Say Sankabalgan a Toon Nambilay ed Kapiganman

Kapitulo 109

Kinondena nen Jesus Iray Sumusumpa To

Ontanla so impangarap nen Jesus ed saray relihyoson sumusumpa to ya antakot day ontepet ed sikato na antokaman ni. Kanian sikatoy angalay inmunan kundang pian iwalwal so inka-ignorante ra. “Antoy isisip yo ed Cristo?” tepet to. “Siopa so makan-anak ed sikato?”

“Anak nen David,” inyebat na saray Pariseo.

Anggaman ag-ipupulisay nen Jesus a si David et inmunan ateng ed laman na Kristo, odino Mesias, intepet to: “Panon sirin nen David dia [ed inkapuyanan diad Salmo 110] a sikato’y tawagen to na Katawan, a kuan to, Say Katawan [Jehova, NW] inkuan to ed Katawan ko, Onyorong ka ed nikawanan a limak, anga ed pakapangyan ko ed saray kakabosol mo ya totoonan na saray salisalim? No si David sirin sikato so tawagen to’y Katawan, panon a sikato so anak to?”

Saray Pariseo so andi-esel, lapud agda amta so peteg a pakabidbiran na Kristo, odino alanaan a sakey. Say Mesias so aliwan basta sakey ya atooan a kailalakan nen David, a mapatnag a sisisiaen na saray Pariseo, noagta sikatoy niwala la’d tawen tan sikatoy atagtagey, odino Katawan, nen David.

Diad iyaarap natan ed karaklan tan ed saray babangatan to, si Jesus so amasakbay nipaakar ed saray eskriba tan saray Pariseo. Lapud ibabangat na saraya so Ganggan na Dios, a walan ‘manyorong ed yorongan nen Moises,’ impaseseg nen Jesus: “Amin a bengabengatla sirin ya antokaman ya ibaga ra naani ed sikayo, gawaen yo tan imanoen yo.” Balet inyarum to: “Ingen ag kayo mangawa na onong ed saray gawa ra, ta ibaga ra et ag da gawaen.”

Sikaray mansimpisimpitan, tan kinondena ira nen Jesus diad parehon tuloy a balikas a singa ginawa to legan na pirurungo to ed abung na sakey a Pariseo, pigaran bulan ed asasakbay. “Saray amin a gawa ra,” kuanto, “gawaen da pian nanengneng ira na totoo.” Tan sikatoy angitarok na saray alimbawa, ya ipapaimano:

“Gawaen da’n malapar ’ray filacterias da [bilang mananalimbeng].” Sarayan melag a pananginan, ya ibebedber ed moling odino diad taklay, so mankarga na apatiran kabiangan na Ganggan: Exodo 13:1-10, 11-16; tan Deuteronomio 6:4-9; 11:13-21. Balet pababalegen na saray Pariseo irayan pananginan pian mangiter na impresyon a sikaray maseseg nipaakar ed Ganggan.

Intuloy nen Jesus a sikaray ‘mangipaparukey na saray lagaylay na saray kawes da.’ Diad Numeros 15:38-40 et saray Israelita so gagangganen a manggawa na lagaylay ed saray kawes da, balet ta gagawaen na saray Pariseo iray lagaylay dan andukdukey nen say gagawaen na siopaman. Amin a bengatla so ginawa’d pasirayew! “Kaliktan da’y pasen ya manona,” inyabawag nen Jesus.

Makapaermen, saray dilin babangatan to so naapektaan na sayan pilalek parad inkaprominenti. Kanian insimbawa to: “Balet ag kayo komon patatawag na Rabbi, ta sakey so managbangat ed sikayo, et sikayo ya amin sanaagi kayo. Tan angapo’y tawagen yo na ama ed dalin, ta sakey so Ama yo, a sikato’y wala ed tawen. Tan ag kayo met patatawag na katawan, [ta] sakey so [Katawan] yo a salanti si Cristo.” Nepeg ya iwaklit na babangatan so pilalek dan magmaliw a manuna! “Saman so kabalbalgan ed sikayo sikato naani aripen yo,” insimbawa nen Jesus.

Insublay to so angibalikas na mantutumbokan a kási ed saray eskriba tan saray Pariseo, a paulit-ulit a tatawagen ira a mansimpisimpitan. ‘Kakapotan da so panarian na tawen sumpa ed saray totoo,’ kuanto, tan ‘sikaray mangaakmon ed saray abung na saray baló a bibii tan ibabaraan so panggawa na andurukey a pikakasi.’

“Kasi kayo la, ya bubulag a manangibasbas,” kuan nen Jesus. Kinondena toray Pariseo ed kaandian day espiritual a kablian, a singa papaneknekan na agmakatunongan a panangiduma-duma ra. Alimbawa, ibabaga ra, ‘Baliwala no say siopaman et mansamba lapud templo, ingen say sakey so makautang no sikatoy mansamba lapud balitok na templo, NW.’ Diad lalon pangidadanet da ed balitok na templo nen say espiritual a kablian na saman a pasen na panagdayewan, ipaparungtal day inkabulag da ed moral.

Insan, singa ginawa to ed asasakbay, kinondena nen Jesus iray Pariseo ed pangibabaliwala ra ed “ambelbelat iran pamaakaray Ganggan, salanti, kaalasan tan panangasi tan katooran, NW” bangta mangiiter na baleg a panangimano ed panagbayar na kakaplo, odino komasamplon parte, na agmakabaliksan a pisipising.

Tatawagen nen Jesus iray Pariseo a ‘bubulag a manangibasbas, a manasapit ed ageyet [balet] mamibikler ed camello!’ Sasapiten day ageyet manlapud alak da aliwan basta lapud satan so sakey a bigis noagta satan so marumsis ed seremonyal a paraan. Ingen, say pangibabaliwala ra ed ambelbelat iran pamaakaran na Ganggan so misimbangan ed pangaakmon ed kamelyo, sakey met a marumsis ed seremonyal a paraan ya ayep. Mateo 22:41–23:24; Marcos 12:35-40; Lucas 20:41-47; Levitico 11:4, 21-24.

▪ Akin a saray Pariseo so andi-esel sanen tinepetan ira nen Jesus nipaakar ed imbaga nen David ed Salmo 110?

▪ Akin a papabalegen na saray Pariseo iray mankakargay-kasulatan a pananginan da tan saray lagaylay ed saray kawes da?

▪ Anton simbawa so inter nen Jesus ed saray babangatan to?

▪ Anton agmakatunongan a panangiduma-duma so gagawaen na saray Pariseo, tan panon a kinondena ira nen Jesus ed pangibabaliwala ra ed ambelbelat iran pamaakaran?