Setyembre

Inikdan nen Jehova si Jesus na pakayarin solusyonan so amin ya problema na totoo. Nanengneng ed saray milagro nen Jesus ya sarasarag ton solusyonan so amin ya problema ya agtayon balot nasolusyonan. Singa bilang, walay pakayari ton ekalen so mismon lapuan na amin ya problema tayo—say atawir tayon kasalanan tan saray epekto to, kaiba lay sakit tan patey. (Mat. 9:​1-6; Roma 5:​12, 18, 19) Saray milagro nen Jesus et patunay ya sarag ton paabigen so “amin a klase na sakit” tan bilayen iray inatey. (Mat. 4:23; Juan 11:​43, 44) Sarag to met ya patundaen iray bagyo tan taloen iray demonyo. (Mar. 4:​37-39; Luc. 8:2) Ombibiskeg so liknaan tayo ta amta tayon sarasarag nen Jesus ya ekalen so amin ya problema tayo! Makapantiwala tayo ya nagawa so amin ya im-promise nen Jehova ya bendisyon na Panarian. Nanggawa na milagro si Jesus lapud labay ton ipanengneng iray milagro ya gawaen to ed interon mundo no sikato la so Ari ed Panarian na Dios. w23.04 3 ¶5-7

No wala kad baleg ya kongregasyon tan ngalngali agka naturo, ompan natabangan ka lan mankomento. Pero agka komon nadidismaya. Manparaan kay dakel ya komento pian dakel nin siansia so reserbam anggano agka natawag diad bandad gapo. No ipaparaan moy artikulo ya aralen ed Panag-bantayan, isip mo no antoy koneksion na kada parapo ed manunan tema. No ontan so gawaen mo, walan-walay marakep ya punto ya naiyarum mo. Maabig met no iparaan mon ebatan iramay parapon tungkol ed aralem ya katuaan ya mas mairap ya ipaliwawa. Akin ey? On ta posiblin mas daiset so mankomento ed sarayan parapo. Panon to balet no linmabas lay pigaran aral et agka nin siansia natuturo? Antis na aral, katongtong mo la may mangikondukta tan ibagam ed sikato no anton parapo so labay mon ebatan. w23.04 22 ¶9-10

Maunor si Jose ed saray ganggan nen Jehova, tan atan so rason no akin ya agawaan toy responsabilidad to bilang maong ya asawan laki. Diad Biblia, amitlon beses ya inikdan na Dios si Jose na instruksion no antoy gawaen tod pamilya to. Diad satan ya taloran inkagawa, inmunor ya tampol si Jose anggano aliwan mainomay. (Mat. 1:20; 2:​13-15, 19-21) Lapud inmunor si Jose, aprotektaan, naasikaso, tan niiter to ray pankaukolan nen Maria. Seguradon pandinayewan nen Maria so inkamaunor na asawa to, kanian lalo ton naar-aro tan arespeto. No sakey kan asawan laki, panon mon naalig si Jose? Manpaigiya kad si Jehova tan unor mo ray bilin to ya walad Biblia diad pangaasikasom ed pamilyam. No unoren mo iray bilin nen Jehova anggano kaukolan moy mansakripisyo, nalikna na misis mo ya inar-arom. Oniay imbaga na sister ya taga Vanuatu ya masulok lan 20 taon ya kasal: “No nanenengneng koy asawak ya manpapaigiya ed si Jehova tan uunoren to ray bilin ya walad Biblia, lalok ya narerespeto. Mareen so nonot ko tan walay tiwalak ed saray desisyon to.” w23.05 21 ¶5

Iilaloan nen Jehova ya saramay Judio ya pinmawil manlapud Babilonia et magmaliw ya ‘masanto ya totoo.’ (Deu. 7:6) Pero, agto labay ya ibaga ya anggapo lan balot so umanen dad sarili da. Maslak ya Judio ya inyanak ed Babilonia et naimpluensiaan na ugali tan kagagawa na saray taga Babilonia. Diad tua, kayari na dakel ya dekada manlapud insabi na unonan grupo ed Israel, agmakapanisia si Gobernador Nehemias ya wala ray ananak na saray Israelita ya aga “makapansalita na lenguahe na saray Judio.” (Neh. 13:​23, 24; Deu. 6:​6, 7) Lapud ag-ira makasalita tan ag-ira makabasa na Hebreo, agda natalosan so Salita na Dios—katon panon dan naaro tan nadayew si Jehova? (Esd. 10:​3, 44) On, dakdakel ni kaukolan ya umanen na saray Judio, pero maong labat ta wala la rad Israel tan sandaraiset lan ompapawil so dugan panagdayew.—Neh. 8:​8, 9. w23.05 15 ¶6-7

