Say Kristianon Pamilya so Maniiban Mankikimey
“Pikasik sirin ed sikayo, agagi, . . . no ag ingen ayadyari a pannononong yo ed saksakey a nonot tan saksakey ya isip.”—1 CORINTO 1:10.
1. Anto so situasyon nipaakar ed pankakasakey ed dakel a pamilya?
KASIN walaan ka na nankakasakey a pamilya? Odino kasin gagawaen na balang sakey so labay to? Kasin sikayoy maniiban mankikimey? Odino kasin amin yo so mataltalag a niwalad sakey a lugar ed parehon panaon? Say mismon salitan “pamilya” so mangipapatnag na nankakasakey a sankaabungan.a Ingen, aliwan amin a pamilya so nankakasakey. Sakey a managbangat a Britanyo so angikuan ni ingen: “Imbes a magmaliw a letnegan na maong a sosyedad, say pamilya . . . so panlalapuan na amin ya ag-inkakontento tayo.” Kasin tua itan ed pamilyam? No ontan, kasin kaukolan ya ontan?
2. Siopa iran persona ed Biblia so mamaneknek a nanlapura’d maong pamilya?
2 Say pankasakey odino agpankasakey na say pamilya so gendagendat a dependi’d panangidaulo ed satan, balanglan diad duaran atateng odino sulon ateng. Diad saray panaon na Biblia, saray nankakasakey a pamilyan nandayew so nangayaga ed panamendisyon nen Jehova. Saya so tua diad kadaanan ya Israel, a ditan say marikit nen Jepte, si Samson, tan si Samuel, balang sakey ed nanduruman paraan, so amaneknek a sikaray nanlapud sakey a maridios a pamilya. (Uko-ukom 11:30-40; 13:2-25; 1 Samuel 1:21-23; 2:18-21) Nen inmunan Kristianon panaon, si Timoteo, say matoor a kaulop nen Pablo ed pigaran misioneron impanbaroy, so pinabaleg nen bai ton Lois tan ina ton Eunice a walaay pikakabat ed Hebreon Kasulatan. Agaylan sikatoy nagmaliw a matalonggaring a babangatan tan misionero!—Gawa 16:1, 2; 2 Timoteo 1:5; 3:14, 15; nengnengen met so Gawa 21:8, 9.
Akin a Maniiban Mankimey?
3, 4. (a) Antoran kalidad so nepeg a nipatnag ed nankakasakey a pamilya? (b) Panon a say sakey ya ayaman so magmaliw a nagkalalo nen say sakey ya abung lambengat?
3 Akin a makagungguna para’d saray pamilya a maniiban mankimey? Lapud pabiskegen to so pantatalosan tan panagrespeto ed balang sinansakey. Imbes ya arawian tayo so balang sinansakey, sikatayo so makapanaapitan tan mangiter na panamabiskeg. Sakey ya agano nin artikulo ed dyurnal a Family Relations so nankuan: “Sakey a malinew a retrato so linmesa a manideskribe ed espisipiko iran atributo na ‘mabiskeg iran pamilya.’ Itetekep na saratan a kalidad so panamidbir ed responsabilidad tan panamabli ed balang sakey, sakey a maliket a liknaan na inkamaapit, maong a pitatalosan, abilidad ed panresolbi na problema, tan sakey a mabiskeg ya espiritualidad.”
4 Sano sarayan kalidad so wala ed sakey a pamilya, say ayaman so aliwa lan singa sakey a gasolinaan, a tutundaan pian manpagasolina. Saya so nagkalalo nen say sakey ya abung lambengat. Saya so maabrasan pasen a mangingganyo para’d saray membro na pamilya. Satan so pasen na ligsa tan panangaro, panangabagey, tan pakatalos. (Uliran 4:3, 4) Saya so obong a pakaromogan na pankakasakey na pamilya, aliwan ayaman na alakdan a napno na gutgutan tan inkaapag-apag. Balet panon iyan nadampot?
Paniiba ed Panagaral na Pamilya
5. Anto so uusaren tayo ta pian naaralan so tuan panagdayew?
5 Say tuan panagdayew ed si Jehova so naaaralan diad panangusar na utek tayo, odino say “abilidad a manrason.” (Roma 12:1, NW) Say kondukta tayo so nepeg ya agbanlongan na say agmagnayon ya emosyon a singa samay liknaan a nipapatnag ed oratorikal iran sermon tan saray relihyoson organisasyon a mangipapalaknab ed saray sisisiaen da diad panamegley na telebisyon. Imbes, sikatayoy dadagdagen na say regular a panagaral tan panagdalepdep tayo ed Biblia tan saray literatura ed panagaral na Biblia ya itatarok na say “matoor tan makabat ya aripen.” (Mateo 24:45) Say kakikiwas tayo bilang Kristiano so resulta na panangalig ed kanonotan nen Kristo ed antokaman a situasyon odino tukson onlesa. Diad satan a pamaakaran, si Jehova so Baleg a Managbangat tayo.—Salmo 25:9; Isaias 54:13; 1 Corinto 2:16.
