Agosto

Walay duaran naaralan tayo ed teksto tayo ed sayan agew: (1) Anggan saray matunong et manirap tan naproblema met. (2) Tulongan itayo nen Jehova no ondadalan tayod subok. Panon to tayon tutulongan? Say sakey ya paraan et ibabaga tod sikatayo ya talagan aliwan mainomay so bilay ed sayan mundo. Tua, im-promise to ya makapaliket so manlingkor ed sikato, pero agto imbaga ya ag-itayo lan balot naproblema natan. (Isa. 66:14) Kanian papasesegen to tayo ya manpokus ed ilalo tayo—say bilay ya andi-anggaan diad balon mundo. (2 Cor. 4:16-18) Legan tayon aalagaren itan, impaseguro to ya tulongan to tayo pian naanosan tayo so kada agew. (Tag. 3:22-24) Antoy naaralan tayo ed saray matoor ya lingkor nen Jehova nen panaon na Biblia tan diad panaon tayo? Nanengneng tayo ed alimbawa ra ya anggano onarap tayo ed ag-iilaloan ya problema, ag-itayon balot paulyanan nen Jehova basta mantiwala tayo ed sikato.—Sal. 55:22. w23.04 14-15 ¶3-4

Makaaral tayod si Jose tan Maria. Akaparaan iran unoren so batas na gobierno anggano aliwan mainomay. (Luc. 2:1-6) Nen manga siameran bulan la ya malukon si Maria, walay batas na gobierno ya kaukolan dan unoren nen Jose. Ingganggan nen Emperador Augusto ya manparehistro so amin ya walad sakop na Roma. Pian makapanparehistro si Jose tan Maria, kaukolan day onlad Betlehem. Manga 150 kilometro so biahien da, tan patatdang tan palasur so dalan. Seguradon nairapan si Maria ta baleg lay eges to. Panon to no walay nagawad dalan? Panon to no legay biahe et biglan manpasakit si Maria? Say lukon to pa ni met et say Mesias. Anggano wala ray ontan ya panaaburidoan dan sanasawa, kasin rason itan pian agla ra onunor ed gobierno? Inmunor nin siansia si Jose tan Maria anggano mairap. Benendisyonan nen Jehova so inyunor da. Ligtas iran akasabi ed Betlehem, anggapoy mauges ya agawa ed lukon nen Maria, tan asumpal so propesiya ed Biblia ta inyanak si Jesus ed Betlehem!—Miq. 5:2. w23.10 8 ¶9, 11; 9 ¶12

Kasin labalabay moy mankomento pero nauunaan kay nerbiyos? Marakep no manparaan kan maong pian nakabisadom so topic. (Pro. 21:5) No kabisadom itan, mas confident kan mankomento. Say sakey nin makatulong et no antikey labat so ikomentom. (Pro. 15:23; 17:27) No daiset labat so ibagam, agka masyadon nanerbiyos. On, anggano antikey so komentom basta nanlapud puso tan agmo labat binasa ed parapo, nanengneng na agagi ya namparaan kan maong tan natatalosan moy topic. Panon to no ginawam la irayan suggestion pero manaalangan kan mankomento ya mas mabetbet? Tandaan mo ya napapaimis moy Aman Jehova no gagawaen moy ‘the best’ mo ed panagkomento. (Luc. 21:​1-4) Agan balot ipagawa nen Jehova so agmo sarag. (Fil. 4:5) Marakep no walay goal mo, amay antam ya nasarag mo, tan ipikasim ed si Jehova ya nalabanan moy pannerbiyos mo. Singa bilang, i-goal mo ya kada aral et makapankomento ka anggano sakey labat. Insan diad ontutumbok iran aral, i-goal mo ya mamidua, mamitlo, o mas mabetbet ka nin mankomento. w23.04 21 ¶6-8

Inkompara itayo nen apostol Pablo ed sundalo ya lanang ya alerto tan akaparaan ya miguerra. No walay guerra, aga nayarin kampante o relaks labat so sakey ya sundalo. Ontan met ed sikatayo ran Kristiano natan. Importante ya lanang tayon akaparaan parad agew nen Jehova. Agtayo eekalen so samben ed pagew tayo—say pananisia tan aro. Seguradoen tayo met ya lanang ya akasulong ed sikatayo so espiritual ya hilmit—say ilalo tayo. Say samben ed pagew so manproprotekta ed puso na sakey ya sundalo. Proprotektaan met na pananisia tan aro so simbolikon puso tayo. Makatulong itan ya dua pian agtayo ontundan manlingkor ed Dios tan tuloytuloy tayon natumbok si Jesus. No walay pananisia tayo, agtayo pandudaan ya walay manatalaran ya premyo ed saramay interon puso ya manlilingkor ed si Jehova. (Heb. 11:6) Pananisia met so manpakilos ed sikatayon manmatoor ed Lider tayon si Jesus anggano amayamay so subok. Say sakey ya makatulong pian naanosan tayo ray subok et no aralen tan aligen tayoy alimbawa na saray agagi ya nanmatoor anggano agaylay irap na bilay da o dinmalan ira ed graben isusumpa. Tan agtayo met natukson magmaliw ya materyalistiko no aligen tayo iray agagi ya pinasimpli day bilay da pian naiyuna da so Panarian. w23.06 10 ¶8-9