Anggano pursigido o disiplinado tayo, agtayo naiwasan ya wala ray makahadlang ed goal tayo. Singa bilang, ompan agtayo natumbok so eskedyul tayo no wala ray “ag-iilaloan a nagawa.” (Ecl. 9:11) Ompan onkapuy so liknaan o naupot so biskeg tayo lapud problema ya aarapen tayo. (Pro. 24:10) Tan no walay nagawaan tayon lingo, ompan natabangan tayo la ed goal tayo. (Roma 7:23) Sakey ni, wala ray agew ya talagan naknaksawan tayo. (Mat. 26:43) Anto ray dapat tayon tandaan no wala ray ontan ya hadlang? Tandaan mo ya no agka onsuko, ipapanengneng mo ya inar-arom si Aman Jehova. Ibabaga na Biblia ya walan-walay panaon ya naproblema tan nalingo tayo. Pero im-promise nen Jehova ya tulongan to tayo no natumba o nairapan tayo. On, no agka manpatalo ed antokaman ya nayarin makahadlang ed goal mo, ipapanengneng mo ed si Jehova ya talagan labalabay mon paliketen! Seguradon makakaimis si Jehova no nanenengneng ton mani-effort kan gawaen so goal mo anggano wala ray hadlang. w23.05 30 ¶14-15

No manpayunir so kabataan ya brother, naaralan toy mibagay ed nanduruman totoo. Makatulong met itan pian naaralan toy man-budget tan mankontento. (Fil. 4:​11-13) No goal moy manlingkor ya full-time, igapom diad pan-apply mo bilang auxiliary payunir pian akaparaan ka lan man-regular payunir. No payunir ka, baleg so posibilidad ya naimbitaan kan manlingkor bilang construction servant o Bethelite. Marakep no amin ya brother et i-goal day manlingkor ed kongregasyon bilang elder. No ontan so goal na sakey ya brother, ibabaga na Biblia ya “maabig a kimey so pipirawaten to.” (1 Tim. 3:1) Pero antis ya magmaliw ya elder, dapat magmaliw nin ministeryal a lingkor. Balbaleg so nitutulong na saray ministeryal a lingkor ed saray elder. Saray elder tan ministeryal a lingkor et makulikuli ed ministeryo tan mapaabeban manseserbi ed saray agagi. w23.12 28 ¶14-16

Tinedyer ni labat si Arin Josias nen ‘ginapoan ton anapen si Jehova’​—labay to ya mas nakabat to ni si Jehova tan gawaen no antoy duga. Pero aliwa itan ya mainomay ta diad saman ya panaon et dakdakel ya Judio so mandadayew ed saray dios-diosan. Nampakpel si Josias pian nasuportaan toy dugan panagdayew. Nen manga 20 so taon to, ginapoan ton ekalen so palson panagdayew diad Juda. (2 Awa. 34:​1, 2) Anggano ugaw ka ni, sarag mon gawaen imay ginawa nen Josias. Maabig no kabaten mon maong si Jehova tan amtaen mo iray balibalin ugali tan kualidad to. No gawaen mo itan, napakilos ka ya idedika so sarilim ed sikato. Antoy epekto to ’tan ed bilay mo? Oniay imbaga nen Luke ya abautismoan nen 14 so taon to: “Manlapu nen indedikak so sarilik ed si Jehova, amtak ya kailangan kon iyuna ed bilay ko so panaglingkor, tan sikato so dapat kon paliketen.” (Mar. 12:30) Maong so pansumpalan mo no ontan met so goal mo! w23.09 11 ¶12-13

Nen sinulatan nen apostol Pablo iray agagi ed Tesalonica, ngalngali sakey taon ni labat na kongregasyon da. Kanian anggapo ni masyadon eksperiensya na saray mangidadaulo ed sikara tan ompan wala ray aliwan desisyon da. Anggano onman, binilin nen Pablo iray agagi ya respetoen da ni ran siansia. No natan ni labat et kakkaukolan tayo lay panangigiya na saray elder, di nagkalalo la no baleg ya kairapan la. Posiblin napultot so komunikasyon tayod world headquarters tan branch office. Kanian natan ni labat et ipasal tayo lan aroen tan respetoen iray elder. Antokaman so nagawa, agtayo manpopokus ed lingo ra. Agtayo lilingwanan ya si Jehova tan si Jesu-Kristo so mangigigiya ed sarayan matoor ya brother. Proprotektaan na hilmit so ulo na sundalo. Say ilalo tayo ed arapen so manproprotekta met ed panagnonot tayo. No malinlinew itan ed isip tayo, ag-itayo natukso ed saray iyoopresi na sayan mundo ta amta tayon andi-kakanaan iratan. (Fil. 3:8) No ondadalan tayod subok, baleg so naitulong na ilalo pian kalmado tayo labat tan ag-onkapuy so espiritualidad tayo. w23.06 11-12 ¶11-12

