“Say Panaon a Natitilak so Apatikeyan’’
1. Akin ya isipen na arum a say panaon so nanaupot la a para ed katooan?
NANAUPOT la so panaon a para ed sayan sistema na bengabengatla. Sakey a rason no akin a dakel so akasabi ed sayan konklusyon et say mismon kiwawala na katooan a niiyan ed kaatapan. Akin, say palanit a panagderal na nuklar so ompatnag a asingsingger natan a nibagan sikato lambengat so “taloran minuto sakbay na pegley-labi’’!
2. Anto so imbaga na sakey a dyurnalista nipaakar ed panangigtot na nuklar?
2 Nansulat ed teman “The Shadow of the Bomb,’’ inkuan nen Nick Brash a dyurnalistan Australiano: “Say sakey a nisnis na gelignite a manbelat na kapalduan kilo so magenap a mamisangbisang ed sakey a too. Ingen say simpen a nuklar so misimbangan natan ed apatiran tonilada na gelignite a para ed kada laki, bii tan ugaw ed dalin. Masulok a $500 bilyon so inggana ed armas nuklar tan masulok ya $40 bilyon so gastosen ed armas diad interon mundo ed sayan taon [1983]. Makapataktakot a karakel na panagpatey. Misimbangan ed pamatey diad sakey ya ageyet ed 10 latan [insektisidio] Mortein.’’—The Sun Weekend Magazine (Melbourne, Australia), Abril 23, 1983.
3. Anto so nibaga nipaakar ed saray nayarin epekto na bakal nuklar?
3 Mairap ya isipen so nayarin epekto na bakal nuklar. Nilikud ed ipatey na nilasus-milyon, say panakulob na sankagloboan ya radyo-aktibo, say daget na ekologo tan arum ni, wala so nikadkaduman kagulo na sosyal, pulitikal tan kurang na ekonomya ed sankadalinan. Diad tua, inako nen Dr. Brian Martin, sakey a pisisista tan managsukimat ed Australian National University: “Simplen agmagenap so akabatan ed pangipasakbay a tekep na talek ed amin a sankagloboan ya epekto na bakal nuklar.’’
4. (a) Akin a maseguro itayon say katooan so agmangupot ed inkasikato diad palanit a panagderal na bakal nuklar? (b) Panoy pikabat tayo a say panaon so nanaupot la a para ed sayan peles a sistema na bengabengatla?
4 Peteg a say arapen so mapatnag a makapasinagem. Ingen sikayoran manangaro ed Dios, imatleken yo! Anggaman say panaon na sayan peles a sistema na bengabengatla so nanaupot la, agderalen na katooan so inkasikato ed makapataktakot a panagpalanit na nuklar. Diad satan makapanseguro itayo, ta si Jehova, “say Anibukel tan Nanggawa’’ na dalin, et “agto pinalsa ya andi-kakanaan, tinibukel to pian panayaman.’’ (Isaias 45:18, Byington) Siempre, pian say katooan so niliktar a manlapud kadesyang, nepeg ya alaen so aliston mabiskeg nen too a kiwas diad paneral ed sayan sistema, tan ontan met ed kaambagelan na nuklar to. Makapaliket, say Amalsa ed planetan Dalin tan katooan so magano lan maneral ed sayan marelmeng, manbibitkel a sistema. Say panaon to so antiktikey la lapud “say baleg ya agew nen Jehova’’so sankanengneng la! (Sofonias 1:14-18) Ingen, agaylan makaligliwa so pakaamta a legan na satan a maples a manasingger ya agew na pipapalinewan, ‘bantayan nen Jehova ya amin iraman so mangaaro ed sikato, balet amin na saray marelmeng so deralen to’!—Salmo 145:20
Panon Karukey Ni So Panaon a Natitilak?
5. Unong ed Apocalipsis 6:9, 10, anto so akainteresan na saray alanaan a patumbok nen Jesus ya aralen?
5 Agnasuppiat a say Dios so onkiwas a sumpad kakabusol to. Balet panon kabayag ni so kagawa sakbay a panganggaen to so sayan marelmeng a sistema na bengabengatla tan itarok to so balon oksuy na kareenan tan inkatunong? Nayarin sika so sakey a tasi nen Jehova a malabay a makaamta ed ebat na satan a tepet. Diad sayan pamaakaran, naliknam so singa alikna na saramay alanaan a Kristiano a nirepresenta ed Apocalipsis a mangikekelyaw na: “Anggad kapigan, Soberanon Katawan a masanto tan matua, so pangipapaleen mo ed pangukom tan pangibales ed dala mi diad saraman so manaayam ed dalin?’’ (Apocalipsis 6:9, 10) On, diad piguratibo kaliktan ya amtaen na saraman so alanaan no kapigan so pangibales na Dios ed dala ra. Agpankelawan ya amin na saray Tasi nen Jehova natan so magunaet a manatalaran “ed bakal na baleg ya agew na Dios a Makapanyarin-amin’’ ed Har-Magedon!—Apocalipsis 16:14-16.
