem. (Exo. 33:7, 9, 10) Akitongtong si Jehova ed si Moises panamegley na satan ya lurem, insan ipasabi nen Moises ed saray Israelita so mensahe To. On, sankanengneng na saray Israelita so ebidensya ya si Moises so uusaren nen Jehova ya mangigiya ed sikara. w24.02 21 ¶4-5

    Publikasyon a Pangasinan (1988-2025)
    Man-Log Out
    Man-Log In
    • Pangasinan
    • Share
    • Setting Mo
    • Copyright © 2025 Watch Tower Bible and Tract Society of Pennsylvania
    • Kondisyon ed Pangusar
    • Totontonen ed Privacy
    • Privacy Settings
    • JW.ORG
    • Man-Log In
    Share