6. Walaan itayo na anton sankamundoan ya alimbawa na panagaral na pamilya?
6 Say panagaral na pamilya ed Biblia so walaan na makanan betang ed espiritualidad na kada Kristianon pamilya. Kapigan so panagaral na pamilya yo? No ag itan iplano odino gawaen ed biglaan, maseguron satan so mataltalag a nagawa. Say paniiba ed panagaral na pamilya so mankaukolan na sakey a regular, nigetar ya eskedyul. No ontan, amta na amin no dinan ya agew tan anton oras a sikaray nailaloan a wadman ta pian napangayagaan so espiritual a panlilimog na pamilya. Say masulok a 12,000 a membro na sankamundoan a pamilyan Bethel et kabat da a say panagaral na pamilya et diad Lunes na labi. Agaylan makapasagyat para’d sarayan boluntaryo ed Bethel a nonoten a sikaran amin so minanabang ed saksakey a panagaral legan a mansasampot so agew, diad saray isla na Pasipiko tan New Zealand, kayari to et mantutumbokan diad Australia, Hapon, Taiwan, Hong Kong, kayari to et diad Asya, Aprika, tan Europa, tan diad kaunoran et diad interon Amerika. Anggaman nanaarawian na nilibon milya tan dakel a lenguahe, sayan panagaral na pamilya so manasagyat ed saray membro na pamilyan Bethel a maniiba. Diad memelag a paraan, nabayuboan mo so mipadparan liknaan diad panagaral na pamilyam.—1 Pedro 2:17; 5:9.
7. Unong ed si Pedro, panon tayon moriaen so salita na katuaan?
7 Si apostol Pedro so manisimbawa ed sikatayo: “Panpilalekan yo komon, a singa saray kapangyanak ya ugugaw, so gatas a maespiritu ya andian na saol to a mamabaleg ed sikayo ed kilalaban. No asali yo la a say Katawan et mapalangkap.” (1 Pedro 2:2, 3) Agaylan marakep ya indengan so ipapanengneng nen Pedro diad saraman a salita! Inusar to so Griegon berbon e·pi·po·theʹsa·te, ya, unong ed Linguistic Key to the Greek New Testament, so manlalapud salitan mankabaliksan na “panpirawat, panpilalek, pankaliktan.” Ipapatnag to so panpilalek a maong. Kasin naimanom no panon a say kapangyanak ya ayep so sigugunaet a mananap na musing na ina to tan no panon a kontento so kapangyanak ya ugaw sano onsususo ed ina to? Ontan met so nepeg a pilalek tayo ed salita na katuaan. Inkuan na Griegon eskolar a si William Barclay: “Para’d masimoon a Kristianos, say panaral na salita na Dios so aliwan sakey a kimey noag ingen sakey a panliketan, lapud ditan naromog na puso to so taganon panpirpirawatan na satan.”
8. Anton angat so kidudungetan na ulo na pamilya diad panangikondukta na panagaral na pamilya?
8 Mangipapasen na baleg a responsabilidad ed ulo na pamilya so panagaral na pamilya. Kaukolan ton seguroen a say panagaral so makapainteres ed amin tan amin so makapibiang. Nepeg ya agnonoten na saray anak a say panagaral so para lambengat ed saray ankabaleg la. Say kalidad na panagaral so lalon importanti nen say karakel na materyal a kobrian. Gawaen a mabilabilay so Biblia. No matukoy, tulongan yoray anak yon mangiretrato’d kaisipan ed saray lugar tan parti na Palestina no iner ya agawa iray ebenton siningbat. Amin so nepeg a napaseseg a manggawa na personal a panag-research da tan ipanabang itan ed pamilya. Diad onian paraan saray anak met so nayarin ‘ombaleg ed arap nen Jehova.’—1 Samuel 2:20, 21.