6, 7. (a) Nipaakar ed panaon, anto so imbaga nen Pablo ed 1 Corinto 7:29? (b) Anton balikas nen Pedro so mangidadanet ed katuaan a sayan sistema so walaan na makadesyang ya anggaan?
6 Saraman ya alanaan a tastasin naibung so dala ra lapud katooran da’d si Jehova so nidasig ed sakey a tumang, ta ibabaga na awaran na Biblia: “Sakey ya amputin kawes so niiter ed balang sakey ed sikara; tan nibaga a sikara so manpainawan magano, ya anggad say bilang da so nasampotan met ed saray kapara ran ariripen tan agagi ra a napapatey a singa met sikara.’’ (Apocalipsis 6:11) Makapanseguro itayo a say Dios so onkiwas ed tinuro ton panaon. Diad tua, saray salita nen apostol Pablo ed 1 Corinto 7:29 so matukoy a tuloy. Malinlinew ya imbaga to’d saray kapananisiaan to: “Say panaon a natitilak so apatikeyan.’’
7 Saray salita nen Pablo so aglabat angiter na panamaseseg ed saray modernon-agew ya ariripen nen Jehova noagta mangipanengneng met a say bilay na Kristiano so nepeg a nisentro ed maganat a kimey ya impabtang na Dios ed sikara. Diad miulibay a pamaakaran, insulat nen apostol Pedro: “Say anggaan na amin a bengatla so inmasingger la.’’ (1 Pedro 4:7) Kabat nen Pedro a sayan sistema so nigana ed makadesyang ya anggaan. Ditan so aarapen to!
8. Say katuaan a say anggaan na sayan sistema so asingger la so nepeg a walaan na anton epekto ed saray totoo nen Jehova?
8 Namparan si Pablo tan Pedro so angidanet ed katuaan a sayan sistema na bengabengatla so nigana ed kadederal. Saya so bengatlan agbalot lilingwanan na saray tuan Kristiano. Say anggaan so onsabi ed agew tayo, tan amin ya ebidensya so mangipanengneng a satan so peteg ya asingsingger la. Sirin, say inagew-agew a padron na bilay tayo so nepeg a mangisindag ed ontan a kumbiksion. Nagkalalo ni, say katuaan a sikatayoy inmabante lan tuloy ed kaunoran iran agew na sayan sistema so nepeg a mamano ed sikatayo na determinasyon a manggawa ed anggaan na nayarian tayo diad maabig tan sankamaganatan a kimey na panangiyabawag ed maong a balita bilang malinis tan maseseg a tastasi nen Jehova.—Tito 2:13, 14.
Manampusampot so “Panaon na Anggaan’’
9. Diad anto so okupadon gagawaen natan na saray totoo ed inkalapagan, tan kasin saya so agawa la nensaman?
9 Impasakbay nen Jesu-Kristo a kaleganan na agnanengneng a kiwawala to a saray totoo so okupadon tuloy ed kurakurang na bilay. Sikara so agmangim-imano, a singa saray totoo ed agew nen Noe tan ed si Lot. “Ontan met ed satan ya agew sano say Anak na too so nipatnag,’’ kuan nen Jesus, a tutukoyen to so panaon na agnanengneng a kiwawala to, sano nidapo so kadederal ed sayan marelmeng a sistema.—Lucas 17:26-30.
10, 11. Anton ebidensya so nipresenta dia a mangipanengneg a say anggaan na sayan sistema so asingger la?
10 Imanoen met iray propesiyan nikurit ed Mateo 24, Marcos 13 tan Lucas 21. Impasakbay nen Jesus iray bengatlan sigpot ya agnakontrol na too—a singa saray bengatlan singa salot tan angkakabaleg a yegyeg. Nagkalalo ni, wala so “indaak na kaugsan’’ nanlapulad 1914. Natan saray balita, lautla’d saray angkabaleg a syudad, so mabetbet ya apusek na saray balita ed krimen tan kaugsan. Wala so mas ed saya nen say itutulasok na krimen, ta say espiritu na agpanangimano ed legal a panameget so matalona natan, tan say aro na babaleg a bilang so pihon ombebetel.—Mateo 24:12.
