Antoy Ibabaga na Biblia Nipaakar ed Guerran Nuklear?

Napepeligro so mundo tayo natan. Posiblin walay nagawan guerran nuklear ta tuloytuloy nin paparakelen na saray makapanyarin bansa iray nuklear ya armas da. Natural met labat ya naaburido iray totoo, ta no mas ondarakel iray nuklear ya armas mas baleg so posibilidad ya walay nagawan guerra ya usaren da iratan ya armas. Natatakot ni ingen iray totoo ya no mangusar na anggan melag labat ya bomban nuklear so sakey ya bansa, posiblin ditan la onggapo so guerran nuklear ya maneral ed interon mundo. Ibabaga na Bulletin of the Atomic Scientists ya “anggan anton oras et posiblin walay nagawan guerran nuklear.”

Talaga kasin posible ya walay nagawan guerran nuklear? No on, naderal kasi so planeta tayo? Antoy sarag tayon gawaen pian agtayo masyadon naaburido ya ompan walay nagawan guerran nuklear? Antoy Ibabaga na Biblia?

Diad sayan artikulo

Impasakbay kasi na Biblia ya walay nagawan guerran nuklear?

Ag-espisipikon binitla na Biblia so guerran nuklear. Pero posiblin walay nagawan guerran nuklear lapud saray ugali na totoo tan saray nagawa ed mundo ya impasakbay na Biblia.

Ikompara tayo iray bersikulo na Biblia ed saray nagagawa ed mundo natan:

Bersikulo na Biblia: Oniay intepet na saray disipulo nen Jesus: “Antoy tanda na kiwawalam tan say kaunoran a parte na sistema na mundo?” Inmebat si Jesus: “Manlalaban iray bansa ontan met ed saray panarian.”—Mateo 24:3, 7.

Saray nagagawa ed mundo natan: Ondarakel so bansa ya labalabay day miguerra, kaiba la ray bansan walaan na nuklear iran armas.

“Diad agano ni ran taon, mas nagmaliw ya maruksa so mundo, dinmakel iray bansa ya manlalaban.”—The Armed Conflict Location & Event Data Project.

Bersikulo na Biblia: “Diad panaon na anggaan et mantulakan ira, [say ari na amianen] tan say ari na abalaten.”—Daniel 11:40.

Saray nagagawa ed mundo natan: Singa impasakbay na Biblia, mantutulakan odino mankokompetensiaan iray mankalaban ya bansa tan saray kaalyado da pian naamtaan no siopay mas makapanyari. Natan et agmet direktan manlalaban iray bansan walaan na angkakabaleg ya nuklear ya armas, pero tuloytuloy da nin paparakelen tan papabiskegen iray nuklear ya armas da.

“Diad apalabas ya samploran taon, mas dinmakel ya maong iray bansan manlalaban, kaiba lad satan iray bansa ya susuportaan na saray mayayaman tan mabibiskeg ya bansa.”—The Uppsala Conflict Data Program.

Bersikulo na Biblia: “Diad kaunoran iran agew et onsabi iray mapeligro tan mair-irap a panaon. Ta saray totoo et . . . agda labay so mipaknaan, managpauges ira, anggapoy kontrol da ed sarili ra, masesebeg ira.”—2 Timoteo 3:1-3.

Saray nagagawa ed mundo natan: Singa saray dakel ya totoo natan, anggapo met so pankakasakey na saray manuuley, ta imbes ya ayosen da ray problema diad mareen ya paraan, mas labay dan taktakoten so sakey tan sakey tan manlalaban ira. Lapud satan, mas baleg so posibilidad ya walay nagawan guerran nuklear.

“No ag-ira mantutulongan, walan walay nagawan agpantatalosan.”—S. Saran tan J. Harman, World Economic Forum.

Kasin abuloyan na Dios ya walay nagawan guerran nuklear?

