Anto so Kabaliksan na Relihyoson Kawayangan ed Sika?
Anggaman say kawayangan na relihyon so nikokonsidera a manunan kanepegan ed Estados Unidos, sakey a daluyon na karawalan na pangkat sumpad Tastasi nen Jehova so kinmayat ed intiron bansa diad dekada na 1940
MINILYON so akilaban parad satan. Arum ni ingen so inatey parad satan. Talagan sakey ed sankamablian a kayarian na katooan. Anto itan? Kawayangan! Uukeran na The World Book Encyclopedia so kawayangan a bilang “say abilidad a pakapanpili tan insan gawaen iratan.” Intultuloy to: “Manlapud legal a punto-de-bista, bulos iray totoo no say sosyedad so agmangipipilit na pikewet, agkapilitan, odino agmakatunongan a panangeter ed sikara. Nepeg met a salimbengan na sosyedad iray kanepegan da—salanti, saray manunan pakabulosan, abilidad, tan pribilihyo ra.”
Singa simplin ideya. Balet, diad aktual et ompatnag a magmaliw ya imposibli parad totoo a panpaknaan day nepeg ya eksakton pangiletnegan na saray ketegan na kawayangan. Alimbawa, sisiaen na arum a say gobierno so nepeg a mangipakat na saray ley a manalimbeng ed kawayangan na saray mibabaley to. Balet isangsang na arum a sarayan ley so mismon manesebel ed kaukolan a kibulosan na saray mibabaley! Malinlinew, nanduruma so bengatlan kabaliksan na kawayangan ed nanduruman totoo.
Komusta met so Nipaakar ed Relihyoson Kawayangan?
Anganko say kawayangan ya ampetapetang a pansusuppiatan et say kawayangan na relihyon, a naukeran bilang “say kanepegan a manisia tan pangagamil ed pananisia a pili na sakey.” Unong ed United Nations Universal Declaration of Human Rights, “amin so walaan na kanepegan ed kawayangan na kanonotan, konsiensia, tan relihyon.” Lalaktipen na saya so kanepegan na too “ya umanen so relihyon odino sisiaen to,” pati lay kawayangan “ya ipatnag so relihyon odino sisiaen to diad bangat, agamil, panagdayew tan panagngilin.”—Artikulo 18.
Maseguro, nailaloan tayo ya ipagamor na dinanman a nasyon a tudtuan mangaasikaso parad uuleyan to so ontan a kawayangan. Makapaermen, aliwan ontan a naynay so nagagawa. “Aapektaan na relihyon so sankaaraleman a liknaan na dakel a totoo,” so ibabaga na The World Book Encyclopedia. “Pigaran gobierno so walaan na mabiskeg a siglaotan ed sakey a relihyon tan ipapasen dan say totoo na arum a relihyon et sesga ed mapolitikan autoridad. Nayarin ipasen met na gobierno so relihyon a mameligro ed politika lapud saray relihyon so mas mangipaarap na katooran ed Dios nen say katutulok ed estado.”
Lapud sarayan rason ya arum a gobierno so mamepeget ed panangagamil ed relihyon. Pigara so manidismaya ed pangagamil ed dinanman a pananisia. Balet say arum, anggaman ibabaga ran iyaalibansa ra so kawayangan na panagdayew et pirmin pupugeran dan amin so relihyoson aktibidades.
Ikonsidera pan alimbawa, so walan kipapasen ed dakel a taon diad Mexico. Anggaman igagarantiya na Konstitusyon so relihyoson kawayangan, satan so akiabobon: “Saray simbaan ya uusaren parad publikon panagdayew so kayarian na Nasyon, irerepresenta na Gobierno Pederal, a manitermina no dinan iray nitultuloy a nausar bilang ontan.” Nen 1991 apasimbalo so Konstitusyon pian panganggaen itan a panameget. Balet, ipapanengneng na sayan alimbawa a say relihyoson kawayangan et nandurumay talos to ed nanduruman daldalin.
Sananey a Nengneng na Relihyoson Kawayangan
Kasin wala so relihyoson kawayangan ed dalin a panaayaman mo? No ontan, panon a nibiig itan? Makapandayew ka ta ed Dios ed paraan a pinilim, odino pinilit kan mimembro ed relihyon na Estado? Naabuloyan ka ta’n makapanbasa tan makapangikayat na relihyoson literatura, odino say ontan a niprintan materyal et isesebel na gobierno? Nitongtong mo ta ed arum so nipaakar ed pananisiam, odino satan so ipapasen bilang panaglusob ed saray relihyoson kanepegan da?
Saray ebat ed sarayan tepet so mandedependi ed lugar a panaayaman mo. Balet, makapainteres ta wala so nengneng na relihyoson kawayangan ya agbalot mandidipindi ed kaliberliber. Legan a walad Jerusalem nen taon 32 K.P., inkuan nen Jesus ed papatumbok to: “No mansiansia kayo ed salitak, sirin petepeteg a sikayo so babangatan ko, et nakabatan yo so katuaan, et say katuaan sikayo so gawaen to a bulos.”—Juan 8:31, 32.
Anto so labay ya ibaga nen Jesus ed satan a balikas? Panpirpirawatan na Judion dumerengel to so kibulos manlapud uley na Romano. Balet agsasalambiten nen Jesus dia so kawayangan manlapud mapolitikan panaglames. Imbes, sikatoy mangisisipan ed babangatan to na bengatlan lalon magmaong, a singa nanengneng tayo ed ontumbok ya artikulo.