11 Nagkalalo ni, say “irap na nasyones’’ so mapatnag natan lapud agkabat na totoo so dalan a pawayan da ed saray asaganet a problema. (Lucas 21:25, 16) Insan, met, wala so idaraiset ed bilang na saraman so “ed sayan kapolian’’ na 1914, ya agnapaso sakbay na kasumpalan na amin ya impasakbay nen Jesus ed panaon tayo. (Mateo 24:34) Saya so sananey a malinew a pamatnagan a say anggaan na sayan sistema so asingger la.
12. Anto so andi-duaruwan sankabalgan a prueban sikatayo la so wala ed panampusampot na “panaon na anggaan’’?
12 Dakel nin kaaruman ya ebidensya so nayarin nipresentan mamaneknek a sikatayo la so manampusampot ed “panaon na anggaan.’’ (Daniel 12:4) Balet andi-duaruwan say sankabalgan a prueban manasingger itayo la ed anggaan na sayan sistema et say sankamundoan a panangipulong ed Panarian a kimey a gagawaen na saray Tasi nen Jehova. Agnin balot agawa nensaman so ontan a bengatla. Peteg, diad 203 ed sankagloboan masulok a 2,800,000 tastasi nen Jehova so maseseg a manggagawa ed sayan maabig a kimey na panangikayat ed makapaligsay-puson mensahe a si Kristo so manuuley la ed pakayari na Panarian nanlapulad 1914. Tan inyabawag nen Jesus a sano sayan maong a balita na Panarian so nipulong ed amin a panaayaman a dalin, insan “say anggaan so onsabi.’’—Mateo 24:14.
Manbilay a Tukoy ed Konseho na Biblia
13. Panon so nepeg a panmoria tayo ed balikas nen Pablo a ‘saraman so walaan na kaasawan so nepeg a singano saraman so andian’?
13 Lapud say nakekeraan a panaon so malinlinew ya apatikeyan tan say anggaan so asingger la, saray totoo nen Jehova so nakaukolan a manbilay a tukoy ed konseho na Biblia, a singa saray salita nen apostol Pablo ed 1 Corinto 7:29-31. Tampol kayari impangibaga ton “say panaon a natitilak so apatikeyan,’’ insulat to: “Sirin komon ta saraman so walaan na kaasawan so ompatnag a singano andian.’’ Aglabay na apostol dian ibaga a say sakey a Kristianon asawan laki et paulianan to so asawa to. Andi, noagta legan a say sakey a laki et matoor ya aasikasoen to so responsabilidad to ed panamaley, nepeg a walad puso to tan kanonotan ton ununa so relasyon to ed Dios, ya imanoen ton say panamaley to so ontulong ed saya.
14. Unong ed 1 Corinto 7:30, panon so nepeg a mangipasen na saray manangiyabawag na Panarian ed saray personal a problema tan arum nira?
14 Diad bersikulo 30, intuloy nen Pablo ya imbaga: “Ontan met [komon] saraman so mannangis so magmaliw a singa saraman so agmannangis, tan saraman so manliket so magmaliw a singa saraman so agmanliket, tan saraman so mansaliw so magmaliw a singa saraman so andian.’’ Anto so labay ya ibaga na satan? Sarayan apuyanan a salita so mangidanet ed katuaan a saray personal a pamaakaran, balanglan lalanoren da so kaykayarian, kaermenan odino gayaga, so aliwan baleg iran bengatla a para ed saray ministro na Panarian. Say “panaon tan ag-inilaloan a nagawa’’ so nagawa ed sikatayon amin tan nayarian umanen iray sirkumstansya tayo a bigla. (Eclesiastes 9:11; Santiago 4:14) Kanian kakulangkulangan so pagmaliw ya okupadon tuloy ed saray kaermenan, kairapan tan nanduruma ran personal a probleman misasalet ed ministeryo tayo, ed apribilehyoan a kimey tayo ed panangipulong na maong a balita na Panarian.
15. Akin a kakulangkulangan a tuloy ed sakey a Kristiano so pagmaliw ya okupado ed personal iran pamaakaran a lalanoren to so materyal iran kayarian, tan arum ni?
