Teolohikon Problema

“SAY ideyan ag-ipapatey na kamarerwa tan pananisia ed kioli na saray inatey . . . so duaran ideyan sigpot a mandumaan ed intelektual ya iyaaligwas, a diad baetan da et kaukolan so panpili.” Sarayan salita nen Philippe Menoud so manegek ed probleman kidudungetan na saray teologon Protestanti tan Katoliko nipaakar ed kipapasen na inaatey. Sasaglawien na Biblia so ilalon kioli ed “kaonoran ya agew.” (Juan 6:39, 40, 44, 54) Balet say ilalo na dakel a mananisia, kuan na teologon si Gisbert Greshake, “so based ag-ipapatey na kamarerwa, ya onsian manlapud laman diad ipapatey tan ompawil ed Dios, bangta say ilalo ed kioli so abalbaleg, no agkumpleto, naandi.”

Diad satan a kaso, sakey a mairap a problema so onlelesa, onia so salaysay nen Bernard Sesboüé: “Anto so kipapasen na inaatey legan na say ‘nanleetan’ na ipatey na laman tan say pinal a kioli?” Ompatnag a satan a tepet so sentro na teolohikon debati diad apalabas a pigaran taon. Anto so angipaarap ed satan? Tan nagkalalon importanti, anto so peteg ya ilalo parad inaatey?

Lapuan tan Impakatibukel na Problema

Malinew so pakatalos na saray inmunan Kristiano ed satan a pamaakaran. Kabat da manlapud Kasulatan a saray inatey et andian na liknaan, tan ibabaga na Hebreon Kasulatan: “Ta saray mabilay amta ra a sikara ompatey ira: balet saray inaatey agda amta so bengatla, ag ira met nawalaan la na tumang; . . . . Angapo so gawa, no kanonotan, no pakaamta, no kakabatan, dia ed Sheol, a laen mo.” (Eclesiastes 9:5, 10) Nanilalo iraman a Kristiano ed kiolin nagawa legan na arapen a “kiwawala na Katawan, NW.” (1 Tesalonica 4:13-17) Ag-ira nanilalon diad sakey a pasen et sikaray walaay liknaan legan a manaalagar ed saman a momento. Si Joseph Ratzinger a diad kaplesan et pangulo na Vatican Congregation parad Doktrina na Pananisia, so nankuan: “Anggapo so manamekder a doktrina diad kadaanan ya iglesia nipaakar ed ag-ipapatey na kamarerwa.”

Anggaman ontan, isasalaysay na Nuovo dizionario di teologia, sano babasaen iray sulat na Papari na Simbaan, a singa di komapat-a-siglon Augustine odino Ambrose, “natalosan tayoy bengatlan balo nipaakar ed Biblikon tradisyon​—say inlesa na Griegon eschatology, a manunan duma manlapud samay Judeo-Kristianos.” Sayan balon bangat so nibased “ag-ipapatey na kamarerwa, ed kaukom bilang sinansakey tekep na tumang odino dusa kayarin tuloy na patey.” Kanian, sakey a tepet so apawala nipaakar ed “nanpegleyan ya istado”: No makaliktar so kamarerwa ed ipatey na laman, anto so nagawa ed satan legan a manaalagar na kioli ed “kaonoran ya agew”? Saya so probleman pipupuligesgesan a resolbien na saray teologo.

Diad komanem a siglo K.P., sinuppiat nen Papa Gregory I a diad patey, saray kamarerwa so onlan tampol ed akagetaran da. Si Papa John XXII na koma-14 siglo so kumbensidon saray inatey so mangawat na ultimon tumang diad Agew na Panangukom. Anggaman ontan, sinuppiat nen Papa Benedict XII iray akauna’d sikato. Diad papal a sulat a Benedictus Deus (1336), impakseb to a “saray kamarerwa na inaatey so onloob ed kipapasen na nagnap a liket [tawen], panlinis [purgatoryo], odino kakondena [impierno] kayarin tuloy na ipatey, a nikasakey lambengat ed apaoli iran laman da diad anggaan na mundo.”

