Amtaen si Jehova—Say Dios a Persona

DIAD pangikokompara ed panmoriay Hindu ed Dios ed saray arum a grupoy relihyon, oniay naobserbaan nen Dr. Radhakrishnan na India: “Say Dios na saray Hebreo so midumaan. Sikatoy sakey a persona tan aktibo ed awaran tan interesado ed saray panguuman tan nagagawa ed sayan onaaligwas a mundo. Sikatoy Personan mitatalosan ed sikatayo.”

Say Hebreon ngaran na Dios ed Biblia et יהוה, inkalapagan a nipapatalos a “Jehova.” Sikatoy manunaan ed amin nin dirios. Anto tay amta tayo nipaakar ed sikato? Panoy impideneng to’d totoo ed panaoy Biblia?

Si Jehova tan si Moises ‘Nanlupalupaan’

“Lupalupaan” so inkaapit na relasyon ed baetan nen Jehova tan ed aripen ton Moises, anggaman agliteral a nanengneng nen Moises so Dios. (Deuteronomio 34:10; Exodo 33:20) Diad inkatobonbalo to, say simpatiya nen Moises so walad Israelitas, a diad saman et walad inkaaripen diad Ehipto. Impulisay toy kabibilay to bilang membro na sankaabungan nen Faraon, “a pinili to a nilabi so mantepel ed irap na saman a baley na Dios.” (Hebreos 11:25) Bilang resulta, inikdan nen Jehova si Moises na dakel ya espisyal a pribilihyo.

Bilang membro na sankaabungan nen Faraon, “abangatan si Moises ed amin a kakabatan na saray taga-Ehipto.” (Gawa 7:22) Balet pian niwanwan so nasyon na Israel, kinaukolan met a bayuboan toray kualidad ya inkamapaabeba, inkaanos, tan inkauyamo. Ginawa to iya legan na 40 taon to bilang pastol ed Midian. (Exodo 2:15-22; Numeros 12:3) Si Jehova, anggaman nansiansian agnanengneng, imparungtal toy inkasikato tan say gagala to ed si Moises, tan diad panamegley na angheles ya inmatalek na Dios ed sikato so Samploran Ganggan. (Exodo 3:1-10; 19:3–20:20; Gawa 7:53; Hebreos 11:27) Ibabaga ed sikatayo na Biblia ya “akisalitay Jehova ed Moises ed lupalupaan, a singa sakey a too a misalita ed kaaro to.” (Exodo 33:11) On, inkuan a mismo nen Jehova: “Dia ed sikato misalitaak ed sangisangian.” Agaylan mabli tan maapit a siglaotan so nanggayagaan nen Moises ed agnanengneng balet ta Dios a persona!​—Numeros 12:8.

Niarum ni ed inmunan awaran na nasyon na Israel, inrekord nen Moises so kodigo na Ganggan tekep na amin a kabiangan to. Nimatalek met ed sikato so sananey nin mablin pribilihyo​—salanti say pangisulat ed libroy Genesis. Say saginonor a kabiangan na satan a libro et awaran ya amtan tuloy na dilin pamilya to tan diad ontan et medyo mainomay ya irekord. Balet iner so angalaan nen Moises na saray detalye na sankasakbayan ya awaran na too? Posiblin walaan si Moises na antigo iran nisulat a dokumento, ya impreserba na inmuunan atateng to, pian napanreperensyaan. Diad biek a dapag, nayarin naawat toray detalye diad impangidikta odino direktamenti diad madibinon panangiparungtal manlapud si Jehova. Abayag lan binidbir na dederlengen a totoo ed amin a panaon so personal a siglaotan a nanggayagaan nen Moises ed Dios to ed sayan pamaakaran.

Jehova​—Kabat nen Elias so Dios Bilang Persona

Kabat met nen propeta Elias si Jehova bilang sakey a Dios a persona. Maseseg si Elias parad puron panagdayew tan nanlingkor ed si Jehova anggaman puntirya na pirmin gula tan isusumpa na saray managdayew nen Baal, say manunan dios ed saray grupo na dirios na Canaanita.​—1 Arari 18:17-40.