15 Diad 1 Corinto 7:31, inkuan nen apostol Pablo: “[Komon] saraman so mangusar ed mundo [so] magmaliw a singa saraman so agmangusar ed satan diad inkagnap.’’ Lapud saray totoo na mundo so kulang na niletneg ed Biblian ilalo, sikara so abalkot diad panag-isip nipaakar ed inagew-agew a kakaukolan tan ambisyon. Mabetbet a labay dan sagyaten so arum diad panamegley na materyal iran kayarian. Balet, a singa impalinew nen apostol Juan, “say kapangtaan ed panagbilay na sakey’’ so sakey a pamatnagan na “amin a bengatla ed mundo’’ ya “agnanlapu ed Ama, noagta nanlapud mundo.’’ Tan ipapaseguro nen Juan ed sikatayo a “say mundo so napaso tan ontan met ed saray pilalek to, balet say manggawa ed linawa na Dios so mansiansia lawas.’’ (1 Juan 2:16, 17) Sirin, kakulangkulangan a tuloy ed anggan siopan Kristiano, a walaan na ilalo ed andi-anggaan ya arapen, so pagmaliw a nabalkot ed saray personal a pamaakaran ya andian la na panaon ed saray interes na Panarian. (Mateo 6:25-32; ipareng so Filipos 2:19-22; 2 Timoteo 4:10.) Anggaman aliwan agmanepeg so panggayaga ed makagungguna ran materyal a kayarian tan anggan arum iran mabunigas a panliliket, agtayon balot nepeg ya abuloyan irayan bengatla a sikaray magmaliw a manunan sentro na bilay tayo.—Lucas 12:15.
16. Anton awawey tan kalakalat so mabetbet a wala ed saray minumundon totoo, balet anto so nepeg a sankaimportantian ed saray ariripen nen Jehova?
16 Maslak ed saray minumundon totoo, odino saraman so andian na tuan espiritualidad, so panreklamo ed kipapasen da ed bilay. (Ipareng so Judas 16.) No sikara so mainagem, nayarin sikara so naynay a manreklamo ed agda iyabig. Mipadpara, say pobre so nayarin manreklamo lapud sikara so aliwan mayaman. Akin, say ontan iran bengatla a singa maong a bunigas na laman tan baleg a kayamanan so nayarin magmaliw a manangupot iran kalat ed bilay da! Pipuligesgesan da so pakagamor ed saratan, tan say isaew so nayarin mangipalereg ed sikara ed aralem a kagonigonan. Ingen diad saray dedikadon totoo nen Jehova say “sagradon serbisyo’’ so sankaimportantian. (Roma 12:1, 2) Tua, anggaman sikatayo so ariripen nen Jehova, walaray probleman arapen tayo. Ingen saraya so agmanagdag ed sikatayon pagmaliwen a managnguronguro, managreklamo nipaakar ed kipapasen na bilay tayo. Walaan itayo na kimey a gawaen ya inter na Dios, tan diad sayan apapalar a kimey so pangiiteran tayo na manunan imano. Peteg, maliket itayo lapud iyuuna tayo ed bilay iray intereses na Panarian.—Mateo 6:33.
17. No nipaakar ed nayarin pakabalangan na imano, anto so nepeg ya ag-abuloyan na saray totoo nen Jehova?
17 Anto, sirin, so makabat a kurang para ed saray ariripen nen Jehova? Bueno, nayarian tayon usaren so arum a bengatla tan serbisyo ya iter na mundo, balet agtayon balot abuloyan iratan a mangiyarawi ed sikatayo a manlapud panaglingkor ed Dios. (Lucas 21:34-36) Nonoten ya anggapo ed peles a sistema so permanente. Say mismon panguuman-uman to so nayarin sengegan na isuawi. On, a singa inkuan nen Pablo, “Say nagagawa ed sayan mundo so manguuman.’’ (1 Corinto 7:31) Balet saya so agtayo nepeg ya abuloyan a mangiyarawi ed sikatayo diad panaglingkor ed si Jehova.
Gawaen a Magunaet so Kimey na Katawan
18. (a) Unong ta sikatayo la so walad “panaon na anggaan’’ nanlapulad 1914, diad anton kimey so nepeg a pagmaliwan tayon okupado? (b) No mansiansia itayon okupado ed kimey na Katawan, anto so nayarin nagawa ed saray problema ed bilay?
18 Diad kiwawala na espiritual a pakatebek, bidbiren tayo so baleg ya ebidensya a sikatayo la so wala ed “panaon na anggaan’’ nanlapulad 1914. Peteg, sirin, agtayo labay ya usaren so mundo a nagnap a singano nasasaew tayo so bengatla no agtayo gawaen so ontan. Imbes, panoen tayoray bilay tayo ed “kimey na Katawan.’’ Nepeg a ‘nawalaan itayo na daakan a gawaen ed kimey na Katawan, a kabat tayon saray sagpot tayo so aliwan andi-kakanaan ed Katawan.’ (1 Corinto 15:58) Kanian sikatayo komon so okupado ed panagpulong tan panagbangat ed katuaan na Panarian. Insan anto so nayarin nagawa ed saray problema ed bilay? Akin, sikara so ontayer ed benegan tan magmaliw iran aliwan tanton importante, aliwan tanton makapagonigon!