Anggaman ed sangsangan tan debati, saya so posisyon na saray iglesia na Kakristianoan ed loob na saray siglo, anggaman diad inkalapagan et agmanisia ed purgatoryo iray iglesian Protestanti tan Ortudoks. Anggaman ontan, manlapud anggaan na kaunoran a siglo, walay ondaraak a bilang na saray iskolar a mangipapaimano’d totoo ed aliwan Biblikon lapuan na doktrinan ag-ipapatey na kamarerwa, tan bilang nansumpalan, “mabetbet natan a sasalien na modernon teolohiya a moriaen so too bilang impankasakey a sigpot a naderal diad ipapatey.” (The Encyclopedia of Religion) Kanian, naiirapan iray komentarista na Biblia ya ikatunongan so kiwawala na “nanpegleyan ya istado.” Kasin sasaglawien itan na Biblia, odino kasin mangiyoopresi na duman ilalo?

Kasin Anisia si Pablo ed “Nampegleyan ya Istado”?

Kuan na Catechism of the Catholic Church: “Pian nasabi Kristo, nepeg tayoy ompatey a singa si Kristo: nepeg tayoy ‘andi ed laman, no ag say wala itayo ed abung na Katawan.’ [2 Corinto 5:8] Diad satan ya ‘itataynan’ a diad ipapatey et onsian so kamarerwa manlapud laman. [Filipos 1:23] Satan so niyapasakey lamet ed laman ed agew na kioli na saray inatey.” Balet diad saray tekston inaon dia, kasin ibabaga nen apostol Pablo a liktaray kamarerwa so ipatey na laman tan insan manalagar ed “Kaunoran a Subok” pian niyapasakey lamet ed laman?

Diad 2 Corinto 5:1, tutukoyen nen Pablo so ipapatey to tan sasaglawien toy “abung dia ed dalin” a “naderal.” Kasin iisipen toy laman a tinaynan na ag-ompatey a kamarerwa to? Andi. Sisiaen nen Pablo a say too so sakey a kamarerwa, ya aliwan sikatoy walaan na kamarerwa. (Genesis 2:7; 1 Corinto 15:45) Si Pablo so aturoy-espiritun Kristiano a say ilalo to et singa ed saramay inmunan-siglon agagi to, a ‘nigana ed tawen.’ (Colosas 1:5, NW; Roma 8:14-18) Kanian, say ‘masimoon a pilalek’ to et say kioli ed tawen bilang ag-ompatey ya espiritun pinalsa ed aturon panaon na Dios. (2 Corinto 5:2-4) Diad panasaglawi ed sayan ilalo, insulat to: “Nauman itayo ya amin . . . dia ed onor a trumpeta; ta say trumpeta ontanol, tan saray inatey onolira ed bilay ya ag naderal, tan nauman itayo.”​—1 Corinto 15:51, 52.

Kuan nen Pablo diad 2 Corinto 5:8: “Wala itayo ed malet ya ilalo, kuan ko, tan lablabay tayo’y andi ed laman, no ag say wala itayo ed abung na Katawan.” Sisiaen na arum a sarayan salita et ontukoy ed nampegleyan ya istado na panalagar. Sikara met so manutukoy ed sipan nen Jesus ed saray matoor a patumbok to a sikatoy manparaan na pasen ya ‘onkana’d sikara ed inkasikato.’ Balet kapigan a namoria iratan ya ilalo? Inkuan nen Kristo a satan et nagawa sano sikatoy ‘onsabi lamet’ ed arapen a kiwawala to. (Juan 14:1-3) Mipadpara, diad 2 Corinto 5:1-10, inkuan nen Pablo a say ilalon kaslakan ed saray alanaan a Kristiano et say panawir ed mangatatawen a panayaman. Saya so namoria, aliwan diad panamegley na pigaran ipapasen ya ag-ipapatey na kamarerwa, noagta diad panamegley na kioli legan na kiwawala nen Kristo. (1 Corinto 15:23, 42-44) Sinampotan na manangiwalwal a si Charles Masson a say 2 Corinto 5:1-10 so “natalosan sirin diad ag-isaral ed konklusyon ya ‘nampegleyan ya istado.’”