Walay duaran pampilian na saramay makarengel ed imbitasyon na “makulangkulang a bii”: Kasin awaten da itan o andi? Importante ya gawaen tayoy anggaay nayarian tayo ya iwasan so imoralidad. Imbaga to may “makulangkulang a bii” ya “saray tinakew a danum et masamsamit.” (Pro. 9:17) Anto tay “tinakew a danum”? Diad Biblia, say seksual ya relasyon na sanasawa et inkompara ed makarepreskon danum. (Pro. 5:​15-18) Say seksual ya relasyon et para labat ed sakey ya laki tan sakey ya bii ya legal iran kasal. Kanian no imbagan “tinakew a danum,” nayarin ontutukoy itan ed panggaway imoral o pirelasyon ed agmo asawa. Saray manggagaway imoral et singa ra matakew ta iyaamot day gagawaen da pian ag-ira naerel. Parad sarayan totoo, masamsamit so “tinakew a danum,” lalo la no anggapo met so makakanengneng o makaamta ed gagawaen da. Pero lolokoen da labat so sarili da ta nanenengneng nen Jehova ya amin. Aliwa sirin ya “masamsamit” so “tinakew a danum.” Akin ey? On ta no napaermen tayoy Jehova tan nabalang tayoy pabor to, atan la so sankapaitan ya nagawad bilay tayo.—1 Cor. 6:​9, 10. w23.06 22 ¶7-9

Panon to no diad ilabas na panaon et nalikas mon aliwa lan impapuso iray pikakasim odino natatabangan ka lan manpulong? Agmo komon iisipen ya anggapo lad sika so pabor nen Jehova. Lapud agtayo perpekto, wala ran talagay panaon ya manguman-uman so emosyon tayo. No bilang ta onkakapuy lay seseg mo, isip moy alimbawa nen apostol Pablo. Ginawa toy anggaay nayarian ton aligen si Jesus. Pero inamin to met ya no maminsan et natatabangan ed ministeryo. Balet anggano walay negatibon nalilikna to, desidido ya sumpalen so responsabilidad ya inmatalek ed sikato nen Jehova. Singa si Pablo, agka komon ompapayag ya natalo ka na emosyon mo. Gawam nin siansia no antoy duga anggano walay negatibon naliliknam. Diad tua, no ontan so gawaen mo, ompan agmo naliklikas et kalkalna la manayan ompapawil so liket tan seseg mo.—1 Cor. 9:16. w24.03 11-12 ¶12-13

Nipanengneng tayo ya inar-aro tayo ray agagi no ipalikna tayod sikara ya labalabay tayo ran nakaaro tan nakaiba. (2 Cor. 6:​11-13) Diad kongregasyon, nanduruman lugar tan pamilya so binalegan na saray agagi, kanian segurado ya nanduruma met so ugali tan kalareker tayo. Pero ag-itan magmaliw ya hadlang no say nengnengen tayo et saray balibalin ugali da. Ipapanengneng tayon inar-aro tayo ray agagi no say pampokusan tayo et saray balibalin ugali ya anengneng nen Jehova ed sikara. Importantin maong so panangaro no baleg a kairapan la. No ginmapo la itan, iner dapat so kulaan tayo pian iligtas itayo nen Jehova? Imanoen tayoy imbaga nen Jehova ya gawaen na saray lingkor ton manaayam ed Babilonia no lusoben la itan: “La kayo, sikayo ran totook, loob kayod saray kuarto yo, tan ikapot yo iray puerta. Amot kayon magano anggad onlabas so sanok na Dios.” (Isa. 26:20) Ompan ontan met ya instruksion so kaukolan tayon unoren no baleg a kairapan la. w23.07 6-7 ¶14-16

Nanengneng komon ed ugali tayo ya makatunongan tayo. Kanian tepetan moy sarilim: ‘Kasin say pakanengneng na arum ed siak et makatunongan ak, mapalugar, tan open-minded ak? Odino kada no nabitlay ngaran ko, say naisip dan tampol et “Ay, is-istrikto man ya too, antiktikey so pasensia to!” Kasin dedengelen koy opinyon na arum tan pagbibigyan koy labay da no anggapo met so nalalabag ya prinsipyod Biblia? Odino ipilit ko no antoy amtak ya duga?’ No itepet mo iratan ed saray kapamilyam tan kakaarom, anto kasi ibaga ra? Nanengneng ed ebat da no talagan aaligen moy Jehova tan Jesus. Importante ya makatunongan o flexible tayo no manguman so situasyon tayod bilay. Singa bilang, ompan bigla labat ya na-diagnose ya walay graben sakit tayo. Odino biglan magulo so politika ed bansan panaayaman tayo odino ombagsak so ekonomiya. (Ecl. 9:11) Subok met ed sakey ya Kristiano no manguman so asainmin to ed organisasyon o no ibaki dad arum ya lugar. Pero ag-itayo nairapan ya man-adjust no: (1) tanggapen tayoy realidad, (2) onnengneng tayod arapen, aliwan diad apalabas, (3) iwasan tayoy manisip na negatibo, tan (4) ontulong tayod arum. w23.07 21-22 ¶7-8

