Say Sankabalgan a Toon Nambilay ed Kapiganman

Kapitulo 110

Akumpleto so Ministeryo ed Templo

Saman la so unor a nanengneng si Jesus ed templo. Diad tua, sasampotan to so mapublikon ministeryo to diad dalin nilikud ed saray ebento na panusay tan pamatey ed sikato, a taloran agew ed arapen. Natan et sikato so mantutultuloy ed pankakastigo to ed saray eskriba tan saray Pariseo.

Amitlo nin danay ya inkelyaw to: “Kasi kayo la, ya escribas tan Fariseos, a mansimpisimpitan!” Unona, inyabawag ton kási ira lapud lilinisan da so “paway na vaso tan lipong, say dalem da balet napno na kasibaan tan inkalablabas.” Kanian insimbawa to: “Urasan [yo] ni ya unonay dalem na vaso tan lipong, pian say paway to et nalinisan met.”

Insan inyabawag ton kási laray eskriba tan saray Pariseo lapud akindalem ya inkabulok tan inkaderal a sasalien dan saniban na akinpaway a pansanto-santoan. “Mipadpara kayo ed saray pinutin lobok,” kuanto, “ya dia’d paway nengneng toy marakerakep, balet dia’d dalem napno [na] pokepokel na saray totoo ya inaatey, tan amin a karutakan.”

Kaunoran, nipapatnag so pansimpisimpitan da ed inkamabulos dan manggawa na saray pantion parad saray propeta tan aadornoan iratan pian ipaimanoy dilin gawagawa ran inkamatulong. Ingen, singa ipaparungtal nen Jesus, sikaray ‘anak na saray amatey ed saray profetas.’ On, siopaman a manpakpel a mangiwalwal ed pansimpisimpitan da so niiyan ed kaatapan!

Diad pangitutuloy, sinalambit nen Jesus iray sankabiskegan a balikas na panangondena to. “Sikayo ya uleuleg, sikayo a poli na saray tadioko,” kuanto, “panon so ibatik yo naani ed panangokom na infierno [Gehenna, NW]?” Say Gehenna so lawak a datin buntonay basura na Jerusalem. Kanian ibabaga nen Jesus a say pangitutuloy da’d marelmeng a kurang da, sagmaken na saray eskriba tan saray Pariseo so andi-anggaan a kadederal.

Nipaakar ed saramay imbaki to bilang manangilaman to, inkuan nen Jesus: “Arum ed sikara bakbaken yo naani ed saray sinagogas yo, tan usilan yo ra manlapu ed sakey a ciudad anga ed sananey a ciudad; pian dia’d sikayo onsabi so amin a dala na saray matonong ya naibung ed tapew na dalin, manlapu ed dala nen Abel ya matunong anga ed dala nen Zacarias ya anak nen Baraquias [tatawagen met ya Joiada ed Komaduan Awaran], a sikato so pinate’yo ed leet na santuario tan say altar. Tua kuan ko ed sikayo, Amin irayan bengatla onsabi naani ed sayan kapolian.”

Lapud nanlabiran nen Zacarias iray pangulo na Israel, “nanoopit ira sumpa ed sikato, tan sikato so tinopak da ed saray bato lapu ed gangan na ari ed saban na abung nen Jehova.” Balet, singa impasakbay nen Jesus, say Israel so manbayar ed amin na saratan a matunong a dalan nipaagus. Sikaray nanbayar 37 taon ed saginonor, nen 70 K.P., sanen dineral na saray armaday Romano so Jerusalem tan masulok a sakey milyon ya Judios so atawtaw.

Legan ya ikokonsidera nen Jesus iyan makapakebbiew a kipapasen, sikatoy agonigon. “O Jerusalem, Jerusalem,” inyabawag to lamet, “aminpigapigan nilabay ko komon ya tinipon ya inpandaragup iray anak mo, a singa sakey a nganak ya tiponen to ’ray siwsiw to ed silong na saray payak to! [Balet sikayon totoo so agmalabay.] Nia! Say abung yo natainan ed sikayo ya andi lugan.”

Insan inyarum nen Jesus: “Ag yo ak naani nanengneng a manlapu’d natan, anga ed pangikuan yo naani, Mapalar [Bendito, NW] so onla dia ed ngaran na Katawan [Jehova, NW].” Satan ya agew so diad kiwawala nen Kristo sano sikato so onla dia ed mangatatawen a Panarian to tan sikatoy nanengneng na totoo ed saray mata na pananisia ra.

Si Jesus natan so inmalis ed sakey a pasen a nanengneng to so panangisimpenan na kayamanan ed templo tan saray karaklan a mangipepelag na kuarta ed saratan. Say mayayaman so angipelag na dakel a barya. Balet ta sakey a mairap a balon bii so sinmabi tan angipelag na duaran ankekelag a barya a walaan na melag a tuloy a balor.

Kayarin tinawag iray babangatan to, inkuan nen Jesus: “Tua kuan ko ed sikayo, Sayan duka ya bii a baló angipelag na dakdakel nen saray amin a manpepelag ed panangisimpenan na kayamanan.” Maseguron sikaray mankelaw no panon a satan so nayari. Kanian impaliwawa nen Jesus: “Sikara’n amin angipelag ira ed nasosolokan da; sikato balet dia ed inka-okolan to inpelag to ya amin so wala ed sikato, salanti amin a panbilay to.” Kayari impangibaga’d sarayan bengatla, si Jesus so tinmaynan manlapud templo ed kaunoran a pankanawnawa.

Mandinayew ed kabaleg tan karakep na templo, inkelyaw na saray babangatan to: “Managbangat, nengneng mo! agay la a nengneng na batobato tan agay la a nengneng na palpaalagey!” On, saray bato so nibabagan onsulok ed 11 metro ed karukey, masulok ed 5 metro ed awang, tan onsulok ed 3 metro ed katagey!

“Nanengneng [yo] so saraya’n ankakabaleg a palpaalagey?” inyebat nen Jesus. “Angapo naani natilak dia a sakey a bato ed tapew na sakey, ya ag nigeba naani.”

Kayari’d impangibaga na sarayan bengatla, si Jesus tan saray apostol to so binmeltang ed Lawak na Kidron tan tinmatdang ed Palandey na saray Olibo. Manlapud dia et nayari ran nabantag so marakep a templo. Mateo 23:25–24:3; Marcos 12:41–13:3; Lucas 21:1-6; 2 Awaran 24:20-22.

▪ Anto so ginawa nen Jesus legan na unor ya ibibisita to ed templo?

▪ Panon a nipatnag so pansimpisimpitan na saray eskriba tan saray Pariseo?

▪ Antoy kabaliksan na “panangokom na Gehenna”?

▪ Akin ya imbaga nen Jesus a say balon bii so akapangiter na dakel ni nen say mayayaman?