Makapanisia Ka Ta ed Sakey a Dios a Persona?
“AGLA kaukolan a manisia ka ed Dios pian magmaliw a sakey a Kristiano . . . Kabiangan itayo na biglan pananguman natan, balet diad koma-21 siglo say relihyon so naandian na Dios diad tradisyonal a pantalos,” so insalaysay na sakey a señor a pari ed sakey ya unibersidad ed Britanya. Sikatoy nansalita ed biang na kurang a Sea of Faith ya ag-onkulang a sanlasus a Britanon papari so manusuporta. Ipipilit na sarayan “ateistan Kristiano” a gawagawa labat kuno na totoo so relihyon kanian, a singa imbaga na sakey a membro, say Dios et “sakey ya ideya” labat. Say makapanyarin Dios so agla mitunosan ed paraan na panag-isip da.
“Inatey so Dios” so popular a diparan ed dekada na 1960. Insindag toray panmoria na koma-19 siglon pilosopon Aleman a si Friedrich Nietzsche tan satan so angibaraanan na dakel a kalangweran pian gawaen so dilin panlabayan da, pian manpenek ed agkasal a pisekso tan panag-abuso ed druga ya anggapoy moral a panameget. Balet kasin say ontan a kawayangan so angitonton ed manangitandoroy aro ya ananak, a singa tawag da, ed mas makapenek a bilay a maliket?
Diad satan met a dekada, impalapag na Anglikanon obispo a si John A. T. Robinson so kontrobersial a libro to ya Honest to God. Sikatoy binalaw na dakel a kapara ton klero lapud paniisip ed Dios “bilang aliwa lan aspekto na akindalem ya eksperiensia na too.” Intepet na propesor ed teologo a si Keith Ward: “Kasin say panisia ed Dios et kabiangan na kadaanan ya anito, ya ipupulisay la natan na saray makabat?” Diad pangebat ed mismon tepet to, oniay inkuanto: “Anggapo lay mas importanti ed relihyon natan nen say pangipawil ed pikakabat ed tradisyonal ya ideya nipaakar ed Dios.”
Say Paniirap tan say Dios a Persona
Dakel a manisia ed sakey a Dios a persona so naiirapan ya itunos so sisiaen da ed saray trahidya tan paniirap a nanenengneng da. Alimbawa, nen Marso 1996, 16 ya ugugaw, kaibay maestra ra, so pinapaltog tan inaatey ed Dunblane, Scotland. “Agkon talaga natalosan so linawa na Dios,” so inkuan na natitiris a bii. Say ot-ot na trahidya so nibalikas ed sakey ya intilak a kard tekep na saray rosas ed paway na eskuelaan na ugugaw. Akasulat ed satan so salitan, “AKIN?” Bilang ebat oniay inkuan na ministro na Dunblane Cathedral: “Agnipaliwawa. Agtayo naebatan no akin a kaukolan a nagawa iya.”
Diad saginonor na saman lanlamang a taon, sakey a popular a kalangweran nin klerigo na Church of England so maramsak a pinatey. Inreport na Church Times a say abiglan kongregasyon so akadngel ed klerigo na Liverpool a mangisasalita nipaakar ed “panatabbiog ed puerta na Dios tekep na tepetepet ya akin? akin?” Agmet akapangiter na ligliwa iyan klerigo manlapud Dios a persona.
Anto, sirin, so nepeg a panisiaan tayo? Makatunongan so panisia ed Dios a persona. Satan so tombok diad pangebat ed mabiskeg iran nitepet ed tagey. Imbitaan mi kan mangonsidera ed nipresintan paneknek ed ontumbok ya artikulo.
[Litrato ed pahina 3]
Say tepet ed kard et “Akin?”
[Credit Line]
NEWSTEAM No. 278468/Sipa Press