Say Sankabalgan a Toon Nambilay ed Kapiganman

Kapitulo 108

Sikaray Sinmaew a Mamalingo ed si Jesus

Lapud manbabangat si Jesus ed templo tan kapkangisalaysay to’d saray relihyoson kabusol to na taloran ilustrasyon a mangiwawalwal ed inkarelmeng da, saray Pariseo so asanokan tan nannononong pian sikatoy palingoen diad pangibaga na bengatlan sengegan na pangerelan da’d sikato. Sikaray nanplano na sakey a palikdo tan imbaki iray babangatan da, ontan met et saray partidon papatumbok nen Herodes, pian panggunaetan a sikatoy napalingo.

“Managbangat,” inkuan na sarayan lalaki, “amta mi ya sika matua ka, tan ibangat [moy] dalan na Dios ed katuaan, tan ag ka napagaan ed siopaman, ta sika ag mo nengnengey inkatoo na saray totoo. Ibagam pa sirin ed sikami, Anto so isisip mo? Onkatonongan kasi panangiter na buwis ed kinen Cesar, ono andi?”

Si Jesus so ag-apalikdo ed sayan mansimpisimpitan a panangidayew. Kabat ton sano ikuanton, ‘Andi, aliwan makanepegan odino susto so panbayar na sayan buwis,’ magmaliw a sikatoy mankasalanan na sedisyon sumpad Roma. Ingen, no ibaga to, ‘On, nepeg yo a bayaran iya buwis,’ saray Judio, a maingongot ed panpapasakop da ed Roma, so mangula ed sikato. Kanian inyebat to: “Akin et subsuboken yo ak, sikayo mansimpisimpitan? Ipanengneng yod siak so pilak na buis.”

Sanen inawit da’d sikatoy sakey, intepet to: “Siopay akanlupa tan akansulat ed saya?”

“Si Cesar,” inyebat da.

“Bayaran yo sirin ed Cesar so kien nen Cesar; tan ed Dios so kien na Dios.” Bueno, sanen arengel na sarayan totoo so onsianon ebat nen Jesus, sikara so mankelaw. Tan inmalis ira tan sikatoy tinaynan dan bokor.

Diad impakanengneng ed insaew na saray Pariseon makala na bengatlan isumpa ed si Jesus, saray Saduceo, a mangibabagan anggapoy kioli, so inmasingger ed sikato tan tinmepet: “Managbangat, si Moises inkuan to, No say sakey a laki ompatey ya angapo ray anak to, say agi ton laki asawaen to naani man so asawa to, tan ibangonan to so agi to na poli. Natan walara ed sikami so pitoran sanaagi a lalaki; et say pangoloan angasawa et inatey, et lapud angapo so ilalak to intilak ton asawa to ed agi ton laki. Ontan met ed komadua, tan komatlo, anga ed komapito. Tan kayari ran amin inatey so bii. Dia ed kioli ed bilay siopa sirin ed saraman a pitora so makan asawa ed sikato? Ta sikato’y inasawaran amin.”

Bilang ebat et inkuan nen Jesus: “Ag ta nisengeg ed saya so kalingoan yo, ya ag yo amta so saray sulsulat, ni say pakapanyari Dios? Ta sano onoli ra a manlapu’d saray inatey, ag ira mangasawa, tan ag ira met miasawa; balet singara angeles ed tawen. Balet nipaakar ed saray inatey, ya onoli ra ed bilay, ag yo ta abasa ed libro nen Moises, ed pasen a pakatongtongan nipaakar ed Zarza, no panon so inpisalita na Dios ed sikato, a kuan to, Siak so Dios nen Abraham, tan say Dios nen Isaac, tan say Dios nen Jacob? Sikato so aliwa’n Dios na saray inatey, ingen Dios na saray mabilay. Baleg a toloy so kalilingo yo.”

Lamet, saray karaklan so nikelawan ed ebat nen Jesus. Arum ni ingen ed saray eskriba so amidbir: “Managbangat, maong so inkuan mo.”

Sanen anengneng na saray Pariseo ya apepe nen Jesus iray Saduceo, sikara so inmasingger ed sikato bilang sakey a grupo. Pian sikato ni suboken, sakey ya eskriba ed limog da so tinmepet: “Managbangat, dinan so baleg a gangan ed katunongan?”

Inyebat nen Jesus: “Say manonaan sikatoya, Dengel mo, O Israel, Say Katawan [Jehova, NW] a Dios tayo, say Katawan [Jehova, NW] saksakey, et sika aroen mo so Katawan a Dios mo ed amin a pusom, tan ed amin a kamarerwam, tan ed amin a nonot mo, tan ed amin a biskeg mo. Say komadua sikato ya, Aroen mo so kaparam a too a singa sika lanlamang. Angapo lay sananey a gangan ya babaleg nen saraya.” Diad tua et inyarum nen Jesus: “Dia ed sarayan duaran gangan so pansaksabitan na amin a katunongan tan say salita na saray profetas.”

“Dia’d tua, Managbangat, maong so inpangikuan mo,” inyabobon na eskriba. “A sikatoy saksakey, tan angapo’y sananey noag sikato lambengat; tan say pangaro ed sikato ed amin a puso, tan ed amin a pakatalos, tan ed amin a biskeg, tan say pangaro ed kapara’n too a singa sikato lanlamang, sikato’y dakdakel nen saray amin a lapag ya pangaro ya poolan tan saray bagat.”

Diad impakatebek ed makabat ya impangebat na eskriba, inkuan nen Jesus ed sikato: “Sika ag ka arawi ed panaria’y Dios.”

Mikatlo lan agew natan​—Simba, Lunes, tan Martes—​si Jesus so manbabangat ed templo. Tinmalineng so totoo ed sikato tekep na liket, ingen ta sikatoy labay a pateyen na saray relihyoson pangulo, balet anggad satan et sinmaew iray panasali ra. Mateo 22:15-40; Marcos 12:13-34; Lucas 20:20-40.

▪ Anton palikdo so implano na saray Pariseo pian palingoen si Jesus, tan anto so pansumpalan no sikato so onebat na on odino andi?

▪ Panon a pinasaew nen Jesus so panasali na saray Saduceo a sikatoy palingoen?

▪ Anto nin impanali so ginawa na saray Pariseo pian suboken si Jesus, tan anto so nansumpalan?

▪ Legan na kaunoran a ministeryo to ed Jerusalem, pigaran agew a nanbangat si Jesus ed templo, tan antoy epekto?