Si Ahab, Ari na Israel, tan say asawa to, si Jezebel, so nanggunaet a mamatey ed si Elias. Lapud takot nisesengeg ed bilay to, binmatik si Elias ed Beer-sheba, sagur na Inatey a Dayat. Nanyatawyataw diman ed kalawakan tan impikasi ton ompatey la komon. (1 Arari 19:1-4) Kasin kinaindanan nen Jehova si Elias? Kasin Sikatoy agla interesado ed matoor ya aripen to? Nayarin ontan so naisip nen Elias, balet agaylan sikatoy alingo! Saginonor, mapalnan akisalita si Jehova ed sikato, a tetepeten ton: “Anto so gawaen mo dia, Elias?” Kayari na dramatikon panangipanengneng na labas nen toon pakapanyari, “sinmabi sakey a bosis ed sikato, tan inkuanto [lamet]: ‘Anto so gawaen mo dia, Elias?’” Impatnag nen Jehova iyan personal a kapagaan ed si Elias ta pian pasesegen so napanmatalkan ya aripen to. Dakel ni pagawa na Dios ed sikato, tan magunaet a kinmiwas si Elias ed saman a tawag! Sitotoor a sinumpal nen Elias iray asainmin to, a pinasantos so ngaran nen Jehova, say Dios to a sakey a persona.​—1 Arari 19:9-18.

Kayari impangipulisay to ed nasyon na Israel, agla akisalita si Jehova a personal ed ariripen to ed dalin. Agkabaliksan na saya a binmetel so personal ya interes to ed sikara. Diad panamegley na masanton espiritu to, siansia nin ididirehi tan papabiskegen tora ed serbisyo to. Alaen pan alimbawa si apostol Pablo, datin kabat a Saulo.

Indirehi na Masanton Espiritu si Pablo

Nanlapud Tarsus si Saulo, sakey a prominentin syudad na Cilicia. Saray atateng to et Hebreos, balet ta sikatoy niyanak a mibabaley a Romano. Balet, binmaleg si Saulo unong ed mapeget iran sisiaen na Fariseos. Saginonor, diad Jerusalem, pankanawnawa toy nabangatan “dia ed salian nen Gamaliel,” sakey a prominentin managbangat na Ganggan.​—Gawa 22:3, 26-28.

Nisengeg ed lingon seseg nen Saulo parad Judion tradisyon, sikatoy akibabali ed masebeg a kampanyan sumpad saray papatumbok nen Jesu-Kristo. Inabobonan to ni ingen so impamatey ed si Esteban, say inmunan martir a Kristiano. (Gawa 7:58-60; 8:1, 3) Saginonor et inaksobi to ya anggaman sikatoy datin managpauges tan manamasegsegang tan matangsit a too, “[sikatoy] akarapat na panangasi, lapu ed sikato so ginawak ya andi amamta, nen agak ni anisia.”​—1 Timoteo 1:13.

Si Saulo so pinakiwas na puron pilalek a manlingkor ed Dios. Kayari inkakomberti nen Saulo ed dalan a mamaarap ed Damasco, sikatoy inusar nen Jehova ed ekstra-ordinaryon paraan. Si Ananias, asasakbay a Kristianon babangatan, so indirehi na inmolin Kristo pian ontulong ed si Pablo. Kayari na saman si Pablo (say Romanon ngaran a ditan et si Saulo so akabatan bilang sakey a Kristiano) so inggiya na masanton espiritu nen Jehova pian sumpalen so andukey tan mabungan ministeryo to ed intiron kabiangan na Europa tan Asia Minor.​—Gawa 13:2-5; 16:9, 10.

Kasin napatnagan met so parihon panangidirehi na masanton espiritu natan? On.

Say Ateismo so Agmakaamper ed Personal ya Interes nen Jehova

Si Joseph F. Rutherford so komaduan presidenti na Watch Tower Society. Sikatoy abautismoan nen 1906 bilang Estudyante na Biblia​—datin tawag ed Tastasi nen Jehova​—tinuro bilang abogado na Sosyedad ed tinmumbok a taon, tan nagmaliw a presidenti na saya nen Enero 1917. Ingen, datin sayan malangwer ya abogado et sakey ya ateista. Panon a sikatoy nagmaliw a maseet a Kristianon aripen nen Jehova?

Nen Hulyo 1913, nanlingkor si Rutherford bilang tsirman na kombension na International Bible Students Association a ginawa diad Springfield, Massachusetts, E.U.A. Sakey a reporter na lokal a peryodiko, The Homestead, so anginterbio ed si Rutherford, tan say salaysay so niimprinta lamet ed brosyur nipaakar ed saman a kombension.