No walay kontrol mo ed sarilim, nakontrol moy liknaan mo tan saray gagawaen mo. Kailangan itan pian nagawaan tayoy goal tayo ed espiritual, lalo la no naiirapan o natatabangan tayon gawaen itan. Tandaan, say kontrol ed sarili et kaiba ed bunga na espiritu. Kanian kerew mo ed si Jehova ya ikdan to ka na masanton espiritu pian naipanengneng mo itan ya kualidad. (Luc. 11:13; Gal. 5:22, 23) Agmo la aalagaren ya ondakep ni situasyon. Diad sayan mundo, walan-walay problema ya arapen tayo. Kanian no alagaren mo ni ya ondakep so situasyon mo, agmon talaga nagawaan so goal mo. Ompan nangirasan tayo ed goal tayo no singa mair-irap itan ya gawaen. Mas maabig sirin no igapom ed mas simpli iran goal. Singa bilang, no say goal mo et ipanengneng so sakey ya balibalin ugali o kualidad, manisip kay simplin paraan pian naipanengneng mo itan. No say goal mo et basaen so interon Biblia, mas realistic no diad gapo et pigaran minuto labat so iyeskedyul mon pambasam. w23.05 29 ¶11-13

Diad sayan kaunoran iran agew, uusaren nen Jehova so organisasyon to pian mangitarya na dakdakel ya espiritual ya naakan. Ontulong iratan pian tuloytuloy tayon makapanakar ed “Dalan na Kasantosan.” (Isa. 35:8; 48:17; 60:17) No say sakey et manpa-Bible study, singa ginapoan to lay onkupbang ed “Dalan na Kasantosan.” Say arum et salien day manakar ya magano, insan onalis ira lanlamang. Pero wala ray desididon manakar anggad makasabi ira ed destinasyon da. Say tepet, iner so pugtaan na “Dalan na Kasantosan”? No say sakey et parad tawen, say destinasyon to et diad “paraiso na Dios” diad tawen. (Apo. 2:7) Pero no say sakey et parad dalin, say destinasyon to et say perpekton bilay ya iter na Dios diad sampot na Sanlibon Taon ya Uley nen Kristo. No manaakar ka la ed sayan dalan, diretso ka labat tan agka la onlilingaw ed benegan mo. Agkan balot onaalis ditan anggad nasumpal moy biahe diad balon mundo. w23.05 17 ¶15; 19 ¶16-18

No isipen moy amin ya ginawa tan regalo nen Jehova ed sika, seguradon napakilos kan idedika so sarilim ed sikato ta labay moy ombales ed kaabigan to. (Sal. 116:12-14) Diad tua, ibabaga na Biblia ya no si Jehova so manregalo, “maong tan sankaabigan” so iiter to. (Sant. 1:17) Diad ami-amin ya inregalo tod sikatayo, say sankamablian et say bilay na Anak to, si Jesus. Ginawa to itan pian nadondon itayo. No anggapoy dondon, ag-itayo makapikaaro ed si Jehova tan agtayo met makapanbilay na andi-anggaan. (1 Juan 4:9, 10) No idedikam so sarilim ed si Jehova, nipanengneng mo ya misatsalamat kad dondon tan ed arum ni ran bendisyon tod sika.—Deu. 16:17; 2 Cor. 5:15. w24.03 5 ¶8

Abebbeba lan maong so moralidad na totoo natan, kanian nalilikna tayo met imay alikna nen Lot. Sikatoy ‘naermenan a maong lapud anggapoy-baing a kagagawa na saray totoo’ nen panaon to. Ontan so alikna nen Lot ta amta to ya kabusol nen Aman Jehova so gagawaen da. (2 Ped. 2:7, 8) Walay takot nen Lot ed Dios tan inar-aro toy Jehova kanian agnampaimpluensya ed sarayan imoral ya totoo. Saray totoo met ed panaon tayo natan et anggapoy pibabali ra anggano amta ra ya say gagawaen da et kabusol na Dios. Basta no antoy labay da, sikatoy gawaen da. Pero no inar-aro tayoy Dios tan walay takot tayod sikato, agda itayo naimpluensyaan. Labalabay nen Jehova ya mansiansia tayon malinis ed moral kanian lanang to tayon bibilinen. Say sakey ya pakabasaan na sarayan bilin et diad libron Proverbio. Saray bilin ya wadtan et parad sikatayon amin—lalaki, bibii, ugugaw, tan anggan saray matatken la. Maong so pansumpalan tayo no unoren tayo iratan. No walay takot tayod si Jehova, agtayo mikakaaro ed saray mauges so kagagawa ra. w23.06 20 ¶1-2; 21 ¶5