Paniiba ed Panag-ebanghelyo
9. Panon a nagawan sakey a magayagan eksperiensia na pamilya so panagpulong?
9 Inkuan nen Jesus: “Say evangelio kaokolan ya nipulong ya unona ed saray amin a naciones.” (Marcos 13:10) Saratan a salita so mangiiter ed kada magunaet a Kristiano na sakey ya asainmin—pian man-ebanghelyo, ipanabang ed arum so maong a balita na manguuley a Panarian na Dios. Say panggawa ed saya a maniiba bilang pamilya so nayarin makapaseseg tan makapagayagan eksperiensia. Saray kainaan tan kaamaan so mangikinon nipaakar ed panangiparungtal na saray anak da na maong a balita. Sakey a sanasawa a walaay taloran anak a lalaki a manedad ed baetan na 15 tan 21 so angibaga a niyugali ra a piulopan iray anak da ed mapublikon panagpulong ed kada Mierkoles kayari klase tan kada Sabado na kabuasan. Inkuan na ama: “Babangatan mi ’ra ed amin a pankanawnawa. Tan seseguroen min saman so sakey a makapagayaga, makapaseseg ya eksperiensia.”
10. Panon a nagunggunaan na saray ateng iray anak da diad ministeryo?
10 Say paniiban mankimey bilang pamilya ed panagpulong tan panagbangat so nayarin magmaliw a mabungan tuloy. No maminsan saray totoo so onkikiwas a lalon positibo ed sakey a simpli balet ta peteg a presentasyon na sakey ya ugaw. Insan, wadtan met si Ina odino si Ama ta pian ontulong no nakakaukolan. Naseguro na saray ateng a saray anak da so makaawat na onaaligwas a panangipasal tan diad ontan et sikaray magmaliw a ministro “ya angapo so ibaing to, ya agamilen . . . ed matonong so salita a tua.” Say paniiba ed panagpulong ed onian paraan so mangiiter na pankanawnawa ed saray ateng a mangimaton ed awawey, inkaepektibo, tan maong iran walna na anak da ed ministeryo. Diad pakawalaan na sakey a regular a rutina, nanengneng da so iyaaligwas na anak tan makapangiter na regular a panangipasal tan panamaseseg ta pian napabiskeg so pananisia to. Ontan met, naimano na saray anak a saray ateng da so maong iran alimbawa ed ministeryo. Diad sarayan maatap tan marawal a panaon, say pankimey bilang nankakasakey tan maasikason pamilya so nayari ni ingen a mangitarok na magenap ya inkaligen ed saray komunidad a kasmak so krimen.—2 Timoteo 2:15; Filipos 3:16.
11. Anto so magmainomay a mamakesay ed seseg na sakey ya anak ed katuaan?
11 Mainomay a napatnagan na ugugaw iray doblen-estandarte ed saray adulto. No agmangipanengneng iray atateng na tuan panangaro ed katuaan tan ed pankabkaabungan a ministeryo, mairap a nailaloan iray anak a magmaliw a maseseg. Kanian, say mabunigas ya ateng a say lawak a serbisyo to lambengat et say sinimban panagaral na Biblia ed saray anak to so ompan makasagmak na agmarakep iran pansumpalan sano saraya so ontatken la.—Uliran 22:6; Efeso 6:4.
12. Panon a nagagamoran na pigaran pamilya so sakey a nikadkaduman panamendisyon nen Jehova?
12 Say sakey a bentaha na “mankakasakey kayo komon na kalakal” et nayarin say pamilya so makapantulongan ta pian say sakey a membro so makapanlingkor bilang sigpot-panaon a ministron payunir ed kongregasyon. Dakel a pamilya ed interon mundo so manggagawa na onia, tan amin so nabebendisyonan manlapud saray eksperiensia tan onaaligwas ya inkaepektibo na membro ed pamilya ran payunir.—2 Corinto 13:11; Filipos 2:1-4.
Maniiba ed Panagresolbi na Saray Problema
13, 14. (a) Antoran situasyon so makaapekta ed pantutunosan na sakey a pamilya? (b) Panon a napaliisan iray dakel a problema na pamilya?
13 Diad sarayan mairap a panaon na “gonigon” tan “kapeligroan,” amin tayo so nadedesdes. (2 Timoteo 3:1, Revised Standard Version; Phillips) Walaray problema ed trabaho, diad eskuelaan, diad saray lansangan, tan anggan diad ayaman a mismo. Saray arum so manasagmak na sakit tan abayag laran problema a pinalesa na emosyon, a no maminsan et mansumpal ed saray kolkolan tan agpantatalosan diad pamilya. Panon a pidenengan so ontan iran situasyon? Kasin diad agpaneeselan? Kasin diad panbukbukor anggaman manaayam kayo ed saksakey ya ayaman? Andi. Imbes, kaukolan tayon itongtong iray kapagaan tayo tan onkerew na tulong. Tan iner ni so magmaong a pasen para’d saya nen say diad sakey a sikulo na manaaroan a pamilya?—1 Corinto 16:14; 1 Pedro 4:8.