Nen kabataan ni si propetan Daniel, sikatoy binihag ed Babilonia. Anggano sakey ya bihag tan ugaw ni, apabilib to iray opisyales na Babilonia. Anggapoy nabalaw ed sikato. Anta guapo la lanti, matalino ni, tan nanlapu ed respetadon pamilya. (1 Sam. 16:7) Anengneng day potensyal to kanian impasal da pian magmaliw ya opisyal ed palasyo. (Dan. 1:​3, 4, 6) Wala balet so anengneng nen Jehova ed si Daniel ya ag-anengneng na saray taga Babilonia. Anto ’tan ey? Makaala tayoy ideya ed mismon imbaga nen Jehova ya walad Ezequiel 14:14. Nen imbaga itan nen Jehova, ompan tinedyer o masulok ya 20 ni labat so taon nen Daniel. Pero diad pakanengneng nen Jehova, say inkatunong nen Daniel et mipara lad inkatunong nen Noe tan Job​—sarayan lalaki et deka-dekada ya nanlingkor ed Sikato. (Gen. 5:32; 6:​9, 10; Job 42:​16, 17) On, inar-aro nen Jehova si Daniel, tan lapud nanmatoor si Daniel ed interon bilay to, agkinmupas so panangaro na Dios ed sikato.—Dan. 10:​11, 19. w23.08 2 ¶1-2

No planom ya saliwen so sakey ya abung, seguradon amtaen mo ni so amin ya detalye antis mon saliwen. Ontan met dapat so nepeg tayon gawaen no babasaen tan aaralen tayoy Biblia. No mapmaples mon basaen, ompan say naaralan mo labat et saray manunan bangat. (Heb. 5:12) Kailangan mo met ya amtaen so amin ya detalye ed Biblia pian natalosan mon maong. Legan mo sirin ya babasaen tan aaralen so Biblia, nengneng mo no panon ya mankokonektaan iray katuaan ya wadtan. Aliwan sapat ya antam no anto ray katuaan ya walad Biblia. Dapat natatalosan mo met no akin ya panisiaan mo iratan. Pian natalosan tayoy Biblia, kaukolan tayon aralen iray aralem ya katuaan ya wadtan. Pinaseseg nen apostol Pablo iray kapara ton Kristiano nen inmunan siglo ya makuli dan aralen so Salita na Dios pian “sigpot [dan] natalosan so kaawang tan karukey tan kaatagey tan kaaralem” na katuaan. Imbaga to ya no ontan so gawaen da, “nilamot tan niletneg” so pananisia ra. (Efe. 3:​14-19) Parad sikatayo met itan ya bilin. w23.10 18 ¶1-3

Dakel iray nabasa ed Biblia ya matoor a lingkor na Dios ya impanengneng day inkaanos. Marakep no i-personal study tayo iratan. Singa bilang, ugaw ni si David nen sikatoy nilanaan pian magmaliw ya ari ed Israel, pero nanalagar ni na dakel ya taon antis ya man-ari. Maan-anos met ya inalagar nen Simeon tan Ana so isabi na Mesias, tan nanmatoor irad si Jehova legan iran manaalagar. (Luc. 2:​25, 36-38) No ipe-personal study’m irayan salaysay, anap moy ebat ed sarayan tepet: ‘Antoy akatulong ed sayan lingkor nen Jehova akin et akapan-anos? Antoy maong ya resulta na impan-anos to? Panon kon naalig so alimbawa to?’ Makaaral tayo met ed lingo na saray aga akapan-anos. (1 Sam. 13:​8-14) Legan mon ipe-personal study so tungkol ed sikara, anap moy ebat ed sarayan tepet: ‘Akin et aga akapan-anos iyan too? Tan anto laingen so nansumpalan to?’ w23.08 24 ¶15