Kasin kontra iray kapamilyam ed pandadayew mod si Jehova? Kasin walay insakripisyom pian naiyunam so Panarian ed bilay mo? (Mat. 6:33) No on, makapantiwala ka ya nanenengneng tan papablien nen Jehova so katooran mo tan pansasakripisyom. (Heb. 6:10) Seguradon apatunayan mo la ya tua iyan imbaga nen Jesus: “Siopaman ya anaynan ed abung to odino agagi ton lalaki odino agagi ton bibii odino ina to odino ama to odino ananak to odino kaumaan to nisengeg ed siak tan nisengeg ed maong a balita et mangawat na maminlasus ed karakel ed sayan panaon​—kaabungan, agagin lalaki tan bibii, kainaan, ananak, tan kaumaan, anggaman ed saray panamasegsegang—​tan diad onsabin sistema na mundo et bilay ya andi-anggaan.” (Mar. 10:29, 30) On, amin ya bendisyon ya iiter nen Jehova ed sikatayo et masulosulok ni kompara ed saray sakripisyon gagawaen tayo parad sikato.—Sal. 37:4. w24.03 9 ¶5

Nen walay agawan baleg ya eras ed Judea, nandesisyon iray agagi diad Antioquia ya “mangipawit na tulong ed saray agagin manaayam diad Judea, kada sakey unong ed nasarag to.” (Gawa 11:27-30) Anggano arawi so Judea, nanggawa na paraan iray agagi ed Antioquia pian makasabi so tulong da. (1 Juan 3:17, 18) Imamalasakit tayo met natan iray agagin apektado na kalamidad. Tutulongan tayo ra diad nanduruman paraan. Mandodonasyon tayo ed worldwide work tan ipipikasi tayo ra. Sarag tayo met ya ibaga ed saray elder tayo ya labay tayoy manboluntaryo ed relief project. Ompan wala met iray agagi ya naekal ed trabaho tan onirap so bilay da. Kakkaukolan na agagi so tulong tan malasakit tayo. No apasal tayo lan tulongan iray agagi natan, agtayo la nairapan ya ipanengneng so malasakit ed sikara diad baleg a kairapan. Komon ta diad satan ya panaon et nasabian itayo na Ari tayon si Jesus ya ontan so gagawaen tayo, tan sakey tayo ed saray pangibagaan to na, “Tawir yoy Panarian.”—Mat. 25:​34-40. w23.07 4 ¶9-10; 6 ¶12

Makatunongan si Jesus ya singa si Ama to. Sikatoy imbaki nen Jehova diad dalin “parad saray abalang a karnero ed sankaabungan na Israel.” Pero nen sikatoy kinerewan na tulong na saray aliwan Israelita, tinulongan to ra. Aminsan, walay biin taga Fenicia ya akikasi ed sikato ya paabigen to komon so anak ton aselepan na demonyo. Akasian nen Jesus kanian anggano aliwan Israelita iyan bii, pinaabig toy anak to. (Mat. 15:​21-28) Wala ni sakey ya alimbawa. Legan na ministeryo nen Jesus, walay onian imbaga to: “Siopaman a mangiburi ed siak . . . , sikatoy iburik met.” (Mat. 10:33) Pero antoy ginawa nen Jesus nen sikatoy amitlon imburi nen Pedro? Kasin imburi to met iyan apostol to? Andi. Amta nen Jesus ya matoor si Pedro tan pagbabawian toy ginawa to. Kanian kayari na inkioli nen Jesus, sikatoy nampanengneng ed si Pedro. Seguradon imbaga tod si Pedro ya pinerdona to la tan inar-aro to nin siansia. (Luc. 24:33, 34) No si Jehova tan si Jesus et makatunongan, sikatayo balet ey? Iilaloan nen Jehova ya makatunongan tayo met. w23.07 21 ¶6-7

Anto ray rason no akin ya makapantiwala tayo ya talagan magmaliw ya Paraiso so dalin? Unona, si Jehova ya mismo so nam-promise. Oniay ibabaga na libron Apocalipsis: “Inkuan na samay akayurong ed trono: ‘Gagawaen kon balo so amin a bengatla.’” Labalabay nen Jehova ya gawaen so im-promise to. Tan lapud sikato so sankarunongan tan Makapanyarin-amin, sarasarag to itan ya gawaen. Komadua, segurado si Jehova ya nagawa itan kanian diad pakanengneng to et singa la itan agawa. Oniay imbaga to: “Isulat mo, ta sarayan salita et napanmatalkan tan tua. . . . Agawa la iraya!” Komatlo, no antoy inggapo nen Jehova et sumpalen ton sumpalen, tan ag-ontunda anggad ag-itan nagawa. Atan so rason no akin ya imbaga ton, “Siak so Alfa tan say Omega.” (Apo. 21:6) No nagawa lay gagala nen Jehova, ditan napatunayan ya si Satanas so matila tan palpak. Kanian no say kuan to may katongtong mo et, “Singa imposible itan,” marakep no ibasam tan i-explain mo so Apocalipsis 21:​5, 6. Ipanengneng mo ya nen nan-promise si Jehova, ginarantiyaan to. On, pinirmaan nen Jehova so promise to!—Isa. 65:16. w23.11 7 ¶18-19