Anggapoy ibabaga na Biblia. Pero nabasa tayo ditan ya wala ray “makapataktakot a nanengneng,” odino nagawa diad panaon tayo. (Lucas 21:11) Say sakey ya alimbawa et amay impangusar na saray atomic bomb nen World War II. Ibabaga na Biblia no akin ya aabuloyan na Dios iray guerra. Pian naaruman ni antam nipaakar ed sayan topic, bantayan so video ya Akin et Aabuloyan na Dios so Paniirap?

Naderal kasi so planetan Dalin?

Andi. Anggano mangusar ni ray totoo na nuklear iran armas, ag-abuloyan na Dios ya onsabid punton naderal so interon dalin. Ibabaga na Biblia ya mansiansia so planeta tayo tan panayaman itan na totoo ya anggad angga.

“Say dalin et mansiansia ya anggad angga.”—Eclesiastes 1:4.

‘Say tuan Dios, say amorma tan amalsa ed dalin et agto itan pinalsa ya andiay gagala, noagta ginawa to itan ya panayaman.’—Isaias 45:18.

Iisipen na arum ya totoo ya diad arapen, say mundo kuno et naderal lapud guerran nuklear tan saramay totoon makaliktar et nairapan lanlamang ya manbilay ta nasamalan lay dalin. Pero ibabaga na Biblia ya amin ya aderal lapud guerra et naapiger diad arapen.

“Manliket so kalawakan tan say amagaan a dalin, tan manggayaga so patar a desierto tan manrosas a singa safron.”—Isaias 35:1.

Saniiban mankikimey tan mani-enjoy iray totoo diad paraison dalin. — Labay na Dios ya manbilay tayon maliket ed marakdakep ya dalin

Makapadinayew so impamalsa na Dios ed dalin ta anggano naderal itan lapud antokaman ya rason, sarag to nin ompawil ed datin itsura tan kipapasen to. Pero onsabi panaon ya usaren na Dios so pakayari to pian naapiger so dalin tan panayaman itan na saray totoo diad andi-anggaan.—Salmo 37:11, 29; Apocalipsis 21:5.

Antoy sarag tayon gawaen pian agtayo masyadon naaburido ya ompan walay nagawan guerran nuklear?

Wala ray naaaburidon maong ta ompan walay nagawan guerran nuklear. Masyado iran natatakot ed magmaliw ya epekto na satan. Pero makatulong iray sipan tan bilin na Biblia pian nasarag tan nabawasan so takot da. Panon?

Ibabaga na Biblia ya diad arapen et walay balibalin nagawa ed dalin tan ed saramay manaayam ditan. No amta tayo itan ya ilalo, magmaliw itan ya “angkla na bilay tayo,” kanian agtayo la masyadon aburido. (Hebreo 6:19, paimanod leksab) Nabawasan met so panaburido tayo no agtayo masyadon mapagpaga ed saray bengatlan agmet ni agawa. Singa imbaga nen Jesus, “magenap la ray problema ed kada agew.”—Mateo 6:34.

Diad tua, amin tayo et kaukolan tayon asikasoen so sarili tayo pian mareen so isip tayo tan mansiansia tayon kalmado. Nagawaan tayo itan no paliisan tayoy manbasa, manbantay, odino ondengel ed saray impormasyon ya mikonektaan ed nuklear. Pero agto labay ya ibaga ya ibabaliwala tayo la iray nagagawa. Imbes, manggawa tayo labat na paraan pian agtayo lanang ya manaburido ed saray bengatlan anggapoy kontrol tayo odino agmet lanlamang nagawa.

“Say kapagaan ed puso na too so mamapabelat ed satan, balet say maabig a salita so mamaliket ed satan.”—Proverbio 12:25.

Agmo ni iisipen iray aliwliwan balita, imbes isip mo ray balibalin nagagawa ed bilay mo.

“Say Dios a mangiiter na ilalo et panoen to kayo komon na liket tan deen lapud panmamatalek yod sikato.”—Roma 15:13.