Impaliwawa nen Rutherford a diad saman a panaon et plano toy mangasawa, saray relihyoson panmoria to et unong ed relihyon a Baptist, balet saray panmoria na asawaen to et Presbiteryano. Sanen inkuan na pastor nen Rutherford a “say asawaen to et onla ed mangapoy-apuy ya impierno lapud sikatoy ag-abautismoan tan sikato (Rutherford) balet so onla’d tawen lapud abautismoan la, inwaklit iman na makatunongan a kanonotan to tan sikatoy nagmaliw ya ateista.”

Pigaran taon a maalwar a nansukimat si Rutherford pian nipawil so pananisia to ed Dios a sakey a persona. Angikatunongan, kuanto, manlapud padesir a “saray ideya ya agmakapenek ed nonot so agmet makapenek ed puso.” “Nepeg a seguroen na [saray Kristiano] a say Kasulatan a sisiaen da et tua,” so impaliwawa nen Rutherford, ya inyarum to ni: “Nepeg dan amtaen so pundasyon a tatalindegan da.”​—Nengnengen so 2 Timoteo 3:16, 17.

On, anggan natan et posibli parad sakey ya ateista odino agnostiko a sukimaten so Kasulatan pian nawalaan na pananisia tan nabayuboan toy mabiskeg a personal a siglaotan ed si Jehova a Dios. Kayari na maalwar ya impanaral to ed Biblia diad tulong na publikasyon na Watch Tower a Pikakabat a Mangitonton ed Andi-Anggaan a Bilay, onia so inaksobi na malangwer a laki: “Agak manisia ed Dios sanen inggapok iyan panagaral, balet nalmoan ko natan a sigpot ya inuman na satan a pikakabat ed Biblia so panag-isip ko. Nakakabatan ko la si Jehova tan manmamatalek ed sikato.”

“Say Makulangkulang” tan say Dios

“Agbalot inisip na siopaman a managsulat na DS [Hebreon Kasulatan] a paneknekan odino suppiaten so kiwawala na Dios,” kuan nen Dr. James Hastings diad A Dictionary of the Bible. “Satan so aliwan unong ed espiritu na kadaanan a mundo ed inkalapagan ya iburi so kiwawala na Dios, odino miargumentoan pian paneknekan itan. Say sisiaen et sakey a natural ed kanonotan na too tan kaslakan la ed amin a totoo.” Siempre, agkabaliksan na saya ya amin a totoo diad saman a panaon et walaay takot ed Dios. Arawin ontan. Namparan sinalambit na Salmo 14:1 tan 53:1 so “say andi kalakal,” odino a singa impangibaga na King James Version, “say makulangkulang,” a mankuan ed puso to, “Anggapoy Jehova.”

Anton klase na too iyan makulangkulang, toon mangibuburi ed kiwawala na Dios? Sikatoy ag-ignorante no intelektual so pantotongtongan. Imbes, say Hebreon salitan na·valʹ so ontutukoy ed kakulangan ed moral. Inkuan nen Propesor a si S. R. Driver, ed komento to ed The Parallel Psalter, a say impakalukso et “aliwan say kakapuyan na panagrason, noagta say moral tan relihyoson inkaambagel, sigpot ya andian na pakalikna, odino pakatebek.”

Intuloy a deniskribe na salmista so kagegebay moral a resulta na ontan ya awawey: “Aderal ira, nanggawa ra na bubusolen ira a gawa; anggapo a balot so manggawa na maong.” (Salmo 14:1) Oniay impanegek nen Dr. Hastings: “Makasengeg ed sayan agkiwawala na Dios manlapud mundo tan ed inkabulos ed pakadusa, onuuges iray totoo tan manggagawa na makapadimla iran bengatla.” Parungtalan dan aabrasaen so agmaridios a prinsipyos tan ibabaliwalay Dios bilang persona a diad sikato et andian iray pikuekuentaan. Balet say ontan a panag-isip et makulangkulang tan andiay-pakalikna natan a singa sanen insulat na salmista iray salita to ed masulok lan 3,000 taon so apalabas.