Nen 75 so taon nen Abraham, ontan so insipan nen Jehova ed sikato anggano anggapo ni anak to. Kasin tinoor itan nen Jehova? On, pero agla anengneng nen Abraham so amin ya kasumpalan na satan ya sipan. Manlapud imbaliw nen Abraham ed Ilog Eufrates, sikatoy nanalagar ni na 25 ya taon insan ira awalaan nen Sara na anak, si Isaac. Tan linmabas lamet so 60 ya taon insan awalaan na apo, si Esau tan Jacob. (Heb. 6:15) Pero agla anengneng nen Abraham ya nanayam ed Insipan ya Dalin iray ilalak to ya anggad nagmaliw iran baleg a nasyon. Anggaman ontan, nibaga tayon sulit so impananos nen Abraham ta sikatoy inturing nen Aman Jehova ya malet ya kaaro. (Sant. 2:23) Tan diad balon mundo, no sikatoy bilayen la nen Aman Jehova, seguradon malikeliket no naamtaan to ya abendisyonan so “amin a nasyon ed dalin” lapud pananisia tan impananos to! (Gen. 22:18) Antoy naaralan tayo? Singa si Abraham, ompan agtayo nanengneng ya mismo so kasumpalan na arum ya sipan nen Jehova. Pero no maanos tayo ya singa sikato, seguradon natan ni labat et bendisyonan itayo la nen Jehova, tan lalo la diad balon mundo!—Mar. 10:29, 30. w23.08 24 ¶14

Nen kabataan ni si Arin Uzias, sikatoy mapaabeba. Ibabaga na Biblia ya naaralan ton “takotan so tuan Dios.” Diad 68 ya taon na impanbilay to, dakel ya bendisyon so inter nen Jehova ed sikato. (2 Awa. 26:1-4) Diad tulong nen Jehova, tinalo nen Uzias so dakel ya bansa ya kalaban na Juda. Angipaalagey met na saray tori tan pinabiskeg toy puersa militar to pian protektado so Jerusalem. (2 Awa. 26:​6-15) Seguradon malikeliket si Uzias ed amin ya bendisyon tan tulong nen Jehova ed sikato. (Ecl. 3:12, 13) Apasal si Arin Uzias ya no antoy imbaga to, ’katoy unoren na saray sakop to. Seguro lapud satan, inisip to ya nagawaan toy amin ya labay to. Aminsan, linmoob si Uzias ed templo tan sinali toy mamool na insenso diad altar anta saray saserdote labat so nayarin manggawa ed satan. (2 Awa. 26:16-18) Binano ya tampol nen Azarias, say Atagey ya Saserdote. Pero imbes ya ondengel si Uzias, sinmanok laingen! Legan ya onsasanok, “sikatoy dinapoan nen Jehova na kating.” (2 Awa. 26:19-21) Makapaermen so nansumpalan nen Uzias. Sayang, no nampaabeba labat komon, ag-iman agawad sikato! w23.09 10 ¶9-10

Anggano alanaan la na masanton espiritu si apostol Pedro, wala ni ran siansiay kakapuyan to. Nen 36 C.E., anengneng ya mismo nen Pedro ya alanaan na masanton espiritu si Cornelio anggano aliwan Judio. Ebidensya iman ya “anggapoy lalabien na Dios” tan nayari lan magmaliw ya Kristiano so amin ya lahi. (Gawa 10:​34, 44, 45) Manlapu lad saman, midudungo lay Pedro ed saray aliwan Judio. Agto ’tan balot ginawa nensaman. Pero wala ni ran siansiay agagin Judio ya mangibabaga ya agnayarin maniba ya mangan iray Judio tan arum ya lahi. Nen binmisita ed Antioquia so arum ed sarayan agagin Judio, iniwasan nen Pedro so midungo ed saray agagin dumay lahi ra, ta natatakot ed no antoy ibaga na saray bisita. Anengneng nen apostol Pablo iyan agawa tan agto nitepel so “pankunkunwari” nen Pedro, kanian impetek to diad arapan na agagi. (Gal. 2:​13, 14) Pero anggano walay onian agawa, nansiansian aktibo ed panaglingkor si Pedro. w23.09 22 ¶8