14 Singa kabat na siopaman a doktor, magmaong so panalwar nen say tambal. Ontan met no nipaakar ed saray problema na pamilya. Say lukas tan prangkan tongtongan so mabetbet a makatulong ta pian agmagmaliw a seryoso iray problema, saraya so napantongtongan tan naresolbi ni no kunsideraen na pamilyan saniiba iray nasasaglawin prinsipyo na Biblia. Mabetbet a say irangan so nipawil ed mauksoy a siglaotan diad pangiyaplika ed saray salita nen Pablo ed Colosas 3:12-14: “Mampales kayo la sirin . . . na sakey a puso a maabagey, maong a linawa, kaoyamoan, kadeenan, kasondoan. Mantetepelan so sakey tan sakey, tan manpipirdonaan so balang sakey, no say siopaman a too wala so pangidalman to ed siopaman. . . . Ikawes yo so aro, a sikato so singer yo ed inkayadyari.”
Paniiba ed Panligliwaan
15, 16. (a) Anton kalidad so nepeg a mangibiig ed saray Kristianon pamilya? (b) Anton nengneng na totoo so pawawalaen na arum iran relihyon, tan akin?
15 Si Jehova so maliket a Dios, tan say katuaan et sakey a maliket a mensahe—sakey ya ilalo para’d katooan. Niarum ni, sakey ed saray bunga na espiritu et say gayaga. Sayan gayaga so duman tuloy ed agmagnayon a gayaga na gumagalaw ya analo ed sakey a laslasan ed esport. Satan so manamenek a tuloy a liknaan na gayaga a manlepwa ed puso bilang resulta na panamayubo na sakey a maapit a siglaotan ed si Jehova. Satan so gayagan nibase’d espiritual iran estandarte tan makapabiskeg iran siglaotan.—Galacia 5:22; 1 Timoteo 1:11.
16 Kanian, bilang Kristianon Tastasi nen Jehova, andian itayo na rason pian magmaliw a maermen odino andi-esel. Mamapawala iray arum a relihyon na ontan a totoo lapud say nengneng na pananisia ra so mangidadanet na negatibo iran letnegan. Say resulta na saray bangat da so sakey a maermen, tan andiay-gayagan nengneng na panagdayew, ya agnibase’d Biblia nisay asimbang. Sikaray agmamapawala na maliket iran pamilya’d serbisyo ed Dios. Anengneng nen Jesus so pankaukolan na panligliwaan tan panagpainawa. Alimbawa, aminsan inimbitaan toray babangataan to ya onla ed ‘arawi a pasen a lawak, tan manpainawan magano.’—Marcos 6:30-32; Salmo 126:1-3; Jeremias 30:18, 19.
17, 18. Diad anton matukoy iran paraan a makapanrelaks iray Kristianon pamilya?
17 Saray pamilya met so kaukolan a manrelaks. Sakey ya ateng so nankuan nipaakar ed ananak to: “Dakel so magayagan bengatlan gagawaen min saniiba—onla ed dayat, manggalaw na bola ed parke, mangorganisa na sakey a piknik ed kapalandeyan. Tunggal paminsan et walaan kami na ‘agew na payunir’ a maniiba ed ministeryo; kayari to et selebraan mi itan na espesyal a tagano, tan maniiteran kami ni ingen na regalo.”
18 Saray arum niran suhestion a nayarin ikunsidera na atateng et say panikskursyon na pamilya ed zoo, ed saray parken pakapanligliwaan, ed saray museo, tan ed arum nin makapasagyat a paspasen. Say pan-hiking ed takel, panbantay ed saray manok, tan panagtanaman et aktibidades a panliketan na balang sakey. Nayari met a pasesegen na saray ateng iray anak da a manaral a mantugtug na sakey ya instrumenton musika odino magmaliw ya okupado ed sakey a praktikal a hobby. Maseguron, say asimbang iran ateng so mabulos a mangigetar na panaon pian migalaw ed saray anak da. No saray pamilya et maniiban manggalaw, maseguron sikaray mansiansian mankakasakey!
19. Anton modernon uso so mamasakit ed sakey a pamilya?
19 Say sakey a modernon uso et say panlabay na saray tobonbalo ya onarawi manlapud pamilya tan gawaen so panlabayan da no nipaakar ed panagrelaks. Anggaman anggapoy mauges para’d sakey a malangwer a nawalaan na sakey a panligliwaan odino sakey a paboriton personal a panagpalabas na oras, agmakabat so pangiyabuloy ed saratan ya interes a mamalesa na permanentin iyarawi manlapud pamilya. Imbes, labay tayon iyaplika so prinsipyon inkuan nen Pablo: “Ag nengnengen na balang sakey ed sikayo so kayarian to’n dili, no ag balang sakey ed sikayo nengnengen to met so saray bengatla’n kayarian na saray arum.”—Filipos 2:4.
