Say Magayagan Nasyon

SAY magayagan nasyon! Kasin ontukoy iyan paneskribe ed anggan dinan a nasyon na too natan? Kasin wala so anggan dinan a nasyon a magayagan makapangibaga a nakal to la so karawalan, krimen, inkaduka, polusyon, makapaletey a saki-sakit, politikal a kabulokan, relihyoson panbubusolan? Kasin wala so anggan dinan a nasyon a makapapangiter na peteg ya ilalo ed pakasumpal na ontan iran kalat? Arawin ontan!

Anto so nipaakar ed sankagloboan a retrato? Si Mikhail Gorbachev, presidenti na U.S.S.R., inkuanto nen imbeneg a Hulyo 16: “Sikatayo so onpipikal ed sakey a panaon ed pang-internasyonal iran relasyon, tan onloloob ed sananey, a peryodo, ya iilaloan ko, so mabiskeg, aparukey a kareenan.” Anggaman ontan, inreport na Time magasin ed satan lanlamang a petsa a say Estados Unidos so siansian mamupuntirya ed Moscow dingan na 120 nuklear warheads, ya anggan sakey ed satan et sigpot a makaderal ed satan a syudad. Tan maseguron saray Sobyet so akaparaan ya onbales ed parehon klase. Tekep na dakel a membro natan ed Nasyones Unidos a walaan na eksperto ed pamawala na nuklear ya armas, ya anggapoy liket ed panisip no siopa so ununan magmaliw a manpaputok a basta-basta.

Sakey a Tuan Magayagan Nasyon

Aminsan ed awaran​—3,500 a taon ed apalabas–​peteg a wala so magayagan nasyon. Satan so kadaanan ya Israel. Sanen inliktar na Dios itan a totoo a manlapud panamairap ed Ehipto, akikasakey ira ed si Moises ed mangidayew a kanta na pananalo, tan nantultuloy iran maliket kaleganan a mangunor ed Dios tan Manangiliktar da.​—Exodo 15:1-21; Deuteronomio 28:1, 2, 15, 47.

Diad silong na uley nen Solomon “say Juda tan Israel so dakel, a singa buer ed gilig na dayat parad karaklan, a mangakan tan maniinum tan manliliket.” Satan so panaon na baleg a panliliket, a pinantokan ed inpamaalagey na nayarin sankamaglorian paalagey ed amin ya awaran, say templo na panagdayewan ed si Jehova diad Jerusalem.​—1 Arari 4:20; 6:11-14.

Say Modernon-Agew a Magayagan Nasyon!

Angiyanino so kadaanan ya Israel na sakey a modernon nasyon. Dinan itan? Say politikon Israel na Pegley Bukig? Ipanengneng na saray balitan report a saman a mipupuligesgesan a nasyon et magayaga. Kasin angitarok na peteg a gayaga so tatawagen a Nasyones Unidos ed membro iran estado to? Andi, agnaromog so tuan gayaga ed limog na manpopolitikan nasyones. Dinmaak so agum, kabulokan, tan ag-inkamatua, tan diad dakel a dalin saray karaklan a totoo so agmaliket a mipupuligesges pian manbilay lambengat.​—Uliran 28:15; 29:2.

Anggaman ontan, wala natan so sakey a matalunggaring a nasyon a supremon magayaga. Aliwan mapolitikal, ta say Ulo to, si Kristo Jesus, so angikuan ed totoo to: “Sikayo so agkabiangan na mundo.” (Juan 15:19) Bangta say Nasyones Unidos so nankakasakey ed ngaran to lambengat, tugyopen na magayagan nasyon iray maarod-kareenan a patumbok to a “manlapud amin a nasyones tan tribo tan totoo tan pansasalita.” (Apocalipsis 7:4, 9) Natan manbilang na masulok nen apatiran milyon, kanian say populasyon to so dadakel nen 60 ed say 159 membron nasyones na NU. Say lokal a lenguahe na sarayan apatiran milyon a totoo so ngalngali 200; ingen amin da so nankakasakey ed pansasalita na sakey a “puron lenguahe.”​—Sofonias 3:9.

Agta makapakelaw ya ontanlan nanduruman kultura so mansalita na sakey a karaklan a lenguahe? Peteg ya andi, lapud sayan sakey a manamasakey a lenguahe so mangilaktip ed mensahe na onsasabin Panarian na inkatunong na Dios. Sayan magayagan nasyon so nanlapud “sankaarawian a pasen na dalin” tan kabkabat ed sankamundoan bilang ‘Tastasi nen Jehova.’ (Isaias 43:5-7, 10; Zacarias 8:23) Ngalngali inerman a panbaroyan yo ed tapew na sayan globo, naromog yora.

Diad Isaias 2:2-4, say propeta na Dios so aneskrebi na ulop ya onaagos nanlapud amin a nasyones, a mangikuan: “Galidia, sikayon totoo, tan ontatdang tayo ed palandey nen Jehova, diad abung na Dios nen Jacob; tan sikatoy manbangat ed sikatayo ed saray dalan to, tan manakar tayo ed saray basbas to.” Maseseg, a mangimbita iraya ed arum a mangawat na bilin a manlapud si Jehova diad panamegley na Salita to, say Biblia, pian naaralan dan gawaen so linawa to. Sayan sakey a nasyon so manutombok ed basbas na tuan kareenan, a walan pinitpit na totoo ‘iray kampilan a ginawan lokoy tan saray gayang a ginawan komkompay, ya aglara manaral na bakal a balot.’ Peteg a magayagan nasyon!

Minabang kayo met ed sayan gayaga. Naaralan yo so maples-onsasabin agew sano say Ari, si Kristo Jesus et mamagit ed managderal a totoo tan gobgobierno tan mangipawil na Paraiso diad dalin. (Daniel 2:44; Mateo 6:9, 10) Anggan natan, bilang sakey a tuan nankakasakey a nasyon, akaromog iray Tasi nen Jehova na baleg a gayaga ed kimey da ed pananangitarya ed satan a maglorian panaon na tuan kareenan, unong ya ipanengneng na ontumbok iran pahina.