No alikas mod sarilim ya wala ray kakapuyan mo, agka komon nadidismaya. Tandaan mo ya agaylay “kaabigan na Katawan [a Jesus]” kanian tulongan to ka. (1 Ped. 2:3) Oniay impaseguro nen apostol Pedro: “Say Dios . . . et sumpalen toy pangipapasal tod sikayo. Gawaen to kayon mapekder.” Diad primero, say pakalikna nen Pedro et agto kanepegan so anggan onabay ed Anak na Dios. (Luc. 5:8) Pero diad tulong nen Jehova tan Jesus, akapanmatoor si Pedro bilang disipulo nen Kristo. Kanian sikatoy akaloob ed “andi-anggaan a Panarian na Katawan tan Manangiliktar tayo a si Jesu-Kristo.” (2 Ped. 1:11) Balbaleg itan ya premyo! No agka met onsuko ya singa si Pedro, tan paipasal kad si Jehova, awaten mo met so premyon bilay ya andi-anggaan. On, manmatoor tayo labat ta ‘amta tayon say pananisia tayo et manresulta ed kililiktar.’—1 Ped. 1:9. w23.09 31 ¶16-17

Walay sular to may tabernakulo nensaman. Naalar tan maawa-awang itan ya sular. Ditan gagawaen na saray saserdote iray nanduruman kimey da. Wadtan so balbaleg ya altar parad apay a popoolan. Wadtan met so balbaleg ya palanggana ya nankargay danum ya uusaren na saray saserdote pian linisan so sarili da antis dan gawaen so sagradon kimey da. Say altar tan palanggana et parehon gawa ed gansa o copper. (Exo. 30:​17-20; 40:​6-8) Saray alanaan ya agagi nen Jesus natan et matoor ya manlilingkor diad loob ya sular na espiritual ya templo. Say balbaleg ya palanggana ya nankargay danum so mangipapanonot ed sarayan alanaan tan ed amin ya Kristiano ya kaukolan tayoy mansiansian malinis ed moral tan espiritual. Iner balet so kawalaan na “baleg ya ulop”? Anengneng nen apostol Juan ya wala rad “arap na trono na Dios” tan “agew-labi iran manlilingkor ed sikato diad templo to.” Singa ra walad paway ya sular na espiritual ya templo nen Jehova. (Apo. 7:​9, 13-15) Balbaleg ya kagalangan ya inikdan itayo nen Jehova na tsansa ya mandayew ed sikato diad espiritual ya templo to! w23.10 28 ¶15-16

Uusaren nen Jehova iray elder pian pabiskegen itayo. (Isa. 32:​1, 2) Kanian no walay dadalanen mon problema, ibagam itan ed saray elder. No walay iisipen dan paraan pian natulongan ka, awat mo ta nanlapu itan ed si Jehova. Labay to ya ombiskeg ka. Ombiskeg met so liknaan tayo no sankanonot tayoy ilalo tayon manbilay ya anggapoy anggaan—balanglan diad Paraison dalin o diad tawen. (Roma 4:​3, 18, 19) No mabilabilay itan ed isip tayo, nasarag tayoy antokaman ya subok, agtayo ontabang ed panagpulong, tan makuli tayon gampanan iray responsabilidad tayod kongregasyon. (1 Tes. 1:3) Atan ya ilalo so amabiskeg ed si apostol Pablo. Imbaga to ya sikatoy “nadedetdetan,” “nawewetwet,” “napapasegsegang,” “itutumba,” tan lanang ingen ya napepeligroy bilay to. (2 Cor. 4:​8-10) Binmiskeg si Pablo ta nampokus ed ilalo to kanian akaya to ray subok. (2 Cor. 4:​16-18) Sankanonot ya lanang itan nen Pablo kanian sikatoy ombibiskeg o “napapasimbalo ya inagew-agew.” w23.10 15-16 ¶14-17

No walay ipipikasim ed si Jehova, isip mo: ‘Kasin aya la so dugan panaon ya iter nen Jehova so kekerewen ko?’ No maminsan, labay tayon naebatan lan tampol so pikakasi tayo. Pero tandaan tayo ya si Jehova so makaamta no kapigan so “dugan panaon” ya iter toy kerew tayo. (Heb. 4:16) No agan tampol inebatan nen Jehova so pikakasi tayo, ompan isipen tayo ya say ebat to et ‘Andi,’ anta manaya et ‘Andi ni.’ Singa bilang, walay kabataan ya brother ya impikasi ton onabig la komon so sakit to. Balet aga anguman so situasyon to. No mamilagron paabigen nen Jehova, ompan kuestionen nen Satanas so motibo to ya sikatoy manlilingkor labat ed si Jehova ta inmabig. (Job 1:​9-11; 2:4) Sakey ni, wala lay panaon ya inyeskedyul nen Jehova ya paabigen toy amin ya sakit. (Isa. 33:24; Apo. 21:​3, 4) Pero anggad agni itan sinmabi, agtayo iilaloan ya manggawa na milagro si Jehova natan pian onabig tayod sakit tayo. Anto sirin so mas marakep ya ipikasi to may brother? Maabig no ipikasi tod si Jehova ya naanosan to komon so sakit to tan mansiansiay deen na nonot to pian tuloytuloy ya makapanlingkor ed sikato. w23.11 24 ¶13