Saray Litrato: Lakin matalek ya wala ray balibalin nagawa ed arapen. 1. Diad benegan to et walay guerra. Sankanengneng so eroplano na militar, saray nuklear ya bomba, tan makapal ya asewek lapud impanbomba. 2. Diad arapan to et walay malinis tan mareen ya dalin. Sankanengneng iray palandey, saray birdin lawak, ilog, tan saray siwit. — Mangiiter so Biblia na seguradon ilalo ya walay balibalin nagawa ed arapen

No aralen mon maong iray imbaga na Dios ya nagawa ed arapen, nawalaan kay ilalo, onliket ka, tan ondeen so liknaan mo.

Impropesiya kasi na Biblia ya say Armagedon et sakey ya guerran nuklear?

Iisipen na arum ya say Armagedon et sakey ya guerran nuklear ya apektoen toy interon mundo. Seguro naiimadyin da ya naderal ya maong so dalin no nagawa itan.

Balet diad Biblia, say salitan “Armagedon” et ontutukoy ed samay guerra diad baetan na Dios tan “saray arari na interon dalin,” odino saray gobierno na totoo.a (Apocalipsis 16:14, 16) No Armagedon, aliwa itan ya singa saray guerran nuklear ya palaran labat ya naderal so dalin tan anggan siopan too. Imbes, no Armagedon saray mauges labat so deralen na Dios. Kanian niwalay tuan kareenan tan kaligenan.—Salmo 37:9, 10; Isaias 32:17, 18; Mateo 6:10.

Antoy ibabaga na Biblia ya solusyon ed saray guerra?

“Papatundaen to ray guerra diad interon dalin. Puputeren to ray pana tan dederalen to ray gayang; popoolan to ray kariton a parad guerra.”—Salmo 46:9.

Ipanengneng nen Jehovab a Dios so pakayari to ed saray bansa. Diad panamegley na Panarian to et patundaen toy panlalaban da tan deralen to ray armas ya uusaren da ed guerra. Sayan Panarian et sakey ya gobierno ed tawen ya onsalat ed panuuley na totoo ed interon mundo.—Daniel 2:44.

Ibangat na Panarian na Dios iray totoo no panon iran manbilay ya mareen tan nankakasakey. Saksakey labat ya gobierno so manuley ed interon dalin kanian naandi la ray panlalaban na saray bansa tan agmet la aralen na saray totoo so miguerra! (Miqueas 4:1-3) Antoy resulta? “Say balang sakey ya too et manayam ed kareenan diad kawalaan da ray kaubasan tan saray kakiewan ton igos, et anggapo lay manaktakot ed sikato.”—Mikias 4:4, Maung a Balita.

a Nengnengen so artikulon “Anto so Guerra ya Armagedon?”

b Jehova so ngaran na Dios. (Salmo 83:18) Nengnengen so artikulon “Siopa si Jehova?”

Kasin guerran nuklear so tutukoyen na saray abitla ed libro na Biblia ya Apocalipsis?

Iisipen na arum ya say tutukoyen na libron Apocalipsis et say pakaderal na dalin lapud guerran nuklear. (Apocalipsis 6:14; 8:7-12; 16:1-21) Singa bilang, abitla ditan ya ‘ompelag ed dalin so apoy manlapud tawen.’ (Apocalipsis 13:11-13) Pero say pakatalos na saray Tasi nen Jehova ed satan et ontutukoy itan ed say impangusar na saray atomic bomb nen World War II, aliwan ed sakey ya guerran nuklear ya apektoen toy interon dalin.

Tua ya tinukoy na libron Apocalipsis so impangusar ed saratan ya nuklear ya armas, pero agto idedeskribe iray makapataktakot ya agawa lapud satan. Kanian no babasaen tayoy libro na Apocalipsis, tandaan ya:

Dakdakel ya tanda odino simbolo so inusar na sayan libro tan aliwan literal so kabaliksan na saratan.—Apocalipsis 1:1.
Sayan libro et ag-insulat pian taktakoten iray manbasa. Imbes, magmaliw ya maliket iray makatalos tan mangiyaplika ed mensahe na satan.—Apocalipsis 1:3.

Parad kaaruman ya impormasyon, nengnengen so artikulon “Say Libro na Apocalipsis—Antoy Labay ya Ibaga na Satan?”