Saray Pasakbay Manlapud Dios Tayo a Persona

Pawilen tayo pa natan iray tepet a pinalesa ed manangilukas ya artikulo. Akin ya agnitunos na dakerakel a totoo so sakey a Dios a persona ed kairapan a kasmak ed mundo natan?

Lugan na Biblia so nisulat ya impormasyon manlapud totoo a “nansalita ra a nanlapu ed Dios, diad impanenyeg ed sikara na espiritu santo.” (2 Pedro 1:21) Satan labat so mangipaparungtal ed sikatayo na sakey a Dios a persona, si Jehova. Papasakbayan to itayo met nipaakar ed sakey a mauges a persona, agnanengneng na totoo, a makapanyari ed panangimaneobra tan panangontrol ed panag-isip na too​—si Satanas a Diablo. Makatunongan, no ag-itayo manisia ed sakey a Dios a persona, panon itayon makapanisia a wala met so Diablo, odino Satanas a sakey a persona?

Diad silong na panangipuyan et onia so insulat nen apostol Juan: “[Say] manngaran na Diablo tan Satanas . . . so mantila ed lapag na sankamundoan.” (Apocalipsis 12:9) Saginonor et inkuan nen Juan: “Amta tayo a kien itayo na Dios tan say sankamundoan mandukdukol ed kaugsan.” (1 Juan 5:19) Isisindag na sarayan balikas iray salita nen Jesus, a salitan inrekord a mismo nen Juan ed Ebanghelyo to: “Say prinsipe na mundo onsabi. Et anggapo so pibibiangan to ed siak.”​—Juan 14:30.

Agaylan arawi iyan Makasulatan a bangat manlapud sisiaen na totoo natan! “Say panongtong nipaakar ed Diablo et agla uso natan. Say napanduaruwaan tan sientipikon panaon tayo, so amaretiro la’d si Satanas,” so inkuan na Catholic Herald. Ingen, mapuersan inkuan nen Jesus ed saraman a totoon mangegetman mamatey ed sikato: “Sikayo kien kayo na ama yo a Diablo, et saray kalikaliktan nen ama yo sikato so labay yo a gawaen.”​—Juan 8:44.

Say salaysay na Biblia nipaakar ed pakapanyari nen Satanas so makatunongan tan natalosan. Ipapalinew to no akin, anggaman ed pilalek na karaklan a totoo a manbilay a mareen tan mantutunosan, say mundo so sasaloten na gulaan, bakabakal, tan andi-kabaliksan a karawalan, a singa agawa diad Dunblane (ya asalambit ed pahina 3 tan 4). Sakey ni, agbukbukor nen Satanas a kabusol a nepeg tayon pipuligesgesan. Iikdan itayo ni na Biblia na kaaruman niran pasakbay nipaakar ed saray diablo, odino demonyos​—marelmeng iran espiritun pinalsa ya abayag lan akiulop ed saray puersa nen Satanas pian ibalang tan abusoen so katooan. (Judas 6) Aminpigapigan inarap nen Jesu-Kristo so pakapanyari na sarayan espiritu, et tinalona tora.​—Mateo 12:22-24; Lucas 9:37-43.

Gagala na tuan Dios, si Jehova, a linisan iyan dalin manlapud karelmengan tan diad kaunoran et ekalen iray aktibidad nen Satanas tan saray demonyo to. Base ed pikakabat tayo ed si Jehova, nawalaan itayo na mapekder a pananisia tan panagmatalek ed sipasipan to. Inkuanto: “Anggapo nensaman so agawa a Dios ya inmuna nen siak, tan anggapo met naani so ontumbok ed siak. Siak, siak lanlamang si Jehova, no aliwa a siak anggapo komon so manangilaban.” Si Jehova so talagan sakey a Dios a persona ed amin a mangaamta, mandadayew, tan manlilingkor ed sikato. Diad sikato, tan ed sikato lambengat, a makapanmatalek itayo parad kilalaban tayo.​—Isaias 43:10, 11.

[Litrato ed pahina 7]

Say koma-18 siglon panangiyukit a mangililitrato ed impangisulat nen Moises ed Genesis 1:1 diad panangipuyan

[Credit Line]

Manlapud The Holy Bible nen J. Baskett, Oxford

[Litrato ed pahina 8]

Aminpigapigan tinalona nen Jesu-Kristo iray demonyo