Wala tay aminsan ya alingo-lingo si Samson ed desisyon to, pero agsinmuko. Sankanonot to nin siansia si Jehova tan no panon ton nasumpal so asainmin ya inter nen Jehova ed sikato. (Ukom 16:​28-30) Oniay impikasi to: “Jehova, ipangasim, . . . abuloyan mo ak ya ombales ed saray Filisteo.” Inebatan nen Jehova so kerew nen Samson, tan impawil To so ekstraordinaryon biskeg to. Kanian mas dakel ya Filisteo so apatey nen Samson nen say karakel na apatey to antis to ’ya. Anggano alingo si Samson ed desisyon to tan inani toy resulta, ginawa to nin siansia so panlabayan nen Jehova. Kanian no makagawa tayo met na lingo ya lapud satan et kaukolan tayoy panangipetek o naekal tayod pribilehyo, agtayo komon ontatabang ed panlilingkor tayo ed si Jehova. Tandaan ya ag-itayo sukoan nen Aman Jehova. (Sal. 103:​8, 9) Anggano akagawa tayoy lingo, posible ya usaren itayo nin siansia nen Jehova ya singa ginawa to ed si Samson. w23.09 6 ¶15-16

No nanengneng nen Jehova ya aanosan mo ray subok, naalam so pabor to tan sikatoy napaliket mo. Labay to kasin ibaga, naliliketan si Jehova lapud nanairapan ka ed subok ya dadalanen mo? Andi. Naliliketan si Jehova ed sika ta manmamatoor ka ed sikato. No antam ya walad sika so pabor na Dios, balibali itan ed liknaan! (Sal. 5:12) No isipen tayoy alimbawa nen Abraham, say rason no akin ya apaliket toy Aman Jehova et lapud inanosan to ray subok tan nansiansian matoor kanian sikatoy inturing na Dios ya kaaro tan inyabawag ton matunong. (Gen. 15:6; Roma 4:​13, 22) Sikatayo natan ey? Antoy gawaen tayo pian ontan met so turing nen Jehova ed sikatayo? Tandaan tayo ya say pabor na Dios et ag-akadepende ed pribilehyo tayo odino diad karakel na nagagawaan tayo parad sikato. Naawat tayoy pabor to basta manmatoor tan mananos tayo. Sarasarag tayo itan ya gawaen anggan antoy edad, situasyon, o abilidad tayo. Kasin walay dadalanen mon subok natan pero manmamatoor kad si Jehova? No on, tandaan mo ya napapaliket moy Aman Jehova tan walad sika so pabor to. No kombinsido ka ya inar-aro ka nen Jehova, walay balibalin epekto to—lalon ombiskeg so ilalom! w23.12 11 ¶13-14

Importantin aralen na sakey ya brother so ondengel tan mitongtong. Akin ey? Kailangan itan pian naamtaan toy iisipen na agagi tan natalosan toy liknaan da. (Pro. 20:5) Legan kan mitotongtong, maabig no obserbaan moy tono na boses, ekspresyon na lupa, tan kilos na katongtong mo. Agmo itan nagawaan no agka miulop tan miistoryaan ed arum. No say apasalan mo labat et email, text, o chat, ompan nababaingan kan mitongtong no personal la. Kanian maabig no manggawa kay paraan pian nakaulop tan nakaistoryaan mo ray agagi. (2 Juan 12) Importante met ya say sakey ya brother et nasuportaan toy sarili to tan say pamilya to. (1 Tim. 5:8) Importante ya walay antam ya skill pian makalmo kay trabaho. (Gawa 18:​2, 3; 20:34; Efe. 4:28) Ipasal moy mankuli ed trabaho. No antoy ginapoan mo, sumpal mo. No pulido kan mankimey, mainomay moy makalmo na trabaho tan labalabay da ka. w23.12 27 ¶12-13

Diad Biblia, no nabitla so “agew nen Jehova,” ontutukoy itan ed panaon ya deralen nen Jehova iray kalaban to tan iligtas to iray lingkor to. Nensaman, wala met la ray ontan ya ginawa nen Jehova. (Isa. 13:​1, 6; Eze. 13:5; Sof. 1:8) Diad panaon tayo, onggapo so “agew nen Jehova” no deralen la na saray lider na gobierno so Makapanyarin Babilonia, tan manampot itan ed guerra na Armagedon. Pian makaligtas tayo ed satan ya “agew,” dapat natan ni labat et manparaan tayo la. Diad tua, say imbaga nen Jesus et “mansiansia [tayon] akaparaan” parad “baleg a kairapan.” (Mat. 24:21; Luc. 12:40) Diad samay unonan sulat nen apostol Pablo ed saray agagi ed Tesalonica, sikatoy angusar na nanduruman ilustrasyon pian mabilabilay ed nonot da so agew nen Jehova tan mansiansia ran akaparaan. Amta nen Pablo ya aliwa nin saman ya panaon so isabi na agew nen Jehova. (2 Tes. 2:​1-3) Pero pinaseseg to ray agagi ya manparaan tan isipen da ya singa la itan onsabi nabuas. Marakep no ontan met so isipen tayo natan. w23.06 8 ¶1-2