Matoor si apostol Pedro, kanian anggan antoy nagawa, desidido ya agbalot ontunda ed itutumbok tod si Jesus. Walay agawa ya asubok so katooran nen Pedro. Aminsan, walay imbaga nen Jesus ya ag-atalosan na saray disipulo. (Juan 6:68) Imbes ya tepetan day Jesus no antoy labay ton ibaga, adismaya so dakel ya disipulo tan agla ran balot akiulop ed sikato. Si Pedro balet ey? Sikatoy nanmatoor ta amta to ya “walad [si Jesus] iray salita a mangitonton ed bilay ya andi-anggaan.” Amta pa nen Jesus ya sikatoy taynanan nen Pedro tan arum nin apostol. Pero anggano amta nen Jesus ya onman so nagawa, imbaga to ya ombiskeg lamet ed espiritual si Pedro tan mansiansian matoor. (Luc. 22:​31, 32) Natatalosan nen Jesus ya “magunaet so espiritu, balet maletey so laman.” (Mar. 14:38) Kanian anggano sikatoy imburi nen Pedro, agto sinukoan. Nen inmoli lay Jesus, nampanengneng ed si Pedro. Mapatnag ya kinatongtong toy Pedro ya sikaran dua labat. (Mar. 16:7; Luc. 24:34; 1 Cor. 15:5) Seguradon atambal so ermen nen Pedro tan binmiskeg so liknaan to! w23.09 22 ¶9-10

No say sakey ya too et mangipapatnag na pananisia ed Dios, naperdona o nasakbongan so kasalanan to. Tan no pinerdona la nen Jehova so sakey ya too, agto la pawil-pawilen o isumbat iray kasalanan to. (Sal. 32:​1, 2) Atan ya too et ipasen nen Jehova ya ag-akagawa na kasalanan, tan diad pakanengneng To et sikatoy matunong lapud pananisia to. Saray matoor ya lingkor na Dios nensaman ya singa si Abraham tan David et aliwa ran perpekto. Pero impasen ira nen Jehova ya matunong ta mabiskeg so pananisia ra. Diad pakanengneng to et anggapoy nabalaw ed sikara, lalo la no ikompara ed saray totoon anggapoy pananisia ra. (Efe. 2:12) On, singa indanet nen apostol Pablo ed samay sulat to ed saray taga Roma, importante so pananisia pian say sakey ya too et magmaliw ya kaaro na Dios. Atan so rason no akin ya inturing nen Jehova ya kaaro si Abraham tan David. Kanian no mabiskeg so pananisia tayo, ituring to tayo met ya kaaro. w23.12 3 ¶6-7

Sikatayo ran Kristiano natan et singa tayo mangibabagat ed si Aman Jehova kada no uusaren tayoy panaon, biskeg, tan amin ya walad sikatayo parad Panarian. Naipanengneng tayod si Jehova ya papablien tayoy pribilehyo tayon mandayew ed sikato no iter tayoy ‘the best’ tayo ed panaglingkor. Binitla nen apostol Pablo so nanduruman kabiangan na panagdayew tayo ya agtayo dapat papaulyanan. (Heb. 10:​22-25) Imbaga to ya masimoon tayon manpikasi, iyabawag tayo ed publiko so ilalo tayo, pablien tayo iray pantitipon na kongregasyon, tan manpapasesegan itayo, “nagkalalo la ta nanenengneng tayon manasingger lay agew” nen Jehova. Diad bandad sampot na Apocalipsis, oniay amidua ya imbaga na anghel nen Jehova: “Mandayew kad Dios!” (Apo. 19:10; 22:9) Komon ta agtayo lilingwanan so aralem ya katuaan tungkol ed baleg ya espiritual ya templo nen Jehova, tan lanang tayon pablien so balbaleg ya kagalangan tayo ya mandayew ed Makapanyarin-amin a Dios tayo! w23.10 29 ¶17-18

Labay tayon amin ya “itultuloy [ya] aroen so sakey tan sakey.” Pero agtayo lilingwanan imay warning nen Jesus ya “ombetel so panangaro na karaklan a totoo.” (Mat. 24:12) Tua, aliwan saray tuan Kristiano so tutukoyen nen Jesus. Pero kaukolan tayo nin siansiay manalwar, ta ompan naimpluensyaan itayo na ugali na saray totoo ed sayan mundo. Maslak ya totoo natan et sarili da labat so inaro da tan anggapoy pibabali dad arum. Kanian usisaen tayoy sarili tayo. Antoy sakey ya pakanengnengan ya ampetapetang o mabisbiskeg so panangaro tayo ed saray agagi? Say sakey ya pakanengnengan no kasin mabiskeg so panangaro tayo ed saray agagi et no antoy reaksion tayo no walay onlesan mairap ya situasyon. (2 Cor. 8:8) Imbaga nen apostol Pedro so sakey ed saratan ya situasyon. Kuan to: “Manuna ed amin, nawalaan kayo komon na aralem a panangaro ed sakey tan sakey, lapud sasakoban na aro so dakel a kasalanan.” (1 Ped. 4:8) On, nasubok so panangaro tayo ed saray agagi no nasakitan da tayo tan no nanengneng tayoy lingo o kakapuyan da. w23.11 10-11 ¶12-13