Kuan nen Pablo diad Filipos 1:21, 23: “Ta no nipaakar ed siak say panbilay sikato si Cristo, et say ipapatey sikato so tobo. Ta wala ak a mangamanga ed duara’n bengatla, a pirawat ko so ontainan a manayam ed Cristo; a sikato so lalo’n magmaong.” Kasin tutukoyen dia nen Pablo so “nampegleyan ya istado”? Ontan so isipen na arum a totoo. Anggaman ontan, ibabaga nen Pablo a sikatoy walad silong na panadesdes na duaran posibilidad​—bilay odino patey. Balet say “pirawat ko,” inyarum to, diad impanaglawi ed komatlon posibilidad ya, “ontainan a manayam ed Cristo.” Say ‘itaynan’ a piulop ed Kristo kayarin tuloy na ipapatey? Bueno, singa anengneng la, sisiaen nen Pablo a saray matoor ya alanaan a Kristiano so napaoli legan na kiwawala nen Kristo. Kanian, walad kanonotan toray ebento ed satan a panaon.

Nanengneng iya manlapud saray salita ton naromog diad Filipos 3:20, 21 tan 1 Tesalonica 4:16. Say ontan ya ‘itaynan’ legan na kiwawala nen Kristo Jesus so mamakayari ed si Pablo a mangawat na tumang ya inggana na Dios ed sikato. Say katuaan a saya so ilalo to so naimano ed saray salita to ed malangwer a Timoteo: “Manlapu ed natan anga ed arapen wala a niparaan ed siak so balanget na kaptekan, ya iter naani ed siak na Katawan, say maptek ya okom, ed saman ya agew: tan aliwa labat ed siak, no ag dia met ed saray amin a mangaro ed ipayawar to.”​—2 Timoteo 4:8.

Say Kioli​—Sakey a Marlang a Katuaan ed Biblia

Impasen na saray inmunan-Kristiano so kioli ya ebenton onggapo legan na kiwawala nen Kristo, tan apabiskeg tan aligliwa ra manlapud sayan engranden katuaan na Biblia. (Mateo 24:3; Juan 5:28, 29; 11:24, 25; 1 Corinto 15:19, 20; 1 Tesalonica 4:13) Sitotoor dan inalagar itan a gayaga ed arapen, ya ipupulisay iray apostatan bangat na ag-ipapatey na kamarerwa.​—Gawa 20:28-30; 2 Timoteo 4:3, 4; 2 Pedro 2:1-3.

Siempre, say kioli so aglimitado ed saray Kristianon walaay mangatatawen ya ilalo. (1 Pedro 1:3-5) Saray patriarka tan arum niran inmunan aripen na Dios so angagamil na pananisia ed abilidad nen Jehova a napaoli iray inatey diad dalin. (Job 14:14, 15; Daniel 12:2; Lucas 20:37, 38; Hebreos 11:19, 35) Anggan saramay binilyon a legan na saray siglo et agbalot akaamta ed Dios so walaan na pankanawnawan ompawil ed bilay diad mangaraldalin a paraiso, ta “wala naani kioli ed bilay na saray matunong tan ag matunong.” (Gawa 24:15; Lucas 23:42, 43) Agta saya so makapasagyat ya ilalo?

Imbes a gawaen to itayon manisia a say kairapan tan ipapatey so lawas wadtan, ipapaimano nen Jehova ed sikatayo so panaon sano “say kaonoran a kabusol . . . say patey,” so naekal ed ando lan ando tan saray matoor a katooan so magnayon a manbilay ed dalin a nipawil a Paraiso. (1 Corinto 15:26; Juan 3:16; 2 Pedro 3:13) Agaylan makapakelaw so pakanengneng ed saray inad-aro a napaoli! Agaylan magmaong iyan peteg ya ilalo nen say inimbenton ideyan ag-ipapatey na kamarerway too​—doktrinan based Griegon pilosopya aliwan ed Salitay Dios! No ibasem so ilalom ed seguradon sipan na Dios, sika met so makapanseguro a diad asingger ya arapen et “andi gapo la naani ipatey”!​—Apocalipsis 21:3-5.

[Litrato ed pahina 31]

Say kioli so sakey a marlang a katuaan ed Biblia