Nen 1978, walay atagtagey ya bilding ya impaalagey ed Tokyo, Japan ya 60 so palapag to. Mabetbet so yegyeg ed satan ya syudad kanian inisip na totoo ya ompan maganggano itan ya nageba no yegyeg. Pero walay ginawa na saray engineer pian ag-itan ombigay. Anggano malmalet so impanggawa ra ed pundasyon na bilding, in-design da ya sarag toy mila ed galaw na yegyeg. Lapud flexible so design to, ag-itan ombagsak. Sikatayo ran Kristiano et singa satan ya atagtagey ya bilding. Akin ey? Importante ya malmalet so espiritual ya pundasyon tayo, pero dapat flexible tayo met tan marunong tayon man-adjust. Importante ya mapekder tayo no say pantongtongan et ganggan tan estandarte nen Jehova. ‘Akaparaan tayon tuloken’ iratan anggan antoy nagawa. Pero wala met iray situasyon ya importantin “makatunongan” o flexible tayo. (Sant. 3:17) Antoy epektod sikatayo no mapekder tayo pero akaparaan tayo met ya man-adjust? Magmaliw tayon desidido ya unoren si Jehova, pero agtayo magmaliw ya is-istrikto. w23.07 14 ¶1-2

Nen adulto lay Jesus, kaukolan toy manindigan pian makapanmatoor ed Dios, lalo la ta arap-arapan ya tinukso nen Satanas a Diablo. (Mat. 4:​1-11) Labay nen Satanas ya mankasalanan si Jesus pian agto nabayaran so dondon. Nen inggapo la nen Jesus so ministeryo to diad dalin, dakel ni ran subok so inanosan to. Amayamay so kinmontra ed pampupulong to, binusol da, tan binantaan da ni ingen ya pateyen da. (Luc. 4:​28, 29; 13:31) Inanosan to met iray aliwliwan ugali na saray papatumbok to. (Mar. 9:​33, 34) Nen sikatoy lilitisen ed korte na saray Judio, minaltrato tan ininsulto da, insan da senentensiaan bilang mauge-uges ya kriminal. Makapabaing so impamatey dad sikato! (Heb. 12:​1-3) Legan ya akapasak si Jesus ed panamairapan a poste, sikatoy agprinotektaan nen Jehova tan pinaulyanan ton manirap. (Mat. 27:46) On, dakel so irap ya dinalan nen Jesus pero intepel to iratan ya amin pian nabayaran so dondon. Makapa-touch anto? No isipen mon amin so ginawa nen Jesus parad sika, seguradon mas naar-arom. w24.01 10-11 ¶7-9

No maanos tayo, maong so pipiulop tayod arum. Singa bilang, no walay mansasalita, alisto tayon ondengel. (Sant. 1:19) Naiwasan met so barongan no maanos tayo. Anggano makapa-stress lay situasyon, agtayo man-react ya tampol tan agtayo mansalitay ansakit. Tan no maanos tayo, kontrolen tayoy emosyon tayo anggano asakitan tayo ed imbaga o ginawa na arum. Imbes ya ombawi, “itultuloy [tayon] itepel . . . tan mabulos a perdonaen so sakey tan sakey.” (Col. 3:​12, 13) Makatulong met so inkaanos ed panagdesisyon. No maanos tayo, agtayo padalus-dalos. Man-research tan man-isip tayo nin maong pian naamtaan tayo no antoy sankaabigan ya gawaen. Singa bilang, panon to no manaanap kay trabaho? No atanggap ka ed unonan inaplayan mo, ompan awaten mon tampol. Pero no maanos ka, isipen mo nin maong no antoy epekto to ’tan ed pamilyam tan ed espiritualidad mo. On no maanos tayo, naiwasan tayoy makagawa na desisyon ya pagbabawian tayo lanlamang. w23.08 22 ¶8-9

No nadidismaya ka lapud wala ni ran siansiay lalabanan mon makasalanan ya pilalek, antoy makatulong pian determinado kan labanan itan? Nonot mo imay im-promise mod si Jehova nen indedikam so sarilim ed sikato. Nen indedikam so sarilim ed si Jehova, imburi o intakwil mo lay sarilim. Labay ton ibaga, anggano walay labay mon gawaen o ambisyon mo pero antam ya kontra itan ed panlabayan nen Jehova, agmo la itan gawaen. (Mat. 16:24) Kanian no nasubok o natukso ka, agka la manduaran isip no antoy gawaen mo. Mainomay moy mandesisyon ta saksakey so labay mon gawaen—say manmatoor ed si Jehova. Atan labat so sankanonot mo, kanian singa ka si Job. Anggano matindi so subok ya dinalan to, imbaga to nin siansia ya: “Agko ikbanan so integridad ko!”—Job 27:5. w24.03 9 ¶6-7