Agtayo naunor imay ganggan nen Jesus ya manaaroan tayo no pipilien tayo labat no siopay panengnengan tayoy panangaro diad kongregasyon. Normal met labat ya wala ray mas ka-close tayo. Diad tua, anggan si Jesus et wala met iray apostol ya mas ka-close to. (Juan 13:23; 20:2) Anggaman ontan, bibilinen itayo nen apostol Pedro ya say panangaro tayo komon et singa “aroan na sanaagi”​—aya may liknaan ya ituturing tayon kapamilya so amin ya agagi tayo. (1 Ped. 2:17) Imbaga met nen Pedro ya “manaaroan [tayon] maong manlapud puso.” (1 Ped. 1:22) Say salitan inusar dia nen Pedro et ipapasabi toy ideya ya aroen tayo ray agagi anggano aliwan mainomay. Singa bilang, panon to no asakitan ka ed imbaga o ginawa na sakey ya agi? Ompan say unonan reaksion mo et labay moy ombawi. Pero naaralan nen Pedro ed si Jesus ya aglabay na Dios ya ombawi tayo. (Juan 18:​10, 11) Kanian oniay insulat to: “Agyo babalesen na mauges so mauges a ginawad sikayo odino iinsultoen imay mangiinsulto ed sikayo. Imbes, manggawa kayoy maabig ed sikato.” (1 Ped. 3:9) On, no talagan inaro tayo ray agagi, ipanengneng tayoy kaabigan ed sikara. w23.09 28-29 ¶9-11

Maples ya ombaleg iray ugugaw! Diad ilalabas na saray taon, agtayo naliklikas ya marikit tan balolaki la ra manaya. On, automatic tan maples so ibaleg ed pisikal. Diad kabaliktaran balet, aliwan mainomay so manpatatken ed espiritual ta kaukolan so effort. (1 Cor. 13:11; Heb. 6:1) Pian ontatken tayod espiritual, kaukolan tayon pabiskegen so relasyon tayod si Jehova. Kailangan tayo met so masanton espiritu to pian na-develop tayo ray balibalin ugali, pian naaralan tayo ray skill ya mausar ed bilay, tan pian naiparaan tayoy sarili tayo parad saray responsabilidad diad arapen. (Pro. 1:5) Pinalsa nen Jehova so too ya laki tan bii. (Gen. 1:27) Duma so inkagawa na laman na laki ed laman na bii. Pero wala ni ray pandumaan da. Singa bilang, duma so inter nen Jehova ya responsabilidad ed saray lalaki tan duma met ed saray bibii. (Gen. 2:18) Pian nagampanan da iratan, wala ray kaukolan dan i-develop ya ugali tan skill. w23.12 18 ¶1-2

Kasin labay nen Jesus ya usaren tayoy ngaran nen Ama to? On, segurado. Pero nen panaon nen Jesus, wala ray lider na relihyon ya ibabaga ran aga kuno nayarin bitlaen so ngaran na Dios ta sagradon maong. Pero aga nampaimpluensya si Jesus ed ontan iran tradisyon. Tuloytuloy ton inggalang so ngaran nen Ama to. Imanoen pa imay agawa nen pinaabig nen Jesus so sakey ya laki ya aselepan na demonyo diad lugar na saray Geraseno. Ataktakot iray totoo kanian akikasi irad si Jesus ya ontaynan lad lugar da, katon inmalis la. (Mar. 5:​16, 17) Pero labalabay nen Jesus ya ipakabat so ngaran nen Jehova ed satan ya lugar, kanian ingganggan to may pinaabig ton laki: “Ibalitam ed sikara so amin a ginawa nen Jehova ed sika.” Agto imbagan, “ginawak ed sika.” (Mar. 5:19) Ontan met so labay nen Jesus ya gawaen tayo natan. Ipakabat tayod interon mundo so ngaran nen Ama to! (Mat. 24:14; 28:20) No ontay gawaen tayo, napapaliket tayoy Jesus, say Ari tayo. w24.02 10 ¶10

