Impakatalona ed Pakatakewan Diad Sagur Aprika
Unong ed salaysay nen Eunice Ebuh
“Implano na armadon matatakew so ilusob da ed agew sano kaslakan et gagawaen mi Panagaral na Libro ed Kongregasyon diad abung mi. Akalukas iray puerta mi parad agagi tan saray interesado. Maseguron amta la na matatakew so lanang lan gagawaen mi tan oras na miting. Segurado min akatakew lara na kotsi ed arum a pasen tan linman manatambang diad paway na puerta mi ed agew tan oras na panagaral na libro.
“Nibanbana, samay simban inyakar da et simba na bisitay manangasikaso na sirkito. Imbes a nagaway miting ed abung mi, nantitipon kami ed Kingdom Hall. Kayari na aral et walay miting na mamatatken. Gendat et onsesempet kami lan saniina, balet kinerew nen masiken ko, sakey a matatken, ya alagaren mi. Inkuanton magano met labat. Kanian inalagar mi.
“Insan mi naimanon agla onandar so kotsi. Agnaapiger na manangasikaso na sirkito tan si masiken ko. Ag-anggan naapiger na tinawag min mekaniko.
“Nanakar lan sinmempet so ugugaw. Kabebekta, sinmempet ak met la. Sinmabi ak ed ngalngali la alas dies. Siak tan saray ugugaw so aglinmoob ed compound ya akakotsi, a nilukas komon so baleg a puerta.
“Sanen linmoob ak ed kuartok, nadngel koy makmaksil a putok na paltog. Uumamengen ko no antoy nagagawa. Sinalik so mantelepono ed polisya, balet narep so linyay telepono. Ginanatan koy linmasor tan intalak so balatyang a kapot, insan ko inapuran intalak imay pegley a kapot. Inerep koray silew. Mankigtot iray ugugaw, kanian inkuan kon mankalmado labat ira. Nankakasakey kamin nampikasi parad proteksion nen Jehova. Kaleganan to, wadman ni’d Kingdom Hall si masiken ko a reremedyoan ton paandarey kotsi.
“Dinmunglaw ak ed bintana et anengneng koy abaktar a laki ed kalsada ed paway na puerta. Ompatnag ya anggapo laray matatakew, kanian inlugan ko’d kotsik so asugatan a too tan imbatik ko’d ospital. Delikado iman, balet kaukolan kon gawaen. Balet, makapaermen ta sikatoy inatey ed kaimbuasan to.
“Anggaman ed satan a trahedya, wala komon so agawan mas alodloor. Lapud bisita na manangasikaso na sirkito et ag-agawa ed abung mi so panagaral na libro. Lapud inkaderal na kotsi et agkami sinmempet a sankapamilyaan. Adegkem komon na matatakew si masiken ko no sinmabin asakbay. Saraya tan arum niran rason so nagmaliw a pankaabiganan mi ed saman a labi.
“Si Jehova so salimbengan tan manangiyagel mi. Ontan so inkuan na kasulatan: ‘Noag si Jehova so mangiyagel ed syudad, say bantay manpuyat labat ya andi kakanaan.’”—Salmo 127:1.