19. Anto so kabaliksan na ‘pansungdo ya anggad kasampotan’?
19 Sanen iiter to so baleg a propesiya to nipaakar ed kaunoran iran agew na sayan sistema, inkuan nen Jesus a saray patumbok to so magmaliw a “puntirya na panggula na amin a totoo’’ nisesengeg ed ngaran to. “Balet,’’ inyarum to, “saman so nansungdo ya anggad kasampotan et sikato so nilaban.’’ (Marcos 13:10-13) Para ed sikatayo bilang sinansakey a dedikado ed si Jehova, “say anggaan’’ so nayarin balanglan “say konklusyon na sistema na bengabengatla’’ odino say mismon ipatey tayo, nayarin diad kayari panamairap na saray managpasegsegang. (Mateo 24:3) Diad balanglan kipapasen, walaan itayo na limitadon panaon a manggawa ed kimey na Katawan. Agta sikatayo, sirin, so magmaliw a maseseg tan magunaet ed panangiyabawag ed mensahe na Panarian? Agnasuppiat, nepeg tayo so ontan!
Panaon lan Tuloy na Ikiwas
20. Panon a saray Israelitas a nibulos a manlapud inkadakep ed Babilonia so akayarin mangipanengneng na kapagaan da diad panagdayew ed si Jehova?
20 Sanen saray Judion destiero so nibulos a nanlapud inkadakep ed Babilonia nen komanem a siglo K.K.P., nakaukolan da so mandesisyon. Kasin sikara so ompawil ed dilin dalin da tan ipawil diman so panagdayew ed si Jehova, odino sikara la so mansiansia ed Babilonia? Saray Israelitas a nansiansia ed saman a syudad so agnibagan sikara so marelmeng, ta si masiken lan Daniel so sakey ed sikara. Nayarian ton ikdan iray ompawil a nakdaan na materyal tan moral a suporta tan makapangipawit met na “boluntaryon iyaapay’’ a para ed abung nen Jehova ed Jerusalem. (Esdras 1:2-4) Sirin makatulong iran mangiyabante ed tuan panagdayew. Agaylan maliket so amin a managdayew ed si Jehova legan a say nakdaan so ombuat a mamaarap ed dilin dalin da, a sankaawit daray sagradon kagawaan ya usaren diad templo nen Jehova! Tan saray manag-awit na kagawaan ed santuaryo so maneguro a sikara so malinis ed amin a nayarin karutakan a relihyoso tan moral a karumsisan na Babilonia.—Isaias 52:11.
21. (a) Antoran tepet so nipresenta ya imanoen yo? (b) Lapud “say panaon a natitilak so apatikeyan,’’ anto so tua ed saray pankanawnawan pangikayat ed maong a balita?
21 Kasin sikayo so mapaga ed tuan panagdayew a singa saraman so nibulos ya Israelitas ed apalabas lan 25 siglo? Kasin ipapasen yon sakey a magayagan pribilehyo so pangisaklang na sagradon serbisyo ed si Jehova bilang kabiangan na malinis tan maseseg ya organisasyon a mangidadayew ed masanton ngaran to? Kasin natebek yo so dakel iran ebidensya a sikatayo la so manbibilay ed panampusampot “na panaon na anggaan’’? No onebat kayo na on ed sarayan tepet, sirin seguroen a gagawaen yo so positibon kiwas natan la. Iyapasakey so pantultuloy a pangiyuna ed saray intereses na Panarian ed bilay yo. Lapud “say panaon a natitilak so apatikeyan,’’ say kaplesan iran pankanawnawa tayo a mangilaknab na maong a balita so lalon-lalo ya importante. Mapalar ya amin iraman so mangisentro na bilay da ed Panarian bilang matoor a tastasi nen Jehova a walaan na daakan a gawaen diad panangipulong ed maong a balita legan a wala so panaon!
Anto So Ebat Yo?
◻ Akin a say panaon so nanaupot la a para ed sayan sistema na bengabengatla?
◻ Panoy pikabat tayo a sikatayo la so walad panampusampot “na panaon na anggaan’’?
◻ No sikatayo so okupado ed kimey na Katawan, anto so nayarin nagawa ed saray problema tayo?
◻ Lapud say anggaan so asingger la, diad anto so pangisentroan tayo na bilay tayo?
[Litrato ed pahina 19]
Komon ta saray problema ed bilay so agmangiyarawi’d sikatayo a manlapud kimey na panangipulong ed Panarian