Magulogulo tan mair-irap so bilay legan na sayan kaunoran iran agew. Pero maong labat ta parte itayo na organisasyon nen Jehova. Malikeliket tayo nin siansia ta wadtan iray maar-aron agagi ya akaparaan ya ontulong ed sikatayo. (Sal. 133:1) Ibabangat itayo met nen Jehova no antoy makatulong pian walay deen tan aroan ed pamilya tayo. (Efe. 5:33–6:1) Tan iikdan to tayo met na karunongan pian nakontrol tayoy emosyon tayo tan mareen so nonot tayo. Pero anggano dakel so bendisyon nen Jehova ed sikatayo, kailangan tayo nin siansiay mansagpot pian agtayo makatunda ed panlilingkor tayod sikato. Akin ey? On ta ompan onsabi panaon et nasakitan tayo ed ibaga o gawaen na arum. Ompan nadismaya tayo met ed sarili tayo no makagawa tayoy lingo, lalo la no paulit-ulit itan. Komon ta agka ontutundan manlingkor ed si Aman Jehova anggano (1) asakitan ka ed imbaga o ginawa na sakey ya agi, (2) nadidismaya kad si asawam, tan (3) nadidismaya kad sarilim. w24.03 14 ¶1-2

Seguro, napapaseseg ka kada no nababasam o nababantayan mo iray eksperiensya na saray agagi ya nansakripisyo pian mas napanlingkoran da ni Jehova. Ompan in-goal day manaral ed School for Kingdom Evangelizers odino namboluntaryo ra ed lugar ya daiset so Tasi. Marakep no ontan met so i-goal mo, lalo la no wala kad kipapasen ya gawaen itan. Dakel ya lingkor nen Jehova so akaparaan ya manpausar ed sikato diad nanduruman paraan. (Gawa 16:9) Panon to balet no agmo ni iratan nagawaan natan lapud situasyon mo? Agmo komon iisipen ya mas inaro nen Jehova iramay agagi ya nagagawaan da iratan ya goal. Say importante ed sikato et tuloytuloy tayon manlingkor tan manmatoor anggad anggaan. (Mat. 10:22) Antokaman so abilidad o situasyon mo, agmo komon lilingwanan ya napapaliket moy Jehova no iiter moy ‘the best’ mo ed sikato. Atan so sakey ya paraan pian tuloytuloy mon natumbok si Jesus kayari na bautismom.—Sal. 26:1. w24.03 10 ¶11

Im-promise nen Aman Jehova ya sikatoy akaparaan ya mamerdona no magbabawi tayo. (Sal. 86:5) Kanian no nagbabawian mo la ray lingom nensaman tan gagawaen moy anggaay nayarian mon agla itan uliten, makapantiwala ka ya talagan pinerdona to ka la. Tandaan tayo met ya makatunongan tan makonsidera ya Dios si Jehova. Amta to no anto labat so sarag tayon gawaen, kanian agto ipagawa ed sikatayo so agtayo met kaya. Say importante ed sikato et gagawaen tayoy anggaay nayarian tayo. Makatulong met no isipen tayo ray alimbawa ed Biblia ya interon puso ya nanlingkor ed si Jehova. Makaaral tayo ed alimbawa nen apostol Pablo. Diad loob na pigaran taon, ararawi so nakar to tan masetseseg ya nampulong. Lapud kuli to, dakel so abuon kongregasyon. Pero nen anguman so situasyon to, limitado lay napupulongan to. Labay to kasin ibaga, nakal lay pabor na Dios ed sikato? Andi. Sikatoy benendisyonan nen Aman Jehova ta ginawa to nin siansia no antoy iyabuloy na situasyon to. (Gawa 28:​30, 31) Singa si Pablo, ompan onsabi panaon ya aliwa lan singa dati so nagagawaan tayo parad si Jehova. Pero say importante et say motibo tayo—no akin ya gagawaen tayo itan. w24.03 27 ¶7, 9

Mapikasi si Jesus, kanian no pikakasi so pantongtongan, dakel so naaralan tayod sikato. Busy pa met si Jesus legan na ministeryo to, tan lanang ya tutumboken na totoo. Pero, sinegurado to ya walay panaon ton manpikasi. (Mar. 6:​31, 45, 46) Aminsan, asaksakbay ya binmangon tan linmad “nisulinek a pasen” pian manpikasi. Wala met may sanlabin nampikasi si Jesus ta walay ambelat ya desisyonan to. (Luc. 6:​12, 13) Tan diad samay labi antis ya ompatey, sikatoy aminpigan nampikasi pian makapanmatoor ed sankairapan ya parte na asainmin to diad dalin. (Mat. 26:​39, 42, 44) Antoy naaralan tayod alimbawa nen Jesus? Anggano busy tayo, dapat seguradoen tayo ya walay eskedyul tayon manpikasi. Singa bilang, ompan kaukolan tayoy ombangon na masakbay odino agtayon tampol onuugip no labi pian makapanpikasi tayo. Seguradon makakaimis si Aman Jehova no nanenengneng to ya mani-effort tayon manpikasi, tan agtayo ibabaliwala so pribilehyon mitongtong ed sikato. w23.05 3 ¶4-5