Kaiba tayoy Jehova, “say Dios na aro.” (2 Cor. 13:11) Sikatoy interesado ed kada sakey ed sikatayo. “Apaliberan [itayo] na matoor a panangaro To”! (Sal. 32:10) No dalepdepen tayoy panangaro nen Jehova, sikatoy magmaliw ya tudtua ed bilay tayo kanian magmaliw tayon close ed sikato. Agtayo met nababaingan ya manpikasi tan ibagan kakkailangan tayoy panangaro to. Agtayo met manalangan ya ibagad sikato iray pakakaaburidoan tayo ta amta tayon makatalos si Jehova tan labalabay to tayon tulongan. (Sal. 145:​18, 19) Say panangaro nen Jehova et singa apoy ya papetangen toy laman no nakeketel tayo. Atan so manpabiskeg na liknaan tayo no ondadalan tayod saray subok tan kairapan. Kanian asingger kad si Jehova tan awat moy panangaro to. Tan komon et proud mo met ya ibagan: “Inad-arok si Jehova”!—Sal. 116:1. w24.01 31 ¶19-20

Amta la na saray Judio so ngaran na Dios. Kanian antoy labay ya ibaga nen Jesus nen imbaga ton, “Impakabat kod sikara so ngaran mo”? Imbangat tan impalinew nen Jesus ed sikara no anton klase na Dios si Jehova. (Juan 1:​17, 18) Singa bilang, ibabaga na Hebreon Kasulatan ya si Jehova et “mapangasi tan maabagey.” (Exo. 34:​5-7) Pero mas pinaletaw nen Jesus iratan ya ugali nen Ama to nen inusar to may ilustrasyon tungkol ed sakey ya anak a laki ya apariwara nen pinili toy onsian ed pudir na ama to. Sinmabi panaon ya nagbabawi yan anak tan nandesisyon ya ompawil lad abung da. “Legan a walad nid arawi,” sikatoy abantag nen tatay to tan akasian to. Kanian binmatik ya tampol tan nilakalakap to! Mabulos ton pinerdona tan tinanggap to lamet bilang anak. Diad sayan ilustrasyon, atalo-talosan tayo ya talagan makasi tan maabagey si Jehova. (Luc. 15:​11-32) Lapud satan ya paraan na panagbangat nen Jesus, mas akabat na totoo iray balibalin ugali tan kualidad nen Ama to. w24.02 10 ¶8-9

Si Jehova et mangiiter na inawa tan ligliwa ed saramay ondadalan ed subok. Panon tayon naalig si Jehova? Kaukolan tayon aralen ya ipanengneng iray ugali ya konektado ed panangasi. Anto iratan ya ugali? Antoy makatulong pian ‘itultuloy tayon ligliwaen’ tan aroen so sakey tan sakey diad kada agew tan agtayo onsawan mananap na paraan pian naligliwa tayo so arum? (1 Tes. 4:18) Kaukolan tayon aralen ya ipanengneng iray balibalin ugali, singa say kaabigan, pililikna, tan panamabli ed agagi. (Col. 3:12; 1 Ped. 3:8) No walad sikatayo iratan ya ugali, natural lad sikatayo ya imalasakit iray agagi, tan agtayo makareen anggad agtayo ira naligliwa o napaseseg. Marakep no saratan ya ugali et parte la na inkatoo tayo, ta say kuan nen Jesus: “No anto so walad puso, satan so ibabalikas na sangi. Say maong a too et mangipapaway na maong iran bengatla manlapud maong a kayamanan to.” (Mat. 12:​34, 35) On, no mabulos tayon liligliwaen iray agagi tayo, patunay itan ya inar-aro tayo ra. w23.11 10 ¶10-11

Kailangan tayoy manpatulong ed si Jehova pian natalosan tayo iray propesiya ed Biblia. Say panaral na propesiya et singa ipasyar ed sakey ya lugar ya agmo kabisado. Mas na-enjoy moy pampasyar mo no mangitagar kay kaarom ya amta toy pasikot-sikot ed satan ya lugar. Legan kayon manbiabiahe, kabisado to no iner lay kulaan yo tan no iner kayo la paarap. No walay ontan ya kaarom ya kaibam ed biahe, panatag so loob mo ta antam ya agka nabalang. Si Jehova et singa ontan ya kaaro. Kabisado to no anto lan panaon so pambibilayan tayo tan no iner tayo la paarap. Kanian pian natalosan tayo iray propesiya ed Biblia, importante ya manpatulong tayo ed si Jehova. (Dan. 2:28; 2 Ped. 1:​19, 20) Si Jehova et singa maar-aron ateng ya sankanonot toy arapen na ananak to, tan labay to ya maong so pansumpalan da. (Jer. 29:11) Pero say pidumaan nen Jehova ed saray atateng tayo, sarag ton amtaen no antoy eksakton nagawa ed arapen. Impaisulat to iray propesiya ed Biblia pian amta tayo iray importantin nagawa ed arapen tan makapanparaan tayo la antis nin nagawa iratan.—Isa. 46:10. w23.08 8-9 ¶3-4