20. Panon a magmaliw iran panaon na gayaga iray asamblea tan kumbension?
20 Agaylan gayaga para’d sikatayon amin a nanengneng iray pamilyan naniiban akayurong ed saray kumbension tan asamblea! Diad ontan a paraan mabetbet a makatulong iray ankabaleg lan ananak ed saray mas malangwer. Satan ya oksuyan so mangamper met na ikiling na arum a katayatdang a migrupo’d saray yurongan ed benegan tan agtanton mangimano ed programa na kumbension. Anggan diad panbiahen mamaarap tan pasempet ed saray asamblea et nayarin pangayagaan, sano say pamilya so nakonsulta ed no antoy rutan dalanan, antoran lugar so nanengneng legan a walad dalan, tan iner so panpundoan. Isipen pa so agaylan magayagan panaon sanen saray pamilya diad agew nen Jesus so naniiban nambaroy ya amaarap ed Jerusalem!—Lucas 2:41, 42.
Saray Bendisyon na Paniiba
21. (a) Panon tayon makapanbanikel diad italona ed panamaley? (b) Antoray apatiran maabig a suhestion para’d magnayon a panamaley?
21 Saray matalonan panamaley tan nankakasakey a pamilya so agmainomay a dampoten, tan agnagawaan no aggagalaen. Ompatnag a mas mainomay para’d arum so ‘itundan manggaway sagpot,’ buyaken so panamaley diad pandiborsyo, tan onggapo la lamet. Ingen, pareho iran problema so mabetbet a nanengneng lamet ed komadua odino komatlon panangasawa. Say lalon magmaong ya ebat et say Kristianon paraan: Pambanikelan so italona diad pangiyaplika na saray prinsipyo na Biblia ed aro tan panagrespeto. Say nankakasakey iran pamilya so dependi ed espiritu na panangiter tan panangawat, diad ag-inkasiblet. Sakey a managsimbawa ed panamaley so angipaarap na sakey a simplin pormula pian magnayon iray panamaley. Insulat to: “Saray apatiran makanan elemento a nanengneng ed ngalngali amin a maong a panamaley et say inkamabulos na balang sakey ya ontalineng, say abilidad ya onkerew na despensa, say pakasarag a mangiter na mantultuloy ya emosyonal a panagsuporta, tan say pilalek ya ondiwit tekep na panangaro.” Sarayan letnegan so talagan makatulong pian magnayon so panamaley lapud saratan so nibase met ed mabiskeg iran prinsipyo na Biblia.—1 Corinto 13:1-8; Efeso 5:33; Santiago 1:19.
22. Antoray pigaran gungguna ed pakawalaan na nankakasakey a pamilya?
22 No tumboken tayo so simbawa na Biblia, sikatayoy nawalaan na putel a basiyan para’d sakey a nankakasakey a pamilya, tan saray nankakasakey a pamilya so pundasyon na sakey a nankakasakey tan mabiskeg ed espiritual a kongregasyon. Diad ontan, sikatayoy makaawat na daakan iran bendisyon manlapud si Jehova legan a sikatayoy nankakasakey a mangipaparungtal na apadaak a panamagalang ed sikato.
[Paimano ed leksab]
a “Say pamilya so nanlapud L[atin] a familia, diad ori[hinal] et saray aripen tan katulong ed sakey a baleg ya abung, pati say abung a mismo a pati say amon laki, say asawa to, ananak—tan saray kumikimey diman.”—Origins—A Short Etymological Dictionary of Modern English, nen Eric Partridge.
Kasin Natandaan Mo?
◻ Akin a makagungguna para’d saray pamilya a maniiban mankimey?
◻ Akin a kaukolan so sakey a regular a panagaral na pamilya ed Biblia?
◻ Akin a maong para’d atateng a mibiang ed lawak a ministeryo a kaulop iray anak da?
◻ Akin a makatulong so paningbat ed saray problema ed loob na pamilya?
◻ Akin a saray Kristianon pamilya so nepeg ya agmagmaliw a maermen tan andiay-gayaga?
Saray
[Litrato ed pahina 17]
Kasin say pamilyam so maliket a makapandudungoan anggan maminsan lambengat ed sanagew?
[Litrato ed pahina 18]
Saray ikskursyon na pamilya so nepeg a magmaliw a makaparelaks tan makapagayaga