Diad teksto tayo ed sayan agew, kasin naimano yo imay salitan “nikalbo”? Base ed sakey ya reperensya, say panangaro nen Jehova ed saray alanaan et singa “kulos ya onaagus ed puso ra.” Idadanet na satan ya manleppua so panangaro tod sikara. On, sankalikna na saray alanaan ya “inad-aro [ira] na Dios.” (Jud. 1) Ontan lay pandinayew nen apostol Juan ed panangaro nen Jehova ed saray alanaan, kanian oniay insulat to: “Nonot yoy kabaleg na panangaro na Ama ed sikatayo, a tinawag itayon ananak na Dios!” (1 Juan 3:1) Pero kasin saray alanaan labat so inaro na Dios? Andi, inaro to tayon amin. Anto so sankabelatan ya ebidensya ya inar-aro itayo nen Jehova? Say dondon. Balbaleg so insakripisyo nen Jehova parad sikatayo ran totoo. Anggapoy makapantay ed satan ya panangaro!—Juan 3:16; Roma 5:8. w24.01 28 ¶9-10

Nabasa ed teksto tayod sayan agew no antoy ginawa nen David pian nalabanan toy takot to. Anggano napepeligroy bilay to, say sankanonot to et no anto ni ray gawaen nen Jehova parad sikato. Matalek si David ya sikatoy iligtas nen Jehova. Tutal, sikato so pinili nen Jehova ya onsublay ya ari ed Israel. (1 Sam. 16:​1, 13) Baleg so tiwala nen David ya nagawan-nagawa no antoy im-promise nen Jehova. Anto ray im-promise nen Jehova ya gawaen to parad sika? Aga im-promise nen Jehova ya ipaliis to tayo ed amin ya problema. Pero antokaman so subok ya aarapen mo natan, tandaan mo ya ekalen iratan ya amin nen Jehova diad balon mundo. (Isa. 25:​7-9) Mantiwala ka ya sarasarag ton bilayen iray inatey, paabigen to iray sakit tayo, tan deralen to so amin ya onkokontra ed dugan panagdayew.—1 Juan 4:4. w24.01 6 ¶12-13

Isip moy dedikasyon mod si Jehova tan no akin ya nampabautismo ka. Ginawam iratan ta labay mon paneknekan ya wala kad panig nen Jehova. Pawil mo may rason no akin ya akombinse ka ya nalmom lay katuaan. Nen nampa-Bible study ka, akabkabat moy Aman Jehova kanian naar-arom tan labay mon pagalangan. Binmiskeg so pananisiam tan nagbabawian mo iray agawaan mon kasalanan. Intundam iray makapuy ya kagagawam tan nansagpotan mon gawaen no antoy duga. Malikeliket ka ta aliknam ya pinerdona ka la na Dios. (Sal. 32:2) Ag-abayag, lanang ka lan mimiaral tan ibabagam lad arum iray nanaaralan mod Biblia. Tan asabi panaon et indedikam so sarilim tan nampabautismo ka. Manlapu lad saman, ginapoan mo lay manakar ed dalan paarap ed tuan bilay, tan desidido kan mansiansia ditan. (Mat. 7:​13, 14) Komon ta pansiansiam ya malet so debosyon mod si Jehova, tan lanang mon unoren iray ganggan to. w23.07 17 ¶14; 19 ¶19

No sankanonot mo may promise mo ed si Jehova nen indedikam so sarilim ed sikato, mas desidido kan labanan so tukso. Singa bilang, no dedikado ka la, kasin salien mo ni mi-flirt ed asawa na arum? Siempre andi, ta im-promise mo lad si Jehova ya agka manggawa na kontra ed panlabayan to. Diad kabaliktaran balet, no agmo sankanonot so dedikasyon mo, paulyanan mo labat ya ontubo ed pusom so mauges ya pilalek, ya anggad onlamot la itan. Kanian nairapan ka no kailangan mo lan bagoten so mauges ya pilalek mo. Mas maong sirin no diad gapo ni labat et “arawian mo [la]” so “dalan na saray mauges.” (Pro. 4:​14, 15) On, tanggian mo lan tampol so antokaman ya apektoen toy relasyon mod si Jehova, say Dios ya angidedikaan moy bilay mo. Alig moy Jesus. Komon ta lanang mon sankanonot no antoy makapaliket ed Dios. (Mat. 4:10; Juan 8:29) Kada no walay subok o tukso, tandaan mo ya tsansam itan pian nipanengneng mod si Jehova ya desidido kan ‘tuloytuloy ya tumboken’ si Jesus. Mantiwala ka ya tulongan ka nen Jehova pian nasarag mo ray subok tan nalabanan moy tukso. w24.03 9-10 ¶8-10